Валидејнләр, өвладларынызы ушаглыгдан тәрбијә един!
1 “Ушағы ҝедәҹәји јола ҝөрә јетишдир, јашлы олунҹа да ондан ајрылмаз” (Сүл. мәс. 22:6). Валидејнләр, өвладларынызын һәгигәт јолундан ајрылмаларыны истәмирсинизсә онлары нә вахтдан тәрбијә етмәјә башламалысыныз? Һәјатларынын илк чағындан!
2 Тимотејин, “ушаглыгдан е’тибарән” руһани тәрбијә алдығыны сөјләјәркән, Павел еһтимал ки, онун лап көрпә чағларындан өјрәдилдијини нәзәрдә тутурду (2 Тим. 3:14, 15). Бунун сајәсиндә Тимотеј чох ҝөзәл, руһани инсан олду (Филип. 2:19–22). Валидејнләр, сиз дә өвладларынызы “ушаглыгдан е’тибарән” тәрбијә етмәлисиниз ки, онлар “Рәббин өнүндә” бөјүсүнләр (1 Сам. 2:21).
3 Бөјүмәләри үчүн зәрури олан һәгигәт сују илә тә’мин един. Бөјүмәләри үчүн, ҹаван ағаҹлар даима суварылмаја еһтијаҹ дујдуглары кими, Аллаһын јеткин хидмәтчиләри олмаг үчүн дә һәр јашда олан ушаглар Мүгәддәс Китабын һәгигәти илә суварылмаға еһтијаҹ дујурлар. Ушаглара һәгигәти өјрәтмәјин вә Јеһова илә јахын гаршылыглы мүнасибәт инкишаф етдирмәкдә көмәк етмәјин әсас үсулу, Мүгәддәс Китабы мүнтәзәм олараг аиләликҹә өјрәнмәкдир. Анҹаг сиз валидејнләр, һәр ушағын имканыны нәзәрә алмалысыныз. Кичик ушаглар үчүн, тез–тез кечирилән гысамүддәтли өјрәнмәләр, еһтимал ки, һәрдәнбир вә узунмүддәтли өјрәнмәләрдән даһа еффектлидир (Тәс. 11:18, 19).
4 Ушагларын өјрәнмәк габилијјәтини гијмәтләндирмәмәк олмаз. Онлара Мүгәддәс Китаб персонажлары һаггында данышын. Гој онлар Мүгәддәс Китаб әсасында епизодлар чәксинләр вә орада тәсвир олунан һадисәләрә әсасән сәһнәҹикләр гурсунлар. Ҹәмијјәтимизин видео вә аудиокасетләриндән, һәмчинин касетә јазылмыш Мүгәддәс Китаб драмларындан истифадә един. Аиләви өјрәнмәни ушагларынызын габилијјәтләринә вә јашларына ујғунлашдырын. Башланғыҹда онлары садә үсулларла вә аз–аз өјрәдин; сонра исә ушаг бөјүдүкҹә, буну даһа ҝениш формада вә мәзмунлу един. Гој сизин мәшғәләләриниз ҹанлы вә мүхтәлиф олсун. Әҝәр ушағынызын Аллаһын Кәламыны “арзуламасыны” истәјирсинизсә, өјрәнмәни олдугҹа мараглы един (1 Пет. 2:2).
5 Јығынҹағын фәалијјәтинә ҹәлб един. Өвладларынызын гаршысында, онлара јығынҹағын бир һиссәси олмагда көмәк едә биләҹәк ардыҹыл мәгсәдләр гојун. Биринҹи мәгсәд нә ола биләр? Ики ушағын валидејнләри сөјләјир: “Биз һәр икисинә дә Падшаһлыг Залында сакит отурмағы өјрәтмәкдән башладыг”. Сонра исә јығынҹагда иштирак етмәк вә Теократик Хидмәт Мәктәбинә јазылмаг мәгсәдиндә олмаг олар. Тәблиғ хидмәтиндә исә трактат тәгдим етмәк, ајә ситат ҝәтирмәк, журнал пајламаг вә мә’налы сөһбәт етмәк кими јахшы мәгсәдләр дә гојмаг олар.
6 Руһландырыҹы нүмунә олун. Ушагларыныз сизин һәр ҝүн Јеһова һаггында данышдығынызы, она дуа етдијинизи, јығынҹаглара ҝетдијинизи, хидмәтдә иштирак етдијинизи вә Аллаһын ирадәсини јеринә јетирмәкдән зөвг алдығынызы ҝөрүрләрми? (Мәз. 40:8). Онларын буну ҝөрмәләри вә бу ишләрин һамысыны бирликдә ҝөрмәјиниз олдугҹа ваҹибдир. Садиг Шаһидләр кими алты ушаг бөјүтмүш анасы һаггында, бөјүк гыз белә сөзләр демишдир: “Һәр шејдән чох, бизә анамызын нүмунәси тә’сир бағышлајырды. Онун нүмунәси ҝүҹлү ифадәләрдән дә тә’сирли иди”. Дөрд ушағын анасы бунлары сөјләди: “Ән ваҹиби Јеһова неҹә истәјир” принсипи садәҹә ифадә јох, бизим һәјат тәрзимиз иди”.
7 Валидејнләр, ушагларыныза Аллаһын Кәламындан олан һәгигәти өјрәдәрәк, гаршыларында ардыҹыл мәгсәдләр гојараг вә нүмунә ҝөстәрәрәк онлары көрпә чағларындан тәрбијә етмәјә башлајын. Буна пешман олмазсыныз!