Аллаһын Падшаһлығы нә заман ҝәләҹәк?

«ЈА РӘББ! Исраилә сәлтәнәти бу заманмы гајтараҹагсан?» (Һәвариләрин ишләри 1:6). Һәвариләр Исанын өз Падшаһлығыны нә заман гураҹағыны билмәк истәјирдиләр. Бу ҝүн һәмин вахтдан тәхминән 2 000 ил кечмәсинә бахмајараг, инсанлары һәлә дә Аллаһын Падшаһлығынын нә заман ҝәләҹәји марагландырыр?

Исанын тәблиғинин әсас мөвзусу Падшаһлыг олдуғундан, демәли, о бу суала тохунмамыш олмазды. Бәли, бу, һәгигәтән дә белә иди! Иса өзүнүн «иштиракы» (ЈД) адландырдығы мүәјјән заман мүддәти һаггында дәфәләрлә данышмышды (Матта 24:37). Онун иштиракы Хиласкар Падшаһлығын гурулмасы илә сых бағлыдыр. Бәс онун иштиракы нә демәкдир? Ҝәлин Мүгәддәс Китабын Мәсиһин иштиракы илә бағлы ачыгладығы дөрд амили нәзәрдән кечирәк.

1. Мәсиһин иштиракы онун өлүмүндән узун мүддәт сонра башлајаҹагды. Иса бир мәсәл чәкәрәк, өзүнү ‘һөкмдар тәјин олунмаг үчүн узаг бир өлкәјә јола дүшән’ адама бәнзәтди (Лука 19:12). Онун бу мәсәлдә сөјләдији пејғәмбәрлик неҹә јеринә јетди? Иса өлдү вә дирилди; сонра «узаг бир өлкәјә», јәни ҝөјләрә ҝетди. Охшар бир мәсәлдә пејғәмбәрлик етдији кими, о, «узун бир заман кечдикдән сонра» һөкмдар тәјин олунуб ҝери дөнәҹәкди (Матта 25:19).

Иса ҝөјләрә галхдыгдан бир нечә ил сонра һәвари Павел јазмышды: «Мәсиһ исә ҝүнаһлар үчүн тәк бир гурбан тәгдим едиб, әбәди олараг Аллаһын сағында отурду. Бундан сонра О Өз дүшмәнләринин Өз ајагларынын алтына кәтил олараг гојулмасыны ҝөзләјир» (Ибраниләрә 10:12, 13). Иса ҝөјә галхдыгдан сонра узун мүддәт ҝөзләмәли олур. Јеһова Аллаһ Өз Оғлуну чохдан вәд едилмиш Хиласкар Падшаһлығын Падшаһы тәјин едәндә, бу мүддәт сона чатыр. Бунунла Мәсиһин иштиракы башланыр. Јер үзүндә јашајан инсанлар бу мүһүм һадисәни ҝөрә биләҹәкдиләрми?

2. Мәсиһин иштиракыны ҝөзлә ҝөрмәк мүмкүн дејил. Диггәт јетирин ки, Иса иштиракынын әламәти барәдә данышырды (Матта 24:3, ЈД). Әҝәр онун иштиракыны ҝөзлә ҝөрмәк мүмкүн олсајды, әламәтә еһтијаҹ олардымы? Мисал үчүн, тәсәввүр един ки, дәнизә бахмаға ҝедирсиниз. Јол бојунҹа јол ҝөстәрән нишанлар ола биләр. Будур, саһилә ҝәлиб чатмысыныз. Үфүгә доғру узанан суларын кәнарында дураркән, үстүндә ири һәрфләрлә «Дәниз» јазылмыш, ирәлијә ишарә едән ҝөстәриҹи ахтараҹагсынызмы? Әлбәттә, јох! Ҝөзлә асанлыгла ҝөрүлән шеји ҝөстәрмәк үчүн ишарә нәјә лазымдыр ки?

Иса инсанларын өз ҝөзләри илә ҝөрә биләҹәкләри шејләри ҝөстәрмәк үчүн дејил, ҝөјләрдә баш верәҹәк һадисәләри анламаг үчүн өз иштиракынын әламәтини верди. Буна ҝөрә Иса деди: «Аллаһын Сәлтәнәти ҝөзлә ҝөрүләрәк ҝәлмәз» (Лука 17:20). Исанын вердији әламәт јер үзүндә оланлара Мәсиһин иштиракынын башладығыны неҹә ҝөстәрәҹәкди?

3. Бөјүк фәлакәтләрлә долу зәманә Исанын иштиракына әламәт олаҹагды. Иса деди ки, јер үзүндә мүһарибәләр, гытлыг, зәлзәлә, хәстәликләр вә ганунсузлуг онун ҝөјләрдә Падшаһ кими иштиракына әламәт олаҹаг (Матта 24:7-12; Лука 21:10, 11). Бүтүн бу аҹыларын сәбәби нә олаҹагды? Мүгәддәс Китаб изаһ едир ки, «бу дүнјанын рәиси» Шејтан гәзәб ичиндәдир, чүнки Мәсиһин Падшаһ кими иштиракы башландығы үчүн вахтынын аз олдуғуну билир (Јәһја 12:31; Вәһј 12:9, 12). Бу ҝүн Шејтанын гәзәбини вә Мәсиһин иштиракыны ачыг-ајдын ҝөстәрән сүбутларын сајы-һесабы јохдур. Тарихчиләрин дөнүш нөгтәси адландырдыглары 1914-ҹү илдән бу сүбутлар дүнја мигјасында мисли ҝөрүнмәмиш дәрәҹәдә мүшаһидә едилир.

Бүтүн бунлар пис хәбәр кими сәсләнсә дә, әслиндә Хиласкар Падшаһлығын артыг ҝөјдә идарә етдијини ҝөстәрир. Тезликлә һәмин һөкумәт бүтүн јер үзүнү идарә едәҹәк. Бәс белә исә, инсанлар Падшаһлығын гајда-ганунларыны гәбул едиб, онун вәтәндашлары олмаг үчүн һарадан билик әлдә етсинләр?

4. Үмумдүнја тәблиғ иши Исанын иштиракына әламәтдир. Иса деди ки, онун иштиракы «Нуһун ҝүнләри» кими олаҹагa (Матта 24:37-39). Нуһ анҹаг ҝәми тикмәклә мәшғул олмурду; о һәм дә «салеһлик тәблиғчиси» иди (2 Петер 2:5). Нуһ инсанлара Аллаһын һөкмүнүн јахынлашдығы һагда хәбәрдарлыг едирди. Иса өзүнүн иштиракы заманы јер үзүндәки давамчыларынын да ејни иши јеринә јетирәҹәкләрини демишди. О пејғәмбәрлик етмишди: «Сәмави Сәлтәнәт һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Матта 24:14).

Әввәлки мәгаләдән ҝөрдүјүмүз кими, Аллаһын Падшаһлығы дүнјанын бүтүн һөкумәтләрини мәһв едәҹәк. Тәблиғ иши инсанлары бу сәмави һөкумәтин тезликлә һәрәкәтә башлајаҹағындан аҝаһ едир, онлара јахынлашан мәһвдән гуртулмаг вә һәмин Падшаһлығын вәтәндашлары олмаг имканыны верир. Бу заман ваҹиб суал ортаја чыхыр: Сиз бу имкандан истифадә едәҹәксинизми?

Аллаһын Падшаһлығы һаггында ешитмәк сизин үчүн хош хәбәр олаҹагмы?

Исанын тәблиғ етдији хәбәр чох ҝөзәл үмид верир. Мин илләр әввәл Едендә галдырылан үсјандан сонра, Јеһова Аллаһ ишләри гајдаја салаҹаг һөкумәт гурмағы нијјәт етди. О, Аллаһын әввәлҹәдән инсанлар үчүн нәзәрдә тутдуғу шәраити — јерүзү Ҹәннәтдә әбәди һәјаты — инсанлара гајтараҹаг. Чохдан вәд едилмиш бу һөкумәтин артыг ҝөјләрдә идарә етдијини билмәкдән валеһедиҹи нә ола биләр? Бу, думанлы, мүҹәррәд анлајыш дејил, әсл реаллыгдыр!

Аллаһын тәјин етдији Падшаһ артыг дүшмәнләринин арасында һөкмранлыг едир (Мәзмур 110:2, КМ). Бу аллаһсыз позғун дүнјада Мәсиһ Атасынын истәјини јеринә јетирәрәк, Аллаһын әслиндә неҹә Аллаһ олдуғуну билмәк вә Она «руһән вә һәгигәтән» ибадәт етмәк истәјәнләри ахтарыр (Јәһја 4:24). Иргиндән, јашындан вә сосиал вәзијјәтиндән асылы олмајараг, һәр кәс Аллаһын Падшаһлығынын һакимијјәти алтында әбәди јашамаға үмид едә биләр (Һәвариләрин ишләри 10:34, 35). Биз сизи гаршынызда ачылан бу ҝөзәл имкандан истифадә етмәјә дәвәт едирик. Елә индидән Аллаһын Падшаһлығы һаггында өјрәнмәјә башлајын ки, онун әдаләтли һакимијјәти алтында әбәдијјән јашаја биләсиниз! (1 Јәһја 2:17).

[Һашијә]

[8 вә 9-ҹу сәһифәләрдәки шәкилләр]

Һәр ҝүн ешитдијимиз пис хәбәрләр тезликлә јахшы шејләрин олаҹағына сүбутдур

[Иҹазә илә]

Zenit topu: U.S. Army photo