«Аллаһа јахынлашын, О да сизә јахынлашаҹаг» (Јагуб 4:8).

Аллаһ дуалары ешидир?

Нә вахтса дүшүнмүсүнүз: «Ҝөрәсән Аллаһ дуаларымы ешидир?» Чохларыны бу суал нараһат едир. Бәзи инсанлар Аллаһа мүәјјән проблем барәдә нә гәдәр дуа етсәләр дә, проблем һәлл олунмур. Бу о демәкдир ки, Аллаһ дуаларымызы динләмир? Хејр! Мүгәддәс Китаб бизи әмин едир ки, дүзҝүн дуа едириксә, Аллаһ дуамызы ешидир. Ҝәлин ҝөрәк орада бу барәдә нә јазылыб.

**АЛЛАҺ ДУАНЫЗЫ ЕШИДИР.**

«Еј дуалары ешидән, һәр ҹүр инсан һүзуруна ҝәләҹәк» (Зәбур 65:2).

Бәзи инсанлар дејирләр ки, дуа едәндә өзләрини јахшы һисс едирләр. Она ҝөрә дә дуаларыны киминсә динләдијинә инанмасалар да, дуа едирләр. Амма дуа садәҹә проблемләр вахты өзүмүзү јахшы һисс етмәјә көмәк едән сакитләшдириҹи васитә дејил. Мүгәддәс Китаб бизи әмин едир: «Јеһоваa Ону чағыранлара, Ону сәмими-гәлбдән чағыранлара јахындыр... Фәрјадларыны ешидәр» (Зәбур 145:18, 19).

Буна ҝөрә дә әмин ола биләрик ки, Јеһова Аллаһ бәндәләринин дуаларыны динләјир. О дејир: «Сиз Мәни чағыраҹагсыныз, ҝәлиб дуа едәҹәксиниз, Мән дә сизи ешидәҹәјәм» (Әрәмја 29:12).

**АЛЛАҺ ОНА ДУА ЕТМӘЈИНИЗИ ИСТӘЈИР.**

Ата ојунҹагла ојнајан гызынын јанында отуруб.

«Даима дуа един» (Ромалылара 12:12).

Мүгәддәс Китаб бизи сәсләјир ки, даима, һәр ан дуа едәк. Демәли, Јеһова Аллаһ бизим Она дуа етмәјимизи истәјир (Мәтта 26:41; Ефеслиләрә 6:18).

Нәјә ҝөрә Аллаһ истәјир ки, Она дуа едәк? Бир нүмунәјә бахаг. Һансы валидејнә ушағы ҝәлиб «ата, мәнә көмәк ет» дејәндә хош олмур? Чох ҝүман ки, ата ушағын нәјә еһтијаҹы олдуғуну, нә һисс етдијини артыг билир. Амма буну ушағын дилиндән ешидәндә баша дүшүр ки, өвлады она етибар едир. Биз дә Јеһова Аллаһа дуа едәндә Она етибар етдијимизи, Она јахынлашмаг истәдијимизи ҝөстәририк (Мәсәлләр 15:8; Јагуб 4:8).

**АЛЛАҺ ГАЈҒЫНЫЗА ГАЛЫР.**

Иш адамы мәјус һалда бинанын пилләкәниндә отуруб. Јанында иш ләвазиматлары илә долу гуту вар.

«Бүтүн гајғыларынызы Онун үзәринә гојун, чүнки О, гајғынызы чәкир» (1 Бутрус 5:7).

Аллаһ бизи севдији, гајғымыза галдығы үчүн истәјир ки, Она дуа едәк. Аллаһ бизим дәрдләримиздән аҝаһдыр, нә чәкдијимизи ҝөрүр. О бизә көмәк етмәк истәјир.

Давуд пејғәмбәр бүтүн һәјаты боју Јеһова Аллаһа үз тутмуш, үрәјини Она ачыб данышмышды (Зәбур 23:1—6). Бәс Аллаһ Давуд пејғәмбәрә неҹә јанашырды? Аллаһ ону севирди, онун бүтүн дуаларыны динләјирди (Һәвариләрин ишләри 13:22). Аллаһ бизим дә дуаларымызы ешидир, ахы О бизи дә севир.

«ЈЕҺОВАНЫ СЕВИРӘМ, ЧҮНКИ ЕШИДИР СӘСИМИ»

Бу сөзләр Мүгәддәс Китабдакы бир мәзмурун јазарынын сөзләридир. О әмин иди ки, Аллаһ онун дуаларыны ешидир вә бу она чох көмәк едирди. О өзүнү Аллаһа јахын һисс едирди вә һәјатын чәтинликләринин, ағры-аҹысынын өһдәсиндән ҝәлмәјә ҝүҹ тапырды (Зәбур 116:1—9).

Аллаһын дуаларымызы ешитдијинә үрәкдән инансаг, Она һәмишә дуа едәҹәјик. Испанијанын шималында јашајан Педро адлы бир кишинин 19 јашлы оғлу автомобил гәзасында вәфат етмишди. Педро үрәјиндәки ағры-аҹыны Аллаһа данышырды вә дөнә-дөнә дуа едиб Ондан тәсәлли, көмәк истәјирди. О дејир: «Јеһова Аллаһ дуаларыма ҹаваб верди. Һәјат јолдашымла мәнә диндашларымызын васитәсилә тәсәлли верди, дајаг олду».

Киши гәм-гүссәјлә әлиндәки шәклә бахыр, достлары ону тәсәлли едир. — Әксәр һалларда Аллаһ дуаларымыза достларымызын дәстәји, тәсәллиси васитәсилә ҹаваб верир

Дүздүр, дуалар Педронун оғлуну ҝери гајтармады. Амма она вә аиләсинә чох бөјүк көмәк етди. Педронун һәјат јолдашы Марија Кармен дејир: «Дуа мәнә бу дәрдә дөзмәјә көмәк етди. Билирдим ки, Јеһова Аллаһ мәни баша дүшүр. Чүнки Она дуа едәндә үрәјимә раһатлыг, сакитлик чөкүрдү».

Һәм Мүгәддәс Китаб, һәм дә өз тәҹрүбәләрини бөлүшән инсанларын сөзләри ҝөстәрир ки, Аллаһ дуалары ешидир. Амма бир шеј дә ајдындыр ки, Аллаһ бүтүн дуалара ҹаваб вермир. Бәс нәјә ҝөрә Аллаһ бәзи дуалара ҹаваб верир, бәзиләринә исә јох?

a Јеһова Аллаһын адыдыр (Зәбур 83:18).