Мәсиһчи вәфтизи үчүн тәләбләр

«Вәфтиз олунмағыма нә әнҝәл вар?» (ҺӘВАРИЛӘРИН ИШЛӘРИ 8:36).

1, 2. Филип һәбәшистанлы мә’мурла сөһбәтә неҹә башлады вә мә’мурун руһани мәсәләләрлә марагландығы нәдән ҝөрүнүрдү?

ИСАНЫН өлүмүндән бир-ики ил сонра бир дөвләт мә’муру арабада ҹәнуба доғру, Јерусәлимдән Гәззәјә ҝедән јол илә ҝедирди. Ону гаршыда тәхминән мин беш јүз километр узунлуғунда јоруҹу јол ҝөзләјирди. Бу садиг инсан Һәбәшистандан [Ефиопија] Јерусәлимә Јеһоваја ибадәт етмәк үчүн ҝәлмишди. Ҝери гајыдаркән о, вахтындан сәмәрәли истифадә едәрәк Аллаһын Кәламыны охујурду. Бундан онун иманлы олдуғу ҝөрүнүр. Бу сәмими инсан Јеһованын диггәтиндән јајынмады вә мүждәни чатдырмаг үчүн Јеһова Филипи онун јанына ҝөндәрди (Һәвариләрин ишләри 8:26-28).

² Филипә, һәбәшистанлы мә’мурла сөһбәтә башламаг асан олду, чүнки мә’мур о вахтын адәтинә ҝөрә уҹадан охујурду. Филип мә’мурун Јешајанын тумарындан бир парча охудуғуну ешитди. Филипин вердији садә суал — «охудуғуну һеч анлајырсанмы?» — онда мараг доғурду. Онлар отуруб бир јердә Јешаја 53:7, 8 ајәләрини мүзакирә етдиләр. Сонра Филип «Иса һаггындакы Мүждәни она баша салды» (Һәвариләрин ишләри 8:29-35).

3, 4. а) Филип һәбәшистанлыны нәјә ҝөрә тә’хирә салмадан вәфтиз етди? б) Биз инди һансы суаллары арашдыраҹағыг?

³ Һәбәшистанлы, Исанын Аллаһын нијјәтиндә һансы ролу ојнадығыны вә Мәсиһин вәфтиз олунмуш шаҝирди олмағын ваҹиблијини тез баша дүшдү. Су һөвзәси ҝөрәндә о, Филипдән «вәфтиз олунмағыма нә әнҝәл вар?» дејә сорушду. Әлбәттә, онун вәзијјәти хүсуси иди: бу иманлы инсан артыг јәһуди прозелити кими Аллаһа ибадәт едирди. Еһтимал ки, вәфтиз олунмаг үчүн онун әлинә үзүн мүддәт башга бир фүрсәт дүшмәјәҹәкди. Лакин ән ваҹиби одур ки, о, Аллаһын ондан нә тәләб етдијини баша дүшдү вә үрәјиндән Аллаһын мәһәббәтинә һај вермәк арзусу кечди. Филип онун хаһишини һәвәслә јеринә јетирди вә бундан сонра һәбәшистанлы «севинәрәк өз јолуна давам етди». Еһтимал ки, о вәтәниндә хош хәбәрин сә’јли тәблиғчиси олду (Һәвариләрин ишләри 8:36-39).

⁴ Вәфтиз олунмаг гәрары тәләсик вә дүшүнүлмәмиш олмалы дејил, лакин һәбәшистанлы мә’мурун нүмунәсиндән ҝөрүндүјү кими, бә’зи һалларда инсанлар Аллаһын Кәламындакы һәгигәти өјрәндикдән гыса мүддәт сонра вәфтиз олуна биләрләрa. Буна ҝөрә нөвбәти суаллары нәзәрдән кечирмәк јахшы оларды: вәфтиз үчүн һансы һазырлыг тәләб олунур? Јаш нә дәрәҹәдә нәзәрә алынмалыдыр? Вәфтиздән габаг инсанын һансы руһани наилијјәтләри ҝөрүнмәлидир? Ән ваҹиби, Јеһова хидмәтчиләриндән нәјә ҝөрә бу аддымы атмағы тәләб едир?

Мүгәддәс вә’д

5, 6. а) Исраил халгы Аллаһын мәһәббәтинә неҹә һај вермишди? б) Вәфтиздән сонра Јеһова илә һансы сых мүнасибәтләримиз јараныр?

⁵ Јеһова исраиллиләри Мисир әсарәтиндән азад етдикдән сонра онлары ‘Өзүнә мәхсус халг’ вә «мүгәддәс милләт» кими гәбул етмәјә, һәмчинин севмәјә вә мүдафиә етмәјә һазыр иди. Лакин белә хејир-дуалары алмаг үчүн Исраил халгы конкрет аддымлар атмагла Аллаһын мәһәббәтинә һај вермәли иди. Онлар ‘Рәббин бүтүн сөјләдикләринә әмәл едәҹәкләрини’ вә’д етмәклә вә Аллаһла әһдә ҝирмәклә буну етдиләр (Чыхыш 19:4-9). Биринҹи әсрдә Иса давамчыларына бүтүн милләтләрдән шаҝирд һазырламаг тапшырығыны вермишди вә онун тә’лимләрини гәбул едәнләр вәфтиз олунурдулар. Аллаһла јахшы мүнасибәтләр Иса Мәсиһә иман ҝәтирмәкдән асылы иди. Бу иман вәфтизлә мүшајиәт олунурду (Матта 28:19, 20; Һәвариләрин ишләри 2:38, 41).

⁶ Мүгәддәс Китабын бу парчаларындан ҝөрүнүр ки, Јеһова Она хидмәт едәҹәкләри барәдә мүгәддәс вә’д верән вә бу вә’дә мүвафиг јашајанлары хејир-дуаландырыр. Бәли, һәср олунма вә вәфтиз Јеһованын хејир-дуаларына јол ачан ваҹиб аддымлардыр. Биз Аллаһын ҝөстәрдији јолла ҝедир вә һәр ишдә Онун рәһбәрлијини ахтарырыг (Мәзмур 48:14). Јеһова исә Өз нөвбәсиндә, мәҹази дилдә десәк, әлимиздән тутуб, бизи ҝетмәли олдуғумуз јолла апарыр (Мәзмур 73:23; Јешаја 30:21; 41:10, 13).

7. Нәјә ҝөрә һәср вә вәфтиз олунмаға даир гәрары шәхсән өзүмүз гәбул етмәлијик?

⁷ Бу аддымлары атмаға бизи Јеһоваја мәһәббәт вә Она хидмәт етмәк арзусу тәшвиг етмәлидир. Биз садәҹә киминсә Мүгәддәс Китабы узун мүддәт өјрәндијимизи дедијинә ҝөрә вә ја достларымызын артыг вәфтиз олундуғуна ҝөрә вәфтиз олунмамалыјыг. Тәбии ки, валидејнләр вә јеткин мәсиһчиләр инсаны һәср вә вәфтиз барәдә дүшүнмәјә тәшвиг едә биләрләр. Һәвари Петер Пентикост ҝүнүндә она гулаг асанлары ‘вәфтиз олунмаға’ тәшвиг едирди (Һәвариләрин ишләри 2:38). Бунунла белә, һәср олунуб-олунмамаг бизим шәхси гәрарымыз олмалыдыр вә һеч кәс бу гәрары бизим јеримизә гәбул едә билмәз. Биз Аллаһын ирадәсини јеринә јетирмәк гәрарыны өзүмүз гәбул етмәлијик (Мәзмур 40:8).

Вәфтиз олунмаг үчүн лазыми һазырлыг

8, 9. а) Көрпәләри вәфтиз етмәк нәјә ҝөрә Мүгәддәс Китаба зиддир? б) Јенијетмәләрин вәфтиздән габаг нәји дәрк етмәләри ваҹибдир?

⁸ Бәс ушаглар һәср олунмаг гәрарыны шүурлу сурәтдә верә биләрләрми? Мүгәддәс Китабда вәфтиз үчүн јаш тәләби јазылмајыб. Лакин ајдындыр ки, көрпәләр нә иман тәзаһүр етдирә, нә дә ки өзләрини Аллаһа һәср едә биләрләр (Һәвариләрин ишләри 8:12). Тарихчи Август Неандер биринҹи әсрдә јашамыш мәсиһчиләрә даир «Христиан дининин вә килсәсинин үмуми тарихи» китабында дејир: «Вәфтиз башланғыҹда јалныз бөјүкләр үчүн нәзәрдә тутулурду, чүнки јалныз онлар вәфтизлә иман арасындакы сых бағлылығы баша дүшүрдүләр» («Ҝенерал Һисторј оф тһе Ҹһристиан Релиҝион анд Ҹһурҹһ»).

⁹ Артыг еркән јашларындан бә’зи јенијетмәләр Аллаһ вә Онун нијјәтләри һаггында әсас шејләри анламаға гадир олдуглары һалда, диҝәрләринә бунлары анламаг үчүн чох вахт тәләб олуна биләр. Лакин вәфтиздән габаг јенијетмәнин Јеһова илә шәхси мүнасибәти олмалы, о, Мүгәддәс Јазыларын әсас тә’лимләрини дәгиг баша дүшмәли вә бөјүкләр кими, һәср олунмағын нә демәк олдуғуну дәриндән анламалыдыр.

10. Аллаһа һәср олунмаздан вә вәфтиздән габаг һансы аддымлар атылмалыдыр?

¹⁰ Иса шаҝирдләринә әмр етди ки, онлар тәзәләрә һәр шејә риајәт етмәји өјрәтсинләр (Матта 28:20). Буна ҝөрә, тәзәләр илк нөвбәдә, Јеһоваја вә Онун Кәламына иман бәсләмәк үчүн лазым олан дәгиг билији әлдә етмәлидирләр (Ромалылара 10:17; 1 Тимотејә 2:4; Ибраниләрә 11:6). Мүгәддәс Китаб һәгигәтләри инсанын үрәјиндә оланда, бу ону төвбә етмәјә вә көһнә һәјат тәрзиндән дөнмәјә тәшвиг едир (Һәвариләрин ишләри 3:19). Бунун нәтиҹәси олараг инсанда өзүнү Јеһоваја һәср етмәк вә Исанын әмр етдији кими, вәфтиз олмаг арзусу јараныр.

11. Вәфтиздән габаг тәблиғ ишиндә мүнтәзәм иштирак етмәк нәјә ҝөрә ваҹибдир?

¹¹ Вәфтиз олмаг үчүн диҝәр ваҹиб аддым исә Падшаһлыг һаггында хош хәбәрин тәблиғиндә иштирак етмәкдир. Бу, Јеһованын ахыр ҝүнләрдә халгына тапшырдығы ән ваҹиб ишдир (Матта 24:14). Вәфтиз олунмамыш тәблиғчиләрин дә өз иманлары илә бөлүшмәк имканлары вар. Вәфтиздән габаг бу ишдә иштирак етмәклә онлар вәфтиздән сонра да хидмәтләрини мүнтәзәм вә фәал сурәтдә давам етдирмәк үчүн лазыми һазырлығы алырлар (Ромалылара 10:9, 10, 14, 15).

Вәфтиз олмаг үчүн сәнә нә исә мане олурму?

12. Бә’зиләрини вәфтиздән ҝери чәкиндирән нәдир?

¹² Бә’зиләри вәфтизин ҝәтирдији мәс’улијјәтләри үзәрләринә ҝөтүрмәк истәмирләр, буна ҝөрә дә бу аддымы атмагдан чәкинирләр. Беләләри Јеһованын нормаларына мүвафиг олмаг үчүн һәјатларында көклү дәјишикликләр етмәли олаҹагларыны баша дүшүр, јахуд да вәфтиздән сонра Јеһованын ганунларына мүвафиг јашамағын чәтин олаҹағындан горхурлар. Диҝәрләри исә, һәтта белә фикирләшә биләрләр: «Бәлкә ҝүнләрин бир ҝүнү мән ҝүнаһ ишләдиб јығынҹагдан кәнар едилдим?»

13. Исанын ҝүнләриндә бә’зи адамлара онун давамчысы олмаға нә мане олурду?

¹³ Исанын ҝүнләриндә шәхси мараглар вә сых гоһумлуг телләри бә’зи адамлара онун давамчысы олмаға мане олурду. Мәсәлән, бир мирзә, Исанын ҝетдији һәр јерә онунла ҝетмәјә һазыр олдуғуну деди. Лакин Иса баша салды ки, онун чох вахт һеч ҝеҹәләмәјә јери олмур. Иса диҝәр бир динләјиҹисини онун давамчысы олмаға дә’вәт едәндә, һәмин адам «әввәлҹә ҝедиб атамы дәфн едим» дејә хаһиш етди. Еһтимал ки, о, евдә галыб атасынын өлүмүнү ҝөзләмәји, Исанын ардынҹа ҝетмәкдән үстүн тутду. Һалбуки өз оғуллуг борҹуну вахты ҝәләндә јеринә јетирә биләрди. Үчүнҹүсү исә деди ки, Исанын ардынҹа ҝетмәздән әввәл аиләси илә ‘видалашмаг’ истәјир. Иса бу ҹүр јубанманы ‘әлини котан үстүнә гојуб архаја бахмаг’ кими гијмәтләндирди. Бу сөзләрдән елә чыхыр ки, беләләри мәсиһчи мәс’улијјәтләриндән бојун гачырмаг үчүн һәмишә бәһанә тапаҹаглар (Лука 9:57-62).

14. а) Петер, Андреј, Јагуб вә Јәһја Исанын ‘инсан тутан балыгчы’ олмаг дә’вәтинә неҹә һај вердиләр? б) Нәјә ҝөрә тәрәддүд етмәдән Исанын бојундуруғуну үзәримизә ҝөтүрмәлијик?

¹⁴ Петер, Андреј, Јагуб вә Јәһја исә Мәсиһин чағырышына тамамилә башга ҹүр һај вердиләр. Ҝөрүн бу адамлар Исанын давамчысы вә ‘инсан тутан балыгчы’ олмаг дә’вәтини аланда неҹә һәрәкәт етдиләр: «Һәмин анда торлары атыб Онун ардынҹа ҝетдиләр» (Матта 4:19-22). Бу дә’вәти һазырлыгла гәбул едән шаҝирдләр, Исанын сонралар дедији сөзләрин һәгигилијини өз үзәрләриндә һисс етмишдиләр: «Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз. Чүнки бојундуруғум асан вә јүкүм јүнҝүлдүр» (Матта 11:29, 30). Вәфтизин инсан үзәринә мәс’улијјәт бојундуруғу гојмасына бахмајараг, Иса әмин етди ки, о, раһат вә асан олдуғундан бизи тәравәтләндирәҹәк.

15. Мусанын вә Јеремјанын нүмунәси неҹә ҝөстәрир ки, биз Аллаһын көмәјинә ҝүвәнә биләрик?

¹⁵ Инамсызлыг һиссләри кечирмәк нормалдыр. Башланғыҹда Муса вә Јеремја да Јеһованын онлара вердији тапшырығын өһдәсиндән ҝәлә билмәјәҹәкләрини фикирләширдиләр (Чыхыш 3:11; Јеремја 1:6). Аллаһ онлары неҹә әмин етди? О, Мусаја деди: «Мән сәнинләјәм». Јеремјаја вә’д етди: «Сәни гуртармаг үчүн Мән сәнинлә олаҹағам» (Чыхыш 3:12; Јеремја 1:8). Биз дә әмин ола биләрик ки, Аллаһ бизи тәк гојмајаҹаг. Она бәсләдијимиз мәһәббәт вә е’тибар шүбһәләрин өһдәсиндән ҝәлмәкдә бизә көмәк едәҹәк. Һәвари Јәһја јазмышды: «Мәһәббәтдә горху јохдур; әксинә, камил мәһәббәт горхуну говар» (1 Јәһја 4:18). Балаҹа оғлан тәк ҝәзәндә горха биләр, лакин атасы илә әл-әлә ҝәзәндә архајын олур. Буна бәнзәр шәкилдә Јеһова вә’д едир ки, әҝәр биз бүтүн үрәјимизлә Она е’тибар едир вә Онунла јан-јана јеријириксә, О, ‘јолларымызы дүзәлдәҹәк’ (Сүлејманын мәсәлләри 3:5, 6).

Шәрәфли мәс’улијјәт

16. Вәфтиз едиләнләр нәјә ҝөрә бүтүнлүклә суја батырылырлар?

¹⁶ Адәтән вәфтиздән габаг мәсиһчи вәфтизинин мә’насыны изаһ едән нитг сөјләнилир. Нитгин сонунда намизәдләр ики суала ҹаваб вермәклә иманларыны бүтүн иштирак едәнләрин гаршысында бәјан едирләр. (Ромалылара 10:10; 24-ҹү сәһифәдәки чәрчивәјә дә бахын.) Сонра Исанын нүмунәсинә риајәт едәрәк, онлар суја батырылырлар. Мүгәддәс Китаб ҝөстәрир ки, Иса вәфтиз олундугдан сонра «судан чыхды» (Матта 3:16; Марк 1:10). Шүбһә јохдур ки, Вәфтизчи Јәһја Исаны бүтүнлүклә суја батырмышдыb. Суја батырылма һәјатымызда әһәмијјәтли дәјишикликләр етдијимизин рәмзидир: биз көһнә һәјат үчүн өлүр, јени һәјата — Јеһоваја һәср едилмиш һәјата гәдәм гојуруг.

17. Вәфтиз үчүн намизәдләр вә мүшаһидәчиләр бу һадисәјә һөрмәтлә јанашдыгларыны неҹә ҝөстәрә биләрләр?

¹⁷ Вәфтиз һәм ҹидди, һәм дә севиндириҹи һадисәдир. Мүгәддәс Китаб ҝөстәрир ки, Јәһја Исаны Иордан чајына батыранда, о дуа едирди (Лука 3:21, 22). Вәфтиз үчүн намизәдләр Исадан нүмунә ҝөтүрәрәк бу һадисәјә ләјагәтлә јанашмалыдырлар. Мүгәддәс Китаб бизи ҝүндәлик һәјатымызда әдәблә ҝејинмәјә тәшвиг етдији үчүн вәфтиз олундуғумуз ҝүн бу мәсләһәтә риајәт етмәк хүсусилә ваҹибдир! (1 Тимотејә 2:9). Динләјиҹиләр вәфтиз нитгинә диггәтлә гулаг асмагла вә вәфтизи мүшаһидә едәркән низам-интизама риајәт етмәклә һөрмәт ҝөстәрмиш олурлар (1 Коринфлиләрә 14:40).

Вәфтиз олмуш шаҝирдләрин алдыглары хејир-дуалар

18, 19. Вәфтиз һансы надир имканлары вә хејир-дуалары ҝәтирир?

¹⁸ Өзүмүзү Аллаһа һәср етдикдән вә вәфтиз олундугдан сонра биз надир бир аиләнин үзвү олуруг. Әлдә етдијимиз илк хејир-дуа одур ки, Јеһова бизим Атамыз вә Достумуз олур. Вәфтиздән габаг биз Аллаһдан узаглашмышдыг, вәфтиздән сонра исә Онунла барышырыг (2 Коринфлиләрә 5:19; Колослулара 1:20). Мәсиһин гурбанлығы сајәсиндә биз Аллаһа, Аллаһ исә бизә јахынлашыр (Јагуб 4:8). «Малаки» китабында ҝөстәрилир ки, Јеһова Онун адыны чағыран вә дашыјан инсанлара диггәт јетирир вә гулаг асыр, һәмчинин онларын адларыны јаддаш китабына јазыр. Аллаһ дејир: «Онлар Мәнә мәхсус халг олаҹаг. Бир ата өзүнә хидмәт едән оғлуна неҹә рәһм едәрсә, Мән дә онлара елә рәһм едәҹәјәм» (Малаки 3:16-18).

¹⁹ Вәфтиздән сонра биз, һәмчинин үмумдүнја гардашлығынын үзвү олуруг. Петер, Исанын јолунда вердикләри гурбанлара ҝөрә шаҝирдләрин һансы хејир-дуалары алаҹагларыны сорушанда, Иса ҹаваб вермишди: «Һәр ким Мәним адым наминә евләрини, гардашларыны, баҹыларыны, атасыны, анасыны, арвадыны, ушагларыны вә јахуд тарлаларыны атмышса, јүз дәфә артыг алаҹаг вә әбәди һәјаты мирас ҝөтүрәҹәкдир» (Матта 19:29). Бу һадисәдән чох илләр сонра Петер ‘дүнјадакы гардашлыг’ һаггында јазырды. Петер гардашлығын ҝәтирдији хејир-дуалары вә онун мәһәббәт долу көмәјини өз үзәриндә һисс етмишди. Бизим дә бу ҹүр имканымыз вар (1 Петер 2:17; 5:9).

20. Вәфтиз һансы ҝөзәл үмиди верир?

²⁰ Иса гејд етмишдир ки, онун ардынҹа ҝедәнләрин әбәди һәјаты олаҹаг. Бәли, һәср едилмә вә вәфтиз бизә Аллаһын јени дүнјасындакы ‘әбәди һәјата наил олмаг’ үмидини верир (1 Тимотејә 6:19). Мәҝәр өзүмүз вә аиләмизин ҝәләҹәји үчүн бундан јахшы тәмәл гоја биләрикми? Бу ҝөзәл үмид бизә «даим вә әбәди Аллаһымыз Рәббин ады илә» јеримәјә көмәк едир (Микеја 4:5).

[Һашијәләр]

Изаһ едә биләрсинизми?

• Биз Јеһованын мәһәббәтинә нә үчүн вә неҹә һај вермәлијик?

• Вәфтиздән габаг инсан һансы руһани наилијјәтләри әлдә етмәлидир?

• Ҝүнаһ етмәк горхусунун вә ја мәс’улијјәтдән бојун гачырмағын бизи вәфтиздән чәкиндирмәсинә нәјә ҝөрә јол вермәмәлијик?

• Иса Мәсиһин вәфтиз олунмуш давамчыларынын һансы надир үстүнлүкләри вардыр?

[29-ҹу сәһифәдәки шәкилләр]

Вәфтиз ҹидди, һәм дә севиндириҹи һадисәдир.