Микрофондан истифадә

БАҸЫ-ГАРДАШЛАРЫМЫЗ јығынҹаг ҝөрүшләринә ҝәлмәк үчүн чохлу вахт вә ҝүҹ сәрф едирләр. Ҝөрүшләрдән фајдаланмаг үчүн онлар дејиләнләри ајдын ешитмәлидирләр.

Гәдим Исраилдә сәсҝүҹләндириҹи ҹиһазлар јох иди. Бәс онда Вәд едилмиш дијара ҝирмәздән әввәл Моав дүзәнлијиндә Муса Исраил халгына мүраҹиәт едәркән милјонларла инсан ону неҹә ешидирди? Ола билсин, дүшәрҝә боју бир-бириндән мүәјјән гәдәр аралы дуран кишиләр онун сөзләрини бир-биринә өтүрүрдүләр (Ганун. т. 1:1; 31:1). Исраиллиләр Иордандан гәрбә доғру торпаглары зәбт етмәјә башладыгдан бир гәдәр сонра Јешуа халгы Ҝеризм вә Евал дағларынын әтәјиндә топлады. Еһтимал ки, бу заман левилиләр һәмин ики дағын арасындакы вадидә дурмушдулар. Бүтүн халг садаланан хејир-дуалары вә ләнәтләри ешидиб, онлара ҹаваб верирди (Јешуа 8:33-35). Ола биләр, бу һалда да, сөзләр дүшәрҝә боју дүзүлмүш адамлар васитәсилә чатдырылырды, анҹаг шүбһә јохдур ки, һәмин әразидә сәсин јахшы јајылмасынын да көмәји дәјмишди.

Тәхминән 1 500 ил сонра Исаны динләмәк үчүн Галилеја дәнизинин саһилиндә ‘бөјүк издиһам топлашанда’ о, гајыға миниб, саһилдән узаглашды вә отуруб халга мүраҹиәт етди (Марк 4:1, 2). Ҝөрүнүр, Иса билирди ки, сујун үзү һамар оланда сәс хүсусилә ајдын ешидилир. Буна ҝөрә дә гајыгдан данышырды.

ХХ әсрин әввәлләринәдәк динләјиҹиләрин дејиләнләри ешитмәси натигин сәсинин нә дәрәҹәдә ҝур вә ајдын олмасындан асылы иди. Анҹаг 1920-ҹи илләрдән башлајараг, Јеһованын хидмәтчиләри конгресләрдә сәсҝүҹләндириҹи ҹиһазлардан истифадә етмәјә башладылар.

Сәсҝүҹләндириҹи ҹиһазлар. Сәсҝүҹләндириҹи ҹиһазлар сәсин сәҹијјәви хүсусијјәтини вә тонуну горујараг, данышанын сәсини дәфәләрлә ҝүҹләндирир. Бу ҹиһазларын сајәсиндә данышана сәс телләрини ҝүҹә салмаг лазым ҝәлмир. Динләјиҹиләр исә ону раһат ешидиб, диггәти дејиләнләрә ҹәмләјә билирләр.

Јеһованын Шаһидләри чалышырлар ки, кечирдикләри конгресләрдә кејфијјәтли сәсҝүҹләндириҹи ҹиһазлардан истифадә етсинләр. Бундан башга, бир чох Падшаһлыг Залларында мәрузә илә чыхыш едән, ҝөрүшләри апаран вә ја сәһнәдән охујан гардашларын сәсини ҝүҹләндирмәк үчүн бу ҹиһазлардан истифадә едилир. Һәмчинин бәзи јығынҹагларда динләјиҹиләр шәрһ верәркән микрофондан истифадә едирләр. Әҝәр сизин дә јығынҹагда белә ҹиһазлар варса, онлардан дүзҝүн истифадә етмәји өјрән.

Бәзи әсас гајдалар. Бу ҹиһазлардан дүзҝүн истифадә етмәк үчүн нөвбәти амилләри јадда сахла: 1) микрофону бир гајда олараг, ағыздан 10-15 сантиметр аралы тутмаг лазымдыр. Микрофон ағыза чох јахын оланда, сөзләр анлашылмаз олур, чох аралы оланда исә сәс јахшы ешидилмир. 2) Микрофону бөјүрдән јох, дүз тутмаг лазымдыр. Данышаркән башыны саға-сола чевирмә, үзүнү микрофона тутуб даныш. 3) Ади һалларда данышдығындан бир гәдәр уҹа вә интенсив даныш. Анҹаг гышгырма. Сәсҝүҹләндириҹи ҹиһазын сајәсиндә ән узагда отуран адам да сәни ешидәҹәк. 4) Боғазыны арытламаг, асгырмаг вә ја өскүрмәк истәјәндә ағзыны кәнара тут.

Мәрузә илә чыхыш едәркән. Сән күрсүјә галханда, гардашлардан бири микрофону дүзәлдәҹәк. Бу заман үзүнү динләјиҹиләрә тут вә сәрбәст дур. Гејдләрини күрсүнүн үстүнә гој вә диггәт јетир ки, микрофон онларын габағыны тутмасын.

Чыхыша башлајанда сәсинин сәсҝүҹләндириҹидән неҹә чыхдығына фикир вер. Сәсин һәддән артыг уҹадан чыхмыр, јахуд партлајышлы сәсләр јаранмыр ки? Бу һалда бир нечә сантиметр ҝери чәкилмәк лазым ҝәлә биләр. Гејдләринә бахан заман, јаддан чыхарма ки, үзүнү микрофондан ашағы јох, микрофона тәрәф вә ја ондан бир аз јухары тутуб данышмаг лазымдыр.

Сәһнәдән охујаркән. Охујаркән үзүнүн динләјиҹиләрә тәрәф олмасы үчүн Мүгәддәс Китабы вә ја башга нәшри әлиндә тутмаг јахшы оларды. Чох еһтимал ки, микрофон дүз гаршында олдуғундан охудуғун материалы азаҹыг јана тутмалы олаҹагсан. Буна ҝөрә дә бир аз јана дур ки, охујанда дүз микрофона данышасан.

«Ҝөзәтчи Гүлләси»нин өјрәнилмәси заманы гардашларын әксәријјәти охујаркән ајаг үстә дурур вә дајаға бәркидилмиш микрофондан истифадә едир. Белә олан һалда даһа раһат нәфәс алмаг вә даһа ифадәли охумаг мүмкүн олур. Унутма ки, абзасларын охунмасы ҝөрүшүн ваҹиб һиссәсидир. Динләјиҹиләрин ҝөрүшдән фајда әлдә етмәји, охунан материалы ешитмәләриндән чох асылыдыр.

Ҝөрүшләрдә шәрһ верәркән. Јығынҹағынызда динләјиҹиләрин шәрһ верәркән микрофондан истифадә етмәләри ајдын вә кифајәт гәдәр уҹадан данышмағын ваҹиблијини истисна етмир. Шәрһ верәркән Мүгәддәс Китабы вә ја өјрәнилән нәшри әлиндә тут ки, микрофон мәтни ҝөрмәјинә мане олмасын.

Бәзи јығынҹагларда микрофонла хидмәт етмәк үчүн гардашлар тәјин олунур. Сизин дә јығынҹағынызда беләдирсә, сәнә сөз вериләндә әлини ашағы салма ки, микрофонла хидмәт едән гардаш һарада отурдуғуну ҝөрсүн вә микрофону сәнә тез чатдырсын. Әҝәр микрофону шәрһ верән өзү әлиндә тутурса, ону ҝөтүрмәјә һазыр ол. Микрофону әлинә алмамыш данышма. Шәрһини дејиб гуртаран кими микрофону гајтар.

Сәһнәҹикдә иштирак едәркән. Сәһнәҹикдә иштирак едәркән микрофондан истифадә едилмәсинә хүсусилә диггәт јетирмәк лазымдыр. Микрофон дирәјә бәркидилибсә, демәли, Мүгәддәс Китабы вә гејдләрини сахламаг үчүн һәр ики әлин бош олаҹаг. Микрофону әлдә тутанда исә сәрбәст һәрәкәт етмәк олур. Мүгәддәс Китабдан раһат истифадә етмәк үчүн, ола билсин, тәрәф мүгабилиндән микрофону тутмағы хаһиш етмәк лазым ҝәләҹәк. Тәрәф мүгабилинин ону дүзҝүн шәкилдә тута билмәси үчүн габагҹадан мәшг етмәк лазымдыр. Һәмчинин јадда сахла ки, сәһнәдә, хүсусилә дә данышаркән, динләјиҹиләрә арха чевирмәк олмаз.

Һәрдән Хидмәти ҝөрүшдә олан сәһнәҹикләрдә бир нечә иштиракчы олур вә онлара сәһнәдә һәрәкәт етмәк лазым ҝәлир. Белә олан һалда, бир нечә микрофона еһтијаҹ ола биләр. Микрофонлары ја габагҹадан лазым олан јерә гојмаг, ја да иштиракчылар сәһнәјә чыханда онлара вермәк лазымдыр. Микрофонларын вахтында һазыр олмасы үчүн габагҹадан тәдбир ҝөрүлмәлидир. Сәһнәҹији чыхышдан әввәл мәшг едәндә иштиракчылара микрофондан дүзҝүн истифадә етмәји өјрәтмәјә имкан олур. Мәшги сәһнәдә кечирмәк мүмкүн дејилсә, јахшы оларды ки, микрофону дүз тутмағы өјрәнмәк үчүн иштиракчылар әлләриндә микрофон өлчүсүндә әшја тутсунлар. Сәһнәҹикдән сонра, иштиракчылар микрофонлары еһмалҹа јеринә гојмалы вә сәһнәдән дүшәркән еһтијатлы олмалыдырлар ки, ајаглары микрофонун шнуруна долашмасын.

Микрофондан истифадә едилмәсинә диггәтлә јанашмағымыз ҝөрүшләримизин әсас мәгсәдләриндән бири илә — Аллаһын Кәламыны мүзакирә едәрәк бир-биримизи мөһкәмләндирмәклә билаваситә бағлыдыр (Ибр. 10:24, 25). Микрофондан дүзҝүн истифадә етмәји өјрәнмәклә һәр биримиз бу мүһүм мәгсәдин һәјата кечмәси үчүн өз төһфәмизи верә биләрик.