Пис дүнјада «мүвәггәти сакин»ләр
«Иманла... онлар... о торпагда гәриб вә мүвәггәти сакин олдугларыны бәјан етдиләр» (ИБР. 11:13).
1. Иса шаҝирдләринин бу дүнјаја гаршы тутаҹаглары мөвге барәдә нә демишди?
ИСА шаҝирдләри барәдә: «Онлар... дүнјададырлар», — демишди. Лакин сонра әлавә етди: «Мән дүнјаја мәхсус олмадығым кими, онлар да дүнјаја мәхсус дејилләр» (Јәһ. 17:11, 14). Бунунла Иса һәгиги давамчыларынын Шејтан Иблисин идарә етдији бу дүнјаја гаршы һансы мөвге тутмалы олдугларыны ачыг-ајдын ҝөстәрди (2 Кор. 4:4). Онлар бу пис дүнјада јашамалы олсалар да, онун бир һисси олмајаҹагдылар. Онлар бу дүнјада «гәриб вә мүвәггәти сакин» кими јашајаҹагдылар (1 Пет. 2:11).
Онлар «мүвәггәти сакин» идиләр
2, 3. Нәјә ҝөрә демәк олар ки, Ханок, Нуһ, Ибраһим вә Сара бу дүнјада «гәриб вә мүвәггәти сакин» кими јашајырдылар?
2 Аллаһын садиг хидмәтчиләри бу аллаһсыз дүнјанын сакинләриндән һәр заман фәргләнибләр. Дашгындан әввәл јашамыш Ханок вә Нуһ «Аллаһла бир јол ҝедирди»ләр (Јар. 5:22—24; 6:9). Онларын һәр икиси дә Јеһованын Шејтанын пис дүнјасына гаршы чыхардығы һөкмләри ҹәсарәтлә бәјан едирди. (2 Петер 2:5; Јәһуда 14, 15 ајәләрини оху.) Ханок Аллаһын рәғбәтини газанмышды, Нуһу исә Аллаһ һәмин нәсил арасында гүсурсуз адам һесаб едирди, чүнки һәр икиси пис дүнјада Онунла јеријирди (Ибр. 11:5; Јар. 6:9).
3 Аллаһын әмринә бојун әјәрәк Ибраһимлә Сара халдејлиләрин Ур шәһәриндәки раһат евләрини тәрк едиб јад јердә көчәри һәјат сүрмәјә разы олдулар (Јар. 11:27, 28; 12:1). Һәвари Павел јазмышды: «Ибраһим, иманы сајәсиндә, Аллаһ тәрәфиндән чағырыланда итаәт едиб мирас алаҹағы торпаға јолланды. О, һара ҝетдијини билмәсә дә, јола дүшдү. О, иманы сајәсиндә вәд дијарында санки гүрбәтдә имиш кими, гәриб тәк өмүр сүрдү. Өзү илә ејни вәдә варис олан Исһаг вә Јагубла бирликдә чадырларда јашады» (Ибр. 11:8, 9). Јеһованын белә садиг хидмәтчиләри барәсиндә Павел демишди: «Бу адамларын һамысы һәјаты иманла баша вурдулар. Онлар вәд едилән шејләри алмасалар да, онлары узагдан ҝөрдүләр вә алгышладылар, һәмчинин о торпагда гәриб вә мүвәггәти сакин олдугларыны бәјан етдиләр» (Ибр. 11:13).
Исраиллиләрә хәбәрдарлыг
4. Исраиллиләр Вәд едилмиш дијарда мәскән салмамышдан әввәл Јеһова онлара һансы хәбәрдарлығы вермишди?
4 Ибраһимин нәслиндән олан исраиллиләр хејли чохалыб бир халг олдулар; онларын ганунлары вә өз торпаглары вар иди (Јар. 48:4; Ганун. т. 6:1). Исраил халгы һеч вахт унутмамалы иди ки, јашадыглары торпагларын әсил Саһиби Јеһовадыр (Лев. 25:23). Онлар кирајәчи кими, Саһибкарын гојдуғу гајда-ганунлара һөрмәтлә јанашмалы идиләр. Үстәлик, исраиллиләр јадда сахламалы идиләр ки, «инсан јалныз чөрәклә» јашамаз вә һәмчинин мадди фираванлыгларынын Јеһованы унутмаларына ҝәтириб чыхармасына јол вермәмәли идиләр (Ганун. т. 8:1—3). Онлар Вәд едилмиш дијарда мәскунлашмаздан өнҹә, Јеһова онлара хәбәрдарлыг етмишди: «Аллаһын Рәбб сәни ата-бабаларын Ибраһимә, Исһага, Јагуба етдији анда ҝөрә верәҹәји торпаға апараҹаг. Орада инша етмәдијин бөјүк вә ҝөзәл шәһәрләр, јығмадығын ҝөзәл шејләрлә долу евләр, зәһмәтини чәкмәдијин газылмыш су гујулары, салмадығын үзүмлүкләр вә зејтунлуглар вар. Јејиб-дојанда исә диггәтли ол... Рәбби унутма» (Ганун. т. 6:10—12).
5. Нәјә ҝөрә Јеһова Исраили рәдд етди вә һансы халга лүтф ҝөстәрмәјә башлады?
5 Бу хәбәрдарлыг әсассыз дејилди. Неһемјанын ҝүнләриндә бир груп левили исраиллиләрин Вәд едилмиш дијара ҝәлдикдән сонра етдикләри һәрәкәтләри хәҹаләтлә хатырлајырды. Раһат евләри, боллуҹа гида вә шәраблары олдугдан сонра онлар «јејиб дојдулар [вә] көкәлдиләр». Исраиллиләр Аллаһа гаршы үсјан галдырырдылар, һәтта онлара хәбәрдарлыг етмәк мәгсәдилә ҝөндәрилән пејғәмбәрләри гәтлә јетирирдиләр. Буна ҝөрә дә Јеһова онлары дүшмән халглара тәслим едирди. (Неһемја 9:25—27 ајәләрини оху; Һушә 13:6—9.) Ромалыларын әсарәти алтында оларкән исә имансыз јәһудиләр һәтта вәд едилмиш Мәсиһи өлдүрмәкдән белә чәкинмәдиләр! Јеһова о халгдан үз дөндәриб јени халга — руһани Исраилә лүтф ҝөстәрмәјә башлады (Мат. 21:43; Һәв. иш. 7:51, 52; Галат. 6:16).
«Сиз дүнјаја мәхсус дејилсиниз»
6, 7. а) Исанын шаҝирдләринин бу дүнјаја гаршы тутдуглары мөвгејә даир дедикләрини неҹә изаһ едәрдиниз? б) Нәјә ҝөрә һәгиги мәсиһчиләр Шејтанын дүнјасына гајнајыб-гарышмамалы идиләр?
6 Бу мәгаләнин әввәлиндә гејд олундуғу кими, мәсиһчи јығынҹағынын Башы Иса Мәсиһ ајдын ҝөстәрмишди ки, онун давамчылары Шејтанын пис дүнјасына гајнајыб-гарышмајаҹаглар. Өлүмүндән бир гәдәр әввәл о, шаҝирдләринә бу сөзләри демишди: «Сиз бу дүнјаја мәхсус олсајдыныз, дүнја сизи севәрди. Мән сизи сечдијим үчүн сиз дүнјаја мәхсус дејилсиниз. Буна ҝөрә дә дүнја сизә нифрәт едир» (Јәһ. 15:19).
7 Мәсиһчилик јајылдыгҹа Исанын давамчылары дүнјанын әмәлләрини мәнимсәјәрәк онун бир һиссәсинә чеврилмәли идиләрми? Хејр! Һарада јашамаларындан асылы олмајараг, онлар Шејтанын дүнјасындан сечилмәли идиләр. Мәсиһин өлүмүндән тәхминән 30 ил сонра һәвари Петер Рома империјасынын мүхтәлиф јерләриндә јашајан мәсиһчиләрә јазмышды: «Әзизләрим, гәриб вә мүвәггәти сакин олан сизләрдән риҹа едирәм: ҹанынызла савашан ҹисмани истәкләрдән узаг дурун. Башга милләтләрин арасында бундан сонра да нүмунәви давранын» (1 Пет. 1:1; 2:11, 12).
8. Бир тарихчи еркән мәсиһчиләрин дүнјаја гајнајыб–гарышмадыглары барәдә нә јазыб?
8 Еркән мәсиһчиләрин Рома империјасында «гәриб вә мүвәггәти сакин» кими јашадыгларыны тәсдиг едән тарихчи Кеннет Скотт Латурет јазыр: «Тарихи факт кими һамыја мәлумдур ки, мәсиһчиләри илк 300 ил әрзиндә дурмадан, бәзән исә амансызҹасына тәгиб едирдиләр... Онлара гаршы мүхтәлиф иттиһамлар ирәли сүрүлүрдү. Мәсиһчиләр бүтпәрәстлик ајинләриндә иштирак етмәкдән имтина етдикләри үчүн онлара атеист дамғасы вурмушдулар. Онлар ҹәмијјәтин һәјат тәрзинә дахил олан чох шејләрдән — бүтпәрәст инанҹларла, адәт-әнәнәләрлә вә әхлагсызлыгла долу олан бајрамлардан вә иҹтимаи әјләнҹәләрдән кәнар дурурдулар, буна ҝөрә дә онлары әлә салараг бәшәријјәтә нифрәт едәнләр адландырырдылар».
Дүнјадан там шәкилдә бәһрәләнмәјин
9. Һәгиги мәсиһчиләрин инсанлары севмәси нәдән бәллидир?
9 Бәс бизим ҝүнләр барәдә нә демәк олар? Еркән мәсиһчиләр кими, биз дә «бу пис» дүнјадан узаг дуруруг (Галат. 1:4). Бу сәбәбдән чохлары бизи баша дүшмүр, бәзиләри исә һәтта бизә нифрәтлә јанашырлар. Бунунла белә, биз «бәшәријјәтә нифрәт едәнләр» дејилик. Инсанлара мәһәббәтдән ирәли ҝәләрәк, биз евдән-евә тәблиғ едирик вә чалышырыг ки, «Падшаһлыг һаггындакы» хош хәбәри һәр бир адама чатдыраг (Мат. 22:39; 24:14). Чүнки биз әминик ки, Мәсиһин рәһбәрлији алтында олан Јеһованын Падшаһлығы тезликлә гејри-камил инсан һөкумәтләринә сон гојараг әдаләтли јени дүнја гураҹаг (Дан. 2:44; 2 Пет. 3:13).
10, 11. а) Биз бу дүнјадан неҹә истифадә едирик? б) Һансы мәнада ајыг-сајыг мәсиһчиләр бу дүнјадан там шәкилдә бәһрәләнмирләр?
10 Бу пис дүнјанын сонунун јахын олдуғуну нәзәрә алараг, Јеһованын хидмәтчиләри олан бизләр дәрк едирик ки, бу дүнјада өзүмүз үчүн раһат шәраит гурмағын вахты дејил. Биз Павелин нәсиһәтинә әмәл едирик: «Гардашлар, буну да билин ки, артыг вахт азалыб. Буна ҝөрә дә... мал алан малы олмајан кими, бу дүнјадан бәһрәләнән, ондан там шәкилдә бәһрәләнмәјән кими олсун, чүнки бу дүнјанын сәһнәси дәјишир» (1 Кор. 7:29—31). Бәс онда мүасир мәсиһчиләр бу дүнјадан неҹә истифадә едирләр? Јүзләрлә дилләрдә Мүгәддәс Китаб һәгигәтләрини јајмаг үчүн мүасир технолоҝијалардан вә әлагә васитәләриндән јарарланмагла. Мәсиһчиләр доланышыг үчүн зәрури олан шејләрлә өзләрини тәмин етмәк мәгсәдилә ишләјирләр. Үстәлик, зәрури шејләр алырлар вә хидмәтләрдән истифадә едирләр. Бунунла белә, онлар дүнјадан там истифадә етмәкдән гачынырлар, јәни јол вермирләр ки, пул, иш вә әшјалар һәјатларында әсас јери тутсун. (1 Тимотејә 6:9, 10 ајәләрини оху.)
11 Ајыг-сајыг мәсиһчиләрин бу дүнјадан там истифадә етмәкдән чәкинмәләри али тәһсилә олан мүнасибәтләриндә дә өзүнү бүрузә верир. Бу дүнјада бир чох инсанлар али тәһсилә нүфузлу вә дәбдәбәли һәјата наил олмағын ән әсас васитәси кими бахырлар. Лакин бу дүнјада мүвәггәти сакин олан биз мәсиһчиләр тамамилә башга мәгсәдләрә ҹан атырыг вә «чох шеј» истәмирик (Јер. 45:5; Ром. 12:16). Биз Исанын давамчылары олдуғумуз үчүн онун сөјләдији хәбәрдарлыға диггәт јетиририк: «Ҝөзләринизи дөрд ачын вә өзүнүзү һәр ҹүр тамаһкарлыгдан горујун, чүнки инсанын вар-дөвләти башындан ашыб-дашса да, һәјаты бундан асылы дејил» (Лука 12:15). Ҝәнҹ мәсиһчиләр јадда сахламалыдырлар ки, Јеһоваја хидмәт бу һәјатда ән ваҹиб шејдир. Буна ҝөрә дә онлар диггәтләрини Јеһоваја бүтүн үрәкләри, ҹанлары, ағыллары вә вар ҝүҹләри илә хидмәт етмәјә јөнәлдәрәк зәрури тәләбатларыны өдәмәјә көмәк едәҹәк лазыми тәһсилә јијәләнмәлидирләр (Лука 10:27). Белә етмәклә онлар «Аллаһын ҝөзүндә» варлы олаҹаглар. (Лука 12:21; Матта 6:19—21 ајәләрини оху.)
Өзүнүзү бу дөврүн гајғылары илә ағырлашдырмајын
12, 13. Исанын Матта 6:31—33 ајәләриндә јазылан сөзләринә әмәл етмәјимиз бизи бу дүнјанын инсанларындан неҹә фәргләндирир?
12 Јеһованын хидмәтчиләринин мадди шејләрә олан мүнасибәти дә фәрглидир. Бунунла әлагәдар Иса давамчыларына демишди: «“Нә јејәҹәјик?”, “нә ичәҹәјик?” вә ја “нә ҝејәҹәјик?”, — дејә һеч вахт нараһат олмајын. Чүнки бүтүн бунларын далынҹа башга милләтләр гачыр. Сизин сәмави Атаныз исә бүтүн бунлара еһтијаҹ дујдуғунузу билир. Беләликлә, падшаһлығы вә Аллаһын салеһлијини һәјатынызда һәмишә биринҹи јерә гојун, онда бүтүн бунлар да сизә вериләҹәк» (Мат. 6:31—33). Һәмиманлыларымызын бир чоху өз шәхси тәҹрүбәләриндән әмин олмушлар ки, сәмави Аталары онларын зәрури еһтијаҹларыны өдәјир.
13 «Әлиндәки илә кифајәтләнәрәк Аллаһ јолу илә јеримәк... бөјүк газанҹдыр» (1 Тим. 6:6, «Инҹил», 1996). Бу дүнјадакы инсанларын дүшүнҹә тәрзи исә тамамилә фәрглидир. Мәсәлән, бир чох ҝәнҹләр аилә һәјаты гураркән һазыра назир олмаг истәјирләр: онлар һәр ҹүр мебеллә тәҹһиз олунмуш раһат ев, ҝөзәл машын вә ән сон модел техники аваданлыглар арзулајырлар. Лакин бу дүнјада мүвәггәти сакин кими јашајан мәсиһчиләр нәфсләринә һаким олараг ајагларыны јорғанларына ҝөрә узадырлар. Һәмчинин тәрифәлајигдир ки, чохлары Јеһоваја хидмәтә даһа чох вахт вә ҝүҹ сәрф етмәк үчүн раһат шәраитләрини гурбан верирләр. Башгалары исә пионер, бет-елли, сәјјар хидмәтчи вә ја миссионер кими хидмәт едирләр. Биз һамымыз һәмиманлыларымызын үрәкдән Јеһоваја етдикләри хидмәти јүксәк гијмәтләндиририк!
14. Исанын әкинчи мәсәлиндән һансы ибрәт дәрси ҝөтүрә биләрик?
14 Иса әкинчи мәсәлиндә демишди ки, «бу дөврүн гајғылары вә вар-дөвләтин алдадыҹы гүввәси» бизим үрәјимиздә Аллаһын сөзүнү боға биләр вә онда о бар вермәјәҹәк (Мат. 13:22). Әҝәр биз бу дүнјада мүвәггәти сакин олмағымызла кифајәтләнсәк, бу тәләјә дүшмәјәҹәјик. Әксинә, ҝөзүмүз тох олаҹаг, јәни диггәтимиз јалныз бир мәгсәдә — Аллаһын Падшаһлығына јөнәләҹәк вә Онун мараглары һәјатымызда биринҹи јердә дураҹаг (Мат. 6:22).
«Дүнја... кечиб ҝедир»
15. Һәвари Јәһјанын һансы сөзләри һәгиги мәсиһчиләрин бу дүнјаја гаршы бахышларыны вә давранышыны мүәјјәнләшдирир?
15 Һәгиги мәсиһчи олан бизләрин бу дүнјада өзүмүзү «гәриб вә мүвәггәти сакин» һесаб етмәјимизин әсас сәбәбләриндән бири јашадығымыз системин мәһвинә аз галмасына даир әминликдир (1 Пет. 2:11; 2 Пет. 3:7). Бу әминлик гәрар, арзу вә мәгсәдләримизи мүәјјән едир. Һәвари Јәһја һәмиманлыларына мәсләһәт ҝөрүрдү ки, бу дүнјаны вә онда олан шејләри севмәсинләр, чүнки «дүнја өз истәкләри илә бәрабәр кечиб ҝедир, Аллаһын ирадәсини јеринә јетирән исә әбәди јашајыр» (1 Јәһ. 2:15—17).
16. Биз бир халг кими башгаларындан фәргләндијимизи неҹә ҝөстәрә биләрик?
16 Јеһова исраиллиләрә демишди ки, итаәткар олдуглары тәгдирдә бүтүн халглар арасындан Она мәхсус халг олаҹаглар (Чых. 19:5). Исраиллиләр Аллаһа садиг оланда онларын ибадәти вә һәјат тәрзи әтраф халгларынкындан фәргләнирди. Ејнилә бу ҝүн дә Јеһова Өзү үчүн Шејтан дүнјасындан олдугҹа фәргләнән бир халг тәшкил едиб. Мүгәддәс Китабда бизә дејилир: «Пислији вә бу дүнјаја хас истәкләри рәдд едиб бу зәманәдә сағлам дүшүнҹә, салеһлик вә Аллаһа сәдагәтлә һәјат [сүрүн]... Бөјүк Аллаһын вә Хиласкарымыз Мәсиһ Исанын шанлы зүһуруну вә сәадәт долу үмидимизин һәјата кечәҹәјини ҝөзләјәркән белә јашамалыјыг. Мәсиһ өзүнү уғрумузда фәда етди ки, бизи һәр ҹүр ганунсузлугдан гуртарыб тәмизләјәрәк өзү үчүн бир әмлак кими, јахшы ишләрә ҹан јандыран бир халг тәшкил етсин» (Тит. 2:11—14). Бу халг мәсһ олунмуш мәсиһчиләрдән вә онлара көмәк едән вә дәстәк олан Исанын милјонларла башга гојунларындан ибарәтдир (Јәһ. 10:16).
17. Нәјә ҝөрә мәсһ олунмуш мәсиһчиләр вә онларын әмәкдашлары бу пис дүнјада мүвәггәти сакин кими јашадыгларына ҝөрә һеч вахт пешман олмајаҹаглар?
17 Мәсһ олунмуш мәсиһчиләрин «сәадәт долу [үмиди]» Мәсиһлә бирликдә ҝөјдә падшаһлыг етмәкдән ибарәтдир (Вәһј 5:10). Башга гојунлар исә јер үзүндә әбәди јашамаға үмид едирләр. Онларын бу үмиди ҝерчәкләшәндә артыг онлар бу пис дүнјада мүвәггәти сакин олмајаҹаглар. Онларын ҝөзәл евләри, бол гидалары олаҹаг (Мәз. 37:10, 11; Јешаја 25:6; 65:21, 22). Исраиллиләрдән фәргли олараг, онлар бу бәхшишләрин «бүтүн дүнјанын Аллаһы» олан Јеһовадан олдуғуну һеч вахт унутмајаҹаглар (Јешаја 54:5). Нә мәсһ олунмушлар, нә дә башга гојунлар бу пис дүнјада мүвәггәти сакин кими јашадыгларына ҝөрә һеч вахт пешман олмајаҹаглар.
Неҹә ҹаваб верәрдиниз?
• Һансы мәнада гәдимдә јашамыш Аллаһын садиг хидмәтчиләри мүвәггәти сакин идиләр?
• Еркән мәсиһчиләр дүнјаја неҹә јанашырдылар?
• Һәгиги мәсиһчиләр һансы мәнада бу дүнјадан там бәһрәләнмирләр?
• Нәјә ҝөрә биз бу пис дүнјада мүвәггәти сакин кими јашадығымыза ҝөрә һеч вахт пешман олмајаҹағыг?
[18–ҹи сәһифәдәки шәкил]
Еркән мәсиһчиләр зоракылыгдан вә әхлагсыз әјләнҹәләрдән узаг дурурдулар