Мәсиһчи аиләләр, Исанын нүмунәсини изләјин!
‘Мәсиһ бизә бир нүмунә гојду ки, биз Онун изләри илә ҝедәк’ (1 ПЕТ. 2:21).
1. а) Јарадылышда Аллаһын Оғлунун ролу нәдән ибарәт иди? б) Иса бәшәријјәтә һансы һиссләри бәсләјир?
АЛЛАҺ ҝөјләри вә јери јараданда Ваһид Оғул «маһир уста» (ЈД) кими Атасы илә бирҝә чалышырды. Һәмчинин Ата јер үзүндә зәнҝин битки вә һејванат аләмини јараданда, о ҹүмләдән Өз сурәтинә вә бәнзәринә ҝөрә јарадаҹағы варлыгларын јашамасы үчүн Ҹәннәти һазырлајанда да Оғул Онунла сых әмәкдашлыг едирди. Сонрадан јер үзүндә Иса кими танынан Аллаһын Оғлу инсанлара дәрин мәһәббәт бәсләјирди. Биз охујуруг: «Бәшәр өвладларына ҝөрә фәрәһләнирдим» (Сүл. мәс. 8:27-31; Јар. 1:26, 27).
2. а) Јеһова гејри-камил бәшәријјәтин гајғысына неҹә галды? б) Мүгәддәс Китабын рәһбәрлик тәгдим етдији саһәләрдән бири һансыдыр?
2 Илк инсан ҹүтү ҝүнаһа батандан сонра бәшәријјәтин ҝүнаһдан тәмизләнмәси Јеһованын нијјәтинин ваҹиб бир һиссәси олду. Бунун үчүн Јеһова Мәсиһи фидјә олараг гурбан верди (Ром. 5:8). Бундан әлавә, Јеһова Өз Кәламыны, Мүгәддәс Китабы инсанлара бәхш етди ки, мирас алдыглары гејри-камиллијә бахмајараг, һәјатда уғурлу олмалары үчүн онлара көмәк етсин (Мәз. 119:105). О, Өз Кәламында инсанларын мөһкәм вә хошбәхт аиләјә саһиб олмалары үчүн рәһбәрлик тәгдим едир. «Јарадылыш» китабында никаһа даир дејилир ки, киши ‘гадынына говушмалы вә онлар бир бәдән олмалыдырлар’ (Јар. 2:24).
3. а) Иса никаһ һаггында нә өјрәдирди? б) Бу мәгаләдә нә мүзакирә олунаҹаг?
3 Јерүзү хидмәти заманы Иса вурғуламышды ки, Аллаһын нијјәтинә әсасән, никаһ әбәди гурулуш олмалыдыр. Онун өјрәтдији принсипләри бүтүн аилә үзвләри тәтбиг едәрсә, онда онлар никаһа вә аиләнин хошбәхтлијинә зәрәр вуран мүнасибәт вә давранышдан гачына биләҹәкләр (Мат. 5:27-37; 7:12). Бу мәгаләдә Исанын тәлимләринин вә нүмунәсинин әрләрә, арвадлара, валидејнләрә вә ушаглара хошбәхт вә мәмнунедиҹи һәјат јашамаға неҹә көмәк едә биләҹәји мүзакирә олунаҹаг.
Әр арвадына һөрмәт етдијини неҹә ҝөстәрмәлидир?
4. Исанын вә мәсиһчи әрләрин роллары арасында һансы охшарлыг вар?
4 Аллаһ Исаны јығынҹағын Башы тәјин етдији кими, әри дә аиләнин башы тәјин едиб. Һәвари Павел демишди: «Бәдәнин хиласкары олан Мәсиһ иманлылар ҹәмијјәтинин Башы олдуғу кими, әр дә арвадын башыдыр. Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди» (Ефес. 5:23, 25). Иса мәсиһчи әрләр үчүн нүмунә гојду: о, өз давамчылары илә неҹә давранырдыса, онлар да өз арвадлары илә о ҹүр давранмалыдырлар. Ҝәлин Аллаһын вердији сәлаһијјәтләрдән Исанын неҹә истифадә етдијинә нәзәр салаг.
5. Иса шаҝирдләри үзәриндә олан сәлаһијјәтиндән неҹә истифадә едирди?
5 Иса ‘һәлим вә гәлбдән тәвазөкар’ иди (Мат. 11:29). Ејни заманда о, әзмли инсан олмушду. О, һеч вахт өз мәсулијјәтләринә сәһләнкарлыгла јанашмырды (Марк 6:34; Јәһ. 2:14-17). О, шаҝирдләринә мүлајимликлә мәсләһәт верәр, лазым ҝәләндә исә ону тәкрарлајарды (Мат. 20:21-28; Марк 9:33-37; Лука 22:24-27). Лакин һеч вахт онлары данламыр, ләјагәтләрини алчалтмыр вә онларда мәһәббәтә лајиг олмадыглары, јахуд тапшырыгларыны јеринә јетирә билмәјәҹәкләри фикри јаратмырды. Әксинә, онлары тәрифләјир вә үрәкләндирирди (Лука 10:17-21). Исадан мәһәббәт вә шәфгәт ҝөрән шаҝирдләрин нәјә ҝөрә она еһтирам бәсләдикләри тәәҹҹүблү дејил!
6. а) Исанын шаҝирдләри илә рәфтарындан әрләр нә өјрәнә биләр? б) Петер әрләри нәјә тәшвиг едирди?
6 Исанын нүмунәсиндән әрләр нә өјрәнә биләр? Башчы олмаг һеч дә зүлмкар олмаг демәк дејил. Әксинә, јахшы аилә башчысы һәјат јолдашына һөрмәт едәҹәк вә ону фәдакарҹасына севәҹәк. Һәвари Петер әрләрә арвадлары илә анлајышла вә ‘һөрмәтлә’ рәфтар етмәји мәсләһәт ҝөрәрәк Исанын мәһәббәт нүмунәсини изләмәјә тәшвиг едирди. (1 Петер 3:7 ајәсини оху.) Әр өз сәлаһијјәтләриндән неҹә истифадә едә биләр ки, арвадына ‘һөрмәт ҝөстәрмиш’ олсун?
7. Әр өз арвадына неҹә һөрмәт ҝөстәрә биләр? Нүмунә чәкин.
7 Әр бүтүн аиләјә аидијјәти олан һәр һансы гәрар гәбул етмәздән өнҹә арвадынын фикир вә һиссләрини нәзәрә алмагла она һөрмәт етдијини ҝөстәрир. Туталым, көчмәк, иш јерини дәјишмәк, јахуд мәзунијјәти һарада кечирмәк вә ја малијјә проблемләриндән гачынмаг үчүн хәрҹләри неҹә азалтмаг кими ҝүндәлик ишләр барәдә гәрар гәбул едилмәлидир. Бу гәрарлар бүтүн аиләјә тәсир едәҹәји үчүн јахшы оларды ки, әр арвадынын фикрини өјрәнсин вә онлар ортаг мәхрәҹә ҝәлсинләр. Онда һәјат јолдашыны дәстәкләмәк гадын үчүн даһа асан олаҹаг (Сүл. мәс. 15:22). Арвадына һөрмәт едән әр јалныз онун мәһәббәтини вә һөрмәтини јох, ән әсасы, Јеһованын рәғбәтини газаныр (Ефес. 5:28, 29).
Арвад әринә еһтирам бәсләдијини неҹә ҝөстәрмәлидир?
8. Нәјә ҝөрә Һәвванын нүмунәсини тәглид етмәк лазым дејил?
8 Мәсиһчи гадынлар әрләринә табе олмагда Исадан нүмунә ҝөтүрмәлидирләр. Исанын һакимијјәтә даир бахышы вә мүнасибәти илк гадынынкындан неҹә дә фәргләнир! Әслиндә Һәвва аиләли гадынлар үчүн јахшы нүмунә дејил. Јеһова онун үзәринә бир башчы гојмушду вә ҝөстәришләрини онун васитәсилә чатдырырды. Анҹаг о, өз әринин башчылығына һөрмәт ҝөстәрмәјиб, онун чатдырдығы ҝөстәришләрә зидд давранды (Јар. 2:16, 17; 3:3; 1 Кор. 11:3). Дүздүр, Һәвва алданды. Анҹаг она: «Аллаһ билир» демәклә Јараданын әсил нијјәтиндән хәбәрдар олдуғуну иддиа едән сәсә гулаг асыб-асмамаг гәрарыны вермәздән өнҹә, әри илә мәсләһәтләшмәли иди. Буну етмәк әвәзинә, о, өз билдији кими һәрәкәт етди (Јар. 3:5, 6; 1 Тим. 2:14).
9. Иса итаәткарлыгда неҹә нүмунә гојуб?
9 Һәввадан фәргли олараг, Иса өз Башчысына табе олмагда мүкәммәл нүмунәдир. Онун әһвал-руһијјәси вә тутдуғу һәјат јолу ҝөстәрир ки, «Аллаһла бәрабәрлији, имтинасы мүмкүн олмајан бир һагг сајмады». Әксинә, о, өзүнү ‘һеч едәрәк гул сурәтинә салды’ (Филип. 2:5-7). Падшаһ кими һөкмранлыг едән Иса бу ҝүн дә ејни әһвал-руһијјәјә маликдир. О, һәр шејдә Атасына тәвазөкарлыгла табе олур вә Онун башчылығына һөрмәтлә јанашыр (Мат. 20:23; Јәһ. 5:30; 1 Кор. 15:28).
10. Гадын әринин башчылығына һөрмәтлә јанашдығыны неҹә ҝөстәрә биләр?
10 Мәсиһчи гадын әринин башчылығына һөрмәт етмәклә Исанын гојдуғу нүмунәни тәглид едир. (1 Петер 2:21; 3:1, 2 ајәләрини оху.) Ҝәлин ҝөрәк, о, буну һансы һалларда едә биләр. Мәсәлән, оғул анасына јахынлашыб һансыса бир иши ҝөрмәк үчүн иҹазә истәјир. Мәсәлә һәр ики валидејн тәрәфиндән мүзакирә олунмадығындан јахшы оларды ки, ана ондан сорушсун: «Атандан иҹазә алмысан?» Әҝәр о, буну етмәјибсә, гадын гәрар вермәздән өнҹә, әри илә мәсләһәтләшмәлидир. Ишдир, гадын әринин фикри илә разы дејилсә, јахшы оларды ки, онлар буну ушағын јанында јох, тәкликдә мүзакирә етсинләр (Ефес. 6:4).
Иса валидејнләрә нүмунәдир
11. Иса валидејнләрә һансы нүмунәни гојуб?
11 Иса евләниб оғул-ушаг саһиби олмаса да, мәсиһчи валидејнләрә дә ҝөзәл нүмунә гојуб. Неҹә? О, шаҝирдләринә өјүд-нәсиһәт верирди вә буну мәһәббәт вә сәбирлә едирди. Иса вердији тапшырығы неҹә јеринә јетирмәк лазым олдуғуну онлара ҝөстәрди (Лука 8:1). Исанын шаҝирдләринә гаршы мүнасибәти вә рәфтары онлара бир-бирләри илә неҹә давранмалы олдуғуну өјрәтди. (Јәһја 13:14-17 ајәләрини оху.)
12, 13. Аллаһдан горхан бир өвлад бөјүтмәк истәјән валидејнләр һансы тәләбә риајәт етмәлидирләр?
12 Ушаглар ата-аналарынын нүмунәсини, јахшы да, пис дә олса, тәглид етмәјә мејиллидирләр. Буна ҝөрә дә валидејнләр өзләриндән сорушмалыдырлар: «Вахтымызын чох һиссәсини нәјә сәрф едирик: телевизора вә мүхтәлиф әјләнҹәләрә, јохса Мүгәддәс Китаб өјрәнмәсинә вә хидмәтә? Ушаглар бу саһәдә биздән нә ҝөтүрүрләр? Аиләмиздә нәјә үстүнлүк веририк? Һәгигәтә ујғун јашајараг вә гәрарлар гәбул едәрәк ушагларымыза јахшы нүмунә гојуругму?» Әҝәр сиз Аллаһдан горхан бир өвлад бөјүтмәк истәјирсинизсә, онда Аллаһын ганунлары, илк нөвбәдә, сизин үрәјиниздә олмалыдыр (Ганун. т. 6:6).
13 Әҝәр валидејнләр Мүгәддәс Китаб принсипләрини ҝүндәлик һәјатларында тәтбиг едирләрсә, ушаглар мүтләг буна фикир верәҹәкләр. Онларын сөзләри вә нәсиһәтләри ушаглар үчүн даһа тәсирли олаҹаг. Лакин ушаглар ата-аналарынын сөзләри илә әмәлләринин үст-үстә дүшмәдијини ҝөрсәләр, белә бир гәнаәтә ҝәләҹәкләр ки, Мүгәддәс Китаб принсипләри бир о гәдәр дә ваҹиб вә ја тәтбигедилән дејил. Нәтиҹәдә, ушаглар дүнјанын тәзјиги гаршысында аҹиз гала биләрләр.
14, 15. Валидејнләр ушагларына һансы дәјәрләри ашыламалыдырлар вә буну неҹә едә биләрләр?
14 Мәсиһчи валидејнләр дәрк едирләр ки, ушағын тәрбијәсинә онун мадди тәләбатларынын гајғысына галмагдан даһа чох шеј дахилдир. Буна ҝөрә дә, ушағы јалныз бу тәләбатлары өдәмәјә јөнәлдән мәгсәдләрә ҹан атмаға тәшвиг етмәк бөјүк сәһв оларды (Ваиз 7:12). Иса шаҝирдләринә руһани дәјәрләрә вә ишләрә үстүнлүк вермәји өјрәдирди (Мат. 6:33). Беләликлә, Исаны тәглид едән валидејнләр өз ушагларына гаршыларына руһани мәгсәдләр гојмағы өјрәтмәлидирләр.
15 Буну неҹә етмәк олар? Үсуллардан бири ушагларын таммүддәтли хидмәтчиләрлә үнсијјәтдә олмалары үчүн шәраит јаратмагдыр. Пионерләрлә, јахуд рајон нәзарәтчиләри вә онларын һәјат јолдашлары илә таныш олмағын јенијетмәләрә һансы фајда ҝәтирә биләҹәјинә диггәт јетирин. Миссионерләр, бет-еллиләр вә бејнәлхалг тикинти лајиһәләриндә иштирак едәнләр Јеһоваја хидмәт етмәјин нә гәдәр севиндириҹи олдуғу һагда даныша биләрләр. Сөзсүз ки, онларын данышмаға чохлу мараглары әһвалатлары вар. Онларын хидмәтдә ҝөстәрдикләри фәдакарлыг нүмунәләри ушагларыныза мүдрик гәрарлар гәбул етмәјә, гаршыларына тәгдирәлајиг мәгсәдләр гојмаға вә таммүддәтли хидмәтдә өзләрини тәмин етмәк үчүн лазыми пешәјә јијәләнмәјә көмәк едә биләр.
Исанын нүмунәсини изләмәкдә ушаглара нә көмәк едә биләр?
16. Исанын валидејнләринә вә сәмави Атасына һөрмәт етдији нәдән ҝөрүнүрдү?
16 Ушаглар, Иса сизин үчүн дә ҝөзәл нүмунәдир. Јеһова Исаны Јусифлә Мәрјәмин һимајәсинә вермишди вә о, онларын сөзүндән чыхмырды. (Лука 2:51 ајәсини оху.) Иса билирди ки, гејри-камил олмаларына бахмајараг, онун гајғысына галмаг мәсулијјәтини онлара Јеһова һәвалә едиб. Буна ҝөрә дә Иса онлара һөрмәт етмәли иди (Ганун. т. 5:16; Мат. 15:4). Иса јеткин јаша чатанда да һәмишә сәмави Атасыны разы салырды. Бәзән она ширникдириҹи тәклифләри рәдд етмәк лазым ҝәлирди (Мат. 4:1-10). Јәгин ки, сиз ҝәнҹләрдә бәзән валидејнләринизин сөзүндән чыхмаг истәји јараныр. Белә һалларда Исанын нүмунәсини изләмәкдә сизә нә көмәк едә биләр?
17, 18. а) Ҝәнҹләр мәктәбдә һансы тәзјигләрә мәруз галырлар? б) Нәји јадда сахламаг ҝәнҹләрә сынагларын өһдәсиндән ҝәлмәјә көмәк едә биләр?
17 Чох еһтимал ки, Мүгәддәс Китаб нормалары синиф јолдашларынызын әксәријјәти үчүн ја аз әһәмијјәтлидир, ја да һеч бир әһәмијјәт кәсб етмир. Онлар сизи пис ишләрлә мәшғул олмаға тәһрик едә биләр, бундан имтина едәндә исә лаға гоја биләрләр. Ола билсин, буна ҝөрә онлар сизә һәтта алчалдыҹы адлар гојурлар. Белә һалларда сиз өзүнүзү неҹә апарырсыныз? Билирсиниз ки, горхуб әксәријјәтин ардынҹа ҝетсәниз, валидејнләринизи вә Јеһованы мәјус едәҹәксиниз. Әҝәр синиф јолдашларынызын сөзү илә отуруб-дурсаныз, бунун ахыры нә олаҹаг? Ола билсин, сиз гаршыныза пионер вә ја хидмәти көмәкчи олмаг, тәблиғчиләрә тәләбат олан әразиләрдә, јахуд Бет-Елдә хидмәт етмәк кими мәгсәдләр гојмусунуз. Синиф јолдашларынызла үнсијјәт бу мәгсәдләрә наил олмағыныза көмәк едәҹәкми?
18 Бәлкә, иманынызын сынаға чәкилдији вахтлар да олур? Бәс онда өзүнүзү неҹә апарырсыныз? Нүмунәмиз олан Иса һаггында фикирләшин. О, ширникдириҹи тәклифләрә ујмады вә дүзҝүн оланы етмәк әзминдән дөнмәди. Буну јадда сахламаг синиф јолдашларыныза онларла бирҝә налајиг ишләрдә иштирак етмәјәҹәјинизи ачыг-ајдын демәк үчүн сизә ҹәсарәт верәҹәк. Иса кими, диггәтинизи Јеһоваја әбәдијјәт боју хидмәт едәҹәјиниз вә даһа һеч кимин сизи аздырмаға чалышмајаҹағы вахта јөнәлдин (Ибр. 12:2).
Аилә хошбәхтлијинин ачары
19. Һансы һәјат јолу әсил хошбәхтлик ҝәтирир?
19 Јеһова Аллаһ вә Иса Мәсиһ бәшәријјәтин јахшылығыны истәјирләр. Гејри-камил олсаг да, мүәјјән дәрәҹәдә хошбәхт олмаг мүмкүндүр (Јешаја 48:17, 18; Мат. 5:3). Иса инсан хошбәхтлијинин әсасыны тәшкил едән руһани һәгигәтләри өјрәдирди, лакин бу, онун шаҝирдләринә чатдырдығы јеҝанә шејләр дејилди. Иса һәм дә јашамағын ән јахшы јолуну өјрәтди. Үстәлик, о, таразлы һәјат сүрмәјә вә таразлы бахышлара малик олмаға даир нүмунә гојду. Аиләдәки ролумуздан асылы олмајараг, онун нүмунәсини изләмәк һәр биримизә фајда ҝәтирә биләр. Буна ҝөрә дә ҝәлин һәр биримиз Исанын нүмунәсини изләјәк! Исанын тәлимләринә риајәт етмәк вә онун нүмунәсини изләмәк, һәгигәтән дә, хошбәхт вә мәмнунедиҹи аилә һәјатынын ачарыдыр.
Неҹә ҹаваб верәрдиниз?
• Әрләр Аллаһын онлара вердији сәлаһијјәти неҹә һәјата кечирмәлидирләр?
• Гадынлар Исанын нүмунәсини неҹә тәглид едә биләрләр?
• Валидејнләр Исанын өз шаҝирдләри илә рәфтарындан өзләри үчүн нә ҝөтүрә биләрләр?
• Ҝәнҹләр Исадан нә өјрәнә биләрләр?
[8-ҹи сәһифәдәки шәкил]
Бүтүн аиләјә аидијјәти олан мәсәләјә даир гәрар гәбул етмәздән өнҹә, севән әр нә едәҹәк?
[9-ҹу сәһифәдәки шәкил]
Гадын һансы һалда әринин башчылығына һөрмәт етдијини ҝөстәрә биләр?
[10-ҹу сәһифәдәки шәкил]
Ушаглар валидејнләринин јахшы вәрдишләрини тәглид едирләр