Көмәк әлини узада биләрсәнми?
1 Јеһова садиг хидмәтчиләринә көмәк әлини узатмаг үчүн һәмишә имканлар ахтарыр (2 Тарих. 16:9; Иш. 41:10, 13). Ону гајғыкеш чобанла мүгајисә едәрәк, Ишаја јазмышдыр: “Сүрүсүнү чобан кими ҝүдәҹәк, әли илә гузулары топлајаҹаг вә синәсиндә дашыјаҹаг вә әмзикли оланлары еһтијатла отараҹаг” (Иш. 40:11). Ҝәлин Јеһованын мәһәббәт долу гајғыкешлијини неҹә тәглид едә биләҹәјимизин бә’зи үсулларыны нәзәрдән кечирәк.
2 Јени ҝәләнләрә көмәк әлини узат. Јығынҹаға јени ҝәләнләри руһландырыҹы үнсијјәтә дә’вәт етмәклә, онлара көмәк әлимизи узада биләрик (Сүл. мәс. 13:20). Јығынҹаға ҝәлмәјә башлајанда башгаларынын она көмәк әлләрини неҹә узатдыгларыны хатырлајан бир гардаш дејир: “Бир аилә мәни бир нечә дәфә өз аиләви өјрәнмәсинә дә’вәт етмишди. Мән руһән бөјүјәндә исә, пионер кими хидмәт едән ҹаван әр-арвад мәни мүнтәзәм олараг бүтүн ҝүнлүк хидмәтә ҝөтүрмәјә башладылар. Биз һәмишә чохлу руһани сөһбәтләр едирдик”. О әлавә едир: “Мәсиһчи олмаздан әввәл мән ҹүмә вә шәнбә ҝүнләри ҝеҹә јарысына гәдәр ҝәзир вә әјләнирдим. Лакин инди баҹы вә гардашларла кечирдијим вахт үнсијјәтә олан тәләбатымы өдәјир”. Јығынҹағын бу гардаша мәһәббәтлә мараг ҝөстәрмәси, она иманда көк салмаға вә инкишаф етмәјә көмәк етди. О, һал-һазырда Бејт-Елдә хидмәт едир (Колос. 2:6, 7).
3 Бир-биринизи руһән инкишаф етдирин. Биз чәтин вәзијјәтә дүшән гардашларымыза көмәк әлимизи узада биләрик. Зәиф сағламлығы олан тәблиғчи илә телефон васитәсилә тәблиғ едә вә ја ону өзүнлә Мүгәддәс Китаб өјрәнмәсинә апара, јахуд да өјрәнән адамы онун евинә ҝәтирә биләрсәнми? Балаҹа ушаглары олан вә тәблиғ хидмәти заманы мәмнунијјәтлә көмәк гәбул едән баҹы вә ја гардашы таныјырсанмы? Јығынҹағынызда тәкрар баш чәкмәк ишиндә вә ја хидмәтин башга нөвләриндә иштирак етмәк үчүн көмәк ахтаран утанҹаг тәблиғчиләр вармы? Баҹы вә гардашлара дујдуғумуз сәмими мәһәббәт вә гајғыкешлик һисси бизи тәшвиг едәҹәк ки, онлары руһән инкишаф етдирмәк үчүн имканлар ахтараг (Ром. 14:19).
4 Јеһованын Өз хидмәтчиләринә ҝөстәрдији сәмими гајғыкешлији тәглид едәрәк, биз бир-биримизи мөһкәмләндирир, јығынҹағын мәһәббәтдә инкишаф етмәсинә көмәк едир вә сәмави Атамызы иззәтләндиририк (Ефес. 4:16).