Өзүнә ҝүвәнмәк рүсвајчылыға сәбәб олур
“Өзүнә ҝүвәнәрсәнсә рүсвај оларсан; амма мүдриклик тәвазөкар оланларладыр” (СҮЛЕЈМАНЫН МӘСӘЛЛӘРИ 11:2, ЈД).
1, 2. Өзүнә ҝүвәнмәк нәдир вә бу хүсусијјәт фәлакәтли нәтиҹәләрә неҹә сәбәб олур?
ПАХЫЛ левит, гијамчыларын издиһамыны Јегованын сәлаһијјәт вердији кәсләрә гаршы галдырыр. Падшаһын шөһрәтпәрәст оғлу, атасынын тахтыны әлә кечирмәк үчүн мәкрли план гурур. Сәбирсиз падшаһ, Аллаһын пејғәмбәринин дәгиг ҝөстәришләринә е’тинасызлыг ҝөстәрир. Бу үч исраиллини үмуми бир хүсусијјәт бирләшдирир - онлар өзләринә ҝүвәнирдиләр.
2 Өзүнә ҝүвәнмәк һисси үрәјә хас олуб, һамы үчүн ҹидди тәһлүкә јарадан бир хүсусијјәтдир (Мәзмур 19:13, 14). Өзүнә ҝүвәнән инсан, һаггы чатмадығы иши едәрәк, өзүнә чох шејләрдә сәрбәстлик верир. Бу, чох вахт фәлакәтләрә сәбәб олур. Өзүнә ҝүвәнмәк хүсусијјәти падшаһлары мәһв етмиш вә империјалары јыхмышдыр (Јеремја 50:29, 31, 32; Даниел 5:20). Һәтта Јегованын хидмәтчиләри дә бу хүсусијјәтин торуна дүшүрдүләр вә бу онлары мәһвә апарырды.
3. Өзүнә ҝүвәнмәјин нә дәрәҹәдә тәһлүкәли олдуғуну неҹә өјрәнә биләрик?
3 Мүгәддәс Китабда јахшы фикир дејилир: “Өзүнә ҝүвәнәрсәнсә рүсвај оларсан; амма мүдриклик тәвазөкар оланларладыр” (Сүлејманын мәсәлләри 11:2, ЈД). Мүгәддәс Китабда, бу мәсәлин доғрулуғуну тәсдиг едән нүмунәләр ҝөстәрилир. Бу нүмунәләрдән бә’зисини нәзәрдән кечирмәк, иҹазә верилән шејин һәддини ашмағын нә дәрәҹәдә тәһлүкәли олдуғуну ҝөрмәкдә бизә көмәк едәҹәк. Беләликлә, ҝәлин мүзакирә едәк ҝөрәк, пахыллыг, шөһрәтпәрәстлик вә сәбирсизлик јухарыда хатырланан үч кишини өзләринә ҝүвәнәрәк давранмаға неҹә тәһрик етди вә бу онларын рүсвајчылығына неҹә сәбәб олду.
Гораһ - пахыл үсјанчы
4. а) Гораһ ким иди вә шүбһәсиз олараг һансы тарихи һадисәләрдә иштирак етмишдир? б) Өзүнүн јаша долмуш чағларында Гораһ һансы шәрәфсиз иши төрәтди?
4 Гораһ, Коһати нәслиндән олан левит вә Муса илә Һарунун әмиси оғлу иди. Еһтимала ҝөрә, о, онилләр әрзиндә Јеговаја сәдагәтли галмышдыр. Гораһ, Гырмызы дәниздән мө’ҹүзә илә кечирилән инсанларын арасында олмушдур вә јәгин ки, Сина дағынын әтәјиндә бузова ибадәт едән исраиллиләрин үзәриндә Јегованын һөкмүнүн иҹра олунмасында иштирак етмишдир (Чыхыш 32:26). Лакин Гораһ сонралар Муса илә Һаруна гаршы јаранан үсјанын сәбәбкары олду; бу үсјанда, Рувен гәбиләсиндән олан Датан, Абирам вә Он, һәмчинин Исраилин 250 рәиси дә иштирак едирдиa. Онлар Муса илә Һаруна дедиләр: “Артыг јетәр, чүнки бүтүн ҹамаат, онлардан һәр бири мүгәддәсдир вә РӘБ онларын арасындадыр; вә нә үчүн РӘББИН ҹәмијјәти үзәриндә өзүнүзү јүксәлдирсиниз?” (Сајлар 16:1—3).
5, 6. а) Муса илә Һаруна гаршы үсјан галдырмаға Гораһы нә тәһрик етди? б) Нәјә ҝөрә демәк олар ки, Гораһ, Аллаһын гурулушунда олан вәзифәсини гијмәтләндирмәди?
5 Чох илләр әрзиндә сәдагәтини горујан Гораһы үсјана тәһрик едән нә олду? Шүбһәсиз ки, Муса Исраилә залымлыгла рәһбәрлик едә билмәзди, чүнки о, “јер үзүндәки бүтүн адамлардан тәвазөкар иди” (Сајлар 12:3). Лакин ҝөрүнүр Гораһ Муса илә Һаруна пахыллыг едирди вә онларын мүһүм вәзифәләринә разылашмадығы үчүн һагсыз олараг сөјләди ки, онлар өзбашларына вә мәнфәәт ҝүдән дүшүнҹәләринә ҝөрә өзләрини ҹәмијјәтдән үстүн тутурлар (Мәзмур 106:16).
6 Ола билсин, Гораһын проблеми гисмән онда иди ки, Аллаһын гурулушунда јеринә јетирдији шәрәфли имтијазлары гијмәтләндирмирди. Коһати нәслиндән олан левитләрин каһин олмамаларына бахмајараг, онлар Аллаһын Ганунунун мүәллимләри идиләр. Бундан әлавә, сәјјар мә’бәди башга јерә көчүрмәк лазым ҝәлдикдә, онлар бу мә’бәддә олан аваданлыглары вә габ-гаҹаглары дашыјырдылар. Бу, әһәмијјәтсиз тапшырыг дејилди, чүнки һәмин мүгәддәс габ-гаҹаглары јалныз руһани вә мә’нәви ҹәһәтдән тәмиз олан инсанлар әлләринә ала биләрдиләр (Јешаја 52:11). Буна ҝөрә дә Гораһа е’тираз едәрәк, Муса сорушду: “Өз вәзифәнизи о гәдәрми әһәмијјәтсиз санырсыныз ки, һәлә бир каһинлијә дә ҹан атырсыныз?” (Сајлар 16:9, 10). Гораһ анламырды ки, ән бөјүк шәрәф хүсуси иҹтимаи вәзијјәтә вә ја мөвгејә наил олмагда дејил, Јегованын тә’јин етдији гајда-гануна ујғун олараг Она сәдагәтлә хидмәт етмәкдән ибарәтдир (Мәзмур 84:10).
7. а) Муса, Гораһа вә онунла әлбир оланлара нә етмәји тәклиф етди? б) Гораһын үсјанына неҹә сон гојулду?
7 Гораһа вә онунла әлбир оланлара Муса тәклиф етди ки, сәһәри ҝүн әлләриндә бухурдан вә бухур јығынҹаг чадырына топлансынлар. Гораһ вә онун тәрәфдарларынын, каһин олмадыглары үчүн, бухур јандырмаға ихтијарлары јох иди. Әҝәр бухурдан вә бухурла ҝәлсәјдиләр, онларын өзләрини каһин олмаға һаглы сандыглары ајдын олаҹагды; бахмајараг ки, онларын бу мәсәләни јенидән мүзакирә етмәк үчүн там бир ҝеҹә вахтлары варды. Онлар сәһәри ҝүн топландыгда, Јегова әдаләтли олараг өз гәзәбини ҝөстәрди. “Јер ағзыны ачды” вә Рувен нәслиндән олан инсанлары “удду”. Диҝәрләрини, о ҹүмләдән Гораһы да, Аллаһдан ҝәлән атәш јандырды (Тәснијә 11:6; Сајлар 16:16—35; 26:10). Гораһын өзүнә ҝүвәнмәси ән бөјүк рүсвајчылыға - Аллаһын ону бәјәнмәмәсинә сәбәб олду!
“Пахыллыға мејил”ли олмаға мүгавимәт ҝөстәрин
8. “Пахыллыға мејл”ли олмаг мәсиһчиләр арасында өзүнү неҹә бирузә верә биләр?
8 Гораһ һаггындакы бу мә’лумат бизим үчүн хәбәрдарлыгдыр. Гејри-камил инсанларда “пахыллыға мејл” олдуғу үчүн, бу, мәсиһчи јығынҹағында да өзүнү ҝөстәрә биләр (Јагуб 4:5, ЈД). Мәсәлән, биз, јығынҹагдакы вәзифәјә бөјүк әһәмијјәт верә биләрик. Арзусунда олдуғумуз имтијазлары бир башгасы иҹра едәрсә, Гораһ кими, биз дә она пахыллыг едә биләрик. Јахуд, биринҹи әсрдә јашамыш Диотреф адлы мәсиһчијә бәнзәјә биләрик. О, ҝөрүндүјү кими, өзү башчылыг етмәк истәдији үчүн, һәвариләрин сәлаһијјәтләринә чох тәнгиди јанашырды. Һәгигәтән дә, Јәһја јазырды ки, Диотреф “рәислик етмәји севир” (3 Јәһја 9).
9. а) Јығынҹагдакы тә’јината һансы нөгтеји-нәзәрлә бахмаг олмаз? б) Аллаһын гурулушунда олан јеримизә дүзҝүн олараг неҹә јанашмаг лазымдыр?
9 Әлбәттә ки, мәсиһчинин јығынҹагда мәс’улијјәтли ишләрә ҹан атмасы пис дејил. Павел, һәтта буна тәшвиг едирди (1 Тимотејә 3:1). Лакин биз, јығынҹагдакы имтијазлара һеч вахт фәргләндириҹи бир хүсусијјәт кими бахмамалыјыг; хидмәтдә әлавә бир имтијаз алмагла, вәзифә “пилләләриндә” ирәлиләдијимизи фикирләшмәмәлијик. Исанын сөзләрини јадда сахламалыјыг: “Аранызда бөјүк олмаг истәјән, диҝәрләринин нөкәри олсун. Вә аранызда биринҹи олмаг истәјән, диҝәрләринин гулу олсун” (Матта 20:26, 27). Бизим мәс’улијјәтимиздән артыг мә’сулијјәтләрә саһиб олан шәхсләрә пахыллыг етмәк дүзҝүн олмазды, чүнки Аллаһын ҝөзүндә дәјәрли олмағымыз, Онун тәшкилатындакы “рүтбәмиздән” асылы дејил. Иса деди: “Сиз һамыныз гардашсыныз” (Матта 23:8). Бәли, тәблиғчиләр вә пионерләр, јени вәфтиз олунанлар вә узун мүддәт мәсиһчи тәҹрүбәсинә малик оланлар, үмумијјәтлә Јеговаја үрәкдән хидмәт едәнләрин һамысы Онун гурулушунда дәјәрли јери тутурлар (Лука 10:27; 12:6, 7; Галатијалылара 3:28; Ибраниләрә 6:10). Мүгәддәс Китабын “бир-биринизә табе олараг тәвазөкарлыг палтары ҝејинин” мәсләһәтинә риајәт етмәјә сә’ј ҝөстәрән милјонларла инсанларла чијин-чијинә хидмәт етмәк, доғрудан да хејир-дуадыр! (1 Петер 5:5).
Абшалом - шөһрәтпәрәст фырылдагчы
10. Абшалом ким иди вә о, падшаһын јанына мүһакимәјә ҝәләнләрин илтифатыны газанмаг үчүн неҹә сә’ј ҝөстәрирди?
10 Давуд падшаһын үчүнҹү оғлу Абшаломун һәјат јолу, шөһрәтпәрәстлијә әјани нүмунәдир. Бу һијләҝәр фырылдагчы, падшаһын јанына мүһакимәјә ҝәләнләрин илтифатыны газанмаға чалышырды. О, илк нөвбәдә бөһтан атырды ки, Давуд ҝәләнләрин еһтијаҹына лагејд јанашыр. Сонра о, һијләјә сон гојуб, бирбаша ишә башлады. Абшалом уҹадан дејирди: “Каш мәмләкәтдә мәни һаким гојајдылар вә мүбаһисәси, јахуд мүһакимәси олан һәр адам мәним јаныма ҝәләрди вә она әдаләт едәрдим!” Абшаломун мәкрли планынын һәдди јох иди. Мүгәддәс Китабда дејилир: “Бир адам онун јанына баш әјмәк үчүн јахынлашан заман о, әлини узадар, ону гуҹаглајар вә өпәрди. Вә һөкм үчүн падшаһын јанына ҝәлән бүтүн Исраилә Абшалом белә едәрди”. Бунун нәтиҹәси нә олду? “Абшалом Исраил адамларынын үрәјини оғурлады” (2 Самуел 15:1—6).
11. Абшалом, Давудун тахтыны әлә кечирмәјә неҹә чалышырды?
11 Абшалом, атасынын тахтыны әлә кечирмәјә гәти гәрарлы иди. Беш ил әввәл, онун сәранҹамы илә Давудун бөјүк оғлу Амнон өлдүрүлмүшдү; бу, Абшаломун баҹысы Тамарын зорланмасына гисас бәһанәси илә едилмишди (2 Самуел 13:28, 29). Лакин ола билсин ки, Абшалом һәтта о заман падшаһлыг һакимијјәтинин нијјәтиндә олмушдур вә Амнонун өлдүрүлмәсиндә рәгибин арадан ҝөтүрүлмәси үчүн фүрсәт ҝөрүрдүb. Һәр неҹә олса да, вахт чатдыгда, Абшалом фәалијјәт ҝөстәрмәјә башлады. О, сәранҹам верди ки, бүтүн мәмләкәтдә ону падшаһ е’лан етсинләр (2 Самуел 15:10).
12. Изаһ един: Абшаломун өзүнә ҝүвәнмәси онун рүсвајчылығына неҹә сәбәб олду.
12 Абшалом бир мүддәт мүвәффәгијјәт газанды, чүнки “фәсад ҹәмијјәти гүввәтли иди... Абшаломла олан халг ҝет-ҝедә чохалырды”. Бу вахт Давуд, өз һәјатыны хилас етмәк үчүн, гачмаға мәҹбур олду (2 Самуел 15:12—17). Лакин тезликлә Абшаломун планлары позулду: Јоаб ону өлдүрдү, онун ҹәсәдини исә бир гујуја тулладылар вә үстүнү дашла өртдүләр. Тәсәввүр един: падшаһ олмаға ҹан атан бу шөһрәтпәрәст адам, һәтта дәфн олунмаға лајиг ҝөрүлмәди!c Абшаломун өзүнә ҝүвәнмәси, доғрудан да онун рүсвајчылығына сәбәб олду (2 Самуел 18:9—17).
Мәнфәәт ҝүдән шөһрәтпәрәстликдән чәкинин
13. Шөһрәтпәрәстлик мәсиһчинин үрәјиндә неҹә көк сала биләр?
13 Абшаломун һакимијјәтә јүксәлмәси вә сонрадан мәғлуб олмасы бизим үчүн ибрәт дәрсидир. Буҝүнкү амансыз дүнјада, мүдријјәтин е’тимадыны газанмаг мәгсәдилә, онун гаршысында јалтагланмаг ади һала чеврилиб; бу, инсанларын һәм өзләри барәдә хош тәәссүрат јаратмалары үчүн, һәм дә хидмәтдә мүәјјән имтијазлар әлдә етмәләри вә ја габаға чәкилмәләри үчүн едилир. Ејни заманда, јалтаглар, табелијиндә оланларын илтифатыны вә мүдафиәсини газанмаг үмиди илә, ловғалыгла бәјанатлар верә биләрләр. Әҝәр еһтијатлы олмасаг, белә шөһрәтпәрәстлик руһу бизим дә үрәјимиздә көк сала биләр. Ҝөрүндүјү кими, белә һадисә биринҹи әсрдә бә’зиләри илә баш вермишдир. Буна ҝөрә дә һәвариләр, мәсиһчиләри белә инсанлардан горунмаға ҹидди хәбәрдар етмишдирләр (Галатијалылара 4:17; 3 Јәһја 9, 10).
14. Биз нәјә ҝөрә шөһрәтпәрәстликдән вә јүксәлмәкдән чәкинмәлијик?
14 Јүксәлмәк һәвәсиндә олуб, “өз иззәтини ахтаран” фитнәкарлара Јегованын тәшкилатында јер јохдур (Сүлејманын мәсәлләри 25:27). Мүгәддәс Китаб хәбәрдарлыг едир: “РӘБ бүтүн дүзҝүн [“јалтаг”, ЈД] додаглары, бөјүк сөјләјән дили кәсәҹәкдир” (Мәзмур 12:3). Абшаломун јалтаг додаглары варды. О, лүтфүнү газанмаг еһтијаҹында олдуғу кәсләрә јалтагланырды вә буну јеҝанә мәгсәдлә - һәсрәтиндә олдуғу јүксәк вәзифәјә наил олмаг мәгсәдилә едирди. Биз, Павелин: “Рәгабәт вә ја шөһрәтпәрәстликлә һеч бир шеј етмәјин, амма тәвазөкарлыгла бир-биринизи өзүнүздән јухары сајын” - мәсләһәтинә риајәт едән гардашлыг арасында олмағымыза неҹә дә шадыг! (Филипилиләрә 2:3).
Шаул - сәбирсиз падшаһ
15. Тәвазөкар олдуғуну Шаул бир дәфә неҹә ҝөстәрди?
15 Сонрадан Исраилин падшаһы олан Шаул бир заманлар тәвазөкар иди. Мәсәлән, о, ҝәнҹ оланда белә бир һадисә баш верди. Аллаһын пејғәмбәри Шәмуел онун һаггында илтифатла данышанда, Шаул итаәкарлыгла ҹаваб верди: “Мән Исраил нәслинин ән кичијиндән, Бенјаминни дејиләмми? Вә гәбиләм Бенјамин нәслинин гәбиләләриндән ән кичији дејилми? Нә үчүн мәнә белә бир шеј сөјләјирсән?” (1 Самуел 9:21).
16. Шаул неҹә сәбирсизлик етди?
16 Лакин сонралар Шаулун тәвазөкарлығы јох олду. Шаул филистимлиләрлә мүһарибә едән заман Ҝилгала чәкилди вә орада Шәмуели ҝөзләмәли иди ки, о, гурбан тәгдим едәрәк Аллаһа јалварсын. Шәмуел тә’јин едилән вахтда ҝәлмәди, Шаул өзүнә ҝүвәнәрәк гурбаны өзү тәгдим етди. О, елә јениҹә гуртармышды ки, Шәмуел ҝәлди. “Нә етдин?” - дејә Шәмуел сорушду. Шаул ҹаваб верди: “Чүнки ҝөрдүм, халг јанымдан дағылыр вә сән дедијин ҝүндә ҝәлмәдин... өзүмү мәҹбур едиб гурбаны тәгдим етдим” (1 Самуел 13:8—12).
17. а) Нәјә ҝөрә Шаулун давранышы илк бахышдан һаглы ҝөрүнә биләрди? б) Шаулун сәбирсиз давранышыны Јегова нә үчүн мүһакимә етди?
17 Шаулун давранышы илк бахышдан һаглы ҝөрүнә биләрди. Доғрудан да, Аллаһын халгы “дарда” иди, о “сыхылырды” вә үмидсиз вәзијјәтдә олдуғундан горху ичиндә иди (1 Самуел 13:6, 7). Әлбәттә ки, вәзијјәт тәшәббүс ҝөстәрмәји тәләб едәндә, бурада һеч бир гәбаһәт иш јохдурd. Лакин унутмајаг ки, Јегова үрәкләри вә ән ҝизли нијјәтләри ҝөрүр (1 Самуел 16:7). Демәли, Мүгәддәс Китабда бу һагда ачыг дејилмәсә дә, әслиндә Шаулу бу һәрәкәтә тәһрик едән һиссләри Јегова ҝөрмүшдү. Мәсәлән, бәлкә дә Јегова ҝөрмүшдү ки, Шаулун сәбирсизлији мәғрурлугдан әмәлә ҝәлмишди. Бәлкә дә, Шаул бәрк гәзәбләнирди ки, о, - бүтүн Исраилин падшаһы - өзүнүн һесаб етдији кими, гоҹа, ағыртәрпәнән бир пејғәмбәри ҝөзләмәлидир! Неҹә олурса-олсун, Шаул гәрара алды ки, Шәмуелин ҝеҹикмәси, она, һәр шеји өз өһдәсинә ҝөтүрмәјә вә алдығы дәгиг ҝөстәришләрә зидд олараг давранмаға ихтијар верир. Бунун нәтиҹәси нә олду? Шәмуел, тәшәббүсүнә ҝөрә Шаулу тә’рифләмәди. Әксинә, о, Шаулу: “Падшаһлығын дурмајаҹаг... чүнки сән, РӘББИН сәнә әмр етдији шеји јеринә јетирмәдин” дејәрәк мүһакимә етди (1 Самуел 13:13, 14). Јенә дә өзүнә ҝүвәнмәк хүсусијјәти рүсвајчылыға сәбәб олду.
Сәбирсизликдән горунун
18, 19. а) Тәсвир един: Сәбирсизлик, Аллаһын мүасир хидмәтчисинин өзүнә ҝүвәнәрәк давранмасына неҹә сәбәб ола биләр. б) Мәсиһчи јығынҹағындакы иш һаггында биз нәји јадда сахламалыјыг?
18 Аллаһын Кәламынын, Шаулун өзүнә ҝүвәнәрәк давранмасы һаггында сөјләдикләри бизим хејримиз үчүндүр (1 Коринфлиләрә 10:11). Руһани гардашларымызын гејри-камиллији чох асанлыгла биздә гәзәб ојада биләр. Биз дә, Шаул кими сәбирсиз олуб дүшүнә биләрик ки, һәр шејин лазыми гајдада едилмәси үчүн, бүтүн ишләрин гејдинә өзүмүз галмалыјыг. Мәсәлән, фәрз едәк ки, бир гардашын јахшы тәшкилатчылыг габилијәти вар. О, һәр шеји өз вахтында едир, тәшкилатчылыг гајда-ганунларына аид Ҹәмијјәтин сон ҝөстәришләриндән хәбәрдардыр, һәмчинин натиглик вә мүәллимлик габилијјәтинә дә маликдир. Ејни заманда, о һисс едир ки, диҝәрләри онун хырдачыл тәләбләринә мүвафиг дејилләр вә онун фикринә ҝөрә, аз сәмәрә илә ишләјирләр. Бу, она өз сәбирсизлијини ҝөстәрмәјә ихтијар верирми? Белә адам, ҝуја ки, онсуз һеч бир ишин едилмәдијинә вә јығынҹағын фәалијјәтинин дајанаҹағына ишарә едәрәк, гардашлары тәнгид едә биләрми? Бу, һәмин адамын өзүнә ҝүвәндијини ҝөстәрәрди!
19 Әслиндә мәсиһчи јығынҹағыны бирләшдирән нәдир? Тәшкилатчылыг габилијјәтими? Баҹарыгмы? Билик чохлуғуму? Бүтүн бунлар, шүбһәсиз ки, јығынҹағын сәмәрәли ишинә көмәк едир (1 Коринфлиләрә 14:40; Филипилиләрә 3:16; 2 Петер 3:18). Лакин Иса деди ки, онун давамчылары илк нөвбәдә бир-бирләринә олан мәһәббәтләри илә танынаҹаглар (Јәһја 13:35). Елә буна ҝөрә дә, гајғыкеш ағсаггаллар өз тәшкилатчылыглары даирәсиндә јадда сахлајырлар ки, јығынҹаг, ҹидди рәһбәрлик гајдасы тәләб едән фирма дејил; әксинә, јығынҹаг, зәриф гајғыја еһтијаҹы олан руһани гојунлардан ибарәтдир (Јешаја 32:1, 2; 40:11). Өзүнә ҝүвәнәрәк белә принсипләрә лагејд јанашмаг, чох вахт тоггушмаја сәбәб олур. Аллаһа мәгбул олан гајда-ганун исә әмин-аманлыға сәбәб олур (1 Коринфлиләрә 14:33; Галатијалылара 6:16).
20. Нөвбәти мөвзуда нә мүзакирә едиләҹәк?
20 Гораһ, Абшалом вә Шаул һаггындакы Мүгәддәс Китабын һекајәләри ачыг-ашкар ҝөстәрир ки, Сүлејманын мәсәлләри 11:2 дејилдији кими, өзүнә ҝүвәнмәк рүсвајчылыға сәбәб олур. Лакин Мүгәддәс Китабын елә һәмин ајәсиндә дејилир: “Мүдриклик тәвазөкар оланларладыр”. Тәвазөкарлыг нәдир? Мүгәддәс Китабын һансы нүмунәләри бу хүсусијјәтин мә’насыны ачыглајыр вә биз бу ҝүн тәвазөкарлығы неҹә ҝөстәрә биләрик? Бу суаллар нөвбәти мөвзуда мүзакирә едиләҹәк.
[Һашијәләр]
a Рувен Јагубун илкин оғлу иди. Бәлкә дә, онун Гораһ тәрәфиндән үсјана тәһрик едилмиш нәслини, Леви нәслиндән олан Мусанын онлар үзәриндә сәлаһијјәти олдуғу гәзәбләндирирди.
b Давудун икинҹи оғлу Килеаб, анадан олдугдан сонра хатырланмыр. Ола билсин ки, о, Абшаломун үсјанындан әввәл өлмүшдүр.
c Мүгәддәс Китаб јазылдығы дөврләрдә вәфат едән инсанын дәфн олунмасына бөјүк әһәмијјәт верилирди. Буна ҝөрә дә, өлән адамын дәфн едилмәмәси рүсвајчылыг сајылырды вә чох вахт Аллаһын һәмин шәхси бәјәнмәдијини ифадә едирди (Јеремја 25:32, 33).
d Мәсәлән, Финеһас, он минләрлә исраиллини мәһв едән бәланы дајандырмаг үчүн, дәрһал тәдбир ҝөрдү, Давуд исә, өзү илә олан аҹ адамлары тәһрик етди ки, “Аллаһын еви”ндә тәгдим едилән чөрәји онунла бәрабәр јесинләр. Аллаһ бу ики һәрәкәтин һеч бирини өзүнә ҝүвәнмәк кими мүһакимә етмәди (Матта 12:2—4; Сајлар 25:7—9; 1 Самуел 21:1—6).
Јадыныздадырмы?
• Өзүнә ҝүвәнмәк нәдир?
• Пахыллыг, Гораһы өзүнә ҝүвәнәрәк давранмаға неҹә мәҹбур етди?
• Шөһрәтпәрәст Абшаломун әһвалатындан биз нә өјрәнирик?
• Биз, Шаулун ҝөстәрдији сәбирсизликдән неҹә горуна биләрик?
[20-ҹи сәһифәдәки шәкил]
Шаул сәбирсизлик етди вә өзүнә ҝүвәнәрәк давранды