Сон ҝәләндә сән һарада олмалысан?

ЈЕҺОВА Һар-Меҝидонда бу пис системи мәһв едәндә салеһ инсанларын агибәти неҹә олаҹаг? Сүлејманын мәсәлләри 2:21, 22 ајәләри бу суала ҹаваб верир: «Әмәлисалеһләр јер үзүндә сакин олаҹаг, камилләр бурада галаҹаг. Пис адамлар бу торпагдан атылаҹаг, хаинләрин көкү бурадан гопарылаҹаг».

Бәс әмәлисалеһләр неҹә хилас олунаҹаг? Онлар үчүн һансыса бир сығынаҹаг јери олаҹагмы? Сон ҝәләндә әмәлисалеһләр һарада олмалыдырлар? Мүгәддәс Китабда хиласа даир гејдә алынан дөрд һадисә бу мәсәләјә ајдынлыг ҝәтирир.

Мәкан ваҹиб рол ојнајанда

Нуһун вә Лутун хиласы һагда 2 Петер 2:5-7 ајәләриндә охујуруг: «[Аллаһ] гәдим дүнјаја да рәһм етмәди. Лакин аллаһсызлар дүнјасы үзәринә туфаны ҝәтирәркән, салеһлик тәблиғчиси олан Нуһ да дахил олмагла, сәккиз нәфәрин ҹаныны сахлады. Содом вә Һоморра шәһәрләрини дә күлә чевирәрәк, јерлә јексан олмаға мәһкум етди вә аллаһсызларын башына ҝәләҹәк шејләри ҝөстәрән бир ибрәт верди. Аллаһ позғун адамларын сәфаһәтә дүшкүн һәјат тәрзиндән әзијјәт чәкән салеһ Луту да хилас етди».

Бәс Нуһ Дашгындан неҹә хилас олду? Аллаһ Нуһа деди: «Өнүмдә олан бүтүн бәшәрин сону чатыб, чүнки јер үзү онларын зоракылығы илә долуб. Буна ҝөрә дә Мән онлары јер үзү илә бирҝә мәһв едәҹәјәм. Өзүнә гофер ағаҹындан бир ҝәми дүзәлт» (Јар. 6:13, 14). Нуһ Јеһованын әмр етдији кими ҝәмини дүзәлтди. Дашгындан једди ҝүн әввәл Јеһова она һејванлары ҝәмијә топламасыны вә аиләси илә бирҝә ораја ҝирмәсини тапшырды. Једдинҹи ҝүн ҝәминин гапысы бағланды вә «јер үзүнә гырх ҝүн-гырх ҝеҹә јағыш јағды» (Јар. 7:1-4, 11, 12, 16). Нуһ вә аиләси «судан сағ-саламат чыхды» (1 Пет. 3:20). Онларын хиласы ҝәминин ичиндә олмаларындан асылы иди. Јер үзүндә ҝәмидән башга тәһлүкәсиз јер јох иди (Јар. 7:19, 20).

Лут исә тамамилә фәргли ҝөстәришләр алмышды. Мәләкләр она һараны тәрк етмәли олдуғуну сөјләди. Онлар Лута деди: «Бу шәһәрдә [Содомда]... һәр кәс варса, һамысыны бу јердән чыхарт, чүнки биз бу јери мәһв едәҹәјик». Онлар ‘даға’ гачмалы идиләр (Јар. 19:12, 13, 17).

Нуһун вә Лутун һадисәси сүбут едир ки, Јеһова «Она ихлас едәнләри имтаһандан неҹә хилас етмәји, салеһ олмајанлары да... гијамәт ҝүнүнә кими ҹәза алтында неҹә сахламағы билир» (2 Пет. 2:9). Һәр ики һадисәдә мәкан ваҹиб рол ојнајырды. Нуһ ҝәмијә ҝирмәли, Лут исә Содомдан чыхмалы иди. Бәс хилас олмаг үчүн мәкан һәмишәми һәлледиҹи рол ојнајыр? Јеһова һарада олмаларындан асылы олмајараг, салеһләри хилас етмәјә гадирдирми? Бу суалын ҹавабыны тапмаг үчүн ики хилас һадисәсини нәзәрдән кечирәк.

Мәкан һәмишәми һәлледиҹи рол ојнајыр?

Јеһова Мусанын ҝүнләриндә Мисирин үзәринә он бәла ҝәтирмәздән өнҹә исраиллиләрә әмр етди ки, Пасха гузусунун ганыны гапыларынын үст дирәјинә вә ики јан тахтасына сүртсүнләр. Нә үчүн? Јеһова «Мисирлиләри бәлаја салмаг үчүн ҝәләндә бир гапынын үст дирәјинин вә һәр ики јан тахтасынын үзәриндә ган ҝөрүб о гапыдан јан кечәҹәк. Мәһведиҹини евинизә ҝирмәјә гојмајаҹаг. Ҝеҹәјарысы Рәбб Мисир торпағында олан бүтүн илк оғуллары өлдүрдү; тахтда отуран фиронун илк оғлундан тутмуш зинданда олан әсирин илк оғлуна гәдәр һәр илк оғул, һејванларын һәр илк баласы да өлдү». Исраиллиләрин илк оғуллары һеч бир јерә ҝетмәдән хилас олундулар (Чых. 12:22, 23, 29).

Ҝәлин һәмчинин Јерихо шәһәриндә јашајан фаһишә Рахавын һадисәсинә нәзәр салаг. Исраиллиләр Вәд едилмиш дијары зәбт етмәјә һазырлашырдылар. Јерихонун мәһвә мәһкум олундуғуну баша дүшәндә Рахав ики исраилли кәшфијјатчыја деди ки, исраиллиләрә ҝөрә шәһәр ваһимә ичиндәдир. О, кәшфијјатчылары ҝизләтди вә шәһәр әлә кечириләндә она, еләҹә дә аиләсинә һеч бир хәтәр јетирмәјәҹәкләринә анд ичдирди. Кәшфијјатчылар Рахава тапшырдылар ки, аиләсини шәһәрин гала диварында јерләшән евә топласын. Еви тәрк едән һәр кәс шәһәрлә бирҝә мәһв олаҹагды (Јешуа 2:8-13, 15, 18, 19). Лакин бир гәдәр сонра Јеһова Јешуаја деди ки, «шәһәрин гала диварлары јерә чөкәҹәк» (Јешуа 6:5). Кәшфијјатчыларын тәһлүкәсиз адландырдығы јер инди тәһлүкәли ҝөрүнүрдү. Бәс Рахав вә аиләси неҹә хилас олунаҹагды?

Јерихону зәбт етмәјин вахты чатанда шејпурлар чалынды вә исраиллиләр чығырдылар. Јешуа 6:20 ајәсиндә дејилир: «Халг шејпур сәсини ешидәндә уҹадан чығырды. Онда гала диварлары јерә чөкдү». Диварларын дағылмасынын гаршысыны һеч бир инсан ала билмәзди. Лакин мөҹүзә баш верди: Рахавын евинә чатанда дағынтылар дајанды. Јешуа ики кәшфијјатчыја әмр етди: «Фаһишә гадынын евинә ҝирин, она анд ичдијиниз кими гадыны вә онун јанындакыларын һамысыны евдән чыхарын» (Јешуа 6:22). Рахавын евиндәкиләринин һамысы хилас олунду.

Ән ваҹиби нәдир?

Биз Нуһун, Лутун, Мусанын ҝүнләриндәки исраиллиләрин вә Рахавын хилас олмасындан нә өјрәнирик? Бу һадисәләр јашадығымыз пис системин сону ҝәләндә һарада олмалы олдуғумузу мүәјјән етмәјә неҹә көмәк едир?

Бәли, Нуһ ҝәмијә ҝирмәјин сајәсиндә хилас олду. Бәс о, нәјә ҝөрә ҝәмидә иди? Мәҝәр бу, иман вә итаәткарлығын тәзаһүрү дејилдими? «Нуһ һәр шеји етди: Аллаһ она неҹә әмр етмишдисә, о да һәр шеји еләҹә јеринә јетирди»,— дејә Мүгәддәс Китабда јазылыб (Јар. 6:22; Ибр. 11:7). Бәс бизим һаггымызда нә демәк олар? Аллаһдан олан бүтүн тапшырыглары јеринә јетиририкми? Нуһ һәмчинин «салеһлик тәблиғчиси» иди (2 Пет. 2:5). Саһәмиздә јашајан инсанларын чатдырдығымыз хәбәрә лагејд јанашмаларына бахмајараг, биз дә онун кими тәблиғ ишиндә сәјлә иштирак едирикми?

Лут Содомун мәһви заманы хилас олду. О, Аллаһын ҝөзүндә салеһ олдуғу, һәмчинин Содом вә Һоморра сакинләринин сәфаһәтә дүшкүн һәјат тәрзиндән әзијјәт чәкдији үчүн хилас олунду. Бу ҝүн дүнјада һөкм сүрән позғунлуг бизи дә нараһат едирми? Јохса ҝөзүмүз бунлара о гәдәрми алышыб ки, артыг бу кими шејләр бизи һеч нараһат етмир? ‘Нөгсансыз [вә] ләкәсиз тапылмаг’ үчүн әлимиздән ҝәләни едирикми? (2 Пет. 3:14).

Мисирдә јашамыш исраиллиләрин вә јерихолу Рахавын хиласы евләриндән чыхмамаларындан асылы иди. Бунун үчүн иман вә итаәткарлыг тәләб олунурду (Ибр. 11:28, 30, 31). Мисир аиләләриндә бир-биринин ардынҹа ‘бөјүк фәрјад гопдуғуну’ ешидән һәр бир исраиллинин ҝөзләрини өз илкинләринин үзәриндән ајырмадығыны бир тәсәввүрүнә ҝәтир (Чых. 12:30). Јерихонун гала диварларынын дағылмасындан чыхан ҝурулту сәси јахынлашдыгҹа Рахавын аилә үзвләринин бир-биринә неҹә сығындығыны бир тәсәввүр ет. Һәгигәтән дә, еви тәрк етмәмәк үчүн ондан иман вә итаәткарлыг тәләб олунурду.

Тезликлә Шејтанын системинә сон гојулаҹаг. Јеһованын Өз халгыны ваһимә долу «гәзәб ҝүнүндә» неҹә гуртараҹағыны һәлә ки билмирик (Сеф. 2:3). Сон ҝәләндә һарада вә һансы вәзијјәтдә олмағымыздан асылы олмајараг, әмин ола биләрик ки, хиласымыз Јеһоваја иманымыздан вә Она итаәткарлығымыздан асылы олаҹаг. Һәләлик биз Јешајанын пејғәмбәрлијиндә ‘ичәри отаглар’ ифадәси алтында нәзәрдә тутулан јерә дүзҝүн мүнасибәти инкишаф етдирмәлијик.

«Кеч ичәри отаглара»

Јешаја 26:20 ајәсиндә дејилир: «Еј халгым, кеч ичәри отаглара, гапылары өрт, Рәббин гејзи кечәнәҹән гыса бир мүддәтә ҝизлән!» Бу пејғәмбәрлик илк дәфә б. е. ә. 539-ҹу илдә мидијалылар вә фарслар Бабили ишғал едән заман јеринә јетмишди. Фарс падшаһы Кир Бабилә дахил оланда һеч кимин евдән чыхмамасыны тапшырмышды, чүнки әсҝәрләринә чөлдә оланларын һамысыны өлдүрмәк әмр олунмушду.

Бизим ҝүнләрдә бу пејғәмбәрликдәки ‘ичәри отаглар’ Јеһованын Шаһидләринин бүтүн дүнјада фәалијјәт ҝөстәрән 100 000-дән артыг јығынҹағы илә мүгајисә олунур. Бу јығынҹаглар һәјатымызда ваҹиб рол ојнајыр. ‘Бөјүк мәшәггәт’ заманы бу, дәјишмәз олараг галаҹаг (Вәһј 7:14). Аллаһын халгына «ичәри отаглара» ҝирмәк вә «Рәббин гејзи кечәнәҹән» орада галмаг әмр олунуб. Јығынҹаға дүзҝүн мүнасибәт инкишаф етдирмәк, ону горујуб сахламаг вә бу сығынаҹаға бағлы галмаға гәти гәрарлы олмаг олдугҹа ваҹибдир. Биз Павелин нәсиһәтинә ҹидди јанашмалыјыг: «Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бәзиләринин адәт етдикләри кими өз јығынҹагларымызы тәрк етмәјәк. Амма хүсусән, о Ҝүнүн јахынлашдығыны ҝөрдүјүмүз нисбәтдә бир-биримизи даһа чох үрәкләндирәк» (Ибр. 10:24, 25).

[7-ҹи сәһифәдәки шәкил]

Аллаһын кечмишдә Өз хидмәтчиләрини неҹә хилас етмәсиндән нә өјрәнә биләрик?

[8-ҹи сәһифәдәки шәкил]

Бизим ҝүнләрдә ‘ичәри отаглар’ нә илә мүгајисә олуна биләр?