Јеһованын рәһбәрлији бәраәт газаныб!
«Инсан падшаһлыглары үзәриндә Аллаһ-Таала һөкмранлыг едир» (ДАН. 4:17).
1, 2. Инсан рәһбәрлијинин мүвәффәгијјәтсизлијә уғрамасынын бәзи сәбәбләри һансылардыр?
ИНСАН һакимијјәтләри ифласа уғрајыб! Буна һеч бир шүбһә јохдур. Бунун әсас сәбәбләриндән бири одур ки, мүвәффәгијјәтлә идарә етмәк үчүн инсанлар кифајәт гәдәр мүдриклијә малик дејилләр. Инсан һакимијјәтинин уғурсузлуғу бу ҝүн хүсусилә нәзәрә чарпыр, чүнки бир чох рәһбәрләр ‘худбин, пулпәрәст, ловға, тәкәббүрлү, гүдсијјәтдән мәһрум, барышмаз, бөһтанчы, нәфсини сахламајан, азғын, рәһмсиз, јахшылығын дүшмәни, хаин [вә] мәғрурдурлар’ (2 Тим. 3:2—4).
2 Бәшәр тарихинин лап башланғыҹында улу валидејнләримиз Аллаһын рәһбәрлијини рәдд етдиләр. Онлар һеч кимдән асылы олмајаҹагларыны дүшүнүрдүләр. Әслиндә исә Шејтанын табечилији алтына дүшдүләр. «Бу дүнјанын рәиси» олан Шејтанын бөјүк тәсири алтындакы инсанларын алты миниллик уғурсуз рәһбәрлији нәтиҹәсиндә бәшәријјәт ән аҹынаҹаглы вәзијјәтә ҝәлиб чатыб (Јәһ. 12:31). Бир мәнбәдә бәшәријјәтин буҝүнкү вәзијјәтинә шәрһ вериләрәк дејилир ки, «мүкәммәл бир дүнја гурмаға ҹәһд етмәјин» һеч бир фајдасы јохдур. Орада изаһ олунур: «Тәкҹә гејри-мүмкүн олдуғу үчүн јох, һәм дә она ҝөрә ки, буну етмәк ҹәһдләри ән дәһшәтли бәдбәхтликләрә, тоталитаризмә вә мүһарибәләрә ҝәтириб чыхарыр» («The Oxford History of the Twentieth Century»). Бу етираф сөзләри инсан рәһбәрлијинин мүвәффәгијјәтсизлијә уғрадығыны неҹә дә ајдын ҝөстәрир!
3. Адәмлә Һәвва ҝүнаһ ишләтмәсәјдиләр, Аллаһ јер үзүндә рәһбәрлији неҹә һәјата кечирәҹәкди?
3 Неҹә дә аҹынаҹаглыдыр ки, улу валидејнләримиз јеҝанә дүзҝүн рәһбәрлији — Аллаһын рәһбәрлијини рәдд етдиләр! Әлбәттә, Адәмлә Һәвванын Аллаһа садиг галдыглары тәгдирдә Аллаһын јер үзүндә һансы идарә системини гураҹағыны дәгиг билмирик. Лакин бир шејә шүбһә јохдур ки, бүтүн бәшәријјәтин гәбул едәҹәји Аллаһын рәһбәрлији алтында мәһәббәт вә әдаләт һөкм сүрәҹәкди (Һәв. иш. 10:34; 1 Јәһ. 4:8). Јеһованын һәдсиз мүдриклијини нәзәрә алсаг, биз һәмчинин она әмин ола биләрик ки, әҝәр бәшәријјәт Јеһованын рәһбәрлији алтында галсајды, инсан һакимијјәтинин тәрәфдарларынын бурахдыглары бүтүн сәһвләрдән гачынмаг оларды. Аллаһын рәһбәрлији — теократија мүвәффәгијјәтлә ‘бүтүн ҹанлылары дојунҹа једирәҹәк’, јәни онларын бүтүн истәкләрини һәјата кечирәҹәкди (Мәз. 145:16). Гыса мүддәт әрзиндә мүкәммәл рәһбәрлик системи гурулаҹагды (Ганун. т. 32:4). Тәәссүф ки, инсанлар ону рәдд етдиләр!
4. Шејтана верилән сәлаһијјәт нә дәрәҹәдә ҝенишдир?
4 Анҹаг јадда сахламаг лазымдыр ки, Јеһова инсанлара өзләрини идарә етмәјә изин версә дә, јаратдығы варлыглар үзәриндә һөкмранлыг етмәк һүгугундан һеч вахт имтина етмәмишдир. Һәтта гүдрәтли Бабил һөкмдары етираф етмәли олду ки, «инсан падшаһлыглары үзәриндә Аллаһ-Таала һөкмранлыг едир» (Дан. 4:17). Әввәл-ахыр Аллаһын Падшаһлығы Онун ирадәсини һәјата кечирәҹәк (Мат. 6:10). Дүздүр, Јеһова Шејтанын галдырдығы суала гәти ҹаваб верилмәси үчүн она «әсрин танрысы» олмаға, јәни бу дүнјаны идарә етмәјә изин вериб (2 Кор. 4:4; 1 Јәһ. 5:19). Лакин Шејтан Јеһованын иҹазә вермәдији шеји һеч вахт едә билмәмишдир. (2 Салн. 20:6; мүгајисә ет: Әјјуб 1:11, 12; 2:3—6.) Аллаһын ән бөјүк Дүшмәни тәрәфиндән идарә едилән бир дүнјада јашамаларына бахмајараг, Онун һөкмранлығына табе олан инсанлар һәмишә олуб.
Аллаһ Исраил үзәриндә неҹә рәһбәрлик едирди?
5. Исраиллиләр Аллаһа нә сөз вердиләр?
5 Һабилин ҝүнләриндән Исраил халгынын јаранмасына гәдәрки дөврдә Јеһоваја ибадәт едән вә Онун ҝөстәришләрини һәјата кечирән сәдагәтли инсанлар олмушдур (Ибр. 11:4—22). Мусанын ҝүнләриндә Јеһова Јагубун өвладлары илә әһд бағлады вә онлар Исраил халгы олду. Ерамыздан әввәл 1513-ҹү илдә исраиллиләр: «Рәббин бүтүн сөјләдикләринә әмәл едәҹәјик»,— демәклә өвладлары илә бирҝә Јеһованын һөкмранлығына табе олаҹагларына сөз вердиләр (Чых. 19:8).
6, 7. Аллаһын Исраил халгы үзәриндәки рәһбәрлијини неҹә тәсвир едәрдиниз?
6 Јеһованын исраиллиләри Өз халгы кими сечмәкдә мүәјјән мәгсәди варды. (Ганунун тәкрары 7:7, 8 ајәләрини оху.) О, буну садәҹә исраиллиләрин рифаһы үчүн етмәмишди. Бураја Аллаһын ады вә али һөкмранлыг мәсәләси дә ҹәлб олунмушду, бунлар исә олдугҹа бөјүк әһәмијјәт кәсб едир. Исраиллиләр Јеһованын јеҝанә һәгиги Аллаһ олдуғуна шаһидлик етмәли идиләр (Јешаја 43:10; 44:6—8). Буна ҝөрә дә Јеһова Исраил халгына деди: «Сиз Аллаһыныз Рәббин мүгәддәс халгысыныз. Рәбб јер үзәриндә олан бүтүн халглар арасындан сизи Өзүнә мәхсус халг олараг сечди» (Ганун. т. 14:2).
7 Јеһова исраиллиләрә рәһбәрлик едәндә онларын гејри-камил олдугларыны нәзәрә алырды. Ејни заманда, Аллаһын онлара Муса васитәсилә вердији ганунлар мүкәммәл иди вә Онун кејфијјәтләрини әкс етдирирди. Бу ганунлар Онун мүгәддәс, әдаләти севән, сәбирли вә бағышламаға һазыр олдуғуну ајдын ҝөстәрирди. Јешуанын вә онун мүасирләринин ҝүнләриндә халг Онун әмрләринә итаәт едирди, буна ҝөрә дә әмин-аманлыг ичиндә јашајыр вә руһани хејир-дуалар алырды (Јешуа 24:21, 22, 31). Исраил тарихинин һәмин дөврү Аллаһын рәһбәрлијинин уғурлу олдуғуну ҝөстәрир.
Инсан рәһбәрлијинин аҹы нәтиҹәләри
8, 9. Исраил халгы һансы ағылсыз тәләби ирәли сүрдү вә бу, нә илә нәтиҹәләнди?
8 Лакин мүәјјән вахтдан сонра исраиллиләр тез-тез Аллаһын рәһбәрлијинә гаршы чыхмаға башладылар, бу сәбәбдән дә Онун мүдафиәсиндән мәһрум олурдулар. Һәтта бир ҝүн онлар Шамуел пејғәмбәрдән онларын үзәринә бир падшаһ гојмасыны тәләб етдиләр. Јеһова Шамуелә деди ки, халгын бу хаһишини јеринә јетирсин. Лакин О әлавә етди: «Рәдд етдикләри сән дејилсән, онлар үзәриндә һөкмранлыг етмәјим дејә, јалныз Мәни рәдд едирләр» (1 Шам. 8:7). Јеһова исраиллиләрин хаһишини јеринә јетирсә дә, хәбәрдарлыг етди ки, инсан рәһбәрлији халга чохлу бәлалар ҝәтирәҹәк. (1 Шамуел 8:9—18 ајәләрини оху.)
9 Тарих Јеһованын хәбәрдарлығынын доғру олдуғуну ҝөстәрди. Падшаһлар — хүсусилә дә Аллаһдан үз дөндәрәндә — Исраил халгынын башына ҹидди проблемләр ачырдылар. Исраилин бу нүмунәсини нәзәрә алсаг, тәәҹҹүблү дејил ки, әсрләр бојунҹа дүнјада мөвҹуд олан вә Јеһованы танымајан һөкумәтләр узунмүддәтли фајда ҝәтирәҹәк бир шеј едә билмәмишләр. Дүздүр, бәзи сијасәтчиләр Аллаһдан сүлһ вә тәһлүкәсизлик јаратмаг ҹәһдләринә хејир-дуа вермәји хаһиш едирдиләр. Бәс Аллаһ Онун рәһбәрлијинә табе олмајан инсанлары неҹә хејир-дуаландыра биләр? (Мәз. 2:10—12).
Аллаһын рәһбәрлији алтында олан јени халг
10. Нәјә ҝөрә Аллаһын сечилмиш Исраил халгы башгасы илә әвәз олунду?
10 Исраил халгы Јеһоваја сәдагәтлә хидмәт етмәјә чох да һәвәсли дејилди. Аллаһын тәјин етдији Мәсиһ јер үзүнә ҝәләндә исә исраиллиләр ону гәбул етмәдиләр, буна ҝөрә дә Јеһова онлары рәдд едиб, јени халг тәшкил едәҹәк инсанларла әвәз етмәк нијјәтинә ҝәлди. Бу сәбәбдән ерамызын 33-ҹү илиндә Јеһованын мәсһ олунмуш хидмәтчиләриндән ибарәт олан мәсиһчи јығынҹағы тәшкил олунду. Демәк олар ки, һәмин јығынҹаг Јеһованын рәһбәрлији алтында олан јени халг иди. Павел ону «Аллаһын Исраили» адландырды (Галат. 6:16).
11, 12. Гәдим Исраиллә «Аллаһын Исраили» арасында рәһбәрлијин һәјата кечирилмәсиндә һансы охшарлыглар вар?
11 Исраил халгы илә «Аллаһын [јени] Исраили» арасында һәм фәргли, һәм дә охшар ҹәһәтләр вар. Гәдим Исраилдән фәргли олараг, мәсиһчи јығынҹағынын үзәриндә инсан падшаһлыг етмир вә онун үзвләринә ҝүнаһларынын бағышланмасы үчүн һејван гурбанлары ҝәтирмәјә еһтијаҹ јохдур. Исраил халгы илә мәсиһчи јығынҹағы арасындакы охшарлыглардан бири араларында ағсаггалларын тәјин олунмасыдыр (Чых. 19:3—8). Бу мәсиһчи ағсаггаллар сүрүјә ағалыг етмирләр. Әксинә, онлар јығынҹағын гајғысына галыр вә мәсиһчи фәалијјәтиндә рәһбәрлији сәдагәтлә өз үзәрләринә ҝөтүрүрләр. Онлар јығынҹагда һәр кәслә мәһәббәтлә давраныр, һамынын мәнлијинә вә ләјагәтинә һөрмәтлә јанашырлар (2 Кор. 1:24; 1 Пет. 5:2, 3).
12 ‘Аллаһын Исраилинин’ үзвләри вә онларын ‘башга гојунлардан’ олан һәмкарлары Јеһованын гәдим Исраиллә рәфтары үзәриндә дүшүнәндә Јеһованы вә Онун рәһбәрлијини даһа чох гијмәтләндирирләр (Јәһ. 10:16). Мәсәлән, тарих ҝөстәрир ки, Исраил падшаһларынын өз тәбәәләринә ҝөстәрдикләри тәсир — истәр јахшы олсун, истәрсә дә пис — чох ҝүҹлү олмушдур. Мәсиһчи јығынҹағында рәһбәрлији үзәринә ҝөтүрән гардашлар гәдим Исраилин падшаһлары кими һөкмранлыг етмәсәләр дә, һәмишә јадда сахламалыдырлар ки, иманда башгаларына јахшы нүмунә олмалыдырлар (Ибр. 13:7).
Јеһова бу ҝүн неҹә идарә едир?
13. 1914-ҹү илдә һансы ваҹиб һадисә баш верди?
13 Мәсиһчиләр бу ҝүн бүтүн дүнјада бәјан едирләр ки, инсанларын бәшәријјәт үзәриндәки рәһбәрлијинә тезликлә сон гојулаҹаг. Јеһова 1914-ҹү илдә Иса Мәсиһин рәһбәрлији алтында ҝөјдә Өз Падшаһлығыны гурду. О заман Јеһова Исаја ‘фатеһ кими фәтһ етмәк’ сәлаһијјәтини верди (Вәһј 6:2). Јениҹә тахт-таҹ верилмиш Падшаһа дејилди: «Дүшмәнләринин арасында һөкмранлыг ет» (Мәз. 110:2, КМ). Әфсуслар олсун ки, милләтләр Јеһованын рәһбәрлијинә табе олмагдан инадкарлыгла имтина едирләр. Онлар өзләрини елә апарырлар ки, санки, «Аллаһ јохдур» (Мәз. 14:1).
14, 15. а) Аллаһын Падшаһлығы бу ҝүн бизә неҹә рәһбәрлик едир вә бунунла әлагәдар өзүмүзә һансы суаллары вермәлијик? б) Аллаһын рәһбәрлијинин үстүнлүјү артыг индидән нәдән бәллидир?
14 «Аллаһын Исраили»нин мәсһ олунмуш үзвләриндән бәзиләри һәлә јер үзүндәдирләр вә онлар Исанын гардашлары кими, ‘Мәсиһин сәфирләри’ гисминдә чыхыш едирләр (2 Кор. 5:20). Онлар садиг вә ағыллы гул синфи тәјин олунублар ки, мәсһ олунмушларын, о ҹүмләдән сајы ҝет-ҝедә артан вә јер үзүндә јашамаг үмидинә малик олан милјонларла мәсиһчиләрин гајғысына галсын вә онлары руһани гида илә тәмин етсинләр (Мат. 24:45—47; Вәһј 7:9—15). Јеһованын бу гурулуша хејир-дуа вермәси Онун һәгиги хидмәтчиләринин руһани фираванлығындан ҝөрүнүр.
15 Һәр биримиз өзүмүздән сорушмалыјыг: «Мәсиһчи јығынҹағында нә етмәли олдуғуму дәрк едирәмми? Јеһованын рәһбәрлијини лајигинҹә дәстәкләјирәмми? Јеһованын һөкмранлыг едән Падшаһлығынын тәбәәси олдуғумла фәхр едирәмми? Әлимдән ҝәлдији гәдәр Аллаһын Падшаһлығыны бәјан етмәк гәрарымда әзмлијәмми?» Биз, бир груп кими, Рәһбәрлик Шурасындан алдығымыз рәһбәрлији һәвәслә изләјир вә јығынҹагда тәјин олунмуш ағсаггалларла әмәкдашлыг едирик. Бунунла биз Аллаһын рәһбәрлијинә табе олдуғумузу ҝөстәририк. (Ибраниләрә 13:17 ајәсини оху.) Парчаланмыш дүнјада тәзаһүр етдирдијимиз итаәткарлыг руһу сајәсиндә надир үмумдүнја бирлијимиз мөвҹуддур. Бунун сајәсиндә арамызда һәм дә сүлһ вә салеһлик һөкм сүрүр вә бу, Јеһованын рәһбәрлијинин ән јахшы рәһбәрлик олдуғуну ҝөстәрәрәк Она иззәт ҝәтирир.
Јеһованын рәһбәрлији зәфәр чалыр
16. Бу ҝүн һәр бир инсан һансы гәрары вермәлидир?
16 Еден бағында галдырылан мәсәләләрин һәлл олунаҹағы вахт сүрәтлә јахынлашыр. Буна ҝөрә дә инди гәрар вермәк вахтыдыр. Һәр бир инсан ја Јеһованын, ја да инсан һакимијјәтләринин тәрәфини тутаҹағына гәрар вермәлидир. Һәлим инсанлара дүзҝүн гәрар вермәкдә көмәк етмәк бизим үчүн шәрәфдир. Тезликлә Һар-Меҝидонда Шејтанын тәсири алтында олан инсан һакимијјәтләри Јеһованын һакимијјәти илә һәмишәлик әвәз олунаҹаг (Дан. 2:44; Вәһј 16:16). Инсан һакимијјәтләринә сон гојулаҹаг, Аллаһын Падшаһлығы исә бүтүн Јер күрәси үзәриндә һөкмранлыг едәҹәк. Сөзүн әсил мәнасында Јеһованын рәһбәрлијинә бәраәт газандырылаҹаг. (Вәһј 21:3—5 ајәләрини оху.)
17. Һәлим инсанлара һөкмранлыға даир дүзҝүн гәрар вермәкдә нә көмәк едә биләр?
17 Һәлә Јеһованын тәрәфини там тутмајанлар дуа едәрәк Аллаһын инсанлар үзәриндә рәһбәрлијинин ҝәтирәҹәји хејир-дуалар барәдә дүшүнмәлидирләр. Инсан һакимијјәтләри ҹинајәткарлығын вә терроризмин гаршысында аҹиздирләр. Аллаһын һакимијјәти бүтүн пислик едәнләри јер үзүндән силәҹәк (Мәз. 37:1, 2, 9). Инсан һакимијјәти арасыкәсилмәјән мүһарибәләрә ҝәтириб чыхарыб; Аллаһын һакимијјәти исә ‘јерин уҹгарларынадәк дөјүшләри дајандыраҹаг’ (Мәз. 46:9). Аллаһын һакимијјәти һәтта инсанларла һејванлар арасында да сүлһү бәрпа едәҹәк! (Јешаја 11:6—9). Инсан рәһбәрлији заманы даима јохсуллуг вә аҹлыг олмушдур, амма Аллаһын һакимијјәти буна сон гојаҹаг (Јешаја 65:21). Һәтта ән јахшы нијјәтлә һәрәкәт едән инсанлар белә хәстәлији вә өлүмү арадан галдырмаға мүвәффәг олмамышлар; Аллаһын һакимијјәти алтында исә јашлы вә хәстә инсанлар јенидән ҝәнҹлик чағларына гајыдаҹаглар (Әјј. 33:25; Јешаја 35:5, 6). Һәгигәтән дә, бүтүн јер үзү Ҹәннәтә чевриләҹәк вә һәтта өлән инсанлар һәјата гајтарылаҹаглар (Лука 23:43, ЈД; Һәв. иш. 24:15).
18. Аллаһын рәһбәрлијинин ән јахшы рәһбәрлик олдуғуна инандығымызы неҹә ҝөстәрә биләрик?
18 Бәли, Шејтан улу валидејнләримизи Јараданларындан үз дөндәрмәјә тәһрик етдикдән бәри төрәтдији бүтүн писликләри Аллаһын һакимијјәти арадан галдыраҹаг. Бир дүшүнүн, Шејтанын тәхминән 6 000 илә вурдуғу зәрәри Аллаһ Мәсиһ васитәсилә 1 000 илә арадан галдыраҹаг! Бу, Аллаһын рәһбәрлијинин үстүнлүјүнә неҹә дә ҝөзәл сүбутдур! Аллаһын Шаһидләри олан бизләр Ону Өз Рәһбәримиз кими гәбул едирик. Буна ҝөрә дә ҝәлин һәр ҝүн, һәр саат Јеһованын хидмәтчиләри вә Онун Падшаһлығынын тәбәәләри олдуғумузу ҝөстәрәк вә Онун Шаһидләри олмағымызла фәхр едәк. Ҝәлин һәр фүрсәтдән истифадә едәрәк гулаг асмаг истәјәнләрә тәблиғ едәк вә Јеһованын рәһбәрлијинин ән јахшы рәһбәрлик олдуғуну вурғулајаг.
Нөвбәти ајәләрдән Аллаһын һөкмранлығы барәдә нә өјрәндиниз?
• Вәһј 21:3—5.
[29-ҹу сәһифәдәки шәкилләр]
Јеһова һөкмранлыг етмәк һүгугундан һеч вахт имтина етмәмишдир
[31-ҹи сәһифәдәки шәкил]
Јеһованын рәһбәрлијинә табе олдуғумузун сајәсиндә надир үмумдүнја бирлијимиз мөвҹуддур