Ибадәт јерләримиз

ЈЕҺОВА Аллаһын хидмәтчиләринә тәлим алмаг вә бир-бириләрини руһландырмаг үчүн бирҝә топлашмаг бујрулуб (Ибр. 10:23—25). Аллаһын сечилмиш халгы олан исраиллиләрин илк ибадәт јери Мүгәддәс чадыр, јәни Һүзур чадыры олуб (Чых. 39:32, 40). Сонралар Давуд падшаһын оғлу Сүлејман Аллаһын шәрәфинә ев, јәни мәбәд тикмишди (1 Пад. 9:3). Бу мәбәд ерамыздан әввәл 607-ҹи илдә јерлә-јексан едиләндән сонра јәһудиләр синагог адланан тикилиләрдә Аллаһа ибадәт едирдиләр. Мәбәд бәрпа олунандан сонра јенидән пак ибадәтин мәркәзинә чеврилди. Иса һәм синагогларда, һәм дә мәбәддә тәлим верирди (Лука 4:16; Јәһ. 18:20). О һәтта ҹамааты јығыб дағда да тәлим верирди (Мәт. 5:1—7:29).

² Исанын өлүмүндән сонра мәсиһиләр иҹтимаи јерләрдә вә евләрдә јығышыб Мүгәддәс Јазылары өјрәнир вә бир-бириләри илә хош үнсијјәт едирдиләр (Һәв. 19:8, 9; Ром. 16:3, 5; Кол. 4:15; Флм. 2). Һәрдән илк мәсиһиләр тәгибчиләрин әлинә кечмәмәк үчүн хәлвәт јерләрдә јығышырдылар. Сөзсүз ки, Аллаһын гәдимдә јашамыш садиг хидмәтчиләринин ибадәт јерләриндә јығышмагда әсас мәгсәди Јеһовадан елм алмаг олуб (Әшј. 54:13).

³ Бу ҝүн дә мәсиһиләр ибадәт ҝөрүшләрини иҹтимаи јерләрдә вә евләрдә кечирирләр. Евләрдә әсас етибарилә тәблиғ үчүн ҝөрүшләр кечирилир. Евләрини бу мәгсәд үчүн тәгдим едәнләр буну өзләринә шәрәф билир вә бунун онлара руһани фајда ҝәтирдијини сөјләјирләр.

ИБАДӘТ ЕВИ

⁴ Јеһованын Шаһидләри ибадәт ҝөрүшләрини әсасән өз ибадәт евләриндә кечирирләр. Адәтән, торпаг саһәси алыныр вә јени ибадәт еви тикилир, јахуд да һазыр бина алыныб орада јенидәнгурма ишләри апарылыр. Вәсаитә гәнаәт етмәк вә биналардан там шәкилдә јарарланмаг мәгсәдилә бәзи һалларда бир ибадәт евиндә бир нечә јығынҹаг топлашыр. Бәзи әразиләрдә исә иҹарәјә јер ҝөтүрмәк даһа әлверишли олур. Јени тикилмиш вә јенидәнгурма ишләри апарылмыш ибадәт евләри үчүн, адәтән, һәсролунма мәрасими кечирилир. Амма ибадәт евиндә ҹүзи тәмир ишләри апарылыбса, бу мәрасими кечирмәјә еһтијаҹ јохдур.

⁵ Ибадәт еви башгаларында тәәссүрат ојадан дәбдәбәли тикили олмамалыдыр. Биналарын тикилиши әразидән әразијә фәргләнсә дә, әсас одур ки, тикилдији мәгсәдә хидмәт етсин (Һәв. 17:24). Бу биналар, јерли шәраитдән асылы олараг, ибадәт ҝөрүшләрини кечирмәк үчүн әлверишли вә раһат олмалыдыр.

⁶ Јеһованын Шаһидләринин бүтүн јығынҹаглары өз ибадәт евләрини горумаг, она гуллуг ҝөстәрмәк үчүн вәсаит ајырырлар. Амма һеч кәсдән пул јығылмыр, һеч кәс ианә етмәјә мәҹбур едилмир. Бинанын истисмары илә бағлы мәсрәфләри өдәмәк үчүн ичәридә ианә гутулары гојулур. Беләҹә, ҝөрүшә ҝәләнләр ианә едә биләрләр. Онлар буну көнүл хошлуғу илә вә үрәкдән едирләр (2 Кор. 9:7).

⁷ Бүтүн јығынҹаглар ибадәт евләрини мадди ҹәһәтдән дәстәкләмәји, тәмизлик ишләриндә иштирак етмәји вә биналара гуллуг ҝөстәрмәји өзләринә шәрәф билирләр. Бу ишләрин ҹәдвәлини тутмаг, адәтән, ағсаггала вә ја јығынҹаг хидмәтчисинә тапшырылыр. Әксәр һалларда тәмизлик ишини тәблиғ груплары ҝөрүр; онлара груп нәзарәтчиси, јахуд онун көмәкчиси башчылыг едир. Ибадәт евләринин һәм дахили, һәм дә хариҹи ҝөрүнүшү Јеһова Аллаһы вә Онун тәшкилатыны лајигинҹә тәмсил етмәлидир.

⁸ Бир ибадәт евиндә бир нечә јығынҹаг јығышанда јығынҹагларын ағсаггаллары ибадәт евинин истисмар комитәсини тәшкил едир. Бу комитә бина вә онун әразиси илә бағлы ишләрлә мәшғул олур. Ағсаггал шуралары бир гардашы истисмар комитәсинин координатору сечир. Ағсаггал шураларынын нәзарәти алтында фәалијјәт ҝөстәрән бу комитә ибадәт евинин тәмизлијинә, тәмиринә вә зәрури ләвазиматларын еһтијатда олмасына нәзарәт едир. Бу ишдә јығынҹаглар арасында әмәкдашлыг мүтләгдир.

⁹ Әҝәр бир ибадәт евиндән бир неҹә јығынҹаг истифадә едирсә, ҝөрүшләрин ҹәдвәли тутулур. Вахташыры ҹәдвәлдә дәјишиклик етмәк олар. Ҹәдвәли тутаркән ағсаггаллар бир-бирини нәзәрә алмалы вә гардашлыг мәһәббәти ҝөстәрмәлидирләр (Филип. 2:2—4; 1 Бут. 3:8). Һеч бир јығынҹаг диҝәр јығынҹагларын әвәзинә гәрар верә билмәз. Рајон нәзарәтчиси ибадәт евиндә јығышан јығынҹаглардан бирини зијарәт едәндә, лазым ҝәләрсә, диҝәр јығынҹагларын һәмин һәфтә үчүн ҹәдвәлиндә дәјишиклик едилир.

¹⁰ Јығынҹағын хидмәт комитәсинин иҹазәси илә ибадәт евиндә тој вә дәфн мәрузәси сөјләмәк олар. Комитәдәки ағсаггаллар бу барәдә мүраҹиәти диггәтлә нәзәрдән кечирир вә филиалын тәгдим етдији ҝөстәришә әсасән гәрар верир.

¹¹ Ибадәт евиндән бу мәгсәдлә истифадә етмәјә иҹазәси олан кәсләрдән өзләрини мәсиһијә јарашан тәрздә апармаг ҝөзләнилир. Ибадәт евиндә јығынҹағы бүдрәдәҹәк, Јеһованын вә јығынҹағын адына ләкә ҝәтирәҹәк һеч бир һәрәкәтә јол верилмәмәлидир (Филип. 2:14, 15). Филиалын ҝөстәриши илә ибадәт евиндә Мәсул Гардашлар үчүн Мәктәб вә Өнҹүл Мәктәби кими руһани тәдбирләр кечирилә биләр.

¹² Јығынҹаглар ибадәт јерләринә һөрмәтлә јанашмалыдырлар. Ора ҝәләнләрин ҝејими, хариҹи ҝөрүнүшү вә давранышы Јеһоваја ибадәтә јарашан тәрздә олмалыдыр (Ваиз 5:1; 1 Тим. 2:9, 10). Бунунла бағлы мәсләһәтләрә әмәл етмәклә биз ибадәт ҝөрүшләрини гијмәтләндирдијимизи ҝөстәририк.

¹³ Ҝөрүш вахты низам-интизама әмәл етмәк ваҹибдир. Валидејнләрә мәсләһәт ҝөрүлүр ки, ушагларыны јанларында отуздурсунлар. Көрпә ушағы олан валидејнләри тәшвиг етмәк лазымдыр ки, бајыра чыхыб ушағы сакитләшдирмәк вә ја һансыса еһтијаҹыны өдәмәк лазым ҝәләндә һеч кимә мане олмамаг үчүн мүнасиб јердә отурсунлар.

¹⁴ Мүнасиб гардашлар ибадәт евиндәки ҝөрүшләр заманы хидмәтчи тәјин олунурлар. Онлар диггәтли, меһрибан олмалы, вәзијјәтә дүзҝүн гијмәт вермәји баҹармалыдырлар. Онларын ишинә јени ҝәләнләри сәмими саламламаг, онлара јер ҝөстәрмәк, ҝөрүшә ҝеҹикәнләрә јер тапмаға көмәк етмәк, иштиракчыларын сајыны һесабламаг, истилик вә вентилјасија системинә нәзарәт етмәк дахилдир. Лазым ҝәлдикдә, хидмәтчиләр валидејнләрә хатырлатмалыдырлар ки, ушагларына нәзарәт етсинләр, ҝөрүшдән әввәл вә сонра гачмаға, сәһнәдә ојнамаға гојмасынлар. Ушаг надинҹлик едәндә хидмәтчиләр меһрибанҹасына вә нәзакәтлә валидејндән хаһиш етмәлидирләр ки, башгаларынын диггәтини даһа чох јајындырмамаг үчүн ушағы бајыра чыхарсын. Хидмәтчиләрин зәһмәти сајәсиндә һамы ҝөрүшә диггәтлә гулаг аса билир. Бу ишә ағсаггаллары вә јығынҹаг хидмәтчиләрини тәјин етмәк мүнасиб оларды.

ИБАДӘТ ЕВЛӘРИНИН ТИКИНТИСИ

¹⁵ Биринҹи әсрдә бәзи мәсиһиләр диҝәрләринә нисбәтән даһа имканлы олдуғу үчүн һәвари Булус јазмышды: «Гој инди сиздәки боллуг онлардакы әскиклији, онлардакы боллуг да сиздәки әскиклији долдурсун вә беләҹә, бәрабәрлик олсун» (2 Кор. 8:14). Бу бәрабәрлик принсипи бу ҝүн дә тәтбиг олунур. Бүтүн дүнјадакы јығынҹаглардан топланан вәсаитин һесабына ибадәт евләри тикилир вә јенидән гурулур. Тәшкилат вә бу ианәләрдән јарарланан јығынҹаглар сәхавәтинә ҝөрә бүтүн дүнјадакы баҹы-гардашлара үрәкдән миннәтдардырлар.

¹⁶ Һәр јығынҹағын һансы ибадәт евиндә јығышаҹағына филиал әрази илә бағлы планына әсасән гәрар верир. Филиал өз әразисиндә јени ибадәт евләринин нә вахт вә һарада тикиләҹәјинә гәрар верир, һәмчинин һансы ибадәт евиндә нә вахт әсаслы тәмир ишләринин апарылаҹағыны мүәјјән едир. Еләҹә дә, тәбии фәлакәт баш верәндә хәсарәт алмыш ибадәт евләринин, һәтта бәзи һалларда баҹы-гардашларын евләринин тәмирини тәшкил едир.

¹⁷ Филиал әмлакын алынмасында, ибадәт евинин лајиһәләшдирилмәсиндә, тикинтисинә иҹазәнин алынмасында, тикилмәсиндә вә тәмириндә иштирак едән көнүллүләрин ишинә нәзарәт едир. Бир чох өлкәләрдә ибадәт евләринә бөјүк тәләбат олдуғундан чохлу көнүллүјә еһтијаҹ вар. Әҝәр сиз вәфтиз олмуш нүмунәви тәблиғчисинизсә вә бу ишдә көмәк етмәк истәјирсинизсә, бланк долдуруб аид олдуғунуз јығынҹағын хидмәт комитәсинә верин. Вәфтиз олмамыш тәблиғчиләр белә, өз ибадәт евләринин тикинти вә тәмир ишләриндә көмәк едә биләрләр.

ТОПЛАНТЫ ЗАЛЛАРЫ

¹⁸ Илк мәсиһиләр әсас етибарилә кичик групларла јығышырдылар. Лакин бәзи һалларда даһа бөјүк групларла топлашырдылар (Һәв. 11:26). Ејнилә, бу ҝүн дә бөјүк топлантыларда чохлу сајда Јеһованын Шаһиди бир јерә топлашыр. Адәтән, бу ҝөрүшләр үчүн иҹарәјә јер ҝөтүрүлүр. Иҹарәјә јер ҝөтүрмәк мүнасиб олмајанда вә ја јер тапылмајанда топланты залы үчүн бина, јахуд јер алыныр.

¹⁹ Бәзи һалларда, бина алыныр, јенидән гурулур вә топланты залы кими истифадә олунур. Әксәр һалларда исә торпаг саһәси алыныб јени зал тикилир. Топланты залынын өлчүсү әразинин тәләбатындан асылы олур. Филиал бу биналарын алынмасына вә ја тикилмәсинә гәрар вермәздән әввәл, чох диггәтлә мәсрәфләри һесаблајыр вә залын нә гәдәр тез-тез истифадә олунаҹағыны ҝөтүр-гој едир.

²⁰ Филиал топланты залына гуллуг ҝөстәрмәк вә бинаны јахшы вәзијјәтдә сахламаг үчүн гардашлар тәјин едир. Залы мүнтәзәм тәмизләмәк, илдә ики дәфә әсаслы тәмизлик ишләри апармаг, һәмчинин техники хидмәт ҝөстәрмәк үчүн мүәјјән тәдбирләр ҝөрүлүр. Бу ишләрдә баҹы-гардашларын көнүллү олараг иштирак етмәси јахшы оларды. Буна ҝөрә дә јығынҹаглары бу тәдбирләрдә үрәкдән иштирак етмәјә чағырырыг (Зәб. 110:3; Мәл. 1:10).

²¹ Бәзән топланты залы диҝәр теократик тәдбирләр үчүн, мәсәлән, Мүгәддәс Китаб мәктәбләри вә рајон нәзарәтчиләринин хүсуси ҝөрүшләри үчүн истифадә олунур. Ибадәт евләри кими, топланты заллары да ибадәтә һәср олунмуш јерләрдир. Ибадәт евинә ҝәләндә неҹә давранырыгса, неҹә ҝејиниб-кеҹинириксә, топланты залына ҝәләндә дә о ҹүр давранмалы вә о ҹүр ҝејиниб-кеҹинмәлијик.

²² Бу ахырзаманын сонунда чох сајда инсан Јеһованын тәшкилатына гошулур. Бу, бир даһа сүбут едир ки, Јеһова бизимләдир (Әшј. 60:8, 10, 11, 22). Буна ҝөрә дә ибадәт јерләринин алынмасы, тәмиз вә раһат олмасы үчүн ҝөрүлән бүтүн тәдбирләри үрәкдән дәстәкләмәлијик. Бунунла бу ибадәт јерләринә ҝөрә миннәтдарлығымызы билдирмиш олуруг, чүнки бу јерләрдә јығышараг биз бир-биримизи руһландырырыг, хүсусән дә Јеһованын ҝүнү јахынлашан бир вахтда.