Мүгәддәс Китабы өјрәнмәк истәјәнләри тапмағын беш үсулу
1. Әҝәр јашадығымыз әразидә Мүгәддәс Китабы өјрәнмәк истәјән инсанлары тапмаг чәтиндирсә, нә етмәлијик вә нәјә ҝөрә?
1 Сәнин үчүн Мүгәддәс Китабы өјрәнмәк истәјән инсанлары тапмаг чәтиндирми? Бунун үчүн әлиндән ҝәләни ет. Јеһова Онун ирадәсини јеринә јетирмәкдән јорулмајан инсанлары хејир-дуаландырыр (Галат. 6:9). Ашағыда бу саһәдә бизә көмәк едәҹәк беш мәсләһәт мүзакирә олунур.
2. Инсанлара Мүгәддәс Китабы өјрәнмәји неҹә тәклиф едә биләрик?
2 Бирбаша тәклиф. Чохлары билир ки, биз «Ҝөзәтчи гүлләси» вә «Ојанын!» журналларыны тәклиф едирик. Амма, ола билсин, онлар Мүгәддәс Китабы өјрәнмәји тәклиф етдијимиздән бихәбәрдирләр. Буна ҝөрә дә евдән-евә тәблиғ едәркән нијә дә бирбаша өјрәнмә тәклиф етмәјәсән? Һәмчинин тәкрар баш чәкдијин инсанлардан Мүгәддәс Китабы өјрәнмәк истәјиб-истәмәдикләрини соруша биләрсән. Әҝәр разылашмасалар, онда онлара әдәбијјат ҝәтирмәјә вә марагларыны артырмаға давам едә биләрсән. Бир гардаш илләр әрзиндә бир әр-арвада баш чәкир вә онлара журнал ҝәтирирди. Журналларын сон нәшрләрини вериб ҝетмәк истәјәндә бирдән ағлына ҝәлир ки, Мүгәддәс Китабы өјрәнмәк истәјиб-истәмәдикләрини сорушсун. Разылашдыгларыны ешидәндә чох тәәҹҹүбләнир. Инди онлар Аллаһын һәср олунмуш хидмәтчиләридир.
3. Јығынҹаг ҝөрүшләринә ҝәләнләрлә киминсә Мүгәддәс Китабы өјрәндијини нәјә ҝөрә јәгин етмәмәлијик?
3 Јығынҹаға ҝәләнләр. Һеч вахт јәгин етмәли дејилик ки, јығынҹаға ҝәлән мараглананларын һамысы илә Мүгәддәс Китабы өјрәнән вар. Бир гардаш дејир: «Мүгәддәс Китабы өјрәтдијим инсанларын әксәријјәти илә, демәк олар ки, јығынҹагда таныш олмушам». Бир баҹы јығынҹагда утанҹаг бир гадына јахынлашмаг гәрарына ҝәлир; онун јығынҹагда ики вәфтиз олунмуш гызы вар иди. Сән демә, һәмин гадын јығынҹаглара һарадаса 15 илдир ҝәлирмиш. Өзү дә зала һәмишә ҝөрүш башлајандан сонра ҝәлир, гуртарандан сонра исә дәрһал ҝедирмиш. Нәтиҹәдә, о, Мүгәддәс Китабы өјрәнмәјә разылашды вә һәгигәти гәбул етди. Онунла өјрәнмәјә башлајан баҹы јазыр: «Чох тәәссүф едирәм ки, өјрәнмәк истәјиб-истәмәдијини ондан 15 илдән сонра сорушмушам!»
4. Башгаларынын көмәји илә Мүгәддәс Китабы өјрәнмәк истәјән инсанлары неҹә тапа биләрик?
4 Һәмиманлыларын көмәји. Бир баҹы чалышырды ки, диҝәр тәблиғчиләрлә онларын өјрәтдикләри инсанларын јанына ҝетсин. Сонда өјрәдән баҹы вә ја гардашын иҹазәси илә һәмин адамдан Мүгәддәс Китабы өјрәнмәк истәјән танышы олуб-олмадығыны сорушур. Бундан әлавә, тәкрар баш чәкдијин адама Мүгәддәс Китабы өјрәнмәк үчүн вәсаити тәклиф едәрәк соруша биләрсән: «Бу нәшри әлдә етмәк истәјән кимисә таныјырсыныз?» Бәзән шәраит елә ҝәтирир ки, тәблиғчиләр вә пионерләр саһәдә гаршылашдыглары адамла Мүгәддәс Китабы өјрәнмәк имканлары олмур. Буна ҝөрә дә башгаларына дејә биләрсән ки, лазым ҝәлсә Мүгәддәс Китабы һәр һансы бир инсанла өјрәнмәк имканын вар.
5. Нәјә ҝөрә јығынҹағымызын үзвләринин һәгигәтдә олмајан һәјат јолдашларына Мүгәддәс Китабы өјрәнмәји тәклиф едә биләрик?
5 Иманда олмајан һәјат јолдашлары. Јығынҹағынызда һәјат јолдашы иманда олмајан баҹы-гардашлар вармы? Бәзиләри һәгигәтдә олан һәјат јолдашлары илә Мүгәддәс Китаб барәдә данышмаг истәмәсәләр дә, анҹаг кәнар адамлардан кимсә онлара өјрәнмә тәклиф едәндә разылаша биләрләр. Анҹаг Мүгәддәс Китабы өјрәнмәји тәклиф етмәмишдән габаг, онларын иманда олан һәјат јолдашлары илә мәсләһәтләшмәк јахшы оларды.
6. Мүгәддәс Китабы өјрәнмәк истәјән инсанлары тапмаг үчүн дуа нә дәрәҹәдә ваҹибдир?
6 Дуа. Бу мәсәләдә дуанын ҝүҹүнү инкар етмәк олмаз (Јаг. 5:16). Јеһова ирадәсинә ујғун олан дуаларымыза ҹаваб верәҹәјини вәд едир (1 Јәһ. 5:14). Ҝәрҝин иш графики олан бир гардаш Мүгәддәс Китабла марагланан инсан тапмаг барәдә ҝүҹлү дуа едирди. Онун һәјат јолдашы нараһат иди ки, ҝөрәсән, әри өјрәнәнин — хүсусилә дә әҝәр онун чохлу проблемләри оларса — гајғысына неҹә галаҹаг. О, әринин марагланан адам тапмасы барәдә дуа едәндә бу нараһатчылығыны да Јеһоваја билдирди. Ики һәфтәдән сонра бу әр-арвад өз дуаларына ҹаваб алды: онларын јығынҹагларындан олан пионер бир баҹы Мүгәддәс Китабы арашдырмаг истәјән бир нәфәр тапыб она верди. Гардашын һәјат јолдашы јазыр: «Мүәјјән чәтинликләрә ҝөрә кимәсә Мүгәддәс Китабы өјрәдә билмәјәҹәјини дүшүнәнләрә дејирәм ки, дуаларында конкрет олсунлар вә бу барәдә дуа етмәјә давам етсинләр. Биз мәним тәсәввүр етдијимдән дә бөјүк севинҹ әлдә етмишик». Мәтанәтли олсаныз, сиз дә Мүгәддәс Китабы өјрәнмәк истәјән инсанлары тапаҹаг вә һәјата апаран јолда чохлу севинҹ дадаҹагсыныз (Мат. 7:13, 14).