Онлар Аллаһын Кәламыны ҹәсарәтлә бәјан едирдиләр!
Тәгибләр гаршысында ҹәсарәт, һәтта шүҹаәт! «Аллаһын Падшаһлығы һаггында ‘әтрафлы шәһадәт верин’» вә «Јеһованын Шаһидләри — Аллаһын Падшаһлығынын мүждәчиләри» (рус.) китабларына бахсаг, ҝөрәҹәјик ки, бу хүсусијјәтләри һәгиги мәсиһчиләр тәзаһүр етдирирләр. Биринҹи әсрдәки һәмиманлыларымыз кими, биз дә Јеһованын сөзләрини ҹәсарәтлә данышмаг үчүн Ондан дуада мүгәддәс руһ вә көмәк диләјирик (Һәв. иш. 4:23—31).
Бир гардаш Биринҹи Дүнја мүһарибәси заманы тәблиғ иши һагда јазмышды: «Аллаһын хидмәтчиләри “Мүгәддәс Јазыларын тәдгиги” китабынын “Ачылмыш сирр” адлы једдинҹи ҹилдинин пајланмасында фәал сурәтдә иштирак едирдиләр. Бу иш мисли ҝөрүнмәмиш дәрәҹәјә ҝәлиб чатыб. 1918-ҹи илдә “Падшаһлыг һаггында хәбәр” адлы трактатын биринҹи нөмрәси дәрҹ олунмушду. Сонрадан бу трактатын икинҹи нөмрәси нәшр олунду вә орада “Ачылмыш сирр” китабынын һаким даирәләри тәрәфиндән нәјә ҝөрә гадаған олундуғу изаһ едилмишди. Даһа сонра исә бу силсиләдән олан трактатын үчүнҹү нөмрәси ишыг үзү ҝөрдү. Бу нәшрләр садиг мәсһ олунмушлар синфи тәрәфиндән ҝениш мигјасда пајланылмышды. “Падшаһлыг һаггында хәбәр” адлы трактаты пајламаг үчүн бөјүк иман вә ҹәсарәт лазым иди».
Бу ҝүн јени тәблиғчиләр, адәтән, тәлим кечирләр, анҹаг бу, һәмишә белә олмајыб. Бирләшмиш Штатларда јашајан бир полјак гардаш 1922-ҹи илдә илк дәфә саһә хидмәтинә чыхдығы заман башына ҝәлән һадисәни хатырлајараг јазмышды: «Мән әдәбијјаты неҹә пајламағы билмирдим. Үстәлик, инҝилис дилиндә дә ҝүҹ-бәла илә данышырдым. Тәк-тәнһа бир һәким отағынын гапысынын гаршысында дајаныб гапыны дөјдүм. Гапыны тибб баҹысы ачды. Һәмин һадисәни һеч вахт унутмарам, чүнки мән һәјәҹан вә горху ичиндә идим. Чантамы ачанда бүтүн китаблар тибб баҹысынын ајаглары алтына төкүлдү. Она нә дедијим һеч јадымда дејил, лакин она бир нәшр вердим. Ораны тәрк едәндән сонра ҹәсарәтләндим вә Јеһованын хејир-дуасыны үзәримдә һисс етдим. Һәмин ҝүн о ишҝүзар әразидә чохлу трактат пајладым».
Бир баҹы дејир: «Тәхминән 1933-ҹү илдә бир чох гардашлар Падшаһлыг һагда хош хәбәри јајмаг үчүн сәсҝүҹләндириҹи апаратуранын гурашдырылдығы машынлардан истифадә едирдиләр». Бир дәфә бу баҹы мәсиһчи әр-арвадла бирҝә АБШ-ын Калифорнија штатынын дағлыг әразисиндә тәблиғ едирди. Баҹы хатырлајыр: «Гардаш машыны дағын башына сүрдү. Биз исә дағын әтәјиндә јерләшән шәһәрдә галмышдыг. О, хош хәбәрин јазылдығы пластинканы охутмаға башлајанда сәс, санки, ҝөјдән ҝәлирди. Шәһәрин сакинләри ону нә гәдәр тапмаға чалышсалар да, ҹәһдләри боша чыхмышды. Јајым битәндә биз инсанлара баш чәкиб тәблиғ етдик. Мән сәсҝүҹләндириҹи апаратура илә тәҹһиз олунмуш башга ики машынла да хидмәт етмишәм. Инанын ки, инсанларын әксәријјәти бу хәбәри ешитмәк белә истәмирди. Лакин онларын башга сечими јох иди, чүнки бу ҹиһазларын васитәсилә сәсләнән хош хәбәр онларын евләриндә дә ешидилирди. Биз ҝөрүрдүк ки, Јеһова һәмишә мүнасиб үсулун мүнасиб вахтда истифадә едилмәсинин гајғысына галырды. Бу үсул һамымыздан бөјүк ҹәсарәт тәләб етсә дә, һәмишә өз мәгсәдинә чатырды вә Јеһованын ады иззәтләнирди».
1930-ҹу илләрдән башлајараг та 1940-ҹы илләрин әввәлинә гәдәр хидмәтдә фонографлардан вә пластинкалара јазылмыш Мүгәддәс Китаба әсасланан мәрузәләрдән истифадә едилирди. Бир мәсиһчи гадын хатырлајыр: «Ҝәнҹ бир баҹы фонографла евдән-евә тәблиғ едирди. О, бир гапы ағзында пластинканы охутмаға башлајанда евин саһиби олан киши о дәрәҹәдә гәзәбләнмишди ки, ајағы илә фонографы вурараг ејвандан ашағы салды. Хошбәхтликдән, пластинкаларын һеч бири сынмады. Јахынлыгда дуран јүк машынында наһар едән үч киши баш верәнләри ҝөрүб баҹыдан хаһиш етди ки, пластинкалары онлара охутсун вә сонра ондан әдәбијјат алдылар. Бу, пис рәфтарын әвәзини тамамилә өдәди». Белә сынаглара таб ҝәтирмәк үчүн ҹәсарәт тәләб олунурду.
Һәмин баҹы әлавә едир: «Јадыма ҝәлир, 1940-ҹы илләрдә күчәләрдә журнал пајламаг иши башлады. Бундан бир аз әввәл исә информасија јүрүшләри кечирилирди. Бир ҹәрҝәдә дүзүлмүш баҹы-гардашлар үзәрләриндә “Дин тәлә вә јаландыр”, еләҹә дә “Аллаһа вә Падшаһ Мәсиһә хидмәт един” шүарлары јазылан плакатларла сәки илә һәрәкәт едирдиләр. Ејни заманда онлар инсанлара пулсуз трактатлар пајлајырдылар. Хидмәтин бу нөвләриндә иштирак етмәк үчүн биздән ҹәсарәт тәләб олунса да, бу үсулларын сајәсиндә Јеһованын ады вә халгы даима инсанларын ҝөзү гаршысында иди».
Башга бир баҹы исә хатырлајыр: «Балаҹа шәһәрләрдә журнал пајламаг олдугҹа чәтин иди. Хидмәтин бу нөвү Јеһованын Шаһидләринә гаршы мүгавимәтләрин ҝүҹлү олдуғу вахта тәсадүф етмишди... Әлиндә журнал күчәләрин тининдә дуруб вә нәзәрдә тутулан шүарлары уҹа сәслә демәк үчүн, һәгигәтән дә, ҹәсарәт тәләб олунурду. Бунунла белә, биз надир һалларда шәнбә ҝүнләриндә хидмәтдән галырдыг. Бәзән сакинләр бизимлә мүлајим давранырдылар. Бәзән дә елә олурду ки, гәзәбли инсанлар бизи даирәјә алырдылар вә онларын һиддәтинә туш ҝәлмәмәк үчүн тез арадан чыхмаға чалышырдыг».
Јеһованын Шаһидләри Икинҹи Дүнја мүһарибәси дөврүндә тәгибләрә бахмајараг, өз хидмәтләрини ҹәсарәтлә давам етдирирдиләр. 1940-ҹы илин декабрын 1-дән 1941-ҹи илин јанварын 12-дәк «Шаһидлик вахты: ҹәсарәт» адлы 43 ҝүнлүк кампанија заманы Бирләшмиш Штатларда тәхминән 50 000 тәблиғчи сәккиз милјона јахын трактат пајламышды.
Аллаһын тәшкилатында бир чох јашлы һәмиманлыларымыз онлардан ҹәсарәт тәләб едән чәтинликләри индијәдәк унутмајыблар. Бәзиләри хатырлајырлар ки, илләр боју онларын тәзаһүр етдирдији ҹәсарәт руһу тез-тез тәкрар етдикләри «сонадәк вуруш» шүарында әкс олунурду. Аллаһын бизә һәвалә етдији хош хәбәри бу пис систем мәһв олмаздан әввәл неҹә тәблиғ едәҹәјимизи заман ҝөстәрәҹәк. Нә гәдәр ки бу вахт ҝәлмәјиб, Јеһованын көмәјинә архаланараг Онун сөзләрини иман вә ҹәсарәтлә бәјан етмәјә гәти гәрарлыјыг!
[9-ҹу сәһифәдәки јазы]
Падшаһлыг һаггында тәблиғ етмәк үчүн һәмишә ҹәсарәт тәләб олунурду