Онлар һәјатларыны даһа мәналы етмишләр. Сиз дә едә биләрсинизми?
КАНАДАДА јашајан Марк адлы бир мәсиһчи космик аҝентликләрин истифадә етдији мүрәккәб автоматлашдырылмыш системләр һазырлајан фирмада ишләјирди. О, јарым ҝүн ишләјир вә даими пионер кими хидмәт едирди. Сонра мүдири Марка јүксәк вәзифәјә кечмәји тәклиф етди. Она чох мааш вәд олунса да, там иш ҝүнү ишләмәли иди. Марк нә етди?
Еми адлы баҹымыз мәктәби гуртаранда даими пионер кими хидмәт едирди. Тәһсилини битирдикдән сонра она там иш ҝүнү олан јүксәкмәваҹибли иш тәклиф етдиләр. Еми һансы сечими етди?
Марк вә Еми мүхтәлиф гәрарлар гәбул етдиләр. Онларын сечиминин нәтиҹәләриндән гәдим Коринф мәсиһчиләринә верилән мәсләһәтин мүдрик олдуғу ҝөрүнүр. Һәвари Павел јазырды: «Бу дүнјадан истифадә едәнләр, там истифадә етмәјәнләр кими олсунлар» (1 Кор. 7:29-31).
Дүнјадан истифадә един, амма там јох
Марк вә Еми илә нә баш вердијини өјрәнмәздән әввәл, ҝәлин Павелин «Коринфлиләрә мәктуб»унда ишләтдији «дүнја» (вә ја јунанҹа коʹсмос) сөзүнүн мәнасыны гысаҹа нәзәрдән кечирәк. Һәмин парчада коʹсмос сөзү јашадығымыз системә, үмумиликдә инсан ҹәмијјәтинә аид едилир. Бу анлајыша һәм дә ҝүндәлик һәјатын бир һиссәси олан ев-ешик, гида вә ҝејим кими шејләр дахилдир. Бу кими ҝүндәлик тәләбатларымызы өдәмәк үчүн чохларымыза ишләмәк лазым ҝәлир. Аллаһын Кәламынын үзәримизә гојдуғу, өзүмүзүн вә аилә үзвләримизин гејдинә галмаг өһдәчилијини јеринә јетирмәк үчүн, бу дүнјадан истифадә етмәјә мәҹбуруг (1 Тим. 5:8). Амма бунунла јанашы анлајырыг ки, «дүнја... кечиб ҝедир» (1 Јәһ. 2:17). Буна ҝөрә дә дүнјадан «там» дејил, лазым олан гәдәр истифадә едирик (1 Кор. 7:31).
Мүгәддәс Китабын дүнјадан мүмкүн гәдәр аз истифадә етмәк мәсләһәтинә гулаг асан чохсајлы баҹы-гардашларымыз өз вәзијјәтләрини өлчүб-бичәрәк иш вахтларыны азалтмыш вә һәјатларыны садәләшдирмишләр. Буну етдикдән аз сонра онлар ашкар етмишләр ки, инди һәјатлары даһа мәналы олуб, чүнки аиләләринә вә Јеһоваја хидмәтә әввәлкиндән чох вахт ајырырлар. Бундан башга, садә һәјат тәрзи сүрмәклә онлар ҝетдикҹә даһа чох дүнјаја дејил, Јеһоваја ҝүвәнирләр. Сиз дә белә едә биләрсинизми? Јеһоваја хош ҝәлән ишләрә даһа чох вахт ајырмаг үчүн һәјатынызы садәләшдирә биләрсинизми? (Мат. 6:19-24, 33).
«Өзүмүзү Јеһоваја әввәлкиндән даһа јахын һисс едирик»
Мәгаләнин ҝиришиндә һаггында данышдығымыз Марк Мүгәддәс Китабын дүнјадан там истифадә етмәмәк мәсләһәтинә гулаг асды. О, тәклиф олунан јүксәкмаашлы ишдән имтина етди. Бир нечә ҝүндән сонра јени иши гәбул етсин дејә, мүдири Марка даһа чох мааш тәклиф етди. Марк дејир: «Бу бир сынаг иди, лакин мән јенә дә тәклифи рәдд етдим». О, сәбәбини изаһ едир: «Һәјат јолдашым Паула вә мән истәјирдик ки, өзүмүзү Јеһоваја хидмәтә мүмкүн гәдәр там һәср едәк. Буна ҝөрә һәјатымызы садәләшдирмәк гәрарына ҝәлдик. Мәгсәдимизә чатмаг үчүн Јеһовадан мүдриклик истәдик вә хидмәтә нә вахтдан даһа чох вахт ајыраҹағымызы мүәјјән етдик».
Паула дејир: «Мән хәстәханада катибә ишләјирдим. Һәфтәдә үч ҝүн ишләјирдим вә јахшы мааш алырдым. Һәм дә даими пионер кими хидмәт едирдим. Бунунла белә мән дә Марк кими тәблиғчиләрә даһа чох еһтијаҹ олан јердә хидмәт етмәк истәјирдим. Анҹаг ишдән чыхмаг үчүн әризә верәндә мүдирим јениҹә бошалмыш мәсул катиб вәзифәсинә кечмәјә имкан јарандығыны хәбәр верди. Бу, хәстәханада ән јүксәкмаашлы катиб иши иди, анҹаг мән ишдән чыхмаг гәрарымдан дөнмәдим. Мүдирә һәмин ишә кечмәмәјимин сәбәбини изаһ едәндә о, иманыма ҝөрә мәни тәрифләди».
Чох кечмәмиш Марк вә Паула Канаданын узаг әразисиндә јерләшән кичик јығынҹаға хүсуси пионер тәјин олундулар. Бу һансы бәһрәләри ҝәтирди? Марк дејир: «Демәк олар ки, өмрүмүн јарысы гәдәр ишләдијим јахшы маашлы стабил ишдән чыханда бир аз тәлаш кечирирдим, анҹаг Јеһова хидмәтимизә хејир-дуа верди. Руһани әнамлары башгалары илә бөлүшмәкдән һәдсиз-һүдудсуз севинҹ дујуруг. Таммүддәтли хидмәт аилә һәјатымызы да зәнҝинләшдирди. Инди сөһбәтләримиз һәгиги мәнада дәјәрли олан руһани мөвзулар әтрафында дөвр едир. Өзүмүзү Јеһоваја әввәлкиндән даһа јахын һисс едирик» (Һәв. иш. 20:35). Паула әлавә едир: «Адам ишини вә доғма евинин раһатлығыны тәрк едәндә, бүтүн үмидини Јеһоваја бағлајыр. Биз белә дә етдик, Јеһова да бизи хејир-дуаландырды. Јени јығынҹағымыздакы әзиз баҹы-гардашларымыз севилдијимизи вә лазымлы олдуғумузу һәмишә бизә һисс етдирирләр. Әввәлләр ишә сәрф етдијим ҝүҹүмү инди инсанлара руһани ҹәһәтдән көмәк ҝөстәрмәк үчүн истифадә едирәм. Бу хидмәт нөвү мәнә бөјүк севинҹ ҝәтирир».
‘Имканлы олса да, хошбәхт дејилди’
Јухарыда адыны чәкдијимиз Еми башга јолу сечди. О, тәклиф олунмуш ҝәлирли, там иш ҝүнү ишләмәк лазым ҝәлән иши гәбул етди. Еми дејир: «Биринҹи ил хидмәтдә фәал идим, лакин ҝөрүрдүм ки, ҝетдикҹә диггәтим хидмәтдән ишдә ирәлиләјишләрә наил олмаға јөнәлир. Мән ишлә бағлы ҹәлбедиҹи тәклифләри гәбул едир вә бүтүн ҝүҹүмү јүксәк пилләләрә галхмаға сәрф едирдим. Ишдә мәсулијјәтләрим артдыгҹа, хидмәтә даһа аз вахт сәрф едирдим. Сонра үмумијјәтлә тәблиғ етмәји дајандырдым».
О заманлары јада салараг Еми гејд едир: «Имканлы идим. Чохлу сәјаһәт едирдим вә ишдә тутдуғум вәзифәнин сајәсиндә ҹәмијјәтдә јүксәк мөвгејә малик идим. Амма хошбәхт дејилдим. Пулум чох олса да, проблемләрим дә аз дејилди. Чашыб галмышдым ки, ҝөрәсән нәји дүз етмирәм. Ахырда анладым ки, бу дүнјада карјера далынҹа дүшмәклә, аз гала ‘иман јолундан узаглашмышдым’. Нәтиҹәдә, Аллаһын Кәламында дејилдији кими, өзүмә ‘бир чох әзаблар чәкдирдим’» (1 Тим. 6:10).
Бәс Еми вәзијјәтдән неҹә чыхыш јолу тапды? О дејир: «Руһани ҹәһәтдән дирчәлмәк үчүн ағсаггаллардан мәнә көмәк етмәләрини хаһиш етдим вә јығынҹаг ҝөрүшләринә ҝәлмәјә башладым. Маһны охунанда ҝөз јашларымы сахлаја билмәдим. Беш ил әрзиндә пионер кими хидмәт едәркән, касыб олмағыма бахмајараг, өзүмү неҹә хошбәхт һисс етдијими хатырладым. Баша дүшүрдүм ки, вахтымы пул далынҹа гачмаға сәрф етмәк әвәзинә Падшаһлығын марагларыны биринҹи јерә гојмалыјам. Маашымын 50 фаизини итирмәк баһасына олса да, ашағы вәзифәјә кечәрәк, јенидән тәблиғдә иштирак етмәјә башладым». Еми гејд едир: «Мән бир нечә ил севинҹлә пионер кими хидмәт етмишәм. Инди вахтымын чох һиссәсини дүнјәви ишә сәрф едәркән дујмадығым мәмнунлуғу дујурам».
Нәјисә дәјишдирәрәк, сиз дә һәјатынызы садәләшдирә биләрсинизми? Вахтынызы Падшаһлыг ишинин ирәлиләмәсинә сәрф етсәниз, сиз дә һәјатынызы даһа мәналы едәҹәксиниз (Сүл. мәс. 10:22).
[19-ҹу сәһифәдәки јазы]
Нәјисә дәјишдирәрәк, сиз дә һәјатынызы садәләшдирә биләрсинизми?
[19-ҹу сәһифәдәки чәрчивә/шәкил]
«Артыг бу хидмәт нөвүнү севирәм!»
Бирләшмиш Штатларда ағсаггал кими хидмәт едән Дејвид таммүддәтли хидмәтдә һәјат јолдашына вә ушагларына гошулмаг истәјирди. О, ишләдији ширкәтдә јарымҝүнлүк ишә кечә билди вә даими пионер хидмәтинә башлады. Дәјишикликләр онун һәјатыны даһа мәналы етдими? Бир нечә ајдан сонра Дејвид достуна јазырды: «Һеч нә аиләви олараг Јеһоваја хидмәтдә там иштирак етмәк кими мәмнунлуг ҝәтирмир. Әввәл фикирләширдим ки, пионерлијә алышмаг үчүн мәнә вахт лазым олаҹаг, амма артыг бу хидмәт нөвүнү севирәм! Адама әсл тәравәт ҝәтирир».
[18-ҹи сәһифәдәки шәкил]
Марк вә Паула тәблиғдә