Мүгәддәс Китаб әсасында сөһбәт. Аллаһ пис инсанлары ҹәһәннәмә ҝөндәрир?

ЈЕҺОВАНЫН ШАҺИДЛӘРИ гоншулугда јашајан инсанларла Мүгәддәс Китаб һаггында сөһбәт етмәји севирләр. Бәлкә, сизи Мүгәддәс Китабдан һансыса бир мөвзу марагландырыр? Јахуд да сиз Јеһованын Шаһидләринин етигадлары вә неҹә ибадәт етдикләри барәдә билмәк истәјирсиниз? Нөвбәти дәфә Јеһованын Шаһидләри илә растлашанда суалларынызы онлара вермәкдән чәкинмәјин. Әмин олун ки, онлар бөјүк мәмнунијјәтлә сизин суалларыныза ҹаваб верәҹәкләр.

Бурада Јеһованын Шаһидинин гоншулугда јашајан бир инсанла сөһбәти тәгдим олунур. Тәсәввүр едәк ки, Мурад адында бир Шаһид Әһмәдә баш чәкир.

Аллаһ пис инсанлары ҹәзаландыраҹагмы?

Мурад: Хош ҝөрдүк, Әһмәд!

Әһмәд: Хош ҝүнүнүз олсун!

Мурад: Кечән дәфәки сөһбәтимизин үзәриндә дүшүнмүшәм. Сиз мараглы бир мәгама тохунмушдунуз.

Әһмәд: Һансы мәгама?

Мурад: Демишдиниз ки, Јеһованын Шаһидләринин ҹәһәннәмә инанмадығыны биләндә чох тәәҹҹүбләндиниз.

Әһмәд: Еләдир ки вар. Дүзүнү десәм, сизинлә разылашмаг мәним үчүн чәтиндир.

Мурад: Сәмими олараг фикринизи дедијиниз үчүн чох сағ олун. Башгаларынын нә дүшүндүјүнү билмәк мәнә мараглыдыр. Ҹәһәннәмлә бағлы мүхтәлиф фикирләр олдуғундан мән сизин конкрет олараг нәјә инандығынызы билмәк истәјәрдим.

Әһмәд: Мән һәмишә инанмышам ки, пис инсанлар өләндә ҹәһәннәмә дүшүрләр вә әбәди олараг орада ишҝәнҹә чәкирләр.

Мурад: Бу ҝүн әксәр инсанлар сизин кими дүшүнүр. Иҹазәнизлә сизә бир суал верим: һеч һәјатда фаҹиә илә үзләшмисинизми?

Әһмәд: Һә, беш ил бундан әввәл баҹым гәтлә јетирилиб.

Мурад: Аллаһ сәбир версин! Јәгин, онун үчүн чох дарыхырсыныз?

Әһмәд: Һәм дә неҹә. Бир ҝүн дә олсун јадымдан чыхмыр.

Мурад: Мән фикир вермишәм ки, ҹәһәннәмә инананларын бәзиләри писләрин әлиндән тәнҝә ҝәлмиш инсанлар олур. Бу ҝүнаһсыз инсанлар истәјирләр ки, писләр әмәлләринә ҝөрә ҹаваб версинләр.

Әһмәд: Ај сағ ол! Мән дә истәјирәм ки, баҹымын ганына баис олан гатил аиләмизин ахытдығы ҝөз јашларына ҝөрә өз ҹәзасыны алсын.

Мурад: Сизин кечирдијиниз һиссләр тамамилә нормалдыр. Мүгәддәс Китабда дејилир ки, ҝүнаһсыз инсанлар писләрин әлиндән әзијјәт чәкәндә Аллаһын гәзәби тутур вә О, онлары ҹәзаландыраҹағына сөз верир. Ҝөрүн Јешаја 3:11 ајәсиндә нә јазылыб: «Пис адамларын вај һалына! Чүнки онлара пислик олунаҹаг, еләдикләри әмәлләри гаршыларына чыхаҹаг». Буна ҝөрә дә биз әмин ола биләрик ки, Аллаһ онлары ҹәзасыз гојмајаҹаг.

Әһмәд: Бәс әҝәр сизин дедијинизә ҝөрә ҹәһәннәм јохдурса, бу, неҹә ола биләр?

Мурад: Јахшы суалдыр. Гысаҹа десәк, Аллаһ писләри әбәди мәһвлә ҹәзаландыраҹаг. Ҝөрүн Мүгәддәс Китабын 2 Салоникилиләрә 1:9 ајәсиндә нә јазылыб. Бу ајәни охуја биләрсиниз?

Әһмәд: Олар. «Онлар Ағанын өнүндән рәдд едиләрәк әбәди мәһв ҹәзасы чәкәҹәкләр».

Мурад: Ҝөрдүнүз, Әһмәд гардаш, писләр үчүн үмид јери јохдур, чүнки Аллаһ онлары әбәди өлүмлә ҹәзаландырыр. Аллаһын вәд етдији јерүзү Ҹәннәтдә онларын пајы олмајаҹаг.

Әһмәд: Ајәдә јазыланлары баша дүшдүм, амма, мәнҹә, бу, әдаләтли дејил. Ахы һамы өлүр. Мәҝәр писләр даһа ағыр ҹәзаја лајиг дејилләр?

Әдаләт нә тәләб едир?

Мурад: Ҝөрүрәм ки, сиз әдаләти севән инсансыныз.

Әһмәд: Бәли, чох.

Мурад: Бу тәрифәлајигдир. Аллаһ бизи әдаләт һисси илә јарадыб. Әдаләт мәсәләси Онун үчүн дә чох өнәмлидир. Дин хадимләри Јараданын инсанлары ҹәһәннәмдә ҹәзаландырдығыны өјрәтмәклә Ону чох әдаләтсиз Аллаһ кими гәләмә верирләр.

Әһмәд: Нә демәк истәјирсиниз?

Мурад: Ҝөтүрәк Адәмлә Һәвваны. Мүгәддәс Китабда онлар барәдә јазыланлары ешитмиш оларсыныз.

Әһмәд: Һә, ешитмишәм. Аллаһ Адәмлә Һәвваја бир ағаҹын мејвәсиндән јемәји гадаған етмишди, лакин онлар Онун бујуруғуна гаршы чыхдылар.

Мурад: Дүздүр. Ҝәлин һәмин һадисәјә бирликдә нәзәр салаг. Бу, Јарадылыш 2:16, 17 ајәләриндә јазылыб. Орада дејилир: «Рәбб Аллаһ инсана әмр едиб деди: “Бағдакы бүтүн ағаҹларын бәһрәсиндән истәјәндә јејә биләрсән. Анҹаг хејирлә шәри билмә ағаҹынын мејвәсиндән јемә, чүнки ондан јејән ҝүн һөкмән өләҹәксән”». Демәли, Аллаһын дедијинә ҝөрә, Адәм гадаған едилмиш ағаҹын мејвәсиндән јесәјди, нә баш верәҹәкди?

Әһмәд: Өләҹәкди.

Мурад: Дүздүр. Бир анлыг дүшүнүн: Адәмин бу ҝүнаһы уҹбатындан бүтүн инсанлар ҝүнаһлы доғулурларa. Һәтта белә бир вәзијјәтдә Аллаһ она ҹәһәннәм һөкмү барәдә нә исә демишди?

Әһмәд: Јох.

Мурад: Әҝәр Адәмлә Һәвваны әбәди ишҝәнҹә ҝөзләјирдисә, мәҝәр Аллаһ онлары габагҹадан хәбәрдар етмәзди? Бу, әдаләтин вә мәһәббәтин тәзаһүрү олмазды?

Әһмәд: Һәр һалда.

Мурад: Инди исә ҝөрәк Адәмлә Һәвва ҝүнаһ ишләдәндән сонра Аллаһ онлара нә деди. Јарадылыш 3:19 ајәсини охуја биләрсиниз?

Әһмәд: «Алын тәринлә чөрәк јејәҹәксән. Ахырда торпаға гајыдаҹагсан, чүнки орадан ҝөтүрүлмүсән, она ҝөрә ки јерин торпағысан, торпаға да гајыдаҹагсан».

Мурад: Сағ олун. Аллаһын сөзләринә әсасән, Адәм өләндән сонра һара ҝетмәли иди?

Әһмәд: Аллаһ демишди ки, Адәм торпаға гајыдаҹаг.

Мурад: Тамамилә дүздүр. Јәгин, разылашарсыныз ки, һараса гајытмаг дејәндә бу, ону ҝөстәрир ки, инсан нә вахтса орада олуб.

Әһмәд: Сөз јох.

Мурад: Аллаһ Адәми јаратмаздан әввәл о, һарадаса олуб?

Әһмәд: Јох, о һеч јох иди.

Мурад: Дүздүр. Фикир вердинизсә, Аллаһын чыхартдығы һөкмдә ҹәһәннәмин ады белә һалланмыр. Әҝәр Адәм ҹәһәннәмә ҝедәҹәкдисә, Аллаһын она ҝөтүрүлдүјү торпаға гајыдаҹағыны демәси дүрүст олардымы?

Әһмәд: Тәбии ки, јох.

Мәҝәр Шејтан Аллаһын дедијини едир?

Мурад: Ҝәлин ҹәһәннәм тәлими илә бағлы башга бир мәгама да нәзәр јетирәк. Бир чох инсанларын фикринҹә, ҹәһәннәмдә ишҝәнҹә едән вә ҹәза верән кимдир?

Әһмәд: Шејтан.

Мурад: Анҹаг Шејтан Аллаһын ән гаты дүшмәнидир. Әҝәр Аллаһ Шејтанын инсанлара ишҝәнҹә вермәси үчүн онлары одлу ҹәһәннәмә ҝөндәрирсә, бу, Аллаһын Иблислә әлбир олдуғуну ҝөстәрмир?

Әһмәд: Һмм. Һеч бу фикир ағлыма ҝәлмәмишди.

Мурад: Бир нүмунә чәкмәк истәјәрдим. Јәгин, сизин өвладыныз вар.

Әһмәд: Һә, бир оғлум вар. Бу јахынларда 15 јашы тамам олду.

Мурад: Тутаг ки, о дикбашлыг етмәјә башлајыр. Онун етдији һәрәкәтләр үрәјинизи јаралајыр. Белә вәзијјәтдә нә едәрдиниз?

Әһмәд: Чалышардым ки, она дүзәлиш верим.

Мурад: Әминәм ки, дүз јола гајытмасы үчүн дәфәләрлә она көмәк едәрдиниз.

Әһмәд: Әлбәттә!

Мурад: Туталым, бүтүн ҹәһдләринизә бахмајараг, о, сизин нәсиһәтләринизи гулагардына вурур. Вә нәтиҹәдә, ону ҹәзаландырмагдан башга әлаҹыныз галмыр.

Әһмәд: Һә.

Мурад: Амма хәбәр тутсаныз ки, ушағыныза бу шејләри өјрәдән нанәҹиб бир инсан вар, онда неҹә?

Әһмәд: Она чох гәзәбләнәрдим.

Мурад: Ушағынызы сизә гаршы галдыран пис, әхлагсыз инсанын олдуғуну биләндән сонра өвладынызы ҹәзаландырмаг үчүн ондан көмәк истәјәрдинизми?

Әһмәд: Әлбәттә ки, јох. Бу, мәнтигсиз оларды.

Мурад: Бәс онда Аллаһын пис инсанлара тәсир ҝөстәрән Шејтан Иблисдән елә һәмин инсанлары ҹәзаландырмағы хаһиш етмәси нә дәрәҹәдә ағлабатандыр?

Әһмәд: Мәнҹә дә.

Мурад: Бундан әлавә, әҝәр писләрин ҹәһәннәмдә ишҝәнҹә чәкмәси Аллаһын ирадәсидирсә, мәҝәр Аллаһын ән гаты дүшмәни Иблис Онун истәјини јеринә јетирәр?

Әһмәд: Бу һагда һеч фикирләшмәмишдим.

Јеһова бүтүн писликләрә сон гојаҹаг

Мурад: Әмин олун ки, Аллаһ ислаһолунмаз пис инсанлара гаршы өлчү ҝөтүрәҹәк. Сонда сизә бу фикри тәсдигләјән бир ајә ҝөстәрмәк истәјәрдим. Зәһмәт олмаса, Мәзмур 37:9 ајәсини охујун.

Әһмәд: Бурада дејилир: «Шәр адамлар кәсилиб атылаҹаг, Рәббә үмид бағлајанлар өлкәни мүлк олараг алаҹаг».

Мурад: Сағ олун. Фикир вердиниз, Аллаһ писләрин башына нә ҝәтирәҹәк?

Әһмәд: Һә, ајәдә дејилир ки, Аллаһ онлары кәсиб атаҹаг.

Мурад: Дүздүр. Башга сөзлә, Аллаһ онлары һәмишәлик мәһв едәҹәк. Рәббә үмид бағлајан јахшы инсанлар исә јер үзүндә әбәди јашајаҹаглар. Амма, јәгин ки, сизин ағлынызда бунунла бағлы башга суаллар да јараныр. Мәсәлән, нәјә ҝөрә Аллаһ лап башланғыҹдан инсанлары пис ишләр ҝөрмәкдән чәкиндирмир? Вә әҝәр О, һәгигәтән дә, пис инсанлары мәһв етмәк нијјәтиндәдирсә, нәјә ҝөрә индијәдәк буну етмәјиб?

Әһмәд: Мараглы суаллардыр.

Мурад: Ҝәлән дәфә ҝөрүшүб онларын ҹавабыны Мүгәддәс Китаб әсасында мүзакирә едәрикb.

Әһмәд: Мәмнунијјәтлә.

[Һашијәләр]