Билирсиниз?

Нәјә ҝөрә Давуд падшаһын ордусунда јаделлиләр дә хидмәт едирди?

ДАВУД падшаһын ордусунда јаделли әсҝәрләр дә хидмәт едирди, мәсәлән, әмуни Салиг, һет Урјај вә муаби Исмаһa (1 Салн. 11:39, 41, 46). Һәмчинин ордуда «кәритиләр, фәләслиләр, ҹат»лылар да вар иди (2 Ишм. 15:18). Белә һесаб олунур ки, кәритиләр вә фәләслиләр неҹәсә филиштлиләрлә әлагәси олан халглар иди (Һизг. 25:16). Ҹатлылар исә Филишт шәһәри Ҹатын сакинләри иди (Јуш. 13:2, 3; 1 Ишм. 6:17, 18).

Бәс Давуд падшаһ ордуја нәјә ҝөрә јаделлиләри дә ҝөтүрмүшдү? Чүнки онларын һәм она, һәм дә ән әсасы Јеһоваја сәдагәтиндән архајын иди. Мәсәлән, бир Мүгәддәс Китаб лүғәтиндә кәритиләрлә фәләслиләр һагда белә сөзләр јазылыб: «Онлар Давудун һакимијјәтинин ән ағыр дөнәминдә белә она садиг галмышдылар» («The New Interpreter’s Dictionary of the Bible»). Бәс буну неҹә ҝөстәрмишдиләр? «Бүтүн исраиллиләр» Давуду атыб «Сәба адында бир мәрдимазар»ын далынҹа ҝедәндә кәритиләрлә фәләслиләр Давудун јанында галдылар вә Сәбанын үсјаныны јатырмаға көмәк етдиләр (2 Ишм. 20:1, 2, 7). Бир дәфә исә Давудун оғлу Әдунијјә атасынын тахтыны әлә кечирмәјә ҹәһд етмишди. Амма кәритиләрлә фәләслиләр Давуда садиг галыб Сүлејманын тахта чыхмасына көмәк етдиләр. Чүнки падшаһын хәләфи кими Јеһова Сүлејманы сечмишди (1 Пад. 1:24—27, 38, 39).

Давуда сон дәрәҹә садиг галан диҝәр јаделли исә ҹатлы Иттај иди. Абсалам үсјан едәндә вә исраиллиләрин үрәјини әлә алыб онлары Давуда гаршы галдыранда Иттај вә онун 600 дөјүшчүсү Давудун тәрәфини тутмушду. Иттај јаделли олдуғу үчүн Давуд әввәл-әввәл она дөјүшә ҝетмәмәји мәсләһәт ҝөрмүшдү, амма о демишди: «Јеһоваја анд олсун, падшаһын ҹаны һаггы, өлмәк дә варса, галмаг да варса, сәнинлә ҝедәҹәјәм!» (2 Ишм. 15:6, 18—21).

Кәритиләр, фәләслиләр вә ҹатлылар јаделли олсалар да, Јеһованын вар олан Аллаһ олдуғуну гәбул едирдиләр вә Давуда Јеһованын мәсһ едилмиши кими бахырдылар. Јәгин, Давуд јанында дағ кими дајанан бу ҹүр садиг инсанлара ҝөрә фәрәһләнирди.