ФӘСИЛ 35

Аллаһла неҹә дост ола биләрәм?

Һәјатынын чох чәтин вахтында Ҹереми Аллаһла достлуғун гәдрини билмәјә башлады. «12 јашым оланда, атам бизи атыб ҝетди, — дејә Ҹереми изаһ едир. — Бир ҝеҹә Јеһоваја дуа едиб јалвардым ки, атамы ҝери гајтарсын».

Үмиди һәр јердән үзүлмүш Ҹереми Мүгәддәс Китабы охумаға башлады. Ону Зәбур 10:14 ајәси чох тәсирләндирди. Орада Јеһова һагда дејилир: «Фағыр үзүнү Сәнә тутар, јетимин дајағы Сәнсән». Ҹереми дејир: «Мәндә белә бир һисс варды, санки Јеһова мәнимлә данышыр вә истәјир ки, билим: О мәним дајағымдыр, мәним Атам одур. Ондан јахшы Ата ола билмәз».

ОЛА БИЛӘР сән Ҹереминин јашадығыны јашамамысан, амма Мүгәддәс Китабдан ајдын олур ки, Јеһова сәнинлә достлуг етмәк истәјир. Орада ајдын дејилир: «Аллаһа јахынлашын, О да сизә јахынлашаҹаг» (Јагуб 4:8). Бу сөзләрин үзәриндә бир гәдәр дүшүн: Аллаһы ҝөрмәк мүмкүн дејил, үстәлик, О сәнин јашыдын да дејил, амма бунлара бахмајараг, Јеһова сәни өзү илә дост олмаға чағырыр!

Анҹаг Аллаһла дост олмаг үчүн сәндән дә нә исә тәләб олунур. Бир нүмунәјә нәзәр салаг: евдә отаг биткиләри сахламысанса, билирсән ки, битки өз-өзүнә бөјүмүр. Она гуллуг етмәк лазымдыр: вахты-вахтында сујуну вермәк, ујғун шәраитдә сахламаг лазымдыр. Аллаһла достлуг һагда да ејни шеји демәк олар. Бәс бу достлуг һансы гуллуғу тәләб едир?

Мүталиә чох ваҹибдир

Достлар бир-бирини динләјир вә бир-бирилә сөһбәт едирләр, јәни үнсијјәт икитәрәфлидир. Аллаһла достлуг да беләдир. Биз Мүгәддәс Китабы диггәтлә охујанда санки Аллаһ бизимлә данышыр, биз дә Ону динләјирик (Зәбур 1:2, 3).

Ола билсин, китаб охумағы елә дә севмирсән. Бир чох ҝәнҹләр китаб охумагданса, телевизора бахмағы, ојун ојнамағы, ја да достларыјла вахт кечирмәји үстүн тутур. Анҹаг әҝәр сән Аллаһла достлуг етмәк истәјирсәнсә, бил ки, бунун бир јолу вар: ҝәрәк Онун дедикләринә гулаг асасан. Бунун үчүн исә Онун Кәламыны диггәтлә охумаг лазымдыр.

Горхма, Мүгәддәс Китабы охумаг адамы гәтијјән бездирмир. Өзүнү лап елә бөјүк китаб һәвәскары һесаб етмәсән дә, елә етмәк олар ки, ону охумаг сәнә мараглы ҝәлсин. Әввәла, Мүгәддәс Китабы охумаг үчүн вахт ајыр. Лаис адлы гыз дејир: «Мән Мүгәддәс Китабы охумаг үчүн график дүзәлтмишәм. Сәһәр тездән мүтләг бир фәсил охумалыјам». 15 јашлы Марија исә башга графиклә охујур. О дејир: «Мән Мүгәддәс Китабы һәр ахшам јатмаздан габаг охујурам».

Мүгәддәс Китабы охумаға башламаг үчүн 292-ҹи сәһифәдәки чәрчивәјә бах. Ашағыда гејд ет ки, Аллаһын Кәламыны охумаға ҝүнүн һансыса саатында тәхминән јарым саат вахт ајыра биләрсән.

․․․․․

Вахт ајырмаг ишин јарысыдыр. Китабы охумаға башлајанда ҝөрәҹәксән ки, Мүгәддәс Китаб елә дә асан китаб дејил. 11 јашлы бир оғлан етираф едир: «Мүгәддәс Китабын елә јерләри вар ки, адам онлары баша дүшмүр, онлар о гәдәр дә мараглы дејил». Әҝәр сәндә дә елә тәәссүрат јараныбса, тәслим олма. Унутма ки, бу китабы охумагла Достун Јеһова Аллаһын сөзләрини динләјирсән. Мүгәддәс Китабын сәнин үчүн мараглы олуб-олмамасы истәнилән һалда өзүндән асылыдыр.

Дуа чох ваҹибдир

Дуа Аллаһла сөһбәтдир. Нә јахшы ки, Јеһова бизә дуа етмәк әнамыны бәхш едиб! Үрәјин истәјән вахт, ҝеҹә дә, ҝүндүз дә Јеһова Аллаһла даныша биләрсән. О сәни һәмишә динләјәҹәк. Үстәлик, О Өзү дә сәни ешитмәк истәјир. Буна ҝөрә дә Мүгәддәс Китабда јазылыб: «Һәр мәсәлә барәдә диләјинизи дуа вә јалварышла, шүкр едә-едә Аллаһа билдирин» (Филиппилиләрә 4:6).

Бу ајәдә јазылдығы кими, Јеһова илә чох шеј һагда данышмаг олар. Она проблемләрини, сәни нараһат едән шејләри даныша биләрсән. Һәмчинин һәјатындакы јахшы шејләрә ҝөрә Аллаһа тәшәккүрүнү билдирә биләрсән. Мәҝәр достун сәнә бир јахшылыг едәндә, она «чох сағ ол» демирсән? Јеһоваја да тәшәккүрүнү билдирә биләрсән, ахы О сәнә һәјатда нә гәдәр јахшылыг едиб! Һеч бир дост о гәдәр јахшылыг едә билмәз (Зәбур 106:1).

Ашағыда гејд ет ки, һәјатында нәләрә ҝөрә Јеһоваја миннәтдарсан.

․․․․․

Шүбһәсиз, бәзән һамы кими сән дә нәјә ҝөрәсә фикир едирсән, нараһатчылыға гәрг олурсан. Зәбур 55:22 ајәсиндә дејилир: «Сән гајғы јүкүнү Јеһоваја вер, О, сәнә дајаг олар. О, һеч вахт салеһ инсаны јыхылмаға гојмаз».

Ашағыдакы сәтирләрдә сәни нараһат едән шејләри јаз. Онлары дуада Аллаһа даныша биләрсән.

․․․․․

Шәхси тәҹрүбә

Аллаһла достлуг өзүнә башга ваҹиб шеји дә дахил едир. Давуд јазмышды: «Дадын, ҝөрүн неҹә ҝөзәлдир Јеһова» (Зәбур 34:8). Давуд 34-ҹү мәзмуру гошмаздан әввәл бөјүк тәһлүкә илә үзләшмишди. Талут падшаһ Давудун гәсдинә дурмушду, Давуд да башыны ҝөтүрүб ондан гачмышды. Падшаһдан гача-гача Давуд дүшмән филиштлиләрин арасында ҝизләнмәјә мәҹбур галмышды. Өлүмлә үз-үзә дуран Давуд өзүнү дәлилијә вуруб ҹаныны хилас етмишди (1 Ишмуил 21:10—15).

Давуд баша дүшүрдү ки, өз ағыл-фәрасәти сајәсиндә хилас олмајыб. Ону хилас едән Јеһова иди. О бу һадисәдән сонра мәзмурда јазмышды: «Јеһоваја үз тутдум, мәнә һај верди, мәни бүтүн горхулардан азад етди» (Зәбур 34:4). Давуд өз тәҹрүбәсинә архаланараг башгаларыны да дадыб Јеһованын неҹә ҝөзәл олдуғуну ҝөрмәјә чағырырдыa.

Сән дә һәјатында Јеһованын хүсуси гајғысыны һисс етмисән? Әҝәр белә бир һадисә јадына ҝәлирсә, ону ашағыда гејд ет. Шәрт дејил ки, бу, гејри-ади бир һадисә олсун. Чалыш һәјатындакы ҝүндәлик немәтләр һагда дүшүн, бәзән онлары ади бир шеј кими гәбул едирик.

․․․․․

Ола биләр валидејнләрин сәнә ушаглыгдан Мүгәддәс Китабы өјрәдибләр. Әҝәр беләдирсә, бу, бөјүк хошбәхтликдир. Анҹаг бунунла белә, сән шәхсән өзүн Аллаһла дост олмаға чалышмалысан. Әҝәр һәлә буну етмәмисәнсә, онда гој бу фәсил сәнә тәкан олсун. Јеһова әмәјини мүкафатсыз гојмајаҹаг. Мүгәддәс Китабда дејилир: «Дурмадан диләјин, сизә вериләҹәк; дурмадан ахтарын, тапаҹагсыныз» (Мәтта 7:7).

БУ МӨВЗУ ҺАГДА ДАҺА ӘТРАФЛЫ ҸИЛД 1, ФӘСИЛ 38 ВӘ 39–ДА ОХУ

НӨВБӘТИ ФӘСИЛДӘ Башгаларына Аллаһ һагда данышмаға чәтинлик чәкирсән? Өјрән ҝөр етигадыны неҹә мүдафиә едә биләрсән.

[Һашијә]

АЧАР АЈӘ

«Аллаһа еһтијаҹы олдуғуну дәрк едәнләр хошбәхтдир»​ (Мәтта 5:3).

МӘСЛӘҺӘТ

Һәр ҝүн ҹәми дөрд сәһифә охусан, Мүгәддәс Китабы бир илә охујуб гуртарарсан.

БИЛИРСӘН?

Бу китабы охумағын вә бурадакы мәсләһәтләрә әмәл етмәјин ҝөстәрир ки, Јеһова шәхсән сәнинлә марагланыр (Јәһја 6:44).

ҺӘРӘКӘТ ПЛАНЫ!

Мүгәддәс Китабын мүталиәсиндән даһа чох фајда алмаг үчүн мән...

Даһа тез-тез дуа етмәк үчүн мән...

Бу мөвзу илә бағлы валидејнләримә вермәк истәдијим суаллар:

НЕҸӘ ДҮШҮНҮРСӘН?

● Мүгәддәс Китаб мүталиәсини даһа мараглы неҹә едә биләрсән?

● Јеһова гејри-камил инсанларын дуаларына нә үчүн гулаг асмаг истәјир?

● Дуаларыны неҹә јахшылашдыра биләрсән?

[Јазы]

Бир нечә ил әввәл дуаларымда тез-тез ејни шејләри тәкрар едирдим. Инди исә дуаларымда Јеһоваја һәр ҝүн баш верән јахшы вә пис шејләр һагда данышырам. Ҝүнләр бир-биринә бәнзәмәдији үчүн, артыг дуаларым да бир-биринә бәнзәмир» (Ева).

[Чәрчивә/шәкил]

Мүгәддәс Китабы тәдгиг ет

1. Мүгәддәс Китабдан охумаг истәдијин бир әһвалат сеч. Охудуғуну баша дүшмәк үчүн Аллаһдан һикмәт дилә.

2. Сечдијин әһвалаты диггәтлә оху. Тәләсмәдән оху. Фантазијаны ишә сал. Вәзијјәти ҝөрмәјә, персонажларын сәсини ешитмәјә, һавадакы гохулары һисс етмәјә, јемәкләрин дадыны дујмаға чалыш. Охудуғун һадисәләри хәјалында ҹанландыр.

3. Охудугларын үзәриндә дүшүн. Өзүндән соруш:

● Нә үчүн Јеһова бу һадисәни Өз Кәламына дахил едиб?

● Һансы персонажлара бәнзәмәјә дәјәр, һансыларынын һәрәкәтиндән өзүмә ибрәт ҝөтүрә биләрәм?

● Охудуғумдан нә өјрәнирәм?

● Бу парчадан Јеһова һагда вә Онун мүхтәлиф вәзијјәтләрдә неҹә даврандығы барәдә нә өјрәнирәм?

4. Јеһоваја гысаҹа дуа ет. Мүгәддәс Китаб мүталиәсиндән нә өјрәндијини вә өјрәндикләринә һәјатынын һансы саһәләриндә әмәл етмәк истәдијини Аллаһа даныш. Сәнә вердији һәдијјәјә, јәни Кәламы олан Мүгәддәс Китаба ҝөрә һәмишә миннәтдарлығыны билдир.

[Шәкил]

«Сөзүн аддымларыма чыраг, јолларыма ишыгдыр» (Зәбур 119:105).

[Чәрчивә/шәкил]

Әввәлҹә ән ваҹиб шејләр

Дуаја вахтын галмыр? Мүгәддәс Китабы охумаға вахт чатдыра билмирсән? Чох вахт сәбәб һәјатында нәјә өнәм вермәјиндәдир.

Тәҹрүбәдән кечир: Бир ведрә ҝөтүр вә ичинә бир нечә ири даш гој. Сонра ведрәни ағзынаҹан гумла долдур. Ведрән һәм дашла, һәм дә гумла долудур.

Инди ведрәни бошалт, бу дәфә һәр шеји тәрсинә јығ. Әввәлҹә ведрәни гумла долдур, сонра исә ичинә дашлары гој. Алыныр? Хејр. Бәс нијә? Чүнки әввәлҹә ведрәјә гуму төкдүн.

Бу тәҹрүбәдән һансы нәтиҹәни чыхармаг олар? Мүгәддәс Китабда мәсләһәт ҝөрүлүр ки, даһа ваҹиб шејләри ајырд етмәји баҹараг (Филиппилиләрә 1:10). Әҝәр һәјатда әјләнҹә кими хырда шејләри биринҹи јерә гојсан, онда ваҹиб шејләрә, мәсәлән, руһани ишләрә јер галмајаҹаг. Анҹаг Мүгәддәс Китабын бу мәсләһәтинә әмәл етсән, ҝөрәҹәксән ки, һәјатында һәм руһани ишләрә, һәм дә истираһәт вә әјләнҹәјә вахт галыр. Она ҝөрә фикир вер ҝөр, ведрәнә әввәлҹә нәји гојурсан.

[Шәкил]

Отаг биткиси гуллуг тәләб етдији кими, Аллаһла достлуғу да бәсләмәк лазымдыр