Јеһова сәни таныјырмы?
«Јеһова Она мәхсус оланлары таныјыр» (2 ТИМ. 2:19).
1, 2. а) Иса үчүн ваҹиб олан нә иди? б) Биз һансы суалларын үзәриндә дүшүнмәлијик?
ҜҮНЛӘРИН БИР ҜҮНҮ фәрисејләр Исаја јахынлашыб ондан сорушдулар: «Мүәллим, Ганунда ән бөјүк әмр һансыдыр?» Иса онларын суалына белә ҹаваб верди: «Аллаһын Јеһованы бүтүн үрәјинлә, бүтүн ҹанынла вә бүтүн ағлынла сев» (Мат. 22:35—37). Иса сәмави Атасына бөјүк мәһәббәт бәсләјирди вә һәгигәтән дә, бу сөзләрә ујғун јашајырды. Иса үчүн Јеһованын онун барәсиндә нә фикирләшдији ваҹиб иди. Бу, онун сүрдүјү һәјат тәрзиндән вә садиг галмасындан ачыг-ајдын ҝөрүнүрдү. Буна ҝөрә дә өлүмүндән бир гәдәр өнҹә о деди ки, Аллаһ ону әмрләринә сәдагәтлә итаәт едән бир инсан кими таныјыр. Бу сәбәбдән Иса Аллаһын мәһәббәтиндә галды (Јәһ. 15:10).
2 Бу ҝүн бир чох инсанлар Аллаһы севдијини дејирләр. Шүбһәсиз ки, биз дә бу инсанларын сијаһысындајыг. Бунунла белә, өзүмүзә бәзи ваҹиб суаллары вермәлијик: «Аллаһ мәни таныјыр? Онун ҝөзүндә мән неҹә инсанам? Мән Она мәхсус олан бир инсан кими ад газанмышаммы?» (2 Тим. 2:19). Каинатын Јараданы илә бу ҹүр сых мүнасибәтдә олмаг шәрәфинә малик олдуғумузу билмәк неҹә дә ҝөзәлдир!
3. Нәјә ҝөрә бәзиләри үчүн Јеһоваја мәхсус олдугларына инанмаг чәтиндир? Онлара бу дүшүнҹә тәрзини дәјишмәјә нә көмәк едәҹәк?
3 Лакин Јеһованы севән бәзи инсанлар үчүн Аллаһын онлар барәдә мүсбәт фикирдә олдуғуна инанмаг чәтиндир. Онлар өзләрини дәјәрсиз һесаб етдикләриндән дүшүнүрләр ки, Јеһоваја мәхсус ола билмәзләр. Амма нә јахшы ки, Јеһова бизим барәмиздә белә фикирләшмир! (1 Шам. 16:7). Һәвари Павел һәмиманлыларына демишди: «Ким Аллаһы севирсә, Аллаһ ону таныјыр» (1 Кор. 8:3). Әҝәр Аллаһын бизи танымасыны истәјириксә, Ону севмәк олдугҹа ваҹибдир. Нөвбәти суалларын үзәриндә дүшүн: «Нәјә ҝөрә сән бу журналы охујурсан? Јеһоваја бүтүн үрәјинлә, бүтүн ҹанынла, бүтүн ағлынла вә бүтүн гүввәтинлә хидмәт етмәјә нәјә ҝөрә ҹан атырсан? Әҝәр өзүнү Јеһоваја һәср едиб вәфтиз олунмусанса, бу аддымлары атмаға сәни нә тәшвиг едиб?» Мүгәддәс Китабда дејилир ки, үрәкләри арашдыран Јеһова Она мәгбул олан кәсләри өзүнә ҹәлб едир. (Һаггај 2:7; Јәһја 6:44 ајәләрини оху.) Буна ҝөрә дә әмин ол ки, Јеһова сәни ҹәлб етдији үчүн Она хидмәт едирсән. Јеһова һеч вахт Өзүнә ҹәлб етдији инсанлары тәрк етмир, лакин бир шәртлә — ҝәрәк һәмин инсанлар Она садиг галсынлар. Онлар Аллаһ үчүн чох дәјәрлидирләр вә Јеһова онлары үрәкдән севир (Мәз. 94:14).
4. Нәјә ҝөрә биз Јеһова илә мүнасибәтләримизин бу гәдәр дәјәрли олдуғуну һеч вахт унутмамалыјыг?
4 Әҝәр Јеһова бизи Өзүнә ҹәлб едибсә, Онун мәһәббәтиндә галмаг үчүн әлимиздән ҝәләни әсирҝәмәмәлијик. (Јәһуда 20, 21 ајәләрини оху.) Мүгәддәс Китабда Аллаһдан тәдриҹән вә һәтта билә-билә, јәни өз истәјилә узаглашмаг тәһлүкәсинин олдуғу ҝөстәрилир. Биз бу барәдә һеч вахт унутмамалыјыг (Ибр. 2:1; 3:12, 13). Мисал үчүн, һәвари Павел 2 Тимотејә 2:19 ајәсиндәки сөзләри јазмаздан өнҹә Һименејин вә Филитин адыны чәкди. Бу ики нәфәр вахтилә Јеһоваја мәхсус иди, лакин сонрадан һәгигәтдән узаглашдылар (2 Тим. 2:16—18). Галатија јығынҹағында да вахтилә Аллаһ тәрәфиндән танынан, лакин Онун руһани нурунда өзләрини сахлаја билмәјән инсанлар вар иди (Галат. 4:9). Ҝәлин һеч вахт Аллаһ гаршысында малик олдуғумуз ада бармагарасы бахмајаг.
5. а) Аллаһын дәјәр вердији бәзи хүсусијјәтләр һансылардыр? б) Биз һансы нүмунәләри арашдыраҹағыг?
5 Елә хүсусијјәтләр вар ки, Јеһова онлара хүсуси дәјәр верир (Мәз. 15:1—5; 1 Пет. 3:4). Бу хүсусијјәтләрдән икиси иман вә тәвазөкарлыгдыр. Бунлар Аллаһ тәрәфиндән танынан инсанларын фәргләндириҹи ҹәһәтләри олмушдур. Ҝәлин бу хүсусијјәтләри тәзаһүр етдирмәләри сајәсиндә Јеһованын ҝөзүндә уҹалан ики инсанын нүмунәсинә нәзәр салаг. Һәмчинин биз Аллаһ тәрәфиндән танындығыны дүшүнән, лакин сонрадан тәкәббүрлү олдуғу үчүн Јеһованын рәдд етдији бир шәхсин дә нүмунәсинә бахаҹағыг. Биз бу нүмунәләрдән өзүмүз үчүн ибрәт дәрси ҝөтүрә биләрик.
Иман ҝәтирәнләрин атасы
6. а) Ибраһим Јеһованын вәдләринә иман етдијини неҹә ҝөстәрди? б) Јеһова Ибраһими һансы мәнада таныјырды?
6 Ибраһим Јеһоваја иман едирди. Мүгәддәс Китабда о һәтта «иман ҝәтирәнләрин атасы» адланыр (Јар. 15:6; Ром. 4:11). Иманы сајәсиндә Ибраһим ев-ешијини, дост-танышларыны вә мал-мүлкүнү атыб узаг бир дијара јолланды (Јар. 12:1—4; Ибр. 11:8—10). Ибраһимин иманы узун илләр сонра да мөһкәм галмышды. Бу, нәдән бәллидир? О, Јеһованын әмрләринә табе олараг «оғлуну гурбан ҝәтирмәјә һазыр иди» (Ибр. 11:17—19). Ибраһим Јеһованын вәдләринә иман етдијини ҝөстәрирди. Буна ҝөрә дә Јеһова она хүсуси ҝөзлә бахырды вә ону, һәгигәтән дә, таныјырды. (Јарадылыш 18:19 ајәсини оху.) Бу, садәҹә олараг Јеһованын Ибраһимин мөвҹуд олмасыны билмәси демәк дејилди, Ибраһим Јеһоваја бир дост кими әзиз иди (Јаг. 2:22, 23).
7. Ибраһим Аллаһын вәдләринин һәјата кечәҹәјинә нә дәрәҹәдә әмин иди вә о, буну неҹә ҝөстәрди?
7 Ибраһим јашадығы мүддәтдә Јеһованын она вәд етдији торпағы алмады. Һәмчинин нәслинин «дәниз кәнарындакы гум гәдәр» артыб чохалдығыны да ҝөрмәди (Јар. 22:17, 18). Бу вәдләрин јалныз Ибраһимин өлүмүндән сонра јеринә јетмәсинә бахмајараг, онун Јеһоваја олан иманы сарсылмады. О әмин иди ки, әҝәр Аллаһ сөз верибсә, артыг ону һәјата кечмиш һесаб етмәк олар. Бәли, Ибраһим өз һәјатыны буна ујғун олараг јашады. (Ибраниләрә 11:13 ајәсини оху.) Јеһова бизи дә бу ҹүр имана малик олан бир инсан кими таныјырмы?
Јеһованы ҝөзләмәклә Она иман етдијини ҝөстәр
8. Бәзиләри һансы арзуларынын јеринә јетмәсинин һәсрәтиндәдирләр?
8 Ола билсин, үрәјимиздә елә бир арзу вар ки, онун һәјата кечмәсини һәсрәтлә ҝөзләјирик. Бу, аилә гурмаг, дүнјаја өвлад ҝәтирмәк вә ја сағлам олмаг истәји ола биләр. Бу арзуларын һамысы тәбии вә нормалдыр. Лакин чохларымызын арзусу һәлә дә үрәјимиздә гала биләр. Әҝәр бизим барәмиздә дә белә демәк оларса, бу вәзијјәтләрдә өзүмүзү неҹә апармағымыз иманымызын нә дәрәҹәдә ҝүҹлү олдуғундан хәбәр верир.
9, 10. а) Бәзиләри өз истәдикләринә неҹә наил олурлар? б) Јеһованын вәдләринин јеринә јетмәси барәдә нә фикирләширсән?
9 Арзумузу ҝерчәкләшдирмәк үчүн Јеһованын рәһбәрлијинә зидд давранмаг неҹә дә бөјүк ағылсызлыг оларды. Бу, Јеһова илә мүнасибәтләринизә зәрәр вура биләр. Мисал үчүн, бәзиләри Јеһованын принсипләринә зидд олан мүалиҹә үсулларыны сечмишләр. Диҝәрләри аиләләринә вахт ајырмаға вә ја јығынҹаг ҝөрүшләриндә иштирак етмәләринә мане олан ишә дүзәлмишләр. Башгалары исә Јеһоваја хидмәт етмәјән инсанла романтик мүнасибәтләр гурмушлар. Мәсиһчи белә һәрәкәтләрә јол верирсә, демәк олармы ки, о, һәгигәтән дә, Јеһованын ону танымасыны истәјир? Әҝәр Ибраһим Аллаһын вәдләринин јеринә јетмәсини сәбирлә ҝөзләмәк әвәзинә, иши өз әлинә алараг јенидән өзүнә шәраит гурмаға, ад-сан газанмаға башласајды, бу, Јеһоваја неҹә тәсир ҝөстәрәрди? (Јарадылыш 11:4 ајәси илә мүгајисә ет.) Јеһова она рәғбәт бәсләмәјә давам едәрдими?
10 Бәс сән һансы арзуларынын јеринә јетмәсини һәсрәтлә ҝөзләјирсән? Јахшы арзуларыны ҝерчәкләшдирмәјә сөз верән Јеһованы ҝөзләмәк үчүн иманын кифајәт гәдәр мөһкәмдирми? (Мәз. 145:16). Ибраһимин һадисәсиндә олдуғу кими, ола билсин, Јеһованын бәзи вәдләри истәдијимиз вахтда јеринә јетмәсин. Лакин бизим Ибраһим кими мөһкәм имана јијәләнмәјимизи вә она әсасән давранмағымызы Јеһова јүксәк гијмәтләндирир. Әмин ола биләрик ки, О, бизи мүкафатландыраҹаг (Ибр. 11:6).
Тәвазөкарлыг вә тәкәббүр
11. Гораһ һансы һадисәләрин ҹанлы шаһиди олуб вә онун һансы мәсулијјәтләри вар иди? Бу, онун Јеһова илә мүнасибәтләри барәдә нәји ҝөстәрирди?
11 Муса илә Гораһ Јеһованын гурулушуна вә гәрарларына һөрмәт етмәк мәсәләсиндә бир-бириндән олдугҹа фәргләнирдиләр. Онларын давранышы Јеһова гаршысында малик олдуглары ада бөјүк тәсир ҝөстәрди. Гораһ Гоһат нәслиндән олан левили иди вә о, бир чох тарихи һадисәләрин шаһиди вә иштиракчысы олмушду, һәмчинин онун мәсулијјәтләри дә аз дејилди. Гораһ өз ҝөзләри илә Аллаһын халгынын Гырмызы дәниздән кечмәсини ҝөрүб, Сина дағында Јеһованын итаәтсиз исраиллиләрә гаршы ҝөрдүјү тәдбири дәстәкләјиб. Үстәлик, о, Әһд сандығынын дашынмасында көмәк едирди (Чых. 32:26—29; Сај. 3:30, 31). Гораһ узун мүддәт Јеһоваја садиг галмышды вә бир чох исраиллиләрин һөрмәтини газанмышды.
12. Тәкәббүр Гораһын Аллаһ гаршысында малик олдуғу ада неҹә тәсир ҝөстәрди? 28-ҹи сәһифәдәки шәклә бах.
12 Лакин Исраил халгы Вәд едилмиш дијара јолланаркән Гораһ Аллаһын гурулушунда проблем олдуғуну дүшүндү. Она гошулан 250 нәфәр иҹма башчысы илә бирҝә Гораһ дәјишикликләр етмәк фикринә ҝәлди. Онлар Аллаһ гаршысында малик олдуглары ада архајын идиләр. Бу адамлар Мусаја дедиләр: «Артыг бәсдир! Чүнки бүтүн иҹманын һамысы мүгәддәсдир вә Рәбб онларын арасындадыр» (Сај. 16:1—3). Онлар өзләриндән неҹә дә разы идиләр! Муса онлара деди: «Рәбб кимин Она мәхсус... олдуғуну ҝөстәрәҹәк». (Сајлар 16:5 ајәсини оху.) Нөвбәти ҝүнүн сонунда Гораһ вә бу үсјанда онун тәрәфини тутанларын һеч бири артыг һәјатда јох иди (Сај. 16:31—35).
13, 14. Муса тәвазөкар олдуғуну неҹә ҝөстәрди?
13 Онлардан фәргли олараг, «Муса јер үзүндә јашајан бүтүн адамлардан даһа итаәткар бир инсан иди» (Сај. 12:3). Муса һәлим вә тәвазөкар олдуғуну Јеһованын рәһбәрлијинә риајәт етмәјә гәти гәрарлы олмагла ҝөстәрди (Чых. 7:6; 40:16). Мүгәддәс Китабын һеч бир јериндә дејилмир ки, о, Јеһованын ҝөстәришләрини тез-тез шүбһә алтына алыр вә ја Онун әмрләринә гаршы наразычылығыны билдирирди. Мисал үчүн, Јеһова мүгәддәс мәскәнин гурулушуна даир ән хырда деталларынадәк — пәрдәләрин дүзәлдилмәсиндә истифадә олунаҹаг сапын рәнҝи вә илҝәкләрин сајынадәк конкрет ҝөстәришләр вермишди (Чых. 26:1—6). Әҝәр Аллаһын тәшкилатында һансыса бир нәзарәтчи бир ишлә бағлы хырдалығынадәк сәнә ҝөстәришләр верирсә, ола билсин, бу, сәни руһдан салсын. Лакин Јеһова хидмәтчиләринә чохлу тапшырыглар верән вә онлара ҝүвәнән камил нәзарәтчидир. О, бир ишлә бағлы чохсајлы ҝөстәришләр верирсә, демәли, Онун буна әсаслы сәбәбләри вар. Муса Јеһовадан мүгәддәс мәскәнин тикинтиси илә әлагәдар чохлу ҝөстәриш аланда дејинмирди. О дүшүнмүрдү ки, бунунла Јеһова ону алчалдыр, азадлығыны мәһдудлашдырыр вә ја јарадыҹылыг габилијјәтини ҝөстәрмәјә имкан вермир. Әксинә, Муса мүгәддәс мәскәни дүзәлдәнләрә тапшырды ки, һәр шеји Јеһованын ҝөстәришинә ујғун етсинләр (Чых. 39:32). О неҹә дә тәвазөкар иди! Муса дәрк едирди ки, бу, Јеһованын ишидир вә о, Јеһованын әлиндә садәҹә бир аләтдир.
14 Мусанын тәвазөкарлығыны һәјатында баш вермиш хошаҝәлмәз бир һадисәдән дә ҝөрмәк олар. Бир дәфә Муса халгын дејинҝәнлијиндән тәнҝә ҝәләрәк өзүндән чыхды вә Аллаһы иззәтләндирмәди. Нәтиҹәдә, Јеһова Мусаја деди ки, о, халгы Вәд едилмиш дијара кечиртмәјәҹәк (Сај. 20:2—12). Муса вә онун гардашы Һарун исраиллиләрин дејинҝәнлијинә узун илләр дөздүләр. Лакин Муса бирҹә дәфә сәһвә јол вермәси уҹбатындан илләр боју һәсрәтини чәкдији дијара дахил олмады. Бәс Јеһованын гәрары она неҹә тәсир ҝөстәрди? Тәбии ки, о мәјус олду, лакин тәвазөкарлыгла буна бојун әјди. О, Јеһованын салеһ вә әдаләтли Аллаһ олдуғуна билирди (Ганун. т. 3:25—27; 32:4). Мәҝәр Мусаја баханда Јеһованын ону таныдығына кимдәсә шүбһә јарана биләр? (Чыхыш 33:12, 13 ајәләрини оху.)
Јеһоваја табе олмаг үчүн тәвазөкарлыг ваҹибдир
15. Гораһын тәкәббүр вә үсјанкарлыг нүмунәсиндән нә өјрәнирик?
15 Үмумдүнја мәсиһчи јығынҹағында едилән дәјишикликләрә вә мәсул гардашларын гәрарларына ҝөстәрдијимиз мүнасибәт Јеһованын бизим һаггымызда нә дүшүндүјүнә тәсир едир. Гораһ вә онун тәрәфдарлары өзләриндән һәддән артыг разы, тәкәббүрлү вә иманлары зәиф олан инсанлар иди. Онларын Аллаһдан узаглашмаларына сәбәб дә мәһз бу олду. Гораһ дүшүнүрдү ки, бүтүн гәрарлары верән јаша долмуш Мусадыр, анҹаг о унутмушду ки, әслиндә халга рәһбәрлик едән Јеһовадыр. Гораһ буну нәзәрдән гачырдығы үчүн Аллаһын сечилмишләринә хор бахмаға башлады. Әҝәр о, мүдрик давраныб Јеһованы ҝөзләсәјди, Јеһова она нәјә ҝөрә мүәјјән тәрздә һәрәкәт етдијини баша дүшмәјә көмәк едәрди вә еһтијаҹ јаранардыса, Өзү дәјишиклик едәрди. Гораһын тәкәббүр вә үсјанкарлығы уҹбатындан илләр боју Јеһоваја етдији хидмәт боша чыхды.
16. Әҝәр биз Муса кими тәвазөкар олсаг, Аллаһ бизи неҹә инсан кими таныјаҹаг?
16 Инди мүзакирә етдијимиз һадисә ағсаггаллар, еләҹә дә диҝәр мәсиһчиләр үчүн чох ҹидди бир хәбәрдарлыгдыр. Јеһованы ҝөзләмәк вә тәјин олунмуш мәсул гардашларын ҝөстәришләринә әмәл етмәк үчүн тәвазөкар олмаг ҝәрәкдир. Биз, Муса кими, һәлим вә тәвазөкар олдуғумузу ҝөстәририкми? Арамыздакы мәсул гардашларын сәлаһијјәтләрини гәбул едир вә онларын ҝөстәришләринә табе олуругму? Һансыса сәбәбдән мәјус оланда өз һиссләримизлә баҹара билирикми? Әҝәр бүтүн бу суаллара вердијимиз ҹаваб мүсбәтдирсә, демәли, Јеһова биздән разыдыр. Тәвазөкар вә итаәткар олмағымыз бизи Јеһованын ҝөзүндә даһа да уҹалдаҹаг.
Јеһова она мәхсус оланлары таныјыр
17, 18. Бундан сонра да Јеһова бизи Она мәхсус олан инсан кими танысын дејә нә етмәлијик?
17 Јеһованын Өзүнә ҹәлб етдији вә Онун ҝөзүндә јахшы ад газанмыш инсанларын нүмунәси үзәриндә дүшүнмәк фајдалыдыр. Ибраһим вә Муса, елә бизим кими, гејри-камил идиләр вә онларын мүәјјән гүсурлары вар иди. Бунунла белә, Јеһова онлары Өзүнә мәхсус олан инсанлар кими таныјырды. Гораһын нүмунәси исә ҝөстәрди ки, Јеһовадан узаглашыб Онун рәғбәтини итирмәкдән һеч кәс сығорталанмајыб. Буна ҝөрә дә һәр биримиз өзүмүзә нөвбәти суаллары вермәлијик: «Мән Јеһованын ҝөзүндә неҹә инсанам? Бу Мүгәддәс Китаб нүмунәләриндән шәхсән мән өзүм үчүн һансы ибрәт дәрси ҝөтүрдүм?»
18 Јеһова Она садиг галан хидмәтчиләрини Өзүнә мәхсус олан инсанлар кими таныјыр. Бу фикир бизә бөјүк тәскинлик верә биләр. Инсаны Јеһованын ҝөзүндә уҹалдан иман, тәвазөкарлыг вә бу кими диҝәр хүсусијјәтләр үзәриндә ишләмәјә давам ет. Јеһованын бизи танымасы, доғрудан да, бөјүк шәрәфдир. Онун рәғбәтини газанан инсанлар инди хошбәхт һәјат сүрүрләр, ҝәләҹәкдә исә онлары сонсуз хејир-дуалар ҝөзләјир (Мәз. 37:18).
Јадыныздадырмы?
• Јеһованын бизи танымасы нә демәкдир?
• Сән Ибраһимин иманыны неҹә тәглид едә биләрсән?
• Гораһла Мусанын нүмунәсиндән нә өјрәнирик?
[26-ҹы сәһифәдәки шәкил]
Ибраһим кими, биз Јеһованын бүтүн вәдләрини јеринә јетирәҹәјинә иман едирикми?
[28-ҹи сәһифәдәки шәкил]
Гораһ тәвазөкар дејилди вә рәһбәрлијә табе олмурду
[29-ҹу сәһифәдәки шәкил]
Јеһова сәни ҝөстәришләрә тәвазөкарҹасына табе олан бир инсан кими таныјырмы?