«Иман өрнәкләри»
1. Октјабрын 19-дан башланан һәфтәдән етибарән «Јығынҹағын Мүгәддәс Китаб өјрәнмәси»ндә һансы китабы арашдыраҹағыг?
1 2015-ҹи ил октјабрын 19-дан башланан һәфтәдән етибарән «Јығынҹағын Мүгәддәс Китаб өјрәнмәси»ндә «Иман өрнәкләри» китабы кечиләҹәк. Бу нәшрдә Мүгәддәс Китабда ады чәкилән он дөрд мөмин инсанын башына ҝәләнләр арашдырылыр. Китаб елә тәртиб олунуб ки, охудугҹа һәмин инсанларын һәјаты адамын тәсәввүрүндә ҹанланыр, Јеһоваја хидмәт едәркән чәтинликләрлә үзләшән бу инсанлары, санки, реал һәјатда ҝөрүрсән. Китабда һәмчинин әһвалатлардан нәтиҹә чыхарылыр ки, онлары бу ҝүн һәјатымызда тәтбиг едә биләк (Ибр. 6:12).
2. «Иман өрнәкләри» китабынын һансы өзәлликләри вар?
2 Китабын өзәллији. Китабда јер алан заман хәтти вә хәритәләр бизә һәр бир персонажын нә вахт вә һарада јашадығыны мүәјјәнләшдирмәјә көмәк едир. Үстәлик, һәр фәсилдә «Тәкрар үчүн суаллар» јарымбашлығы вар. Бу, әһвалатларын үзәриндә дүшүнмәјә вә өјрәндијимиз ибрәтамиз дәрсләри тәтбиг етмәјә көмәк едәҹәк. Китабда һәмчинин чохлу рәнҝли рәсмләр вар. Бу рәсмләри чәкмәздән әввәл һәртәрәфли арашдырма апарылмышдыр, сонра исә лазыми сәһнә инҹәлијинә кими тәсвир олунмушдур. Рәсмләр һадисәләри инсанын тәсәввүрүндә ајдын шәкилдә ҹанландырыр.
3. Бу нәшрдән неҹә фајдалана биләрик?
3 Бизә фајдасы. Китабынын әввәлиндә Рәһбәрлик Шурасындан мәктуб јер алыб. Мәктубда белә сөзләр јазылыб: «Тәхәјјүлүнүзү ишә салын, һадисәләри јашајын. Чалышын персонажларын кечирдији һиссләри дујасыныз, ҝөрдүјү шејләри ҝөрәсиниз. Һәр әһвалатдакы гәһрәманын мүхтәлиф вәзијјәтләрдә неҹә даврандығына диггәт јетирин. Өзүнүзә суал верин: “Мән онун јериндә олсајдым, нә едәрдим?”» Дүздүр, тәхәјјүлү ишә салмаг о демәк дејил ки, өзүмүздән нәсә ујдурмалыјыг. Бу о демәкдир ки, Мүгәддәс Китабда јазыланлары тәсәввүрүмүздә ҹанландырмалы, өзүмүзү әһвалатдакы персонажларын јеринә гојмалыјыг. Бунун үчүн вахт сәрф етмәк, дүшүнмәк лазымдыр (Нәһ. 8:8). Әҝәр дәрс фәслин јарысындан башланаҹагса, ҝөрүшү апаран гардаш 30—60 санијә әрзиндә өтән дәрсдә кечиләнләри тәкрарламалыдыр. Дәрсә «Тәкрар үчүн суаллар» чәрчивәси дүшмәјибсә, онда јекунда бир-ики суалла дәрси тәкрарламаг олар.
4. Нәјә ҝөрә «Иман өрнәкләри» китабыны арашдырмаг лазымдыр?
4 Бу дүнја һәр ҝүн һансыса јолла иманымызы мәһв етмәјә, зәифләтмәјә чалышыр. Бу нәшр, еләҹә дә «Ҝөзәтчи гүлләси» журналында бу силсиләдән олан мәгаләләр Јеһованын иманымызы мөһкәмләтмәк үчүн вердији бир һәдијјәдир (Јаг. 1:17). Ҝәлин «Јығынҹағын Мүгәддәс Китаб өјрәнмәси»нә мүнтәзәм ҝәләк вә мүзакирәдә мүмкүн гәдәр чох иштирак едәк. Онда бу нәшрдән там фајда әлдә едәҹәјик.