Аллаһын тә’јин етдији һакимијјәтә сәдагәтлә табе олун
“Һакимимиз Рәбдир, ганунумузу гојан Рәбдир, падшаһымыз Рәбдир” (ИШАЈА 33:22).
1. Исраил халгыны башга халглардан фәргләндирән һансы амилләр варды?
ЕРАМЫЗДАН әввәл 1513-ҹү илдә Исраил халгы мөвҹуд олмаға башлады. О заман бу дөвләтин нә пајтахты, нә әразиси, нә дә инсан падшаһы варды. Бу дөвләтин вәтәндашлары кечмишдә көлә идиләр. Лакин бу халгы фәргләндирән даһа бир амил варды: онун ҝөзәҝөрүнмәз Һакими, Ганунвериҹиси вә Падшаһы Јеһова Аллаһ иди (Чыхыш 19:5, 6; Ишаја 33:22). Башга һеч бир халг өзү һагда бу сөзләри дејә билмәзди!
2. Исраил халгынын тәшкил олунмасы илә әлагәдар һансы суал јараныр вә бу суалын ҹавабыны билмәк бизим үчүн нәјә ҝөрә ваҹибдир?
2 Јеһова низам-интизам, һәмчинин сүлһ Аллаһы олдуғундан, Онун идарә етдији һәр-һансы бир халгын јахшы тәшкил олунмасы тәбиидир (1 Коринфлиләрә 14:33). Исраил халгыны да истисна етмәк олмазды. Лакин јер үзүндә мөвҹуд олан, ҝөзлә ҝөрүнән бир тәшкилат, ҝөзәҝөрүнмәз Аллаһ тәрәфиндән неҹә идарә олуна биләр? Јеһованын бу гәдим халгы неҹә идарә етдијинә нәзәр салмағымыза дәјәр. Һәмчинин Јеһованын Исраил халгы илә давранышындан, Онун тә’јин етдији һакимијјәтә сәдагәтлә табе олмағын ваҹиблијинә дә хүсуси диггәт јетирмәлијик.
Гәдим Исраилдә идарәетмә үсулу
3. Халгына рәһбәрлик етмәк үчүн Јеһова һансы практики гурулушу тә’јин етмишди?
3 Јеһова Исраилин ҝөзәҝөрүнмәз Падшаһы олса да, садиг инсанлары өзүнүн ҝөрүнән нүмајәндәләри тә’јин едирди. Исраилдә халга мәсләһәтчиләр вә һакимләр тимсалында хидмәт едән рәисләр, гәбилә башчылары вә ағсаггаллар варды (Чыхыш 18:25, 26; Тәснијә 1:15). Лакин мәс’улијјәт дашыјан бу адамларын, Аллаһын рәһбәрлији олмадан, һәр шеји сәһвә јол вермәдән ҝөзүачыглыгла вә анлајышла мүһакимә едә биләҹәкләрини дүшүнмәк дүзҝүн олмазды. Онлар гејри-камил идиләр вә һәмиманлыларынын үрәкләриндә оланлары ҝөрә билмирдиләр. Бунунла белә, Аллаһдан горхан һакимләр онлара фајдалы мәсләһәтләр верә билирдиләр. Бу мәсләһәтләр, Јеһованын ганунуна әсасландығы үчүн фајдалы иди (Тәснијә 19:15; Мәзмур 119:97-100).
4. Исраил халгынын сәдагәтли һакимләри өзләриндәки һансы мејлләри рәф етмәјә чалышырдылар вә нәјә ҝөрә?
4 Лакин һакимләрдән, Гануну билмәкдән даһа артыг шеј тәләб олунурду. Гејри-камил олан бу ағсаггаллар, онлара хас олан вә әдаләт мәһкәмәсини иҹра етмәјә манеә төрәдән пис мејлләри, мәсәлән, худбинлијә, үзҝөрәнлијә вә тамаһкарлыға олан мејлләрини јүјәнләмәји баҹармалы идиләр. Муса онлара деди: “Һөкмдә шәхсләрә е’тибар етмәјәҹәксиниз; кичији дә бөјүјү кими динләјәҹәксиниз; инсан үзүндән горхмајаҹагсыныз; чүнки һөкм Аллаһындыр”. Бәли, Исраилин һакимләри Аллаһын адындан һөкм верирдиләр. Бу ҹүр тапшырыг неҹә дә еһтирам һисси доғурур! (Тәснијә 1:16, 17).
5. Јеһова, һакимләр тә’јин етмәкдән башга, халгы үчүн даһа һансы тәдбири ҝөрдү?
5 Халгынын руһани тәләбатларына гајғы ҝөстәрмәк үчүн Јеһова јалныз һакимләр тә’јин етмәди. Исраиллиләр Вә’д едилән дијара чатмаздан әввәл, Јеһова онлара, һәгиги ибадәтин мәркәзи олан сәјјар мә’бәди гурмағы тапшырды. О, һәмчинин каһинләр тә’јин етди ки, онлар Гануну халга өјрәтсинләр, һејванлары гурбан ҝәтирсинләр вә сәһәр-ахшам бухур јандырсынлар. Аллаһ, Мусанын бөјүк гардашы Һаруну Исраилин биринҹи баш каһини тә’јин етди, онун оғулларына исә өз вәзифәсини јеринә јетирмәкдә аталарына көмәк етмәји тапшырды (Чыхыш 28:1; Сајлар 3:10; 2 Тарихләр 13:10, 11).
6, 7. а) Вәзифәләр каһинләр вә каһин олмајан левилиләр арасында неҹә бөлүшдүрүлүрдү? б) Биз, левилиләрин мүхтәлиф ишләр ҝөрмәләриндән һансы ибрәт дәрсини ала биләрик? (Колослулара 3:23)
6 Сајы бир нечә милјон олан халгын руһани тәләбатларынын гајғысына галмаг бөјүк тапшырыг иди, каһинләр исә сајҹа азлыг тәшкил едирдиләр. Онлара көмәк етмәк үчүн Леви гәбиләсинин башга үзвләри тә’јин олунмушдулар. Јеһова Мусаја деди: “Левилиләри Һаруна вә оғулларына верәҹәксән; онлар Исраил оғуллары арасында она тамамән верилмишдир” (Сајлар 3:9, 39)
7 Левилиләр јахшы тәшкил олунмушдулар. Онлар үч аиләјә — Ҝершон, Коһат вә Мерари оғуллары аиләсинә бөлүнүрдүләр вә һәр биринә мүәјјән иш һәвалә олунмушду (Сајлар 3:14-17, 23-37). Тапшырыгларын бә’зиләри даһа үстүн ҝөрүнсә дә, онларын һамысы ваҹиб мә’на дашыјырды. Левилиләрдән Коһат оғулларынын иши мүгәддәс әһд сандығы вә чадырын ләвазиматлары илә сых бағлы иди. Лакин, Коһат оғулларынын сырасына дахил олуб-олмамаларындан асылы олмајараг, һәр бир левилинин иши чох шәрәфли иди (Сајлар 1:51, 53). Әфсуслар олсун ки, өз тә’јинатыны гијмәтләндирмәјән кәсләр дә варды. Аллаһын тә’јин етдији һакимијјәтә сәдагәтлә табе олмаг әвәзинә, онлар наразылыг руһу инкишаф етдирдиләр, ловғалыг, шөһрәтпәрәстлик вә һәсәд кими һиссләрин тә’сири алтына дүшдүләр. Белә адамлардан бири, Кораһ адында левили иди.
“Каһинлији дә арајырсыныз?”
8. а) Кораһ ким иди? б) Кораһ һансы сәбәбдән каһинләрә инсан нөгтеји-нәзәриндән баха биләрди?
8 Кораһ нә Леви нәслинин, нә дә Коһат гәбиләсинин башчысы иди (Сајлар 3:30, 32). Буна бахмајараг, Исраил халгы арасында һөрмәт газанмыш рәис иди. Еһтимал ки, вәзифәси илә әлагәдар Һарун вә онун оғуллары илә сых әлагәдә олурду (Сајлар 4:18, 19). Бу адамларын гејри-камиллијини ҝөрәрәк, Кораһ белә дүшүнә биләрди: “Мәҝәр бу каһинләрин гејри-камил олдуглары ајдын дејилми? Мән исә онлара табе олмалыјам! Бир гәдәр әввәл Һарун гызыл бузов дүзәлтмишди. Она ибадәт етдији үчүн халгымыз бүтпәрәстлијә гапылмышды. Инди исә, Мусанын гардашы олан елә бу Һарун баш каһин вәзифәсини иҹра едир! Неҹә дә икиүзлүлүкдүр! Бәс Һарунун оғуллары Надаб вә Абиһу? Онлар хидмәтләринә о дәрәҹәдә һөрмәтсиз јанашдылар ки, Јеһова онлары мәһв етмәли олду!”a (Чыхыш 32:1-5; Левилиләр 10:1, 2). Кораһ һәр нә дүшүнсә дә, еһтимал ки, каһинләрә инсан нөгтеји-нәзәриндән бахмаға башлады. Буна ҝөрә дә нәтиҹәдә Мусаја вә Һаруна, әслиндә исә Јеһоваја гаршы гијам галдырды (1 Самуел 15:23; Јагуб 1:14, 15).
9, 10. Кораһ вә онун тәрәфдарлары Мусаны нәдә ҝүнаһландырдылар вә онлар һансы сәбәбдән билмәли идиләр ки, буну етмәк олмаз?
9 Кораһ кими нүфузлу адамын, өзүнә тәрәфдарлар тапмасы чәтин дејилди. О, Датан вә Абирам илә бирликдә әтрафларына ҹәмијјәтин рәисләри олан 250 нәфәр һәмфикирләр топладылар. Һамысы бирликдә Мусаја вә Һаруна јахынлашыб дедиләр: “Бүтүн ҹәмијјәт, онлардан һәр бири мүгәддәсдир вә Рәбб онларын арасындадыр; вә нә үчүн Рәббин јығынҹағы үзәринә өзүнүзү јүксәлдирсиниз?” (Сајлар 16:1-3).
10 Гијамчылар јахшы билирдиләр ки, Мусанын һакимијјәтинә гаршы чыхмаг олмаз. Бундан бир гәдәр әввәл Мирјам илә Һарун да белә давранмышдылар. Онлар, һәтта тәхмини Кораһ кими мүлаһизә јүрүдүрдүләр! Сајлар 12:1, 2 ајәләринә әсасән, онлар сорушурдулар: “Рәбб јалныз Муса васитәсиләми сөјләди? бизим васитәмизлә дә сөјләмәдими?” Јеһова һәр шеји ешитди. Мусаја, Һаруна вә Мирјама, рәис сечдији адамы ҝөстәрмәк истәдији јерә, топланма чадырынын ағзына јығылмағы тапшырды. Јеһова ајдын диллә деди: “Әҝәр аранызда бир пејғәмбәр варса, мән, Рәбб, хәјалда өзүмү она билдирәҹәјәм, рө’јада онунла сөјләјәҹәјәм. Гулум Муса елә дејилдир; бүтүн евимдә садигдир”. Бунун ардынҹа Јеһова Мирјамы мүвәггәти олараг ҹүзама гәрг етди (Сајлар 12:4-7, 10).
11. Муса, Кораһын төрәтдији вәзијјәтин өһдәсиндән неҹә ҝәлди?
11 Кораһ вә онун тәрәфини тутанлар бу һадисәдән хәбәрдар олмалы идиләр. Онларын гијамына бәраәт газандырмаг олмазды. Лакин јенә дә Муса онлары сәбирлә јола ҝәтирмәјә чалышырды. Муса онлары, малик олдуглары хидмәти гијмәтләндирмәјә чағырырды: “Исраил ҹәмијјәтиндән сизи өзүнә јахын гылмаг, Рәббин мәскәнинин хидмәтиндә дурмаг вә ҹәмијјәтә хидмәт етмәк үчүн онларын өнүндә дурмаг үзрә Исраилин Аллаһы сизи ајырды... бу сизә кичик бир шејми ҝөрүнүр?” Јох, бу “кичик бир шеј” дејилди! Левилиләрә олдугҹа чох шеј е’тибар едилмишди. Бәс онларын нәји чатышмырды? Мусанын сонрадан дедији онларын үрәјиндә оланы үзә чыхартды: “Каһинлији дә арајырсыныз?”b (Сајлар 12:3; 16:9, 10). Тә’јин етдији һакимијјәтә гаршы галдырылан гијама Јеһова неҹә мүнасибәт ҝөстәрди?
Исраилин Һакими мүдахилә едир
12. Исраиллиләрин Аллаһла јахшы мүнасибәтдә галыб-галмамаглары нәдән асылы иди?
12 Јеһова исраиллиләрә Ганун верәндә онлара деди ки, әҝәр итаәткар олсалар “мүгәддәс милләт” олаҹаг вә Јеһованын јаратдығы гајда-гануна табе олсалар “мүгәддәс милләт” олараг галмагда давам едәҹәкләр (Чыхыш 19:5, 6). Инди исә, ачыг-ашкар шәкилдә баш верән гијам заманы, Исраилин Һакими вә Ганунвериҹиси үчүн мүдахилә етмәк вахты ҝәлмишдир! Муса Кораһа деди: “Сән вә бүтүн јолдашларын, сән вә онлар вә Һарун, сабаһ Рәббин өнүндә олун; вә сиздән һәр бири өз бухурданыны алыб үзәрләринә бухур гојун вә сиздән һәр бири өз бухурданыны алараг Рәббин өнүнә ики јүз әлли бухурдан ҝәтирин; сән вә Һарун икиниз дә бухурданынызы ҝәтирин” (Сајлар 16:16, 17).
13. а) Гијамчыларын Јеһованын өнүндә бухур јандырмалары нәјә ҝөрә һөрмәтсизлик иди? б) Јеһова гијамчыларла неҹә давранды?
13 Аллаһын Ганунуна әсасән, бухуру јалныз каһинләр јандыра биләрдиләр. Каһин олмајан левилиләрин Јеһованын гаршысында бухур јандырмалары һаггындакы фикир, гијамчылары дүшүндүрмәли иди (Чыхыш 30:7; Сајлар 4:16). Амма бу фикир Кораһы вә тәрәфдарларыны дајандырмады. Ертәси ҝүн Кораһ “онлара [Мусаја вә Һаруна] гаршы бүтүн ҹәмијјәти топланма чадырынын гапысына топлады”. Мүгәддәс Китабда дејилир: “Вә Рәбб Мусаја вә Һаруна сөјләјиб деди: Бу ҹәмијјәтдән ајрылын онлары бир анда битирим”. О заман Муса вә Һарун Јеһоваја јалвардылар ки, халгы мәһв етмәсин. Јеһова онларын хаһишләрини динләди. О ки, галды Кораһа вә онун тәрәфдарларына, “Рәббин јанындан атәш чыхды вә бухур тәгдим едән ики јүз әлли кишини јијиб битирди” (Сајлар 16:19-22, 35)c.
14. Јеһова “Исраил оғулларынын бүтүн ҹәмијјәтинә” гаршы нәјә ҝөрә сәрт өлчүләр тәтбиг етди?
14 Гәрибәдир: Јеһованын гијамчыларла давранышыны ҝөрән исраиллиләр, бундан һеч бир ибрәт дәрси ҝөтүрмәдиләр. “Ертәси ҝүн Исраил оғулларынын бүтүн ҹәмијјәти Мусаја гаршы вә Һаруна гаршы сөјләниб дедиләр: Рәббин халгыны сиз өлдүрдүнүз”. Исраиллиләр гијамчыларын тәрәфини сахладылар! Јеһованын сәбри түкәнди. Инди артыг һеч ким, һәтта Муса вә Һарун да, халга рәһм етмәсини Ондан хаһиш едә билмәди. Јеһова итаәтсизләрин үзәринә хәстәлик ҝөндәрди вә “Кораһ мәсәләсиндә өләнләрдән башга вәбадан өләнләр он дөрд мин једди јүз адам иди” (Сајлар 16:41-49).
15. а) Исраиллиләр һансы сәбәбдән тәрәддүд етмәдән Мусанын вә Һарунун рәһбәрлијинә риајәт етмәли идиләр? б) Баш верән бу һадисәдән Јеһова һаггында нә өјрәнирсиниз?
15 Әҝәр бу адамларын һамысы бир аз дүшүнсәјдиләр, өлмәздиләр. Онлар өзләринә белә суаллар верә биләрдиләр: Һәјатыны тәһлүкә алтына атараг фир’онун гаршысында дуран ким олмушду? Исраиллиләрин азад олунмасыны тәләб едән ким иди? Исраиллиләр әсарәтдән азад олундугдан сонра, Аллаһын мәләји илә үз-үзә сөһбәт етмәк үчүн Һореб дағына чыхмаг јалныз кимә тапшырылмышды? Мусанын вә Һарунун ҝөрдүкләри ишләр, шүбһәсиз олараг, онларын Јеһоваја сәдагәтләринә вә халга мәһәббәтләринә шәһадәт едирди (Чыхыш 10:28; 19:24; 24:12-15). Гијамчылары һәлак етмәк Јеһованын хошуна ҝәлмирди. Амма мә’лум оланда ки, халг өз гијамында инад ҝөстәрир, Јеһова һәлледиҹи өлчүләр тәтбиг етди (Һезекиел 33:11). Бунларын һамысы бизим үчүн бөјүк мә’на кәсб едир. Нәјә ҝөрә?
Бу ҝүн канал тимсалында ким хидмәт едир?
16. а) Биринҹи әсрдә јашајан јәһудиләр нәјин әсасында әмин олмалы идиләр ки, Иса Јеһованын нүмајәндәсидир? б) Јеһова левили каһинләри нәјә ҝөрә вә кимләрлә әвәз етди?
16 Бу ҝүн јер үзүндә јени бир “халг” вар вә онун ҝөзәҝөрүнмәз Һакими, Ганунвериҹиси вә Падшаһы Јеһовадыр (Матта 21:43). Бу “халг” б. е. биринҹи әсриндә јаранмышдыр. Һәмин вахт үчүн Мусанын дөврүндә мөвҹуд олан сәјјар мә’бәди, Јерусәлимдәки ҝөзәл мә’бәд әвәз етди. Бу мә’бәддә әввәлки кими мүгәддәс хидмәти левилиләр иҹра едирдиләр (Лука 1:5, 8, 9). Лакин ерамызын 29-ҹу илиндә јени руһани мә’бәд јаранды. Бу мә’бәддә исә баш каһин вәзифәсини Иса Мәсиһ иҹра едирди (Ибраниләрә 9:9, 11). Аллаһын тә’јин етдији һакимијјәт барәсиндә јенидән суал галхды. Јеһова бу јени “халгы” кимин васитәсилә идарә едәҹәк? Иса, Јеһоваја һәдсиз сәдагәтли олдуғуну ҝөстәрди. О, инсанлары севирди. Бундан әлавә, чохлу бөјүк әламәтләр ҝөстәрирди. Лакин левилиләрин әксәријјәти гәддар әҹдадлары кими давранараг, Исаны гәбул етмәкдән бојун гачырдылар (Матта 26:63-68; Һәвариләрин ишләри 4:5, 6, 18; 5:17). Нәтиҹәдә Јеһова левили каһинләри тамамилә башгалары илә — Падшаһын каһин тајфасы илә әвәз етди. Падшаһын бу каһин тајфасы бу ҝүнә гәдәр мөвҹуддур.
17. а) Бу ҝүн Падшаһын каһин тајфасы кимләрдән ибарәтдир? б) Јеһова һәмин каһин тајфасыны неҹә истифадә едир?
17 Падшаһын каһин тајфасы бу ҝүн кимләрдән ибарәтдир? Һәвари Петер, Аллаһдан илһам алмыш биринҹи мәктубунда бу суала ҹаваб верир. Мәсиһин бәдәнинин мәсһ едилмиш үзвләринә бунлары јазыр: “Сиз исә, сечилмиш нәсил, Падшаһын каһин тајфасы, мүгәддәс милләт, Аллаһа мәхсус халгсыныз ки, сизи гаранлыгдан Өз валеһедиҹи нуруна Чағыранын фәзиләтләрини е’лан едәсиниз” (1 Петер 2:9, И–93). Бу сөзләрдән ајдын олур ки, Петерин һәмчинин “мүгәддәс милләт” адландырдығы “Падшаһын каһин тајфасы”, Исанын изләри илә ҝедән мәсһ едилмиш мәсиһчиләрдән ибарәтдир. Бу груп, Јеһованын өз халгына тә’лимат вә руһани рәһбәрлик вермәк үчүн истифадә етдији канал кими хидмәт едир (Матта 24:45-47).
18. Тә’јин олунмуш ағсаггалларла Падшаһын каһин тајфасы арасында һансы әлагә вар?
18 Падшаһын каһин тајфасынын нүмајәндәләри, бүтүн јер үзүндә Јеһованын халгынын јығынҹагларына тә’јин олунмуш, ҹавабдеһлик дашыјан ағсаггаллардыр. Мәсһ едилмиш олуб-олмамаларындан асылы олмајараг, бу гардашларын һамысы бизим һөрмәтимизә вә сәмими јардымымыза лајигдирләр. Нәјә ҝөрә? Она ҝөрә ки, һеч ким јох, јалныз Јеһованын өзү мүгәддәс руһу илә онлары ағсаггаллар тә’јин едир вә онлара бу вә ја диҝәр вәзифәләр е’тибар едир (Ибраниләрә 13:7, 17). Бу тә’јинат неҹә һәјата кечирилир?
19. Нәјә ҝөрә демәк олар ки, ағсаггаллар мүгәддәс руһла тә’јин олунурлар?
19 Бу ағсаггаллар, Аллаһын руһунун тә’сири алтында Аллаһын Кәламында јазылан тәләбләрә мүвафигдирләр (1 Тимотејә 3:1-7; Титуса 1:5-9). Белә исә, демәк олар ки, онлар мүгәддәс руһла тә’јин олунублар (Һәвариләрин ишләри 20:28). Ағсаггаллар Аллаһын Кәламыны чох јахшы билмәлидирләр. Бундан әлавә, онлары тә’јин едән Али Һакими тәглид едәрәк, онлар мәһкәмәдә ҹүз’и дә олса тәрәфкешлији хатырладан һәр шејә нифрәт етмәлидирләр (Тәснијә 10:17, 18).
20. Зәһмәткеш ағсаггалларда сиз нәји гијмәтләндирирсиниз?
20 Онларын һакимијјәтини суал алтына гојмаг әвәзинә, биз зәһмәткеш ағсаггалларымызы лајигинҹә гијмәтләндиририк! Онилликләр боју етдикләри садиг хидмәтләри, биздә онлара гаршы е’тибар һисси ојадыр. Онлар јығынҹаг ҝөрүшләринә виҹданла һазырлашыр вә бу ҝөрүшләри кечирирләр, хош хәбәрин тәблиғиндә бизимлә чијин-чијинә чалышырлар вә еһтијаҹ дујдуғумуз заман бизә Мүгәддәс Китабдан мәсләһәтләр верирләр (Матта 24:14; Ибраниләрә 10:23, 25; 1 Петер 5:2). Хәстәләнәндә бизә баш чәкир, кәдәрли оланда исә бизә тәсәлли верирләр. Онлар сәдагәтлә вә тәмәннасыз олараг Падшаһлығын марагларыны мүдафиә едирләр. Јеһованын руһу онларын үзәриндәдир вә Јеһова онлары бәјәнир (Галатијалылара 5:22, 23).
21. Ағсаггаллар нәји јадда сахламалыдырлар вә нәјә ҝөрә?
21 Бәли, ағсаггаллар камил дејилләр. Имканларынын мәһдуд олдуғуну јадда сахлајараг, онлар сүрүнүн — “Аллаһын мирасынын” (ЈД) үзәриндә ағалыг етмәјә чалышмырлар. Әксинә, гардашларынын “севинмәләри үчүн” чалышырлар (1 Петер 5:3; 2 Коринфлиләрә 1:24). Һәлим олан зәһмәткеш ағсаггаллар Јеһованы севир вә билирләр ки, Ону нә гәдәр дәгиг тәглид етмәјә чалышарларса, јығынҹаға даһа чох фајда ҝәтирәрләр. Буну јадда сахлајараг, мәһәббәт, мәрһәмәт вә сәбир кими Аллаһа мәгбул кејфијјәтләри һәмишә инкишаф етдирмәјә сә’ј ҝөстәрирләр.
22. Кораһ һаггындакы мә’лумат Јеһованын ҝөрүнән тәшкилатына олан иманынызы неҹә мөһкәмләндирди?
22 Биз неҹә дә шадыг ки, Јеһова ҝөзәҝөрүнмәз Һөкмдарымыз, Иса Мәсиһ Баш Каһинимиз, Падшаһын каһин тајфасынын мәсһ едилмиш үзвләри мүәллимләримиз, садиг мәсиһчи ағсаггаллары исә мәсләһәтчиләримиздир! Инсанлар тәрәфиндән идарә олунан һеч бир тәшкилат мүкәммәл ола билмәсә дә, биз, Аллаһын тә’јин етдији һакимијјәтә севинҹлә табе олан садиг һәмиманлыларымызла Аллаһа хидмәт етмәјә шадыг!
[Һашијәләр]
a Һарунун башга ики оғлу Елеазар вә Итамар, Јеһоваја хидмәтләриндә нүмунәви идиләр (Левилиләр 10:6).
b Кораһын әлалтылары олан Датан вә Абирам Рубен гәбиләсиндән идиләр. Буна ҝөрә дә, еһтимал ки, онлар каһинлијә ҹан атмырдылар. Онлар Мусанын рәһбәрлик етмәсиндән вә үмид етмәләринә бахмајараг исраиллиләрин һәлә дә Вә’д едилән дијара дахил олмадыглары үчүн наразы идиләр (Сајлар 16:12-14).
c Гәбилә башчыларынын ҝүнләриндә һәр бир аиләнин башчысы Аллаһ гаршысында арвадыны вә ушагларыны тәмсил едир вә һәтта онлар үчүн гурбанлар ҝәтирирди (Тәквин 8:20; 46:1; Ејуб 1:5). Ганун гүввәјә миндикдән сонра исә, Јеһова бујурду ки, халг үчүн гурбанлары каһинләр — Һарунун аиләсиндән олан кишиләр ҝәтирсинләр. Ҝөрүндүјү кими, 250 гијамчы бу дәјишиклијә мүвафиг давранмаға һазыр дејилдиләр.
Нә өјрәндиниз?
• Јеһова исраиллиләрин гајғысына мәһәббәтлә неҹә галырды?
• Кораһын Мусаја вә Һаруна гаршы гијамына нәјә ҝөрә бәраәт газандырмаг олмазды?
• Јеһованын гијамчыларла давранышындан һансы ибрәт дәрсини алырыг?
• Јеһованын тә’јин етдији гурулуша һөрмәт етдијимизи бу ҝүн неҹә ҝөстәрә биләрик?
[23-ҹү сәһифәдәки шәкил]
Јеһоваја хидмәтдә һәр бир тапшырығы шәрәфли сајырсынызмы?
[24-ҹү сәһифәдәки шәкил]
“Нә үчүн Рәббин ҹәмијјәти үзәринә өзүнүзү јүксәлдирсиниз?”
[26-ҹы сәһифәдәки шәкил]
Тә’јин олунмуш ағсаггаллар, Падшаһын каһин тајфасынын нүмајәндәләри кими хидмәт едирләр.