«Нә олар, Македонијаја ҝәл»
1. Павел вә әмәкдашларынын Македонијаја ҝетмәләринә сәбәб нә иди?
1 Ерамызын тәхминән 49-ҹу илиндә һәвари Павел Сурија Антакијасыны тәрк едиб икинҹи миссионер сәјаһәтинә һазырлашырды. О, Ефесә вә Кичик Асијанын диҝәр шәһәрләринә баш чәкмәк истәјирди. Лакин алдығы ҝөрүнтүдә мүгәддәс руһ тәрәфиндән Македонијаја дәвәт олунду. Павел вә әмәкдашлары бу дәвәти мәмнунијјәтлә гәбул етдиләр вә һәмин әразидә илк јығынҹағы тәшкил етмәк кими ҝөзәл имкана малик олдулар (Һәв. иш. 16:9, 10; 17:1, 2, 4). Бу ҝүн, һәгигәтән дә, дүнјанын бир чох јерләриндә чохлу ишчијә еһтијаҹ вар (Мат. 9:37, 38). Сән дә бу ишә өз төһфәни верә биләрсәнми?
2. Нәјә ҝөрә бәзиләри башга өлкәјә көчмәји планлашдырмырлар?
2 Бәлкә, Павел кими, сәндә дә миссионер руһу вар, анҹаг сән башга өлкәјә көчмәји планлашдырмысан. Мәсәлән, јашын јол вермәдијиндән, субај баҹы вә ја ушагларын олдуғундан Ҝилеад мәктәбиндә тәлим алмаг имканын олмаја биләр. Бәлкә дә, дил өјрәнә билмәјәҹәјиндән горхдуғун үчүн башга өлкәјә көчмәји планлашдырмырсан. Јахуд да, ола билсин, игтисади вәзијјәт уҹбатындан һансыса өлкәдә мүһаҹир кими јашајырсан, буна ҝөрә дә һараса көчмәјә еһтијат едирсән. Анҹаг дуа едиб ҝөтүр-гој етдикдән сонра, ола билсин, ҝөрәҹәксән ки, бу кими вәзијјәтләр тәләбат олан өлкәјә көчмәјинә һеч дә әнҝәл дејил.
3. Нәјә ҝөрә башга өлкәдә еффектив сурәтдә тәблиғ етмәк үчүн Ҝилеад Мәктәби кечмәк шәрт дејил?
3 Ҝилеад Мәктәби кечмәк шәртдирми? Павел вә әмәкдашлары нәјин сајәсиндә уғур газанырдылар? Онлар Јеһоваја вә Онун мүгәддәс руһуна бел бағлајырдылар (2 Кор. 3:1—5). Буна ҝөрә дә, шәраитин хүсуси тәлим алмаға јол вермәсә дә, башга өлкәдә тәблиғ етмәк ишиндә уғурлу ола биләрсән. Һәмчинин унутма ки, Теократик Хидмәт Мәктәбиндә вә Хидмәти ҝөрүшдә алдығын тәлим сәнә фајда ҝәтирәҹәк. Әҝәр Ҝилеад вә ја бу кими башга мәктәбләрдә тәлим алмаг мәгсәдин варса, башга өлкәјә көчмәклә миссионер хидмәтини дада биләрсән. Ишдир, әҝәр ҝәләҹәкдә бу мәктәбләрдән һансыныса кечсән, газандығын тәҹрүбәнин сәнә бөјүк фајдасы олаҹаг.
4. Нәјә ҝөрә јашлы баҹы-гардашлар дүшүнмәмәлидирләр ки, һеч вахт башга өлкәдә хидмәт едә билмәзләр?
4 Јашлы тәблиғчиләр. Руһән јеткин вә сағламлыглары тәблиғ етмәјә јол верән јашлы тәблиғчиләрин тәләбат олан өлкәләрдә бөјүк көмәји дәјә биләр. Артыг тәгаүдә чыхмысан? Һәтта кичик мәбләғдә тәгаүд аланларын тәгаүдү раһат һәјат сүрмәк вә хәрҹләрини өдәмәк үчүн онлара кифајәт едә биләр, чүнки инкишаф етмәкдә олан өлкәләрдә, тибби хидмәтләр дә дахил олмагла, гијмәтләр онларын јашадыглары өлкә илә мүгајисәдә чох ашағыдыр.
5. Тәгаүдә чыхдыгдан сонра башга әразијә көчән гардашын нүмунәсини данышын.
5 Инҝилисдилли өлкәләрдән бириндә јашајан, ағсаггал вә пионер кими хидмәт едән бир гардаш тәгаүдә чыхдыгдан сонра Ҹәнуб-Шәрги Асијанын мәшһур туристик әразисинә көчдү ки, доггуз тәблиғчидән ибарәт инҝилисдилли група көмәк етсин. Бу груп һәмин әразидә јашајан 30 000 әҹнәбијә тәблиғ едирди. Ики ил әрзиндә јығынҹаға ҝәләнләрин сајы 50 нәфәрә чатды. Гардаш јазыр: «Бу әразијә көчмәк мәнә һеч вахт дадмадығым бөјүк хејир-дуалар ҝәтирди. Бу хејир-дуалары садаламагла гуртармаг олмаз!»
6. Бөјүк тәләбат олан өлкәјә көчән ҝәнҹ субај баҹынын нүмунәсини данышын.
6 Субај баҹылар. Јеһова баҹылардан хош хәбәри бөјүк тәләбат олан өлкәләрдә бәјан етмәк үчүн сәмәрәли сурәтдә истифадә едир (Мәз. 68:11). Бир ҝәнҹ субај баҹы башга өлкәјә көчәрәк хидмәтини ҝенишләндирмәк истәјирди, анҹаг тәбии ки, валидејнләри онун үчүн нараһат олурдулар. Буна ҝөрә дә о, сијаси вә игтисади бахымдан сабит өлкә сечдикдән сонра офисә мәктуб јазды вә бу һагда дәгиг мәлумат әлдә етди. Һәмин өлкәдә јашадығы алты ил мүддәтиндә о, чохлу хејир-дуалар алды. Баҹы дејир: «Евимиздә оланда мәним Мүгәддәс Китабы ҹәми-ҹүмләтаны бир нечә нәфәрә өјрәтмәк имканым олурду. Тәләбат олан әразијә көчдүкдән сонра исә мән бир чох инсанларла Мүгәддәс Китабы арашдырыр вә өјрәтмәк габилијјәтими, сөзүн әсил мәнасында, инкишаф етдирирдим».
7. Башга өлкәјә көчән аиләнин нүмунәсини данышын.
7 Аиләли оланлар. Әҝәр сизин ушагларыныз варса, бу о демәкдирми ки, хош хәбәри тәблиғ етмәк үчүн башга өлкәјә көчмәјә һәлә чох вар? Сәккиз вә он јашларында ики ушағы олан бир аилә белә бир аддым атмаг гәрарына ҝәлди. Ана өз һиссләрини бөлүшүр: «Ушагларымызы бурада бөјүдүб боја-баша чатдырдығымыз үчүн чох шадыг, чүнки онлар хүсуси пионерләрлә вә миссионерләрлә үнсијјәт едирдиләр. Тәләбат олан әразидә хидмәт етмәјимизин сајәсиндә һәјатымыз даһа да зәнҝинләшиб».
8. Һеч бир дил өјрәнмәдән башга өлкәдә хидмәт етмәк мүмкүндүрмү? Изаһ ет.
8 Дил өјрәнмәк проблеми. Хариҹи дил өјрәнмәк фикри сәнә башга өлкәјә көчмәјә әнҝәл олмалыдырмы? Бәлкә дә, дил өјрәнмәк лазым ҝәлмәјәҹәк, чүнки ола билсин, Падшаһлығын тәблиғчиләринә тәләбат олан өлкәләрдән бириндә сәнин данышдығын дилдә данышан инсанлар олсун. Мәсәлән, инҝилис дилиндә данышан әр-арвад кифајәт гәдәр инҝилисдилли мүһаҹирләрин јашадығы испандилли өлкәјә көчдү. Онлар филиалдан көмәјә еһтијаҹы олан бир нечә инҝилис јығынҹағы барәдә мәлумат алдыгдан сонра һәмин јығынҹаглардан биринә ики дәфә баш чәкдиләр. Онлар евләринә гајыдыб ајлыг мәсрәфләрини азалтдылар ки, бириллик пул јыға билсинләр. Көчмәјә һазыр оланда јерли гардашлар онлара мүнасиб ев тапмаға көмәк етдиләр.
9, 10. Өз вәтәнләриндән башга өлкәјә көчәнләр нә едә биләрләр вә нәјә ҝөрә?
9 Мүһаҹирләр. Ола билсин, сән дә мүһаҹирсән, башга өлкәјә һәгигәти билмәмишдән габаг көчмүсән. Бәлкә дә, сәнин доғулдуғун өлкәдә ишчиләрә бөјүк тәләбат вар. Көмәк етмәк үчүн өз өлкәнә ҝери гајыда биләрсәнми? Ола билсин, орада иш вә ев тапмаг сәнә даһа асан олаҹаг, нәинки башга өлкәдән ҝәләнләрә. Чох еһтимал ки, дил проблемин дә олмајаҹаг. Үстәлик, Падшаһлыг һагда хош хәбәри данышанда инсанлар әҹнәбиләрдән чох, сәнә гулаг асмаға мејилли ола биләрләр.
10 Бир нәфәр гачгын дүшәрәк Албанијадан Италијаја көчмүшдү ки, јахшы иш тапсын вә Албанијада галан аиләсинә пул ҝөндәрсин. Һәгигәтә ҝәлдикдән сонра Албанијада бөјүк тәләбат олдуғундан ора көчмәјә һазырлашан италијалы бир груп хүсуси пионерә албан дилини өјрәтмәјә башлады. Гардаш јазыр: «Онлар мәним гојуб чыхдығым јерә ҝедирләр. Онлар дил билмирләр, амма ора ҝетмәјә ҹан атырлар. Мән өзүм албанам, оранын дилини дә, мәдәнијјәтини дә билирәм. Бәс онда Италијада нә ишим вар?» Гардаш Албанијаја гајыдыб хош хәбәрин тәблиғиндә көмәк етмәк гәрарына ҝәлди. О дејир: «Италијадакы ишими вә пуллары гојуб ҝәлдијим үчүн пешманам? Әсла! Албанијада, өз вәтәнимдә мән даһа дәјәрли иш тапмышам. Мәним фикримҹә, әсил мәнада дәјәри олан вә инсана сонсуз севинҹ бәхш едән иш бүтүн гәлбинлә Јеһоваја хидмәт етмәкдир!»
11, 12. Башга өлкәјә көчмәк истәјән тәблиғчиләр нә етмәлидирләр?
11 Неҹә етмәли? Македонијаја ҝетмәмишдән габаг, Павел вә әмәкдашлары гәрбә доғру сәјаһәт етмәји планлашдырырдылар, анҹаг «мүгәддәс руһ... гадаған етдијиндән» онлар шимала тәрәф үз тутдулар (Һәв. иш. 16:6). Битинијаја чатачатда Иса онлара әнҝәл олду (Һәв. иш. 16:7). Јеһова инди дә тәблиғ ишинә Иса васитәси илә нәзарәт едир (Мат. 28:20). Буна ҝөрә дә, әҝәр сән башга өлкәјә көчүб-көчмәмәји дүшүнүрсәнсә, дуа едәрәк Јеһовадан рәһбәрлик истә. (Лука 14:28—30; Јаг. 1:5; «Ҝетмәк истәдијин өлкәдә тәләбат олуб-олмадығыны неҹә өјрәнә биләрсән?» адлы чәрчивәјә бах.)
12 Бу барәдә дүзҝүн мәлуматы ағсаггаллардан вә диҝәр јеткин мәсиһчиләрдән өјрәнмәк олар (Сүл. мәс. 11:14; 15:22). Әдәбијјатларымыздан башга өлкәдә хидмәт етмәк барәдә оху вә нәзәрдә тутдуғун өлкә барәдә мәлумат ахтар тап. Һәмчинин һәмин өлкәјә ҝедиб бир нечә мүддәт орада гал. Әҝәр башга өлкәјә көчмәк фикрин гәтидирсә, даһа чох мәлумат алмаг үчүн ахырынҹы «Иллик мәҹмуә»дәки үнванлардан истифадә едәрәк һәмин өлкәнин филиалына мәктуб јаза биләрсән. Лакин мәктубуну бирбаша филиала ҝөндәрмәк әвәзинә, ону јығынҹағынын ағсаггалларына вер; онлар да сәнин мәктубуна зәманәт мәктубу әлавә едиб филиала ҝөндәрәҹәкләр. («Јеһованын ирадәсини јеринә јетирмәк үчүн тәшкил олунмушуг» китабынын 111, 112-ҹи сәһифәләринә бах, рус.)
13. Филиал сәнә нәдә көмәк едә биләр, бәс сән өзүн һансы мәсулијјәти дашыјырсан?
13 Дүзҝүн гәрар гәбул едә билмәјин үчүн филиал сәнә лазыми мәлуматы верә биләр, лакин зәманәт мәктубу, арајыш, виза вә ја һәр һансы башга бир һүгуги сәнәд, еләҹә дә јашамаг үчүн јер верә билмәз. Бунлар сәнин көчмәздән габаг арашдырыб, диггәтлә ҝөтүр-гој етмәли вә гајғысына галмалы олдуғун шәхси мәсәләндир. Бундан әлавә, сәфирликлә вә консуллугла ҝөрүшүб виза вә һәмин өлкәдә ишләмәк үчүн ирәли сүрүлән тәләбләрлә бағлы әтрафлы мәлумат алмаг мәсулијјәти дә сәнин үзәринә дүшүр. Көчмәји планлашдыранлар өз еһтијаҹларыны өдәмәли вә һүгуги тәләбләрә ҹаваб вермәлидирләр (Галат. 6:5).
14. Фәалијјәтимиз гадаға алтында олан өлкәләрә ҝетмәк вә ја көчмәк истәјәндә һансы еһтијат тәдбирләрини ҝөрмәк лазымдыр?
14 Фәалијјәтимизә мәһдудијјәт гојулан өлкәләр. Бәзи өлкәләрдә баҹы-гардашларымыз ибадәт заманы чох еһтијатлы давранмалы олурлар (Мат. 10:16). Бу кими өлкәләрә гонаг ҝедән вә ја көчән тәблиғчиләр һеч өзләри дә билмәдән фәалијјәтимизә һәддән артыг диггәт ҹәлб едә вә јерли гардашлар үчүн тәһлүкә јарада биләр. Әҝәр сән белә өлкәләрдән биринә көчмәји планлашдырырсанса, әввәлҹә бу һагда јығынҹағынын ағсаггаллар шурасы васитәсилә сизин әразинин филиалына мәктуб јаз.
15. Шәраитләри башга өлкәјә көчмәјә јол вермәјәнләр хидмәтләрини неҹә ҝенишләндирә биләрләр?
15 Шәраитин јол вермир? Әҝәр башга өлкәјә көчмәк имканын јохдурса, руһдан дүшмә. Бәлкә, сәнин гаршында башга бөјүк фәалијјәт гапысы ачылыб? (1 Кор. 16:8, 9). Рајон нәзарәтчиси һарада тәләбат олдуғуну вә сәнин евдән узаға ҝетмәдән һарада хидмәт едә биләҹәјини дејә биләр. Ола билсин, јахынлыгдакы әҹнәбидилли јығынҹагда вә ја групда көмәјә еһтијаҹ вар. Јахуд да сән хидмәтини өз јығынҹағында ҝенишләндирә биләрсән. Шәраитин һәр неҹә олурса-олсун, ән ваҹиби сәнин ибадәтә ҹанла-башла јанашмағындыр (Колос. 3:23).
16. Јығынҹағымыздан кимсә баша өлкәјә көчмәк истәјәндә биз буна неҹә јанашмалыјыг?
16 Сән гаршысына башга өлкәдә хидмәт етмәк мәгсәди гојан руһән јеткин мәсиһчиләри таныјырсанмы? Онда онлары дәстәкләмәјә вә руһландырмаға чалыш! Павел Сурија Антакијасыны тәрк едәндә о, Рома империјасынын үчүнҹү ән бөјүк шәһәр иди (Рома вә Искәндәријјәдән сонра). Бу ҹүр ҝениш әразиси олан Антакија јығынҹағында, еһтимал ки, Павелин көмәјинә бөјүк еһтијаҹ вар иди вә о, орадан ҝедәндә баҹы-гардашлар онун үчүн чох дарыхырдылар. Бунунла белә, Мүгәддәс Китабда Павел ҝетдикдән сонра гардашларын мәјуслуға гапылдыглары дејилмир. Бундан ҝөрүнүр ки, онлар јалныз өзләрини дүшүнмәк әвәзинә, бүтүн дүнјанын «тарла» — тәблиғ саһәси олдуғуну анлајырдылар (Мат. 13:38).
17. «Македонијаја ҝәл» дәвәтини гәбул етмәк үчүн һансы сәбәбләр вар?
17 Павел вә әмәкдашлары «Македонијаја ҝәл» дәвәтинә һај вердикләри үчүн бол хејир-дуалар алдылар. Македонијанын Филипи шәһәриндә олдуглары мүддәтдә онлар Лидијаны тапдылар вә «Јеһова онун үрәјини ачды ки, о, Павелин дедикләрини гәбул етсин» (Һәв. иш. 16:14). Лидија вә бүтүн ев әһли вәфтиз олунан заман Павел вә миссионер әмәкдашларынын севинҹини тәсәввүр ет! Бир чох өлкәләрдә, Лидија кими, һәлә Падшаһлыг һагда хош хәбәри ешитмәјән сәмими-гәлбли инсанлар вар. Әҝәр «Македонијаја ҝәл» дәвәтини гәбул етсәниз, сиз дә бу кими инсанлары тапмаг вә өјрәтмәк имканындан севинҹ әлдә едәҹәксиниз.
[5–ҹи сәһифәдәки чәрчивә]
Ҝетмәк истәдијин өлкәдә тәләбат олуб-олмадығыны неҹә өјрәнә биләрсән?
• Сонунҹу «Иллик мәҹмуә»јә нәзәр сал. Тәблиғчинин әһалијә олан нисбәтини диггәтлә нәзәрдән кечир.
• Өлкәләр барәдә мәгалә вә биографијалар тапмаг үчүн «Индекс»дән истифадә ет.
• Башга өлкәләрә ҝедән вә ја орада јашајан тәблиғчиләрлә сөһбәт ет.
• Әҝәр сән доғма дилиндә тәблиғ едә биләҹәјин өлкәни сечмисәнсә, дүнјәви мәнбәләрә, мәсәлән, Интернетә мүраҹиәт ет, һәмин өлкәдә нә гәдәр адамын сәнин дилиндә данышдығыны өјрән.