Хидмәти ҝөрүшүн һиссәләрини апаран гардашлар үчүн тәлимат
«Бизим Падшаһлыг Хидмәтимиз»ин бу сајындан етибарән Хидмәти ҝөрүшүн ҹәдвәлинин үслубу садәләшдирилиб. Бурадакы тәлиматлар вә хатырлатмалар «Бизим Падшаһлыг Хидмәтимиз»ин 2009-ҹу ил мај сајындакы «Хидмәти ҝөрүшә неҹә һазырлашмалы?» адлы мәгаләдә дејиләнләрә дәјишиклик вә ајдынлыг ҝәтирир.
◼ Нитг. Бу бәнд тәјин олунмуш материала әсасланыр вә динләјиҹиләрлә мүзакирә кечирилмир. Натиг диггәтини јығынҹаг үчүн нәјин даһа фајдалы олдуғуна ҹәмләјир.
◼ Суал-ҹаваб. «Ҝөзәтчи Гүлләси» мәгаләләринин өјрәнилмәси кими, ҝөрүшүн бу һиссәсинин дә ҝириш вә јекун сөзләри гыса олмалы вә бүтүн абзасларын суаллары верилмәлидир. Ҝөрүшү апаран узун-узады изаһатлар вермәкдән гачынмалыдыр. Әҝәр вахт јол верирсә, әсас ајәләри охумаг олар. Әҝәр ҝөстәриш јохдурса, абзаслары охумаг лазым дејил.
◼ Мүзакирә. Бу бәнддә динләјиҹиләрин иштиракы да нәзәрдә тутулуб. Бу нә садәҹә нитг, нә дә ки әввәлдән ахыра кими суал-ҹавабдан ибарәт дејил.
◼ Сәһнәҹик вә мүсаһибәләр. Әҝәр сәһнәҹик нәзәрдә тутулубса, бу бәндлә чыхыш едән гардаш сәһнәҹик тәшкил етмәлидир; о, өзү сәһнәҹикдә иштирак едә билмәз. Гардаш сәһнәҹик үчүн сәриштәли вә нүмунәви тәблиғчиләри сечмәли вә мүмкүнсә, онларла бирликдә габагҹадан һазырлашмалыдыр. Јахшы оларды ки, јени вә тәҹрүбәсиз тәблиғчиләр, садәҹә сәһнәјә чыхмаг хатиринә сәһнәҹикләрдә иштирак етмәсинләр, лакин бәзиләри ев саһиби кими иштирак едә биләрләр. Тәгдимә һазырлајан тәблиғчиләр сәһнәдә елә дурмалыдырлар ки, үзләри динләјиҹиләрә тәрәф олсун. Мүсаһибәдә иштирак едәнләр шәрһләрини јерләриндән јох, сәһнәдә вермәлидирләр. Сәһнәҹик вә мүсаһибәләри габагҹадан мәшг етмәк лазымдыр. Әҝәр ҝөрүшүн вахтындан кечирсә вә гардаш өз чыхышынын вахтыны гысалтмалыдырса, о, сәһнәҹији вә ја мүсаһибәни тәхирә салмамалыдыр. Хидмәти көмәкчиләр сәһнәҹикдә вә ја мүсаһибәдә кимләрин иштирак едәҹәкләрини сечәркән ағсаггаллар шурасынын координатору вә ја башга бир ағсаггалла мәсләһәтләшмәлидирләр.
Әҝәр ҝөрүшүн һансыса һиссәсинә даир хүсуси ҝөстәришләр верилибсә, онлара мүтләг риајәт олунмалыдыр. Хидмәти ҝөрүшүн бәндләрини јухарыда ҝөстәрилдији кими кечирмәклә гардашлар Хидмәти ҝөрүшләрин «әдәб-әрканла вә низамла» кечмәси үчүн әлләриндән ҝәләни етмиш олурлар (1 Кор. 14:40).