Тәјин олунмуш материалдан истифадә

МҮГӘДДӘС КИТАБ мәсиһчи јығынҹағыны инсан бәдәнилә мүгајисә едир. Бәдәнин бүтүн үзвләри лазымлыдыр, лакин һамысынын «иши ејни дејилдир». Буна мүвафиг олараг, бизә тапшырылан һәр бир ишин үзәриндә сәјлә чалышмалыјыг. Бунун үчүн јығынҹагда чыхыш етмәк тапшырығына дәрракә вә мәсулијјәтлә јанашмаг, бундан даһа мараглы мөвзуларын олдуғуну дүшүнәрәк тапшырылан нитгин ваҹиблијини азалтмамаг тәләб олунур (Ром. 12:4-8). Садиг вә ағыллы гул синфинин үзәринә «вахтлы-вахтында» руһани гида вермәк мәсулијјәти гојулуб (Мат. 24:45). Нитги верилән рәһбәрлијә ујғун һазырламаг үчүн баҹарыгларымыздан истифадә едәндә гула һөрмәт етдијимизи вә онун әмәјини гијмәтләндирдијимизи ҝөстәририк. Бу, бүтүн јығынҹағын низамлы фәалијјәт ҝөстәрмәсинә көмәк едәҹәк.

Нитгә нәји дахил етмәк лазымдыр? Теократик Хидмәт Мәктәбиндә сәнә мүәјјән мөвзу үзәриндә ишләмәк тапшырыланда башгасынын јох, мәһз онун үзәриндә ишлә. Әксәр һалларда истинад етмәли олдуғун мәнбә верилир. Әҝәр верилмәјибсә, мәнбәни өзүн сечә биләрсән. Анҹаг нитги һазырлајаркән диггәт јетир ки, бүтүн нитги тәјин олунмуш мөвзу әтрафында гурасан. Нитгә нәји дахил етмәји гәрарлашдыраркән динләјиҹиләри дә нәзәрә алмаг лазымдыр.

Материалы диггәтлә өјрән, орадакы ајәләри тәһлил ет. Сонра динләјиҹиләрин фајда әлдә етмәләри үчүн мәлуматдан неҹә истифадә едә биләҹәјин һагда фикирләш. Чап олунмуш материалдан чыхышынын әсас бәндләри олаҹаг ики вә ја үч фикри сеч. Һәмчинин охумаг вә мүзакирә етмәк үчүн ајәләри дә орадан сеч.

Материалын нә гәдәр һиссәсини нитгинә дахил етмәлисән? Јалныз јахшы изаһ едә биләҹәјин гәдәрини. Нитгинә чохлу мәлумат дахил етмәк наминә тәлимин кејфијјәтини зәифләтмә. Әҝәр һансыса мәлуматын мәгсәдинлә бағлылығы јохдурса, ону нитгинә дахил етмә. Диггәтини мәгсәдинә чатмаға көмәк едән мәлумата јөнәлт. Тәјин олунмуш материалдан динләјиҹиләринә даһа чох фајда ҝәтирәҹәк вә онлар үчүн даһа мәзмунлу олаҹаг фикирләри истифадә ет. Бу дәрсин үзәриндә ишләмәкдә мәгсәдин нә гәдәр материалы әһатә едә биләҹәјини мүәјјән етмәк јох, нитгинин әсасы кими тәјин олунан материалы истифадә етмәкдир.

Нитг садәҹә верилән материалын гыса иҹмалы олмамалыдыр. Мүәјјән мәгамлары изаһ етмәк, онларын тәфәррүатларыны ачыгламаг, тәсвир етмәк вә онларын тәтбиг едилмәсинә даир нүмунә чәкмәк лазымдыр. Әлавә фикирләр тәјин олунан материалы әвәз етмәмәлидир, орадан ҝөтүрдүјүн әсас бәндләри ачыгламалыдыр.

Өјрәтмә баҹарығы јахшы олан гардашлара вахт кечдикҹә Хидмәти ҝөрүшдә тәлим вермәк тапшырыла биләр. Онлар билирләр ки, верилән материалын өзүндән јахшы истифадә етмәлидирләр, ону башгасы илә әвәз етмәмәлидирләр. Бунун кими, мәрузә илә чыхыш едән гардашлара да план верилир. План чыхыш едәнә мүәјјән гәдәр сәрбәстлик верир, ејни заманда орада әсас бәндләр, тәсдигләјиҹи дәлилләр вә чыхыша тәмәл олаҹаг ајәләр ајдын шәкилдә ҝөстәрилир. Тәјин олунан материалдан истифадә едәрәк тәлим вермәји өјрәнмәк башга ваҹиб нитгләрлә чыхыш етмәјә һазыр олмагда мүһүм рол ојнајыр.

Бу дәрсин үзәриндә ишләмәк Мүгәддәс Китаб өјрәнмәсини дә јахшы кечирмәјә көмәк едәҹәк. Мараглы олса да, мөвзунун баша дүшүлмәси үчүн ваҹиб олмајан фикирләри вурғуламамагла мөвзудан јајынмајыб, диггәти өјрәнилән материала ҹәмләмәји өјрәнәҹәксән. Диҝәр тәрәфдән, бу дәрсин мәғзини баша дүшсән, өјрәнилән материала о гәдәр сых бағлы галмајаҹагсан ки, өјрәнәнин билмәк истәдији һансыса әлавә фикри изаһ етмәкдән бојун гачырасан.