Шејтанын рәһбәрлији ифласа уғрајыб
«Пис адам јахшылыг ҝөрмәјәҹәк» (ВАИЗ 8:13).
1. Писләрин тезликлә әдаләт гаршысында ҹаваб вермәли олаҹаглары нәјә ҝөрә тәсәлливериҹидир?
ҜЕҸ-ТЕЗ писләр етдикләри һәр шејә ҝөрә әдаләт гаршысында ҹаваб вермәли олаҹаглар (Сүл. мәс. 5:22; Ваиз 8:12, 13). Бу, тәсәлливериҹи хәбәрдир, хүсусилә дә салеһлији севән, әдаләтсизликдән вә писләрин әлиндән әзијјәт чәкәнләр үчүн. Мәсулијјәтә ҹәлб олунаҹаг ән бөјүк ҹинајәткар писликләрин атасы Шејтан Иблисдир (Јәһ. 8:44).
2. Еден бағында галдырылан мәсәләни һәлл етмәк үчүн нәјә ҝөрә вахт тәләб олунурду?
2 Өзү һаггында јүксәк фикирдә олан Шејтан Еден бағында илк инсан ҹүтүнү Јеһованын һөкмранлығына гаршы чыхмаға тәһрик етди. Нәтиҹәдә, улу валидејнләримиз Шејтана гошулараг Јеһованын гануни һөкмранлығыны рәдд етдиләр вә Онун ҝөзүндә ҝүнаһлы олдулар (Ром. 5:12—14). Әлбәттә, Јеһова онларын һөрмәтсизлијинин вә үсјанкарлығынын онлар үчүн нә илә нәтиҹәләнәҹәјини билирди. Анҹаг бу аҹы нәтиҹәләр бүтүн шүурлу варлыглара ајдын олмалы иди. Буна ҝөрә дә мәсәләни һәлл етмәк вә үсјанкарларын тамамилә һагсыз олдугларыны сүбут етмәк үчүн вахт тәләб олунурду.
3. Инсан һакимијјәтләринә гаршы биз һансы мөвгеји тутуруг?
3 Инсанлар Јеһованын һакимијјәтини рәдд етдикләри үчүн өз һакимијјәт формаларыны гурмалы олдулар. Һәвари Павел Ромадакы һәмиманлыларына мәктубунда јазырды ки, онлар ‘үзәрләриндә олан [инсан] һакимләринә табе олмалыдырлар’. Павелин ҝүнләриндә «һакимләр» дедикдә, әсас етибарилә, ерамызын 54—68-ҹи илләриндә һөкмранлыг едән Рома императору Нерон нәзәрдә тутулурду. Павел дејир ки, «мөвҹуд олан һакимләр дә Аллаһ тәрәфиндән тәјин олунмушдур». (Ромалылара 13:1, 2 ајәләрини оху.) Демәк олармы ки, Павел инсан һакимијјәтини Аллаһын рәһбәрлијиндән үстүн тутур? Әлбәттә, јох! О, садәҹә демәк истәјирди ки, һәлә ки Јеһова инсан һакимијјәтләринә јол верир, мәсиһчиләр Аллаһын бу гурулушуна һөрмәтлә јанашмалы вә һакимијјәтләрә табе олмалыдырлар.
Һәлака апаран јол
4. Инсан һакимијјәтинин ифласа мәһкум олдуғунун сәбәбини изаһ един.
4 Лакин Шејтанын тәсири алтында олан инсан һакимијјәти ифласа мәһкумдур. Нәјә ҝөрә? Илк нөвбәдә она ҝөрә ки, инсан һакимијјәти Аллаһын мүдриклијинә әсасланмајыб. Јалныз Јеһова камил мүдриклијә саһибдир. Буна ҝөрә дә мүвәффәгијјәтли рәһбәрлијин нә олдуғуну јалныз О билир (Јер. 8:9; Ром. 14:26). Чох вахт сәһвләр едә-едә өјрәнән инсанлардан фәргли олараг, Јеһова һәмишә нә етмәк лазым олдуғуну јахшы билир. Онун рәһбәрлијинә мәһәл гојмајан истәнилән һакимијјәт ифласа мәһкумдур. Тәкҹә бу сәбәбә ҝөрә — һәлә Шејтанын пис нијјәтләриндән данышмасаг — онун инсанлар васитәсилә рәһбәрлик етмәси та башланғыҹдан уғурсуз олуб.
5, 6. Шејтаны Јеһоваја мүхалиф чыхмаға нә тәһрик етди?
5 Адәтән, дәрракәли вә ағыллы инсан уғурсузлуға мәһкум олан ишә баш гошмур. Вә әҝәр о, инадкарлыгла һәмин ишдән әл чәкмирсә, ҝеҹ-тез өз сәһвини етираф етмәли олаҹаг. Тарих дөнә-дөнә сүбут етмишдир ки, Гадир Аллаһа мүхалиф чыхмаг әбәсдир. (Сүлејманын мәсәлләри 21:30 ајәсини оху.) Лакин Шејтанын мәғрурлуғу вә тәкәббүрлүлүјү онун ҝөзүнү кор етмиш вә бу, онун Јеһоваја арха чевирмәсинә сәбәб олду. Беләликлә, Иблис билә-билә ахыры пис гуртаран јола гәдәм гојду.
6 Шејтанын өзүндән чох разы олмасы Бабил падшаһынын ловғалана-ловғалана дедији сөзләриндә әкс олунур: «Ҝөјләрә галхаҹағам, тахтымы Аллаһын улдузлары үзәриндә јүксәкләрә јерләшдирәҹәјәм, шималдакы јүксәк јердә, топланты дағында отураҹағам, уҹа булудларын үзәринә чыхаҹағам, өзүмү Һагг-Таала кими апараҹағам» (Јешаја 14:13—15). Һәмин падшаһын ағылсыз нијјәти боша чыхды вә Бабил падшаһларынын сүлаләсинин сону шәрәфсиз олду. Шејтан вә онун дүнјасы да тезликлә мәғлуб олаҹаг.
Јеһова буна нәјә ҝөрә јол верди?
7, 8. Јеһованын пислијин мөвҹуд олмасына мүвәггәти јол вермәсинин ҝәтирдији бәзи фајдалар һансылардыр?
7 Бәзиләри соруша биләрләр: «Нәјә ҝөрә Јеһова инсанларын Шејтанын тәрәфини тутмаларына вә мәғлубијјәтә дүчар олан һакимијјәти сечмәләринә мане олмады?» Әлбәттә, Күлли-Ихтијар Аллаһ буну едә биләрди (Чых. 6:3). Лакин О, буну етмәди. Чүнки сонсуз мүдриклијә саһиб олан Аллаһ ҝөрдү ки, мүвәггәти олараг инсанларын үсјанына мүдахилә етмәмәк нәтиҹәдә хејир ҝәтирәҹәк. Јеһованын әдаләтли вә гајғыкеш Һөкмдар олдуғуна бәраәт газандырылаҹаг вә Аллаһын бу гәрары садиг инсанлара фајда ҝәтирәҹәк.
8 Инсанлар Шејтанын тәклифини рәдд етсәјдиләр вә Аллаһдан мүстәгил олмаг фикринә дүшмәсәјдиләр, башымыза бу гәдәр мүсибәт ҝәлмәзди! Буна бахмајараг, Јеһованын инсанлара мүәјјән мүддәт рәһбәрлик етмәјә изин вермәсинин мүсбәт ҹәһәтләри дә вар. Сәмими инсанлар Аллаһа гулаг асмағын вә Она етибар етмәјин нә гәдәр мүдрик олдуғуна әмин олдулар. Әсрләр боју мүхтәлиф һакимијјәт формалары тәҹрүбәдән кечирилмиш, лакин онларын һеч бири идеал олмамышдыр. Бу факт Јеһованын хидмәтчиләрини даһа да әмин етмишдир ки, Онун һөкмранлығындан јахшысы јохдур. Дүздүр, Јеһованын гәддар Шејтана мүвәггәти олараг рәһбәрлик етмәјә изин вермәси бүтүн бәшәријјәтә, о ҹүмләдән Онун садиг хидмәтчиләринә бәлалар ҝәтирди. Амма бунун Јеһованын хидмәтчиләри үчүн фајдасы да аз дејил.
Үсјан Јеһованын иззәтләнмәсинә сәбәб олду
9, 10. Шејтанын рәһбәрлијинин Јеһованын иззәтләнмәсинә неҹә сәбәб олдуғуну изаһ един.
9 Јеһованын инсанлара Шејтанын тәсири алтында јашамаларына вә өз-өзләрини идарә етмәләринә јол вермәси гәтијјән Онун һөкмранлығыны нүфуздан салмады. Әксинә, тарих сүбут етди ки, Јеремјанын Аллаһдан илһам алараг инсанларын өз-өзүнү идарә едә билмәдикләри барәдә јаздығы сөзләр һәгигәтдир. (Јеремја 10:23 ајәсини оху.) Бундан әлавә, Шејтанын галдырдығы үсјан Јеһоваја Өз ҝөзәл кејфијјәтләрини даһа габарыг шәкилдә нүмајиш етдирмәк имканыны верди. Неҹә?
10 Шејтанын һакимијјәтинин ҝәтирдији бәлалар ҝөз габағында олдуғу үчүн Јеһованын мүкәммәл хүсусијјәтләрини һәмишәкиндән даһа ајдын ҝөрүрүк. Бу, Јеһованы Ону севәнләрин ҝөзүндә даһа да уҹалтды. Бәли, нә гәдәр гәрибә сәсләнсә дә, Шејтанын уғурсуз һакимијјәти Аллаһын иззәтләнмәсинә сәбәб олду. Бу һәмчинин Јеһованын һөкмранлығына мејдан охунмасы мәсәләсини мүкәммәл сурәтдә һәлл етдијини ҝөстәрди. Бу һәгигәти әјани шәкилдә ҝөстәрмәк үчүн ҝәлин гысаҹа олараг Јеһованын бәзи хүсусијјәтләрини нәзәрдән кечирәк вә Шејтанын гәддар рәһбәрлијинин Ону бу хүсусијјәтләри даһа неҹә тәзаһүр етдирмәјә тәшвиг етдијинә бахаг.
11. Јеһова мәһәббәтини неҹә тәзаһүр етдирди?
11 Мәһәббәт. Мүгәддәс Јазыларда дејилир ки, «Аллаһ мәһәббәтдир» (1 Јәһ. 4:8). Јеһованы инсанлары јаратмаға тәшвиг едән башлыҹа олараг мәһз мәһәббәт иди. Бизим еҹазкар, әсрарәнҝиз јолла јарадылдығымыз да Аллаһын мәһәббәтинә дәлаләт едир вә Онун гаршысында еһтирам долу горху һасил едир. Үстәлик, Јеһова инсанларын хошбәхт јашамалары үчүн һәр шејлә тәмин олунмуш ҝөзәл ев дә бәхш етди (Јар. 1:29 —31; 2:8, 9; Мәз. 139:14—16). Лакин пислик бәшәр аиләсинә дахил оланда Јеһова Өз мәһәббәтини башга ҹүр тәзаһүр етдирди. Неҹә? Һәвари Јәһја Исанын сөзләрини ситат ҝәтирәрәк јазыр: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһ. 3:16). Аллаһ ҝүнаһларын тамамилә силинмәси үчүн јеҝанә Оғлуну јер үзүнә фидјә кими ҝөндәрди. Мәҝәр О, инсанлара мәһәббәтини бундан да јахшы ҝөстәрә биләрдими? (Јәһ. 15:13). Мәһәббәтин бу ҹүр бөјүк тәзаһүрү инсанлар үчүн нүмунәдир вә һәтта Иса кими, Аллаһын фәдакар мәһәббәтини ҝүндәлик һәјатларында тәзаһүр етдирмәјә имкан верир (Јәһ. 17:25, 26).
12. Јеһованын гүввәси неҹә тәзаһүр олунду?
12 Гүввә. Јалныз Күлли-Ихтијар Аллаһ һәјат вермәјә гадирдир (Вәһј 11:17; Мәз. 36:9). Инсан дүнјаја ҝәләндә, санки, ағ вәрәг кимидир. О өләндә бу вәрәг онун шәхсијјәтини формалашдырмыш гәрарлар, әмәлләр вә һадисәләрлә долудур. Јеһова үчүн бу мәлуматы јадда сахламаг һеч дә проблем дејил. Вахты чатанда Јеһова һәмин инсаны өзүнәмәхсус бүтүн ҹәһәтләри илә бәрабәр һәјата гајтара биләр (Јәһ. 5:28). Беләликлә, өлүм Аллаһын нијјәтинә дахил олмаса да, бу, Она өлүмдән дә ҝүҹлү олдуғуну ҝөстәрмәк имканыны верди. Һәгигәтән дә, Јеһова Күлли-Ихтијар Аллаһдыр.
13. Исанын фидјә гурбанлығы Јеһованын мүкәммәл әдаләтә малик олдуғуну неҹә ҝөстәрди?
13 Әдаләт. Јеһова нә јалан данышыр, нә дә ки әдаләтсизлик едир (Ганун. т. 32:4; Тит. 1:2). Бәзән чох чәтин олса да, О, һәмишә Өзүнүн ән јүксәк һәгигәт вә әдаләт принсипләринә садиг галыр (Ром. 8:32). Әзиз Оғлунун ишҝәнҹә дирәјиндә аллаһсыз инсан кими өлдүрүлмәсини ҝөрмәк Она неҹә дә ағыр иди! Гејри-камил инсанлары севдији үчүн вә мүкәммәл әдаләт принсипләри позулмасын дејә Јеһова бу дәһшәтли һадисәнин баш вермәсинә јол верди. (Ромалылара 5:18—21 ајәләрини оху.) Әдаләтсизликлә долу олан бу дүнја Јеһоваја ән әдаләтли шәхс олдуғуну ҝөстәрмәк имканыны верди.
14, 15. Јеһованын мисилсиз һикмәти вә сәбри неҹә тәзаһүр олунду?
14 Һикмәт. Адәмлә Һәвва ҝүнаһ ишләтдикдән дәрһал сонра Јеһова онларын галдырдығы үсјанын аҹынаҹаглы нәтиҹәләрини неҹә арадан галдыраҹағыны ачыглады (Јар. 3:15). Белә гәти аддымлар вә нијјәтинин тәфәррүатларыны хидмәтчиләринә тәдриҹән ачыгламасы Јеһованын мүдриклијини габарыг шәкилдә нүмајиш етдирди (Ром. 11:33). Проблемләри усталыгла һәлл етмәкдә Јеһоваја һеч нә әнҝәл ола билмәз. Әхлагсызлығын, ағылсызлығын, өзбашыналығын, азғынлығын, ајры-сечкилијин вә икиүзлүлүјүн һөкм сүрдүјү вә мүһарибәләрин түғјан етдији бир дүнјада әсил һикмәтин нә олдуғуну нүмајиш етдирмәк үчүн Јеһованын чохлу имканлары јаранды. Шаҝирд Јагуб јазырды: «Јухарыдан назил олан һикмәт әввәлән сафдыр, сонра да сүлһпәрвәр, мүлајим, итаәткар, мәрһәмәтли вә хејирли бәһрә илә долу, гәрәзсиз вә ријасыздыр» (Јаг. 3:17).
15 Сәбир. Инсанлар гејри-камил вә ҝүнаһлы олмасајдылар, чәтин ки, Онун сәбрини бу гәдәр габарыг тәрздә ҝөрә биләрдик. Јеһованын минләрлә илләр әрзиндә сәбир тәзаһүр етдирмәси ҝөстәрир ки, О, бу ҝөзәл кејфијјәтин ән мүкәммәл дәрәҹәсинә маликдир вә буна ҝөрә биз Она миннәтдар олмалыјыг. Һәвари Петер тамамилә һаглы олараг демишдир ки, биз ‘Рәббимизин сәбрини гуртулуш һесаб етмәлијик’ (2 Пет. 3:9, 15).
16. Нәјә ҝөрә Јеһованын бағышламаға һазыр олмасы севинҹ үчүн сәбәбдир?
16 Бағышламаға һазыр олан Аллаһ. Биз һамымыз ҝүнаһлыјыг вә тез-тез сәһвләрә јол веририк (Јаг. 3:2; 1 Јәһ. 1:8, 9). Јеһованын ‘әфви бол’ олдуғуна ҝөрә биз Она неҹә дә миннәтдар олмалыјыг! (Јешаја 55:7). Үстәлик, Аллаһ гејри-камил вә ҝүнаһлы инсанлар олан бизләрин ҝүнаһындан кечәндә үрәјимиз севинҹдән риггәтә ҝәлир (Мәз. 51:5, 9, 17). Јеһованын бу ҝөзәл хүсусијјәтини өз үзәримиздә һисс етмәк Ону даһа мөһкәм севмәјә вә башгалары илә мүнасибәтдә нүмунәсини изләмәјә тәшвиг едир. (Колослулара 3:13 ајәсини оху.)
Дүнјанын хәстәлијинин сәбәби
17, 18. Шејтанын рәһбәрлији неҹә ифласа уғрајыб?
17 Шејтанын рәһбәрлији алтында олан бүтүн дүнја системи — һөкмранлығы нәтиҹәсиндә әмәлә ҝәлән дүнја әсрләр әрзиндә дәфәләрлә уғурсузлугла гаршылашмышды. «Бу дүнја хәстәдирми? — дејә 1991-ҹи илдә бир гәзетдә суал галдырылмышды. — Бәли, бу беләдир, лакин бунун сәбәбкары Аллаһ јох, инсанлардыр» («The European»). Буна һеч бир шүбһә јохдур! Шејтана ујараг улу валидејнләримиз инсан рәһбәрлијини Јеһованын рәһбәрлијиндән үстүн тутдулар. Бунунла онлар әввәлҹәдән уғурсузлуға мәһкум едилмиш һакимијјәтин тәмәлини гојдулар. Инсанларын бүтүн дүнјада чәкдикләри ағры-аҹы вә изтираблар инсан һакимијјәтинин өлүмҹүл хәстәлијә тутулдуғуна дәлаләт едир.
18 Шејтанын идарәетмә үсулу худбинлик төрәдир. Лакин худбинлик Јеһованын һөкмранлығынын әсасыны тәшкил едән мәһәббәтә һеч заман үстүн ҝәлә билмәз. Шејтанын рәһбәрлији инсанлара сабитлик, хошбәхтлик вә тәһлүкәсизлик ҝәтирә билмәди. Јеһованын һөкмранлығына исә бәраәт газандырылыб! Мүасир зәманәдә буну неҹә ҝөрмәк олар? Бу барәдә нөвбәти мәгаләдә сөһбәт ҝедәҹәк.
Нөвбәти ајәләрдән рәһбәрлик һагда нә өјрәндиниз?
[25-ҹи сәһифәдәки шәкилләр]
Шејтанын рәһбәрлији һеч заман бәшәријјәтин хејринә олмајыб
[Иҹазә илә]
U.S. Army photo
WHO photo by P. Almasy
[26-ҹы сәһифәдәки шәкил]
Јеһова өлүмдән дә ҝүҹлүдүр
[27-ҹи сәһифәдәки шәкил]
Јеһованын мәһәббәти вә әдаләти Оғлуну гурбан вермәсиндән ҝөрүнүр