Аллаһын Кәламындан нә Өјрәнирик?

Өләнләр үчүн үмид вармы?

Бу мәгалә сизи марагландыран суаллара тохунур вә онларын ҹавабыны Мүгәддәс Китабынызда тапмаға көмәк едир. Јеһованын Шаһидләри сизинлә бу суаллары мәмнунијјәтлә мүзакирә едәҹәкләр.

1. Өләнләр үчүн һансы үмид вар?

Иса Мәсиһ Јерусәлимин јахынлығындакы Бетанијаја ҝәләндә досту Лазар артыг дөрд ҝүн иди ки, өлмүшдү. Иса мәрһумун баҹылары Марта вә Мәрјәмлә бирликдә ҹәсәдин гојулдуғу сәрдабәјә јахынлашыр. Һәмин вахт бөјүк бир издиһам да ора топлашыр. Иса Мәсиһ Лазары дирилдәндә Марта илә Мәрјәмин севинҹини бир анлыг тәсәввүр едә биләрсинизми? (Јәһја 11:20—24, 38—44 ајәләрини оху.)

Марта өлүләрин дирилмәсинә инанырды. Јеһованын садиг хидмәтчиләри та гәдимдән билирдиләр ки, ҝәләҹәкдә Аллаһ өләнләри јер үзүндә јашамаг үчүн јенидән һәјата гајтараҹаг. (Әјјуб 14:14, 15 ајәләрини оху.)

2. Өлүләр һансы вәзијјәтдәдир?

Инсаны вә һејваны јашадан һәјат гүввәси вә ја руһ олмасына бахмајараг, биз физики бәдәндә јашајан руһани варлыг дејилик (Ваиз 3:19; Јарадылыш 7:21, 22). Биз торпагдан јарадылмыш физики варлыгларыг (Јарадылыш 2:7; 3:19). Бејин өлдүкдә инсанын дүшүнҹәләри јох олур. Елә буна ҝөрә дә, Лазар дириләндә өлүмдән сонра онунла нә баш вердији һагда һеч нә демәди. (Мәзмур 146:4; Ваиз 9:5, 10 ајәләрини оху.)

Ајдындыр ки, өлүләр әзаб чәкмир. Өлүмдән сонра Аллаһын инсанлара ишҝәнҹә вермәси һагда тәлим јаландыр. Бу, Аллаһа бөһтан атмаг демәкдир. Инсанлара әзаб-әзијјәт вермәк фикри белә Аллаһ үчүн ијрәнҹдир. (Јеремја 32:35 ајәсини оху.)

3. Өлүләрлә данышмаг мүмкүндүрмү?

Өлүләр даныша билмир (Мәзмур 115:17). Лакин пис мәләкләр инсанларла данышараг јаландан өзләрини өләнин руһу кими гәләмә верә биләрләр (2 Петер 2:4). Буна ҝөрә дә, Јеһова Аллаһ өлүләрә мүраҹиәт етмәји гадаған едир. (Ганунун тәкрары 18:10, 11 ајәләрини оху.)

4. Кимләр дирилдиләҹәк?

Тезликлә јер үзүндә Ҹәннәт оланда гәбирләрдә олан милјонларла инсанлар һәјата гајтарылаҹаг. Һәтта Аллаһын ганунларыны билмәдикләри үчүн пис ишләр ҝөрән инсанлар белә дирилдиләҹәк. (Лука 23:43; Һәвариләрин ишләри 24:15 ајәләрини оху.)

Дирилән инсанларын Аллаһ һаггында һәгигәти өјрәнмәк вә Иса Мәсиһә иманларыны она итаәт едәрәк ҝөстәрмәк имканлары олаҹаг (Вәһј 20:11—13). Һәјата гајтарылан вә јахшы ишләр ҝөрән инсанлар јер үзү Ҹәннәтдә әбәди јашамаг хошбәхтлијини дадаҹаглар. Анҹаг дирилдиләнләрдән бәзиләри пис ишләр ҝөрмәјә давам едәҹәкләр. Белә олан һалда онлар дирилдилиб «һөкмә дүчар олаҹаглар». (Јәһја 5:28, 29 ајәләрини оху.)

5. Дирилмәдән Аллаһ һагда нә өјрәнирик?

Дирилмә Аллаһын Өз Оғлуну јер үзүнә ҝөндәрмәси вә онун өз һәјатыны бизим үчүн гурбан вермәси сајәсиндә мүмкүндүр. Буна ҝөрә дә дирилмә Јеһова Аллаһын мәһәббәтинин вә мәрһәмәтинин тәзаһүрүдүр. (Јәһја 3:16; Ромалылара 6:23 ајәләрини оху.)

Даһа чох мәлумат әлдә етмәк үчүн Јеһованын Шаһидләри тәрәфиндән дәрҹ олунан «Мүгәддәс китаб әслиндә нә өјрәдир?» китабынын 6-ҹы вә 7-ҹи фәсилләринә бахын.

[22–ҹи сәһифәдәки шәкил]

Адәм торпагдан јарадылмышды