Ҝәнҹләр, Аллаһын Кәламыны охујун!
1 Ҝәнҹлик — асан олмајан вә ваҹиб гәрарлар гәбул едилән бир дөврдүр. Сиз ҝәнҹ мәсиһчиләрдән чохунуз, сизи һәр ҝүн Мүгәддәс Китаб нормаларына зидд давранмаға вадар едән тәзјигләрлә гаршылашырсыныз. Тәһсил, иш вә никаһла бағлы һәр һансы планлар гурмаздан әввәл, гаршыныза руһани мәгсәдләр гојсаныз даһа јахшы олар. Сиз јалныз о заман бүтүн һәјатыныза ҝөзәл тә’сир ҝөстәрәҹәк гәрарлар гәбул едә биләҹәксиниз. Ајдын руһани мәгсәдләр сизә мүдрик давранмаға вә јолунузу уғурлу етмәјә көмәк едәҹәкдир. Аллаһын Кәламыны мүнтәзәм олараг охумаг вә үзәриндә дүшүнмәк, сизи Аллаһын нәсиһәтләринә ујғун јашамаға тәшвиг едәҹәк вә ҝөстәрдијиниз һәр бир сә’ј о заман мүвәффәгијјәтли олаҹагдыр (Јешу 1:8; Мәз. 1:2, 3).
2 Бу сизә һансы фајданы ҝәтирәҹәк? Шејтанын дүнјасы ширникдириҹи шејләрлә долудур (1 Јәһ. 2:15, 16). Јәгин ки, башгаларынын једәјиндә ҝедәрәк фәлакәтә дүчар олан синиф јолдашларындан вә ја һәмјашыдларындан кими исә таныјырсан. Мүгәддәс Китабын мәсләһәтләринә диггәт јетирмәклә, ҝүнаһлы јола ајаг басмамаг үчүн әхлаги вә руһани гүввә әлдә едәҹәксиниз. Бундан әлавә, Аллаһын Кәламындакы мәсләһәтләр Шејтанын һијләҝәр тәләләриндән гачынмағыныза көмәк едәҹәкдир (2 Кор. 2:11; Ибр. 5:14). Сиз Јеһованын јоллары илә ҝетмәклә һәгиги хошбәхтлик вә мәмнунлуг әлдә едәҹәксиниз (Мәз. 119:1, 9, 11).
3 Аллаһын Кәламынын дәјишмәз принсипләри инсани мүдрикликдән үстүндүр (Мәз. 119:98-100). Сиз Мүгәддәс Китаб принсипләрини тәдгиг едәрәк, Јеһованын нијјәтләри үзәриндә дүшүнәрәк вә дуада сәмими гәлбдән Она мүраҹиәт едәрәк, Мүгәддәс Китабын ән мүдрик мүәллифи олан Јеһова Аллаһла јахын мүнасибәтләр гура биләрсиниз. О вә’д едир: “Сәнә тә’лим едәҹәјәм вә ҝедәҹәјин јолу сәнә өјрәдәҹәјәм; сәнә өјүд верәҹәјәм; ҝөзүм сәнин үзәриндә олаҹагдыр” (Мәз. 32:8).
4 Мүгәддәс Китабы охумаға вахт ајыр. Бир ҝәнҹ мәсиһчи гыз Мүгәддәс Китабы бүтөвлүклә охумағы гаршысына мәгсәд гојмуш вә бир ил әрзиндә буна наил олмушдур. Бу она һансы фајданы ҝәтирмишдир? О хатырлајыр: “Мән Јеһова һаггында о гәдәр өјрәндим ки, бүтүн бунлар мәни Она даһа чох ҹәлб етди вә мәндә Онун гаршысында һәјатым боју еһтирам һисси дујмаг арзусу ојатды” (Јаг. 4:8). Сән Мүгәддәс Китабы бүтөвлүклә охумусанмы? Әҝәр охумамысанса, онда нәјә ҝөрә гаршына белә бир мәгсәд гојмајасан? Сөзсүз ки, Јеһова сәнин сә’јинә хејир-дуа верәҹәк вә сән бол-бол мүкафат алаҹагсан.