Раһабын Јеһоваја иманы

Тәсәввүр ет ки, Әриһа шәһәриндәсән. Бу шәһәр Кәнан дијарында јерләшир. Һәмин шәһәрин сакинләри Јеһоваја инанмырлар. Орада Раһаб адлы бир гадын јашајыр.

Раһаб балаҹа оланда Муса пејғәмбәрин Гырмызы дәнизи неҹә јардығыны вә исраиллиләри Мисирдән неҹә чыхартдығыны ешитмишди. О һәмчинин ешитмишди ки, Јеһова Өз халгына бүтүн дүшмәнләри үзәриндә гәләбә чалмаға көмәк едиб. Инди исә исраиллиләр Әриһа шәһәри јахынлығында дүшәрҝә салыблар.

Ҝүнләрин бир ҝүнү ахшам ики исраилли ҹасус шәһәрә дахил олур. Онлар Раһабын евинә ҝәлирләр. Раһаб ҝеҹәләмәк үчүн онлары евинә дәвәт едир. Ҝеҹәјарысы Әриһанын падшаһы хәбәр тутур ки, шәһәрә ики ҹасус ҝәлиб вә онлар Раһабын евиндәдирләр. Падшаһ ора адамларыны ҝөндәрир. Раһаб бу исраиллиләри евинин дамында ҝизләдир, падшаһын адамларына исә дејир: «Дедијиниз адамлар ҝәлмишдиләр, амма... чыхыб ҝетдиләр... Тез тәрпәнсәниз, онлара чатарсыныз». Сәнҹә, Раһаб ҹасуслары нијә сатмады? ~ Чүнки о, Јеһоваја иман едирди вә билирди ки, О, бүтүн Кәнан торпағыны исраиллиләрә верәҹәк.

Ҹасуслар ҝетмәздән өнҹә Раһаба сөз вердиләр ки, Әриһа шәһәри дағыдыланда о вә онун аиләси сағ галаҹаг. Бәс, онлар Раһаба нә тапшырдылар? ~ Онлар дедиләр ки, пәнҹәрәдән ал гырмызы кәндир ассын ки, евиндәкиләрин һамысы хилас олсун. Раһаб ҹасусларын дедији кими етди. Сонра нә баш вердијини билирсән? ~

Бир нечә ҝүн сонра исраиллиләр сәссиз-сәмирсиз шәһәрин башына фырландылар. Вә буну алты ҝүн әрзиндә ҝүндә бир дәфә едирдиләр. Анҹаг једдинҹи ҝүн онлар шәһәрин әтрафында једди дәфә дөврә вурдугдан сонра уҹадан гышгырдылар. Һәмин вахт Јеһова елә етди ки, шәһәрин диварлары учду. Пәнҹәрәдән гырмызы кәндир асылмыш евә исә һеч нә олмады. Сән һәмин еви шәкилдә ҝөрүрсән? ~ Раһабла аиләси сағ галмышды!

Раһабдан нә өјрәнә биләрсән? ~ Јеһованын мөһтәшәм ишләри барәдә ешитдији үчүн Раһаб Она иман етди. Сән дә Јеһованын ҝөрдүјү сајсыз-һесабсыз һејрәтамиз ишләр барәдә өјрәнирсән. Бәс, сән Раһаб кими Јеһоваја иман едирсән? ~ Әминик ки, едирсән!