Онун “исмини бирликдә јүксәлдәк”
1. Аллаһын адыны бирликдә јүксәлтмәк үчүн һансы имканымыз олаҹаг вә индидән һансы һазырлыг ишләрини ҝөрә биләрик?
1 “Мәнимлә бәрабәр Рәббә тә’зим един вә исмини бирликдә јүксәлдәк” дејә, мәзмурчу охујурду (Мәз. 34:3). Јахынлашмагда олан “Аллаһла јеријин” адлы вилајәт конгресиндә бир чох јығынҹаглардан олан баҹы-гардашларла бирликдә Јеһованын адыны јүксәлтмәк имканымыз олаҹагдыр. Конгрес заманы һарада јашајаҹағыны, ораја неҹә ҝедәҹәјини, һабелә ишдән иҹазә алмагла бағлы мәсәләләри һәлл етмисәнми? Бүтүн бунларын гејдинә әввәлҹәдән галмаг мүдриклик оларды (Сүл. мәс. 21:5).
2. Нәјә ҝөрә конгресә вахтындан бир аз әввәл ҝәлмәји планлашдырмаг фајдалыдыр?
2 Конгрес јериндә. Конгрес нүмајәндәләри чох шеји ҝөтүр-гој етмәлидирләр. Конгресә вахтындан бир аз әввәл јола дүшсәк, һәр һансы сәбәбләр үзүндән ҝеҹикмәк еһтималы аз олаҹаг, башланғыҹ маһны вә дуадан әввәл исә артыг јеримиздә олаҹағыг (Мәз. 69:30). Програмын башланмасына бир-нечә дәгигә галмыш апарыҹы сәһнәдә әјләшәҹәк вә Падшаһлыг мелодијалары сәсләнәҹәкдир. Бу вахт әрзиндә һәр биримиз вахтында јерләримизи тутмалыјыг ки, програм да лајигли тәрздә башлансын (1 Кор. 14:33, 40).
3. Јер тутан заман башгаларына гаршы неҹә диггәтли ола биләрик?
3 Аллаһын Кәламы бизи тәшвиг едир ки, ‘бүтүн етдикләримиз мәһәббәтлә олсун’ (1 Кор. 16:14). Сәһәр саат 8-дә конгресә ҝириш ачылан заман биз башгаларына гаршы диггәтли олаҹаг вә хошумуза ҝәлән јерләри тутмаг үчүн гачмагдан, тәләсмәкдән, башгаларыны итәләмәкдән гачынаҹағыг. Әлавә јерләри анҹаг бир машында ҝәлдијиниз вә ја бир мәнзилдә јашадығыныз кәсләр үчүн тутмаг олар (1 Кор. 13:5; Филип. 2:4).
4. Наһар илә бағлы һансы мәсләһәтләр верилир вә бу нәјә ҝөрә фајдалыдыр?
4 Фасилә заманы конгресдән чыхыб гида алмаг әвәзинә, зәһмәт олмаса, наһары өзүнлә ҝәтир. Бунун сајәсиндә һәр биримизин руһландырыҹы үнсијјәтдән севинҹ дујмаг имканы олаҹаг вә ҝүнортадан сонракы ҝөрүшдә һамы вахтында өз јериндә ола биләҹәкдир. Әҝәр лазымдырса, отурдуғунуз скамјанын алтына гојмаг мүмкүн олан, балаҹа әрзаг контејнери ҝәтирә биләрсән. Конгресә ҝәзинти үчүн олан бөјүк јемәк контејнерләри, шүшә габлар вә спиртли ичкиләр ҝәтирмәк олмаз.
5. Үрәјимизи гаршыдан ҝәлән програма неҹә һазырлаја биләрик?
5 Бизи руһани зијафәт ҝөзләјир. Јеһошафат падшаһ “өз үрәјини Аллаһы арамаг үчүн” һазырламышды (2 Тарих. 19:3). Биз үрәјимизи конгресин програмына неҹә һазырлаја биләрик? 22 мај вә 8 ијун тарихли “Ојанын!” (рус.) журналынын сон сәһифәсиндә гаршыдан ҝәлән руһани зијафәтин гыса “менјусу” тәгдим едилир. Нәјә ҝөрә Јеһованын бизим үчүн һазырладығы бу руһани зијафәти дадмаг үчүн һәмин менјунун үзәриндә дүшүнмәк үчүн вахт ајырмајаг? Үрәји һазырламаг — верилән нәсиһәти дәрк етмәк вә һәјата кечирмәк үчүн Јеһовадан көмәк диләмәји дә өзүнә дахил едир (Мәз. 25:4, 5).
6. Биз нәји арзу едирик вә нәјә ҝөрә?
6 Гуртулуша Аллаһын Кәламынын васитәсилә наил олаҹағымызы дәрк едәрәк, һәр биримиз ону даһа чох өјрәнмәк арзусу илә јашајырыг (1 Пет. 2:2). Буна ҝөрә дә, ҝәлин “Аллаһла јеријин” адлы вилајәт конгресиндә иштирак едәк вә Аллаһын “исмини бирликдә јүксәлдәк” (Мәз. 34:3).
[3 сәһифәдәки чәрчивә]
Аллаһын исмини неҹә јүксәлтмәк олар?
◼ Һәр шеји габагҹадан планлашдыр.
◼ Башгаларына мәһәббәт ҝөстәр.
◼ Үрәјини һазырла.