Мүвафиг сәс ҝүҹү

НАТИГ кифајәт гәдәр һүндүрдән данышмаса, динләјиҹиләрин бәзиләри мүрҝүләмәјә башлајаҹаг. Хидмәт заманы тәблиғчи һәддән артыг јаваш данышса, ев саһибинин диггәти јајынаҹаг. Јығынҹаг ҝөрүшләриндә шәрһләр кифајәт гәдәр јүксәк сәслә верилмәјәндә, иштирак едәнләр руһланмајаҹаглар (Ибр. 10:24, 25). Диҝәр тәрәфдән исә, натиг сәбәбсиз јерә сәсини галдырарса, динләјиҹиләр өзләрини нараһат һисс едәр, һәтта бу, онларын әсәбләринә тохуна биләр (Сүл. мәс. 27:14).

Аудиторијаны нәзәрә ал. Кимә мүраҹиәт едирсән? Бир нәфәрә? Аиләјә? Тәблиғ үчүн ҝөрүшдә иштирак едән кичик група? Бүтөв јығынҹаға? Јохса конгресдә иштирак едәнләрә? Ајдындыр ки, бир вәзијјәт үчүн мүвафиг олан сәс ҝүҹү диҝәр вәзијјәтдә мүвафиг олмаја биләр.

Аллаһын хидмәтчиләри мүхтәлиф һалларда ҝениш аудиторија гаршысында нитг сөјләмишләр. Сүлејманын ҝүнләриндә мәбәдин тәнтәнәли ачылышы заманы сәс ҹиһазлары ихтира олунмамышды. Буна ҝөрә дә Сүлејман һүндүр күрсүјә галхыб «уҹа сәслә» халга хејир-дуа верди (1 Пад. 8:55; 2 Салн. 6:13). Әсрләр сонра, ерамызын 33-ҹү илинин Пентикост ҝүнүндә мүгәддәс руһун верилмәсиндән сонра, бөјүк бир издиһам — бәзиләри марагландыглары үчүн, диҝәрләри исә лаға гојараг — Јерусәлимдә бир груп мәсиһчинин әтрафына топлашмышды. Петер мүдрик давранараг ‘ајаға дурду вә сәсини јүксәлтди’ (Һәв. иш. 2:14). Һәмин ҝүн чох бөјүк шаһидлик верилди.

Сәс ҝүҹүнүн һәр һансы бир вәзијјәтә мүвафиг олуб-олмадығыны неҹә мүәјјән етмәк олар? Ән јахшы ҝөстәриҹиләрдән бири динләјиҹиләрин мүнасибәтидир. Әҝәр динләјиҹиләрдән киминсә сәни ешитмәкдә чәтинлик чәкдијини ҝөрүрсәнсә, сәсини јүксәлт.

Бир нәфәрә, јахуд бир група мүраҹиәт етмәјимиздән асылы олмајараг, динләјиҹиләримизин ким олдуғуну нәзәрә алмаг мүдриклик оларды. Әҝәр кимсә ағыр ешидирсә, ола билсин, сәсини бир аз галдырмаг лазым ҝәләҹәк. Лакин гышгырмагла гоҹалыг уҹбатындан ешитдикләрини бир гәдәр ҝеҹ анлајан инсанларда хош тәәссүрат ојатмајаҹагсан. Бу, һәтта кобудлуг кими дә гәбул олуна биләр. Бәзи халгларда һәддән артыг уҹадан данышан инсанын гәзәбли, јахуд сәбирсиз олдуғу һесаб олунур.

Јајындырыҹы сәсләри нәзәрә ал. Тәблиғ едәркән сәсимизин уҹалығы дүшдүјүмүз шәраитдән әһәмијјәтли дәрәҹәдә асылыдыр. Машынларын, ушагларын сәс-күјү, итләрин һүрүшмәси, уҹадан сәсләнән мусиги вә ја телевизор сәси сәнә мане ола биләр. Диҝәр тәрәфдән, евләрин бир-биринә јахын јерләшдији әразиләрдә гоншуларын диггәтини ҹәлб едәҹәк дәрәҹәдә уҹадан данышмаг ев саһибини пис вәзијјәтдә гоја биләр.

Јығынҹаг, јахуд конгресләрдә чыхыш едән гардашлар да мүхтәлиф чәтинликләрлә үзләширләр. Динләјиҹиләр гаршысында ачыг һавада чыхыш етмәк јахшы акустикасы олан залда чыхыш етмәкдән тамамилә фәргләнир. Латын Америкасында ики миссионер марагланан бир адамын һәјәтиндә мәрузә сөјләјирди. Бу заман јахынлыгдакы базар мејданында атәшфәшанлыг кечирилир, гоншулугда исә хоруз ара вермәдән банлајырды!

Мәрузә вахты сәс-күј азалана кими фасилә етмәк, јахуд сәси галдырмаг лазым ҝәлә биләр. Мәсәлән, әҝәр ҝөрүшүн кечирилдији јерин дамы дәмирдәндирсә, гәфилдән јаған лејсан јағыш уҹбатындан динләјиҹиләр, демәк олар ки, һеч нә ешитмәјәҹәкләр. Ағлајан ушағын сәси, јахуд ҝөрүшә ҝеҹикәнләрин јаратдығы нараһатлыг, сөзсүз ки, ешитмәјә мане олаҹаг. Чатдырдығын мәлуматдан динләјиҹиләрин там фајдаланмасы үчүн манеәләрә үстүн ҝәлмәји өјрән.

Сәсҝүҹләндириҹи ҹиһазларын да көмәји бөјүкдүр, лакин бу, шәраит тәләб едәркән натигин сәсини артырмасы зәрурәтини арадан галдырмыр. Електрик енержисинин тез-тез кәсилдији јерләрдә натигләр мәрузәни микрофонсуз сөјләмәк мәҹбуријјәтиндә галырлар.

Мүзакирә олунан материалы нәзәрә ал. Тәгдим етдијин материалын мөвзусу да сәсин ҝүҹүнә тәсир едир. Әҝәр мөвзу сәрт данышмағы тәләб едирсә, һәддән артыг мүлајим данышараг онун тәсир ҝүҹүнү зәифләтмә. Мәсәлән, Мүгәддәс Јазылардан Јеһованын чыхардығы һөкмләри мәһәббәтлә верилән мәсләһәтә нисбәтән ҝүҹлү сәслә охумаг лазымдыр. Сәсинин ҝүҹүнү мөвзуја ујғунлашдыр, лакин еһтијатлы ол ки, диггәти өзүнә ҹәлб етмәјәсән.

Мәгсәдини нәзәрә ал. Әҝәр динләјиҹиләрини сәјли олмаға тәшвиг етмәк истәјирсәнсә, бир гәдәр ҝүҹлү сәслә данышмалысан. Әҝәр мәгсәдин онларын дүшүнҹә тәрзини дәјишмәкдирсә, һәддән артыг уҹадан данышараг онлары өзүндән узаглашдырма. Тәсәлли вермәјә чалышаркән исә мүлајим сәс даһа мүнасиб олур.

Јүксәк сәсдән дүзҝүн истифадә ет. Башы һансыса бир ишә гарышан адамын диггәтини ҹәлб етмәк истәјәркән чох вахт сәсимизи галдыырырыг. Валидејнләр буну билдикләри үчүн ушагларыны һәјәтдән евә чағыранда онлары уҹадан сәсләјирләр. Јығынҹаг ҝөрүшүнә, јахуд конгресә сәдрлик едән гардаша да ҝөрүшү башламаг үчүн бир гәдәр уҹадан данышмаг лазым ҝәлир. Хидмәт заманы һәјәтдә иш ҝөрән адамлара јахынлашанда диггәтләрини ҹәлб етмәк үчүн онлары уҹадан саламламаг лазым ҝәлә биләр.

Киминсә диггәтини ҹәлб етдикдән сонра да кифајәт гәдәр һүндүрдән данышмаг ваҹибдир. Натиг чох сакит сәслә данышанда динләјиҹиләрдә елә тәәссүрат ојана биләр ки, ја о, јахшы һазырлашмајыб, ја да өзүнә әмин дејил.

Уҹадан сәсләнән әмр динләјиҹиләри һәрәкәтә тәшвиг едә биләр (Һәв. иш. 14:9, 10). Ејни тәрздә, гышгырараг верилән әмр бәдбәхт һадисәнин гаршысыны ала биләр. Филипидә зинданбан мәһбусларын гачдығыны дүшүндүјүндән аз гала өзүнү өлдүрәҹәкди. «Лакин Павел уҹа сәслә гышгырыб деди: “Өзүнә јаманлыг етмә, чүнки биз һамымыз бурадајыг!”» Беләликлә, интиһарын гаршысы алынды. Сонра Павел илә Сила зинданбана вә онун евиндәкиләрә шаһидлик етдиләр, нәтиҹәдә онлар һәгигәти гәбул етдиләр (Һәв. иш. 16:27-33).

Сәси артырмаг үчүн нә етмәк лазымдыр? Мүвафиг сәс ҝүҹү илә данышмаг һамыја асан баша ҝәлмир. Ким исә сәси зәиф олдуғундан алчагдан данышыр. Анҹаг чалышмағын сајәсиндә сәсин ҝүҹүнү артырмаг, ејни заманда мүлајимлијини горумаг мүмкүндүр. Неҹә нәфәс алдығына вә дурушуна диггәт јетир. Дик отурмағы вә дүз дурмағы мәшг ет. Күрәјини дүз тут вә дәриндән нәфәс ал. Ағҹијәрләрин ашағы һиссәсини һава илә долдур. Бу һава еһтијатынын дүзҝүн тәнзимләнмәси сајәсиндә данышаркән сәсин ҝүҹүнә нәзарәт етмәк мүмкүн олур.

Башгаларынын проблеми исә одур ки, онлар чох уҹадан данышырлар. Ола билсин, ачыг һавада, јахуд сәс-күјлү шәраитдә ишләдикләриндән онлар буна алышмышлар. Јахуд боја-баша чатдыглары мүһитдә гышгырмаг, бир-биринин сөзүнү кәсмәк ади һал олуб. Нәтиҹәдә, онларда елә фикир јараныб ки, сөһбәтә гошулмағын јеҝанә јолу башгаларындан бәрк данышмагдыр. Лакин белә инсанлар Мүгәддәс Китабын ‘шәфгәт, хејирхаһлыг, тәвазөкарлыг, һәлимлик вә сәбирлилији ҝејинмәк’ мәсләһәтинә диггәт јетирдикҹә, башгалары илә сөһбәт едәркән сакит данышмағы өјрәнәҹәкләр (Колос. 3:12).

Јахшы һазырлыг, хидмәтдә мүнтәзәм иштирак етмәјин сајәсиндә әлдә едилән тәҹрүбә, һәмчинин Јеһоваја дуа етмәк мүвафиг сәс ҝүҹү илә данышмаға көмәк едәҹәк. Истәр сәһнәдән данышаркән, истәрсә дә хидмәтдә инсанларла сөһбәт едәркән диггәтини динләјиҹиләринин дедикләрини ешитмәклә һансы фајданы әлдә едәҹәјинә јөнәлт (Сүл. мәс. 18:21).