ДӘРС 6
Өлүләр үчүн үмид
1. Өлүләр үчүн һансы үмид вар?
Иса пејғәмбәрин Илазәр адында досту вар иди. Бир ҝүн онун бу досту вәфат едир. Пејғәмбәр достунун јашадығы кәндә ҝәлиб чатанда о артыг дөрд ҝүн иди ки, өлмүшдү. Иса пејғәмбәр мәрһумун баҹылары Марта вә Мәрјәмлә ҹәсәдин гојулдуғу јерә ҝедир. Ораја хејли адам топлашыб. Пејғәмбәр һамынын ҝөзү габағында Илазәри дирилдир. Тәсәввүр един, һәмин ан Марта илә Мәрјәм неҹә севиндиләр! Јәһја 11:21—24, 38—44 ајәләрини охујун.
Марта өлүләрин дириләҹәјини билирди. О билирди ки, бир ҝүн Јеһова Аллаһ өлүләри һәјата гајтараҹаг. Әшија 26:19 ајәсини охујун.
2. Аллаһын Кәламы өлүләр һагда нә дејир?
Аллаһ Адәмә демишди: «Торпагсан, торпаға да гајыдаҹагсан» (ЈАРАДЫЛЫШ 3:19).
Инсан торпагдан јараныб (Јарадылыш 2:7; 3:19). О, ҹисмани варлыгдыр вә өләндә ондан һеч бир руһ ајрылыб јашамаға давам етмир. Онун бејнинин фәалијјәти дајаныр, дүшүнҹәләри вә һиссләри јох олур. Өлүләр һеч нә дәрк етмирләр. Дирилмиш Илазәр дә өлү олдуғу вахтдан һеч нә данышмады. Ваиз 9:5, 6, 10 ајәләрини охујун.
Бәс Аллаһын пис инсанлары ҹәһәннәмдә әзаб вериб јандыраҹағы доғрудурму? Әслиндә, бу тәлим Мүгәддәс Китаба әсасланмыр. Ахы биз орадан өјрәндик ки, өлүләр һиссиз-дујғусуз вәзијјәтдәдир. Үстәлик, бу тәлим Аллаһын мүгәддәс адына ләкә ҝәтирир, чүнки инсанлара одла әзаб вермәк фикринин өзү мәрһәмәтли Аллаһын ҝөзүндә ијрәнҹдир. Әрәмја 7:31 ајәсини охујун.
Видеоја бахын «Аллаһын Кәламы өлүләр һагда нә дејир?»
3. Өлүләр бизимлә даныша биләрми?
Өлүләр нә ешидә, нә дә даныша билир (Зәбур 115:17). Гејд едәк ки, бәзи мәләкләр пислик јолуну сечмишләр вә онлар өлән адамын ҹилдинә ҝириб дириләрлә даныша билирләр (Јәһуда 6). Јеһова Аллаһ сеһрбазлыг васитәсилә өлүләрә мүраҹиәт етмәји гадаған едир. Ганунун тәкрары 18:10, 11 ајәләрини охујун.
4. Кимләр дириләҹәк?
Гәбирләрдә јатан милјонларла инсан јер үзүндә һәјата гајтарылаҹаг. Һәтта Аллаһы танымајыб ҹаһиллик јолу илә ҝетмиш инсанлар да дириләҹәк. Зәбур 37:29; Һәвариләрин ишләри 24:15 ајәләрини охујун.
Дирилән инсанларын гаршысында Аллаһы танымаг имканы ачылаҹаг. Һәмчинин онлар Иса Мәсиһә табе олараг она иман ҝәтирдикләрини ҝөстәрә биләҹәкләр (Вәһј 20:11—13). Дириләндән сонра Аллаһын тәрәфини тутанлар јер үзүндә әбәди һәјата говушаҹаглар. Јәһја 5:28, 29 ајәләрини охујун.
5. Дирилмә үмиди Јеһова Аллаһ барәдә бизә нә дејир?
Аллаһ Өз Оғлуну бизим уғрумузда өлүмә ҝөндәрди ки, өлүләрин дирилмәси мүмкүн олсун. Јеһованын өлүләри һәјата гајтармаг арзусу Онун һәдсиз мәһәббәтини вә бөјүк лүтфүнү нүмајиш етдирир. Бәли, һәсрәтини чәкдијимиз инсанлар дириләндә севинҹимиз јерә-ҝөјә сығмајаҹаг! Јәһја 3:16; Ромалылара 6:23 ајәләрини охујун.