Технолоҝијанын тәсири. Дүшүнҹәнизә

Инсан даима јени шејләр өјрәнир, ја мәктәбдә, ја ишдә, ја да диҝәр саһәләрдә. Технолоҝијанын бу саһәдә инсана бөјүк көмәји дәјир. Һәлә һеч вахт бу гәдәр мәлумат боллуғу олмајыб. Инсан евиндән чыхмадан, һәтта јериндән белә галхмадан истәдији мәлуматы әлдә едә билир.

Лакин електрон ҹиһазлардан ҝениш истифадә едән инсанлар...

охујаркән фикирләрини топламаға чәтинлик чәкирләр.
диггәтләрини бир ишә ҹәмләјә билмирләр.
тәк галанда тез дарыхырлар.

НӘЈИ БИЛМӘК ЛАЗЫМДЫР?

Јенијетмә гыз ејни анда бир нечә иши ҝөрмәјә чалышыр. Телефонунда месаж јазыр, досту илә ҝөрүнтүлү данышыр, дәрс өјрәнмәк үчүн компүтердән вә дәрсликдән истифадә едир.

ОХУМАГ

Електрон ҹиһазлардан тез-тез истифадә едән адамларын мәгаләни вә ја китабы башдан ајаға кими охумаға һөвсәләси чатмыр. Буна ҝөрә дә онлар әсас фикри билмәк үчүн мәгаләјә үздән ҝөз ҝәздирирләр.

Суала тез ҹаваб тапмаг истәјәндә материала өтәри ҝөз ҝәздирмәкдә пис һеч нә јохдур. Анҹаг мөвзуну дәриндән баша дүшмәк үчүн бу ҹүр охумаг сәмәрәли дејил.

ДҮШҮНҮН: Узун мәтнләри охумаға һөвсәләниз чатыр? Нәјә ҝөрә билик алмаг үчүн диггәтлә охумаг лазымдыр? (МӘСӘЛЛӘР 18:15).

ДИГГӘТИ ҸӘМЛӘМӘК

Бәзи инсанлар дүшүнүр ки, технолоҝија ејни анда ики иши ҝөрмәјә имкан јарадыр, мәсәлән, дәрс охујаркән достларла месажлашмаға. Амма инсанын фикри дағыныг оланда һеч бир иши јахшы иҹра едә билмир, хүсусән дә әҝәр ишләрин һәр бири диггәт тәләб едирсә.

Диггәти ҹәмләмәк үчүн инсан ҝәрәк өзүнә һаким олсун. Чәтин олса да, буну етмәјә дәјәр. Грејс адлы јенијетмә дејир: «Фикрини бир шејә ҹәмләјәндә даһа аз сәһвләр едирсән вә даһа аз стрес кечирирсән. Диггәт јетирмишәм ки, адам фикрини бир ишә ҹәмләјәндә, ејни анда бир нечә иши ҝөрмәјә чалышмајанда даһа јахшы нәтиҹә әлдә едир».

ДҮШҮНҮН: Ејни анда бир нечә иши ҝөрмәк сизә диггәтинизи ҹәмләмәјә вә охудугларынызы јадда сахламаға мане олур? (МӘСӘЛЛӘР 17:24).

ТӘК ГАЛМАГ

Бәзи инсанлар тәк галмағы севмир. Онлар тәк галанда башларыны гарышдырмаг үчүн дәрһал әлләринә електрон ҹиһаз алырлар. Оливија адлы гадын дејир: «Он беш дәгигә телефона бахмасам, телевизору јандырмасам, үрәјим партлајар».

Инсанын һәрдән тәк галмасы јахшыдыр. Бу заман дәриндән дүшүнмәк үчүн шәраит јараныр. Дәриндән дүшүнмәк исә һәм ҝәнҹләр, һәм дә јеткин јашда олан инсанлар үчүн ваҹибдир. Чүнки инсан нәјисә өјрәнмәк истәјирсә, о, мүтләг дәриндән дүшүнмәји баҹармалыдыр.

ДҮШҮНҮН: Тәк галдығыныз вахтлардан сәмәрәли истифадә едирсиниз? (1 ТИМУТИЈӘ 4:15).

НӘ ЕДӘ БИЛӘРСИНИЗ?

ӨЗҮНҮЗҮ ТӘҺЛИЛ ЕДИН

Технолоҝијадан неҹә истифадә едә биләрсиниз ки, о сизә дүшүнҹә габилијјәтинизи инкишаф етдирмәјә көмәк етсин? Електрон ҹиһазлар сизә диггәтинизи ҹәмләмәјә вә өјрәнмәјә һансы һалда мане ола биләр?

МҮГӘДДӘС КИТАБДАН МӘСЛӘҺӘТ: «Һикмәти, дүшүнҹәни гору» (МӘСӘЛЛӘР 3:21).

ӨЗҮНҮЗДӘН СОРУШУН:

Ҹиһазда узун мәтн охујанда диггәтим тез-тез јајыныр? Әҝәр беләдирсә, диггәтими ән чох нә јајындырыр?
Бу проблеми минимума ендирмәк үчүн вә ја арадан галдырмаг үчүн нә едә биләрәм?

Мәсләһәт: Әввәл-әввәл гыса парчалар охумаға башлајын, тәдриҹән мәтнин һәҹмини артырын. Диггәтинизи материала ҹәмләмәк үчүн уҹадан, тәләсмәдән охујун.

Охудугларым барәдә дәриндән дүшүнмәјә вахт ајырырам?

Мәсләһәт: Охумаг үчүн ајырдығыныз вахтын сон он дәгигәсини дүшүнмәјә һәср един.

Һансы вахтлар ејни анда бир нечә иши ҝөрмәјә мејилли олурам?
Диггәтими бир ишә ҹәмләмәк үчүн нә едә биләрәм?

Мәсләһәт: Чалышын охудуғунуз мәканда диггәтинизи јајындыран һеч нә олмасын.

МҮГӘДДӘС КИТАБДАН МӘСЛӘҺӘТ: «Һикмәт газан, дәрракә газан» (МӘСӘЛЛӘР 4:5).