Охуҹуларымыз сорушур
Нуһун ҝүнләриндәки Дашгын һәгигәтәнми дүнја мигјасында баш вермишди?
Дашгынын баш вермәсиндән 4 000 илдән чох вахт кечиб. Буна ҝөрә дә инди јер үзүндә бу һадисәни бизә нәгл едәҹәк ҹанлы шаһидләр јохдур. Амма бу фәлакәт барәдә јазылы сәнәдләр вар, орада Дашгынын суларынын о ҝүнләрин ән һүндүр дағларыны өртдүјү дејилир.
Тарихи сәнәддә охујуруг: «Јер үзүндә гырх ҝүн дашгын олду... Су јер үзүнү елә тутду ки, ҝөјләр алтында олан бүтүн уҹа дағлар суја гәрг олду. Су дағларын зирвәсиндән он беш гулаҹ [тәхминән 6,5 метр] галхды вә онлары өртдү» (Јарадылыш 7:17-20).
Бәзиләри дүшүнә биләрләр ки, јерин суја гәрг олмасы әфсанәдир, јахуд да шиширтмәдир. Бу һеч дә белә дејил! Демәк олар ки, мүәјјән мәнада јер бу ҝүндә су алтындадыр. Јер үзүнүн 71 фаизини су тутур. Ҝөрүндүјү кими, Дашгынын сулары һәлә дә бурададыр. Әҝәр бузлаглар вә гүтб бузлары әрисәјди, Нју-Јорк вә Токио кими шәһәрләр сујун алтында галарды.
Бирләшмиш Штатларын шимал-гәрб ландшафтыны тәдгиг едән ҝеологларын тәбиринҹә, гәдим заманларда бу әразини тәхминән 100 дәфә су басмышды. Һесаб едилир ки, бир дәфә белә дашгынлардан бири хүсусилә ҝүҹлү олмуш вә гәфләтән баш вермишди. Һүндүрлүјү 600 метр, һәҹми 2 000 куб километр, чәкиси тәхминән ики трилјон тон олан вә саатда 105 километр сүрәтлә һәрәкәт едән бу далға әразини басмышды. Буна бәнзәр ачылышлар башга алимләри Үмумдүнја дашгынынын баш вермәсинин мүмкүн олмасына инандырды.
Анҹаг Мүгәддәс Китабын Аллаһын Кәламы олдуғуна инананлар Үмумдүнја дашгыныны факт кими гәбул едирләр. Иса дуасында Аллаһа демишди: «Сәнин сөзүн һәгигәтдир» (Јәһја 17:17). Һәвари Павел јазырды: «[Аллаһ] истәјир ки, бүтүн инсанлар хилас олуб, һәгигәти дәрк етсинләр» (1 Тимотејә 2:3, 4). Аллаһын Кәламында јазыланлар рәвајәт олсајды, һәвари Павел Исанын давамчыларына Аллаһ вә Онун нијјәти һаггында һәгигәти неҹә өјрәдә биләрди?
Иса нәинки Дашгынын баш вердијинә, һәм дә онун суларынын бүтүн дүнјаны басдығына инанырды. О өзүнүн иштиракы вә индики системин сону һагда бөјүк пејғәмбәрлијиндә тәсвир етдији һадисәләри Нуһун ҝүнләри илә мүгајисә етди (Матта 24:37-39). Һәвари Петер дә Нуһун ҝүнләриндәки Дашгын барәдә јазмышды: «О заманкы дүнја да һәмин суларла боғулуб мәһв олду» (2 Петер 3:6).
Әҝәр Нуһ вә Үмумдүнја дашгыны әфсанә олсајды, Петерин вә Исанын сон ҝүнләр барәдә сөјләдикләри хәбәрдарлыглар мәнасыз оларды. Белә фикирләр инсан үчүн хәбәрдарлыг олмазды, әксинә, онун Мүгәддәс Китабы дүзҝүн баша дүшмәмәсинә сәбәб олар вә Дашгындан да бөјүк олан мәшәггәтдән сағ чыхмаг имканыны тәһлүкә алтына атарды (2 Петер 3:1-7).
Аллаһ халгына даима лүтф ҝөстәрәҹәјини дејир: «Нуһун дөврүндәки дашгын сулары бир даһа јер үзүнү өртмәјәҹәји һагда неҹә анд ичмишдимсә, инди дә анд ичирәм ки, сәнә гәзәбләнмәјәҹәјәм, сәни мәзәммәт етмәјәҹәјәм». Нуһун ҝүнләриндәки Дашгынын бүтүн дүнјаны басдығына шүбһә етмәдијимиз кими, Аллаһын Она етибар едәнләрә мәһәббәт долу хејирхаһлыг ҝөстәрәҹәјинә дә әмин ола биләрик (Јешаја 54:9).