Суаллар гутусу

◼ Јеһованын Шаһидләри чыхышларын јазыларыны вә ја сурәтләрини пајламалыдырлармы?

Мүгәддәс Китаба әсасланан чыхышлар бизи мөһкәмләндирир вә руһландырыр (Һәв. иш. 15:32). Буна ҝөрә дә ҝөрүшләрдә иштирак едә билмәјәнләрлә бу кими руһландырыҹы фикирләри бөлүшмәк истәји тәбиидир. Бу ҝүн бир чох јазыјаалма васитәләри мөвҹуд олдуғундан чыхышлары јазыја алмаг вә башгаларына пајламаг чох асандыр. Бәзиләри һәтта узун илләр габаг едилән чыхышларын јазыларыны да јығыб сахлајырлар. Онлар јахшы нијјәтдән ирәли ҝәләрәк бу чыхышлары, ја да онларын сурәтләрини достларына верирләр. Диҝәрләри исә Веб-сајтлар јарадыр вә һәр кәсин көчүрә билмәси үчүн чыхышлары орада јерләшдирир.

Ајдындыр ки, чыхышларын јазыларыны шәхсән өзүмүзүн вә ја аилә үзвләримизин истифадә етмәсиндә гәбаһәт бир шеј јохдур. Бундан әлавә, ағсаггаллар сәһһәтинин зәиф олмасына ҝөрә јығынҹаг ҝөрүшләриндә иштирак едә билмәјәнләр үчүн чыхышларын јазылмасынын гајғысына гала биләрләр. Бунунла белә, јахшы оларды ки, биз чыхышларын јазыларыны вә ја сурәтләрини јајмајаг.

Чыхышлар чох вахт јерли тәләбатлара ујғун сәсләнир. Бу тәләбатлар һаггында там мәлуматымыз олмадығы үчүн асанлыгла онлары дүзҝүн баша дүшмәјә биләрик. Бундан әлавә, чыхышын тәзәликҹә едилдијинә вә дәгиг олдуғуна әмин олмаг үчүн кимин вә нә вахт чыхыш етдијини мүәјјән етмәк чәтин ола биләр (Лука 1:1—4). Үстәлик, чыхышларын јазыларыны, јахуд сурәтләрини пајламаг бәзиләрини ја башгаларындан һәддиндән артыг диггәт вә һөрмәт ҝөзләмәјә, ја да башгаларына бу ҹүр мүнасибәт бәсләмәјә тәшвиг едә биләр (1 Кор. 3:5—7).

Садиг вә ағыллы гул руһани гиданы лазыми гәдәр вә «вахтлы-вахтында» вермәк үчүн әлиндән ҝәләни едир (Лука 12:42). Бу, өзүнә Јеһованын Шаһидләринин јығынҹагларында едилән чыхышлары вә тәшкилатын рәсми Веб-сајтындан көчүрүлән аудио-јазылары дахил едир. Әмин ола биләрик ки, садиг вә ағыллы гул вә онун Рәһбәрлик Шурасы иманымызын мөһкәмләнмәси үчүн лазым олан һәр шејлә бизи тәмин едәҹәк (Һәв. иш. 16:4, 5).