Һәгиги ибадәтин гејрәтини чәк
«Мәһсул бол, ишчи исә аздыр» (МАТ. 9:37).
1. Бизә тәҹили иш тапшырыланда өзүмүзү неҹә һисс едирик вә неҹә давранырыг?
ТӘСӘВВҮР ЕТ ки, әлиндә ҝүнүн сонунадәк бир нәфәрә чатдырыласы сәнәд вар. Сән нә едәҹәксән? Онун үзәринә «ТӘҸИЛИ!» јазаҹагсан. Јахуд да сән ваҹиб бир ҝөрүшә ҝедирсән, амма ҝеҹикирсән. Бәс бу һалда нә едәҹәксән? Јәгин ки, сүрүҹүјә: «Хаһиш едирәм, бир аз тез олун. Бу ТӘҸИЛИДИР!» — дејә ону тәләсдирәҹәксән. Һәгигәтән дә, һәр һансы бир иши ҝөрәндә вә ону гуртармаг үчүн аз вахтымыз галанда дахилимиздә ҝәрҝинлик вә һәјәҹан һисс едирик. Һәјәҹан артдыгҹа ишимизи мүмкүн гәдәр тез вә сәјлә ҝөрмәјә чалышырыг. Бизә тәҹили, јәни тәхирәсалынмаз иш тапшырыланда өзүмүзү белә һисс едирик вә бу ҹүр давранырыг.
2. Бу ҝүн һәгиги мәсиһчиләр үчүн ән тәҹили иш һансыдыр?
2 Һәгиги мәсиһчиләр үчүн Падшаһлыг һаггында хош хәбәри тәблиғ етмәкдән вә бүтүн милләтләрин ичиндән шаҝирд һазырламагдан даһа тәҹили иш јохдур (Мат. 24:14; 28:19, 20). Исанын сөзләрини ситат ҝәтирән Марк бу ишин «әввәлҹә», јәни сонун ҝәлмәсиндән өнҹә јеринә јетирилмәли олдуғуну јазмышды (Марк 13:10). Бу, белә дә олмалыдыр, чүнки Иса демишдир: «Мәһсул бол, ишчи исә аздыр». Бичин вахты ҝөзләјә билмәз: мәһсул бичин вахтынын сонунадәк јығылыб гуртармалыдыр (Мат. 9:37).
3. Чохлары тәҹили олан тәблиғ ишиндә иштирак етмәк чағырышына неҹә һај верибләр?
3 Тәблиғ иши бу гәдәр ваҹиб олдуғундан чохлу вахт, ҝүҹ вә диггәт тәләб едир. Әксәр баҹы-гардашларын она мәһз бу ҹүр јанашмасы чох тәрифәлајигдир. Бәзиләри пионер, миссионер вә ја бет-елли кими таммүддәтли хидмәт етмәк үчүн һәјатларыны садәләшдирибләр. Онлар чох мәшғулдурлар. Бу баҹы-гардашлар чох шејдән кечмәли олурлар вә чохсајлы чәтинликләрлә гаршылашырлар. Бунунла белә, Јеһова онлары бол-бол хејир-дуаландырыр. Биз онлара ҝөрә чох севинирик. (Лука 18:28—30 ајәләрини оху.) Диҝәрләринин таммүддәтли хидмәтчиләр сырасына гошулмаға имканы олмаса да, ушагларына гәзәб ҝүнүндән гуртулмаға көмәк етмәји дә өзүнә дахил едән бу хиласедиҹи ишә мүмкүн гәдәр чох вахт сәрф етмәјә чалышырлар (Ганун. т. 6:6, 7).
4. Нәјә ҝөрә бәзиләри ишимизин тәхирәсалынмаз олдуғуну унуда биләрләр?
4 Ҝөрдүјүмүз кими, инсан ишин тәхирәсалынмаз вә ја тәҹили олдуғуну дәрк едәндә һәмин иши онун үчүн гојулмуш ҹәдвәл үзрә, јәни мүәјјән вахт чәрчивәси дахилиндә јеринә јетирмәјә чалышыр. Биз сон ҝүнләрдә јашајырыг вә буну һәм Мүгәддәс Китаб, һәм дә тарихи һадисәләр сүбут едир (Мат. 24:3, 33; 2 Тим. 3:1—5). Бунунла белә, һеч ким сонун нә заман ҝәләҹәјини дәгиг билмир. Иса «дөврүн јекунунун әламәти»ни тәшкил едән һадисәләрдән данышараг хүсусилә гејд етмишди ки, «о ҝүнү вә сааты һеч кәс билмир: нә ҝөјдәки мәләкләр, нә дә Оғул. Буну јалныз Ата билир» (Мат. 24:36). Буна ҝөрә дә бәзиләри, хүсусилә дә һәгигәтдә чохдан оланлар илләр өтдүкҹә Јеһованын ишинин тәхирәсалынмаз олдуғуну унуда биләрләр вә нәтиҹәдә, хидмәтдә сәјләри азала биләр (Сүл. мәс. 13:12). Сәндә дә һәрдән белә олурму? Әҝәр олурса, онда бизә Јеһова Аллаһын вә Иса Мәсиһин мәһз инди етмәјимизи истәдикләри ишә тәхирәсалынмаз бир иш кими бахмаға вә ону сәјлә иҹра етмәјә нә көмәк едә биләр?
Нүмунәмиз олан Иса Мәсиһә диггәт јетирәк
5. Иса хидмәтин тәхирәсалынмаз олдуғуну дәрк етдијини неҹә ҝөстәрмишди?
5 Јеһованын тапшырдығы ишин тәхирәсалынмаз олдуғуну ән чох дәрк едән вә бу иши ән бөјүк сәјлә јеринә јетирән шәхс, әлбәттә ки, Иса Мәсиһдир. Бу саһәдә бизә ән јахшы нүмунәни дә о гојуб. Нәјә ҝөрә Иса өз тапшырығына белә јанашырды? Сәбәбләрдән бири одур ки, о, үч ил јарым әрзиндә чох иш ҝөрмәли иди. Бунунла белә, Иса башгалары илә мүгајисәдә һәгиги ибадәт үчүн даһа чох иш ҝөрүб. О, Атасынын адыны, нијјәтини, Падшаһлыг һаггында хош хәбәри бәјан етмиш, дин рәһбәрләринин икиүзлүлүјүнү, јалан тәлимләрини ифша етмиш вә өлүмәдәк Аллаһын али һөкмранлығына садиг галмышдыр. О, Исраили гарыш-гарыш ҝәзиб инсанлара тәлим верир, онлара көмәк едир вә хәстәләри сағалдырды (Мат. 9:35). Һәлә һеч кәс белә гыса вахт әрзиндә бу гәдәр иш ҝөрмәјиб. Иса бу иш үчүн әлиндән ҝәләни әсирҝәмирди (Јәһ. 18:37).
6. Иса һәјатда бүтүн фикрини нәјә јөнәлтмишди?
6 Исаны усанмадан хидмәт етмәјә нә тәшвиг едирди? Даниелин пејғәмбәрлијиндән Иса Јеһованын бу ишә нә гәдәр вахт ајырдығыны дәгиг билирди (Дан. 9:27). Орада дејилдији кими, онун хидмәти «једдииллик дөврүн ортасында», јәни үч ил јарымдан сонра сона јетмәли иди. Иса ерамызын 33-ҹү илинин јазында Јерусәлимә тәнтәнәли сурәтдә дахил оландан бир гәдәр сонра демишди: «Инсан оғлунун шөһрәтләнмәк вахты ҝәлди» (Јәһ. 12:23). Иса өлүмүнүн гачылмаз олдуғуну билсә дә, бүтүн диггәтини буна ҹәмләмирди. Онун сәјлә чалышмасынын әсас сәбәби дә мәһз бу иди. Әксинә, о, бүтүн диггәтини Атасынын ирадәсини јеринә јетирмәјә вә инсанлара мәһәббәт ҝөстәрмәјә јөнәлтмишди вә бунун үчүн дә һәр фүрсәтдән истифадә едирди. Бу мәһәббәт ону шаҝирд топламаға, онлара тәлим вериб тәблиғ сәјаһәтинә ҝөндәрмәјә тәшвиг едирди. Шаҝирдләр онун бүнөврәсини гојдуғу тәблиғ ишини ҝәләҹәкдә давам етдирәҹәк вә даһа бөјүк ишләри ҝөрәҹәкдиләр. (Јәһја 14:12 ајәсини оху.)
7, 8. Иса сатыҹылары вә сәррафлары мәбәддән гованда шаҝирдләринин јадына нә дүшдү вә нәјә ҝөрә Иса буну етди?
7 Исанын һәјатында баш верән бир һадисә онун һәгиги ибадәтин гејрәтини нә дәрәҹәдә чәкдијини чох ҝөзәл ҝөстәрир. Һәмин һадисә онун хидмәтинин әввәлиндә, ерамызын 30-ҹу илинин Пасха бајрамы заманы баш вермишди. Иса шаҝирдләри илә бирҝә Јерусәлимдәки мәбәдә ҝәләркән орада «мал-гара, гојун вә ҝөјәрчин сатанлары, һәмчинин отуруб сәррафлыг едәнләри ҝөрдү». Иса нә етди вә бу, онун шаҝирдләринә неҹә тәсир ҝөстәрди? (Јәһја 2:13—17 ајәләрини оху.)
8 Исанын о заман дедији сөзләр вә етдији һәрәкәтләр там јериндә олараг шаҝирдләринә Давудун пејғәмбәрлик кими сөјләдији бир мәзмуру хатырлатды: «Евинин гејрәти мәни јандырыб-јахды» (Мәз. 69:9). Нәјә ҝөрә онлар бу сөзләри јадларына салмышдылар? Чүнки Исанын ҝөрдүјү бу иш чох тәһлүкәли иди. Орада ҝедән биабырчы алверин архасында мәбәдин нүфузлу шәхсләри — каһинләр, мирзәләр вә башгалары дурурду. Онларын чиркин нијјәтләрини ифша етмәклә вә онлара мане олмагла Иса бу нүфузлу шәхсләрин дүшмәнинә чеврилди. Шаҝирдләрин тамамилә һаглы олараг гејд етдикләри кими, Аллаһын «евинин гејрәти», јәни һәгиги ибадәт үчүн онун ҝөстәрдији гејрәт ҝөз габағында иди. Гејрәт нәдир?
Гејрәт нәдир?
9. Гејрәт сөзүнү неҹә изаһ етмәк олар?
9 Бир лүғәтә әсасән, «гејрәт» «фөвгәладә сәј, ҹәһд, чалышма» демәкдир вә бу сөзүн «ҹошгунлуг, гызғынлыг, шөвг» кими синонимләри вар. Әлбәттә, Исанын јер үзүндәки хидмәтини бу сөзләрлә тәсвир етмәк олар. Чох мараглыдыр ки, бәзи шәрг дилләриндә «гејрәт» сөзү һәрфи мәнасы «исти үрәк» олан вә санки, үрәјин ичиндә алов јандығыны ҝөстәрән ики сөздән ибарәтдир. Буна ҝөрә дә шаҝирдләрин Исанын мәбәддә етдикләрини ҝөрәндә Давудун сөзләрини хатырламалары тәәҹҹүблү дејил. Исанын үрәјинин од кими алышыб-јанмасына вә онун бу ҹүр һәрәкәт етмәсинә сәбәб нә иди?
10. Мүгәддәс Китабда истифадә олунан «гејрәт» сөзү һансы мәнаны дашыјыр?
10 Давудун мәзмурда истифадә етдији «гејрәт» сөзүнә Мүгәддәс Китабын бир чох јерләриндә раст ҝәлинир вә бу сөз дәрин мәна дашыјыр. (Чыхыш 20:5; 34:14; Јешуа 24:19 ајәләрини оху.) Бир Мүгәддәс Китаб лүғәтиндә изаһ олундуғу кими, «гејрәт» сөзү чох вахт әр вә арвад арасындакы мүнасибәтләрлә әлагәдар ишләнир. Әрлә арвадын бир-биринин үзәриндә ихтијары олдуғу кими, Јеһоваја мәхсус оланларын да ихтијары Онун әлиндәдир вә О, Өз һүгугуну ирәли сүрүр вә мүдафиә едир. Беләликлә, Мүгәддәс Китабда «гејрәт» сөзү һансыса ишлә мәшғул оларкән, мәсәлән, севимли идман нөвүнә пәрәстишкарлыг едәркән инсанын ҝөстәрдији ҹошғун һәвәсдән даһа бөјүк мәна кәсб едир. Давуд «гејрәт» сөзүнү мүсбәт мәнада истифадә етмишди, јәни о, рәгабәтә, истеһзаја гаршы дөзүмсүзлүјү, тәмиз ады горумаға вә әдаләтсизлији арадан галдырмаға даир ҝүҹлү истәји нәзәрдә тутурду.
11. Исаны гејрәт ҝөстәрмәјә нә тәшвиг едирди?
11 Исанын мәбәддә етдикләринин шаһиди олан шаҝирдләр там һаглы олараг Давудун сөзләрини она аид етмишдиләр. Иса јалныз Аллаһын тапшырығыны мүәјјән вахт чәрчивәси дахилиндә јеринә јетирмәли олдуғуну билдији үчүн јох, Атасынын адынын вә һәгиги ибадәтин гејрәтини чәкдији үчүн бу ишә бүтүн гүввәсини сәрф едирди. О, Аллаһын адына күфр едилдијини ҝөрәндә гејрәт ону мөвҹуд вәзијјәти дүзәлтмәјә тәшвиг едирди. Иса дин рәһбәрләринин тәвазөкар инсанлара зүлм вердијини вә онлары истисмар етдијини ҝөрәндә гејрәт ону инсанларын изтирабларыны јүнҝүлләшдирмәјә вә залым дин рәһбәрләрини мүһакимә етмәјә тәшвиг едирди (Мат. 9:36; 23:2, 4, 27, 28, 33).
Һәгиги ибадәтин гејрәтини чәк
12, 13. а) Христиан аләминин дин рәһбәрләри Аллаһын адыны инсанлардан неҹә ҝизләдирләр? б) Христиан аләминин руһаниләри Аллаһын Падшаһлығыны инсанларын ҝөзүндән неҹә салырлар?
12 Һал-һазырда дүнјада һөкм сүрән дини вәзијјәт Исанын јашадығы дөврдәки дини вәзијјәтә охшајыр, бәлкә дә, ондан да писдир. Бир нүмунәјә нәзәр салаг. Иса давамчыларына дуа етмәји өјрәдәркән илк әввәл Аллаһын ады барәдә дуа етмәји тапшырмышды: «Гој адын мүгәддәс тутулсун» (Мат. 6:9). Бәс дин рәһбәрләри, хүсусилә дә Христиан аләминин руһаниләри инсанлара Аллаһын адыны вә бу ады мүгәддәс тутмағы, јәни она һөрмәт етмәји өјрәдирләрми? Әксинә, онлар Үч үгнум, өлмәз руһ вә ҹәһәннәм кими јалан тәлимләр јајараг Аллаһы јанлыш олараг мүәммалы, дәркедилмәз, гәддар, һәтта башгаларына ишҝәнҹә вермәкдән һәзз алан бир шәхс кими тәгдим едирләр. Онларын биабырчы һәрәкәтләри вә икиүзлүлүјү Аллаһын адыны рүсвај едир. (Ромалылара 2:21—24 ајәләрини оху.) Үстәлик, онлар Аллаһын шәхси адыны ҝизли сахламаг үчүн һәр үсула әл атырлар, һәтта өз Мүгәддәс Китаб тәрҹүмәләриндән Онун адыны ҝөтүрүрләр. Бунунла онлар инсанлара Аллаһа јахынлашмаға вә Онунла шәхси мүнасибәт гурмаға манечилик төрәдирләр (Јаг. 4:7, 8).
13 Иса һәмчинин өз давамчыларына Аллаһын Падшаһлығы һаггында дуа етмәји өјрәдирди: «Гој падшаһлығын ҝәлсин. Гој Сәнин ирадән ҝөјдә олдуғу кими, јердә дә јеринә јетсин» (Мат. 6:10). Христиан аләминин дин рәһбәрләри бу дуаны тез-тез тәкрарласалар да, ҹамааты сијаси вә диҝәр инсан тәшкилатларыны дәстәкләмәјә тәшвиг едирләр. Үстәлик, онлар Падшаһлыг һаггында тәблиғ етмәјә чалышанлара вә бу барәдә шаһидлик едәнләрә һәгарәтлә бахырлар. Буна ҝөрә дә өзүнү Мәсиһин давамчысы адландыранларын әксәријјәти Аллаһын Падшаһлығына инанмыр, галды ки онун һаггында данышсынлар.
14. Христиан аләминин дин рәһбәрләри Аллаһын Кәламыны дәјәрдән неҹә салыблар?
14 Иса Аллаһа дуа едәркән ајдын шәкилдә демишди: «Сәнин сөзүн һәгигәтдир» (Јәһ. 17:17). Иса ҝөјләрә гајытмаздан әввәл, инсанлары руһани гида илә тәмин едәҹәк «садиг вә ағыллы нөкәр» тәјин едәҹәјини билдирмишди (Мат. 24:45). Христиан дүнјасынын руһаниләри Аллаһын Кәламыны өјрәтдикләрини иддиа етсәләр дә, Ағанын тапшырдығы бу иши сәдагәтлә һәјата кечирирләрми? Хејр. Онлар Мүгәддәс Китаба нағыллар вә әфсанәләр топлусу дамғасыны вурублар. Инсанлары тәсәлливериҹи вә маарифләндирән руһани гида илә тәмин етмәк әвәзинә, дин рәһбәрләри онларын бејнини гулаға хош ҝәлән инсан фәлсәфәси илә долдурурлар. Бүтүн бунлар аз имиш кими, онлар јени мәнәви дәјәрләрлә ајаглашмаг хатиринә Аллаһын әхлаг нормаларыны гурбан вермишләр (2 Тим. 4:3, 4).
15. Дин хадимләринин Аллаһын ады наминә етдикләрини ҝөрәндә һансы һиссләри кечирирсән?
15 Христиан дүнјасынын руһаниләринин етдикләрини нәзәрә алсаг, (дедикләринә ҝөрә, бунлары Аллаһын ады наминә едибләр) бир чох сәмими инсанларын мәјус олмалары, јахуд да Аллаһа вә Мүгәддәс Китаба олан иманларыны тамамилә итирмәләри тәәҹҹүблү дејил. Онлар Шејтанын вә онун пис дүнјасынын гурдуғу тәләјә дүшмүшләр. Ҝүнбәҝүн белә шејләри ҝөрәндә вә ја ешидәндә бу, сәнә неҹә тәсир едир? Јеһованын бир хидмәтчиси кими, Онун адына гара јахылдығыны ешидәндә мәҝәр Ону мүдафиә етмәк үчүн әлиндән ҝәләни етмәк истәмирсән? Сәмими, тәмизүрәкли инсанларын алдадылдығыны вә дин рәһбәрләринин онлары мәнафеләри наминә истифадә етдикләрини ҝөрәндә мәҝәр үрәјиндә онлара тәсәлли вермәк истәји јаранмыр? Иса адамларын «чобансыз гојунлар кими јазыг вә пәракәндә һалда» олдугларыны ҝөрәндә јалныз онларын һалына аҹымады. О, «онлара чох шејләр өјрәтмәјә башлады» (Мат. 9:36; Марк 6:34). Иса кими, бизим дә һәгиги ибадәтин гејрәтини чәкмәк үчүн там әсасымыз вар.
16, 17. а) Бизи ҹанла-башла вә вар ҝүҹүмүзлә хидмәт етмәјә нә тәшвиг етмәлидир? б) Нөвбәти мәгаләдә биз нә мүзакирә едәҹәјик?
16 Биз хидмәтә сәјлә јанашанда һәвари Павелин 1 Тимотејә 2:3, 4 ајәләриндә јаздығы сөзләр бизим үчүн хүсуси әһәмијјәт кәсб етмәјә башлајыр. (Ајәләри оху.) Бизим сәјлә хидмәт етмәјимизин јеҝанә сәбәби ахыр ҝүнләрдә јашадығымызы билмәјимиз дејил. Бундан әлавә, биз дәрк едирик ки, бу, Аллаһын ирадәсидир. О, бүтүн инсанларын Она дүзҝүн ибадәт вә хидмәт етмәләри, һәмчинин бунунла бағлы хејир-дуалары алмалары үчүн һәгиги билијә јијәләнмәләрини истәјир. Биз јалныз вахтын түкәнмәк үзрә олдуғу үчүн јох, Аллаһын адыны шәрәфләндирмәјә, һәмчинин инсанлара Онун ирадәсини өјрәнмәјә көмәк етмәк истәдијимиз үчүн ҹанла-башла хидмәтдә иштирак едирик. Биз һәгиги ибадәтин гејрәтини чәкирик (1 Тим. 4:16).
17 Јеһова Өз халгы олан бизләрә бәшәријјәтә вә Јер күрәсинә даир нијјәти барәдә һәгигәти ачыглајыб. Мәҝәр бу, хејир-дуа дејил? Биз инсанлара хошбәхтлији вә ҝәләҹәјә һәгиги үмиди тапмаға көмәк едә биләрик. Шејтан дүнјасы мәһв едилән заман сағ галмағын неҹә мүмкүн олдуғуну биз онлара дејә биләрик (2 Салон. 1:7—9). Јеһованын ҝүнүнүн ҝеҹикдијини фикирләшәрәк мәјуслуға гапылмаг әвәзинә, биз севинмәлијик ки, бизим һәлә вахтымыз вар вә биз һәгиги ибадәтин гејрәтини чәкә биләрик (Мик. 7:7; Һаб. 2:3). Бу ҹүр гејрәтә неҹә јијәләнә биләрик? Буну нөвбәти мәгаләдә мүзакирә едәҹәјик.
Изаһ едә биләрсинизми?
• Исаны усанмадан хидмәт етмәјә нә тәшвиг едирди?
• Мүгәддәс Китабда «гејрәт» сөзү һансы мәнада истифадә олунур?
• Һал-һазырда ҝөрдүјүмүз һансы һадисәләр бизә һәгиги ибадәтин гејрәтини чәкмәјә тәшвиг етмәлидир?
[8-ҹи сәһифәдәки шәкил]
Иса бүтүн диггәтини Атасынын ирадәсинин јеринә јетирмәјә вә инсанлара мәһәббәт ҝөстәрмәјә јөнәлтмишди
[10-ҹу сәһифәдәки шәкил]
Һәгиги ибадәтин гејрәтини чәкмәк үчүн бизим там әсасымыз вар