Аллаһын Падшаһлығы нәдир?

ИСА МӘСИҺИН тәблиғинин әсас мөвзусу нә иди? Онун өз сөзләринә ҝөрә, Аллаһын Падшаһлығы иди (Лука 4:43). Иса тәблиғ едәркән Падшаһлыгдан тез-тез сөз салырды. Бу ону динләјән инсанларда чашгынлыг јарадырдымы? Онлар бу Падшаһлығын нә олдуғуну сорушурдулармы? Хејр. Инҹилдә бу ҹүр суаллара раст ҝәлинмир. Демәли, Аллаһын Падшаһлығы онлар үчүн таныш анлајыш иди?

Мәсәлә ондадыр ки, јәһудиләрин мүгәддәс һесаб етдикләри гәдим Јазылар Падшаһлығын нә олдуғуну вә нәләри һәјата кечирәҹәјини ајдын вә бирмәналы шәкилдә тәсвир едирди. Бу ҝүн, јәһудиләр кими, биз дә Мүгәддәс Китабы арашдырараг Падшаһлыг һаггында даһа чох шеј өјрәнә биләрик. Ҝәлин Мүгәддәс Китабын Падшаһлыг һаггында өјрәтдији једди мәгамы нәзәрдән кечирәк. Бунлардан илк үчү Исанын ҝүнләриндә вә ондан әввәл јашајан јәһудиләрә ајдын иди. Галан үчү исә биринҹи әсрдә Мәсиһ вә ја онун һәвариләри тәрәфиндән ачыгланмышды. Сонунҹусуна бизим ҝүнләрдә ајдынлыг ҝәтирилмишдир.

1. Аллаһын Падшаһлығы әбәдијјән мөвҹуд олаҹаг реал һөкумәтдир. Мүгәддәс Китабын илк пејғәмбәрлији ҝөстәрир ки, Аллаһ садиг инсанлара хиласкар ҝөндәрәҹәк. «Зүрријјәт» адландырылан бу кәс Адәмлә Һәвванын вә Шејтанын үсјанынын нәтиҹәси олан дәһшәтли фәлакәтләри арадан галдыраҹаг (Јарадылыш 3:15, КМ). Бу пејғәмбәрлијин үстүндән хејли кечәндән сонра садиг падшаһ Давуда бу «Зүрријјәт» вә ја Мәсиһ һаггында мараглы бир хәбәр верилди. О, Падшаһлығын Падшаһы олмалы иди. Бу һөкумәт башгаларындан фәргләнәҹәкди; о, әбәди дураҹагды (2 Шамуел 7:12-14).

2. Аллаһын Падшаһлығы бүтүн инсан һөкумәтләринә сон гојаҹаг. Даниел пејғәмбәр ҝөрүнтүдә бизим ҝүнләрә гәдәр тарих бојунҹа бир-бирини әвәз едән дүнја империјаларыны ҝөрмүшдү. Бу ҝөрүнтүнүн сонуна диггәт јетирин: «О [инсанлардан олан сон] падшаһларын дөврүндә ҝөјләрин Аллаһы һеч вахт дағылмајан бир падшаһлыг гураҹаг вә бу падшаһлыг башга халгын әлинә кечмәјәҹәк. О бүтүн әввәлки падшаһлыглары әзиб-дағыдаҹаг, өзү исә әбәди галаҹаг». Беләликлә, дүнјанын бүтүн падшаһлыглары вә ја һөкумәтләри — апардыглары мүһарибәләри, гәддарлыглары вә позғунлуғу илә бирликдә әбәдијјән мәһв олунаҹаглар. Даниелин пејғәмбәрлијиндә ҝөстәрилдији кими, Аллаһын Падшаһлығы ҝөјләрдә гурулуб вә тезликлә бүтүн јер үзүнү идарә едәҹәк (Даниел 2:44, 45). Аллаһын Падшаһлығы мөвҹуд олан јеҝанә һөкумәт олаҹагa.

3. Аллаһын Падшаһлығы мүһарибәләрә, хәстәликләрә, аҹлыға, һәтта өлүмә дә сон гојаҹаг. Һәјәҹанландырыҹы Мүгәддәс Китаб пејғәмбәрликләри Аллаһын Падшаһлығынын јер үзүндә едәҹәји ишләри ачыглајыр. Бу һөкумәт һеч бир бәшәри гурулушун индијәдәк етмәдији вә едә билмәјәҹәји ишләри ҝөрәҹәк. Тәсәввүр един, бүтүн силаһлар һәмишәлик мәһв едиләҹәк! Аллаһ ‘јерин уҹгарларынадәк дөјүшләри дајандыраҹаг’ (Мәзмур 46:9). Даһа һәкимләр, хәстәханалар вә ја хәстәликләр олмајаҹаг. Һеч бир сакин «хәстәјәм» демәјәҹәк (Јешаја 33:24). Аҹлыг, әрзаг гытлығы арадан галдырылаҹаг. Јерин ‘зәмиләри бол олаҹаг, дағларын башында далғаланаҹаг’ (Мәзмур 72:16). Артыг нә дәфн мәрасими, нә јас, нә мејитхана, нә гәбиристанлыг, нә дә онларын доғурдуғу кәдәр олаҹаг. Амансыз дүшмәнимиз олан өлүм нәһајәт ки, мәһв едиләҹәк. Аллаһ «өлүмү әбәди олараг јох едәҹәк, Худавәнд Рәбб бүтүн адамларын үзүндән ҝөз јашларыны силәҹәк» (Јешаја 25:8).

4. Аллаһын Падшаһлығынын Аллаһ тәрәфиндән сечилмиш Падшаһы вар. Мәсиһ нә өзү өзүнү Падшаһ тәјин едиб, нә дә гејри-камил инсанлар тәрәфиндән сечилиб. Ону Јеһова Аллаһ шәхсән Өзү сечиб. Елә Мәсиһ титулу да буна ишарә едир. Бу сөзүн мәнасы «мәсһ едилмиш» демәкдир. Беләликлә, бу Падшаһ Јеһова тәрәфиндән мәсһ олунуб, јәни хүсуси ишә тәјин олунуб. Аллаһ онун һаггында дејир: «Будур, Мәним сахладығым, үрәјим истәјән сечилмиш гулум! Мән Өз Руһуму онун үзәринә гојмушам. О, милләтләрә әдаләт ҝәтирәҹәк» (Јешаја 42:1, Матта 12:17, 18). Неҹә Падшаһа еһтијаҹымыз олдуғуну Јарадандан ким даһа јахшы биләр?

5. Аллаһын тәјин етдији Падшаһ неҹә Падшаһ олаҹағыны нүмајиш етдирмишдир. Вәд едилмиш Мәсиһ Назаретли Иса олду. О, Аллаһын сечдији нәсилдән олду (Јарадылыш 22:18; 1 Салнамәләр 17:11; Матта 1:1). Јер үзүндә јашајанда әсрләр өнҹә Мәсиһ һаггында јазылмыш бир чох пејғәмбәрликләр онун үзәриндә һәјата кечди. Онун Мәсиһ олдуғу һәм дә ҝөјдән тәсдиг олунду. Бу неҹә баш верди? Аллаһ ҝөјләрдән данышараг ону Өз Оғлу адландырды; мәләкләр онун вәд олунмуш Мәсиһ олдуғуну билдирдиләр; Иса јүзләрлә вә һәтта минләрлә инсанларын гаршысында мөҹүзәләр ҝөстәрди ки, бунларын да Аллаһын ҝүҹү сајәсиндә баш вердији ајдындырb. Иса неҹә Падшаһ олаҹағыны дәфәләрлә ҝөстәрмишди. Инсанлара көмәк етмәк үчүн онун тәкҹә ҝүҹү јох, һәм дә арзусу вар иди (Матта 8:1-3). О, худбин дејилди, әксинә, мәрһәмәтли, ҹәсарәтли вә тәвазөкар иди. Онун јер үзүндәки һәјаты һаггында мәлумат һамынын охумасы үчүн Мүгәддәс Китабда јазылмышдыр.

6. Аллаһын Падшаһлығында Мәсиһлә бәрабәр 144 000 нәфәр идарә едәҹәк. Иса демишди ки, һәвариләри дә дахил олмагла, ҝөјдә онунла бирликдә башгалары да идарә едәҹәк. О бу групу «кичик сүрү» адландырды (Лука 12:32). Сонралар һәвари Јәһјаја һәмин кичик сүрүнүн сајынын 144 000 нәфәр олаҹағы дејилмишди. Онларын ҝөјләрдә мараглы иши олаҹаг: Мәсиһлә бирликдә падшаһлыг етмәк вә каһин кими хидмәт етмәк (Вәһј 5:9, 10; 14:1, 3).

7. Инди ҝөјләрдә идарә едән Аллаһын Падшаһлығы јер үзүндә өз һакимијјәтини бәргәрар етмәјә һазырдыр. Бу сонунҹу мәгам өјрәнә биләҹәјимиз ән һәјәҹанландырыҹы һәгигәтдир. Исаја ҝөјдәки Падшаһ кими сәлаһијјәт верилмәсинә даир Мүгәддәс Китабда чохлу сајда сүбутлар вар. О инди идарә едир вә чох тезликлә бүтүн јер үзүнү идарә едәҹәк вә һаггында данышдығымыз мөһтәшәм пејғәмбәрликләри јеринә јетирәҹәк. Бәс Аллаһын Падшаһлығынын инди идарә етдијинә неҹә әмин олан биләрик? О јери нә заман идарә етмәјә башлајаҹаг?

[Һашијәләр]