Јеговаја мәгбул һәмд гурбанлары
“Бәдәнләринизи дири, мүгәддәс, Аллаһа мәгбул гурбан кими тәгдим един” (РОМАЛЫЛАРА 12:1).
1. Мүгәддәс Китаб, Мусанын ганунуна әсасән ҝәтирилмәси тәләб олунан гурбанларын дәјәринә даир нә дејир?
“МҮГӘДДӘС Ганун, ҝәләҹәк не’мәтләрин әсл сурәтиндә дејил, көлҝәсинә малик олараг, илдән-илә, мүнтәзәм шәкилдә тәгдим етдикләри ејни гурбанлар васитәсилә Аллаһа јахынлашанлары әсла камала чатдыра билмәз” (Ибраниләрә 10:1). Бу сөзләрлә һәвари Павел ҹәсарәтлә бәјан едир ки, Мусанын ганунуна әсасән ҝәтирилмәси тәләб олунан гурбанлар, инсанларын хиласы нөгтеји-нәзәриндән узун мүддәтли дәјәрә малик дејилдиләр (Колослулара 2:16, 17).
2. Ганунда олан совгатлар вә гурбанлар һаггындакы әтрафлы мә’луматы анламаг үчүн ҝөстәрилән ҹәһд нәјә ҝөрә әбәс дејил?
2 Бу, Төвратда совгатлар вә гурбанлар һаггында олан мә’луматын мүасир мәсиһчиләр үчүн һеч бир дәјәринин олмадығынымы билдирир? Бир ил әрзиндә бүтүн дүнјада Јегованын Шаһидләринин јығынҹагларында Теократик хидмәти Мәктәбинә јазыланлар, Мүгәддәс Китабын илк беш китабыны охујурдулар. Бу китаблары охумаг вә һәр шеји анламаг кимләрә исә асан олмады. Онларын ҹәһдләри һәдәрми олду? Әлбәттә јох, чүнки “бундан әввәл јазыланларын һамысы бизә тә’лим олараг јазылды ки, тәһәммүл вә Мүгәддәс Јазыларын тәсәллиси илә үмидимиз олсун” (Ромалылара 15:4). Онда суал јараныр: Ганунда совгатлар вә гурбанлар барәдә дејиләнләрдән биз һансы “тә’лими” вә “тәсәллини” ала биләрик?
Тә’лим вә тәсәллимиз үчүн
3. Бизим һансы мүһүм еһтијаҹымыз вар?
3 Биздән, Ганунда ҝөстәрилдији кими һәгиги гурбанлар тәгдим етмәк тәләб олунмадығына бахмајараг, ҝүнаһларын бағышланмасына вә Аллаһын илтифатына, јә’ни гурбанларын мүәјјән дәрәҹәдә исраиллиләрә вердији шејләрә биз дә еһтијаҹ һисси дујуруг. Ахы биз һәгиги гурбанлар тәгдим етмириксә, бәс онда бунлары неҹә ала биләрик? Гурбанлардан алынан фајданын мәһдуд олдуғуну ҝөстәрәрәк, Павел јазырды: “Мәсиһ, дүнјаја ҝирәндә дејир: “Гурбан вә совгат истәмәдин, амма Мәнә бәдән һазырладын. Бүтөв шәкилдә јахылан һејванлара вә ҝүнаһ үчүн ҝәтирилән гурбанлара Сән разы олмадын. О заман Мән дедим: Будур, Мән ҝәлдим ки, еј Аллаһ, Сәнин ирадәни јеринә јетирим. Китабын тумарында Мәним барәмдә белә јазылмышдыр”” (Ибраниләрә 10:5—7).
4. Павел, Мәзмур 40:6—8 ајәләрини Иса Мәсиһә неҹә тәтбиг едир?
4 Павел, Мәзмур 40:6—8 ајәләриндән ситат ҝәтирәрәк ҝөстәрир ки, Иса, “гурбанлары вә совгатлары”, “бүтөв шәкилдә јахылан һејванлары вә ҝүнаһ үчүн ҝәтирилән гурбанлары” әбәдиләшдирмәјә ҝәлмәмишдир; Павел ибраниләрә мәктубуну јаздығы заман, бүтүн бу гурбанлар артыг Аллаһа мәгбул дејилди. Даһа доғрусу, Иса, сәмави Атасынын она һазырладығы вә бүтүн ҹәһәтләрдән Аллаһын Адәмә һазырладығы бәдәнә мүвафиг бәдәнлә ҝәлди (Тәквин 2:7; Лука 1:35; 1 Коринфлиләрә 15:22, 45). Аллаһын камил Оғлу Иса, Тәквин 3:15 ајәсиндә габагҹадан дејилдији кими гадынын “зүрријјәти” ролуну јеринә јетирирди. “Топуғундан чалынаҹағына” бахмајараг, Шејтанын “башына зәрбә” вурмаг үчүн Иса тәдбирләр ҝөрмәли иди. Беләликлә дә Иса, Һабилин вахтындан бәри иман адамларынын ҝөзләдикләри вә бәшәријјәтин хиласы үчүн Јегованын тәгдим етдији васитә олду.
5, 6. Мәсиһчиләр үчүн Аллаһа јахынлашмағын ән јахшы үсулу нәдир?
5 Исанын бу хүсуси ролу барәдә Павел ҝөр нә дејир: “Ҝүнаһ нә олдуғуну билмәјән Мәсиһи О [Аллаһ], әвәзимизә ҝүнаһ гурбаны етди ки, биз Онун сајәсиндә Аллаһын салеһлији илә ејниләшәк” (2 Коринфлиләрә 5:21). Һәвари Јәһја исә: “О Өзү ҝүнаһларымыз вә јалныз бизим дејил, бүтүн дүнјанын ҝүнаһлары үчүн әфв тә’мин едән гурбандыр” — дејир (1 Јәһја 2:2). Јә’ни исраиллиләрин Аллаһа јахынлашмасы үчүн, гурбанлар мүвәггәти васитә кими хидмәт едирди; мәсиһчиләрин исә Аллаһа јахынлашмаг үчүн даһа јахшы әсасы вар, бу - Иса Мәсиһин гурбанлығыдыр (Јәһја 14:6; 1 Петер 3:18). Әҝәр Аллаһ тәрәфиндән тәгдим едилән фидијә гурбанлығына иман едир вә Она табе олуругса, онда ҝүнаһларын бағышланмасыны, еләҹә дә Аллаһын илтифат вә хејир-дуасыны биз дә ала биләрик (Јәһја 3:17, 18). Мәҝәр бу тәсәлли мәнбәји дејил? Бәс фидијә гурбанлығына олан иманымызы неҹә ҝөстәрә биләрик?
6 Аллаһа јахынлашмаг үчүн мәсиһчиләрин дә јахшы әсасы олдуғуну изаһ етдикдән сонра, һәвари Павел Ибраниләрә 10:22—25 ајәләриндә, Аллаһын бу ән’амы үчүн иман вә миннәтдарлығымызы ифадә етмәјин үч үсулуну ҝөстәрир. Павелин сөзләринин әсасән “Мүгәддәс Јерә ҝирмәјә” һаггы олан шәхсләрә, јә’ни ҝөјләрә дә’вәти олан мәсһ едилмиш мәсиһчиләрә јөнәлмәсинә бахмајараг, онун Аллаһдан илһам алмыш сөзләринә диггәт јетирмәк Мәсиһин әфв тә’мин едән гурбанлығындан фајда алмаг истәјән бүтүн инсанлара ҝәрәкдир (Ибраниләрә 10:19).
Тәмиз вә ләкәсиз гурбанлар тәгдим един
7. а) Гурбан тәгдим едиләркән иҹра олунан иш Ибраниләрә 10:22 ајәсиндә неҹә әкс олунур? б) Гурбанлары Аллаһ гәбул етсин дејә нә етмәк тәләб олунурду?
7 Һәр шејдән әввәл, Павел мәсиһчиләри тәшвиг едир: “Буна ҝөрә үрәкләримиз пис виҹдандан паклашмыш, бәдәнимиз дә тәмиз су илә јујулмуш олараг, е’тимадла долу иманла, сәмими гәлбдән Аллаһа јахынлашаг” (Ибраниләрә 10:22). Шүбһәсиз, бурада, гурбанлар Мусанын ганунунда тәләб олундуғу кими тәгдим едилән заман иҹра олунан ишләрлә мүгајисә апарылыр. Бу мүнасибдир, белә ки, гурбанын гәбул олунмасы үчүн, ону тәмиз нијјәтләрлә ҝәтирмәк тәләб олунурду, белә гурбан исә јалныз тәмиз вә сағлам һејванлардан ҝәтирилмәли иди. Гурбанлыг һејваны, тәмиз һејванлардан — ири вә ја хырда малдан сечилирди вә “гүсурсуз” олурду. Әҝәр гурбан гушлардан ҝәтирилирдисә, о, гумру вә ја ҝөјәрчин баласындан олурду. Бу шәртләрә әмәл едәрәк, гурбан ҝәтирән “өзү үчүн кәффарә етмәк үзрә гәбул олунаҹагдыр” (Левилиләр 1:2—4, 10, 14; 22:19—25). Чөрәк совгатында, корланма символу олан маја олмурду, онун тәркибиндә бал да олмурду, һансы ки, бу сөзлә ола билсин гыҹгыртма хүсусијјәти олан мејвә ширәси нәзәрдә тутулурду. Һејван гурбаны вә ја чөрәк совгаты гурбанҝаһа ҝәтириләндә, онлара, горујуҹу маддә олан дуз әлавә едирдиләр (Левилиләр 2:11—13).
8. а) Гурбан ҝәтирән адамдан нә тәләб олунурду? б) Ибадәтимизи Јегова гәбул етсин дејә нә етмәк лазымдыр?
8 Бәс гурбаны ҝәтирән шәхс һаггында нә дејилир? Ганунда ҝөстәрилирди ки, Јегованын гаршысына ҝәлән һәр бир кәс тәмиз вә ләкәсиз олмалыдыр? Мүәјјән бир сәбәбдән натәмиз олан кәс, Јегованын гаршысында јенидән тәмиз олсун дејә, әввәлҹә ҝүнаһ үчүн гурбан вә јахуд тагсыркарлыг гурбаны тәгдим етмәли иди. Онун бүтөв шәкилдә јандырылмаға тәгдим етдији гурбаны вә ја әмин-аманлыг гурбаныны Аллаһ јалныз о заман гәбул едәрди (Левилиләр 5:1—6, 15, 17). Буну нәзәрә алараг, Јегованын гаршысында һәмишә тәмиз галмағын нә гәдәр ваҹиб олдуғуну дәрк едирикми? Әҝәр ибадәтимизин Аллаһ тәрәфиндән гәбул олунмасыны истәјириксә, Онун ганунларында һәр һансы бир сәһвә јол верәндә, баҹардығымыз гәдәр тез дүзәлмәлијик. Белә һалларда ләнҝимәдән, Аллаһын тәгдим етдији көмәк васитәләринә - “ҹәмијјәтинин ағсаггалларына” вә “әфв тә’мин едән гурбан” олан Иса Мәсиһә мүраҹиәт етмәлијик (Јагуб 5:14; 1 Јәһја 2:1, 2).
9. Јеговаја тәгдим едилән гурбанларла јалан танрылара верилән гурбанлар арасындакы әсас фәргләрдән бири нәдәдир?
9 Һәр нөв натәмизликдән тәмизләнмәјә верилән әһәмијјәт, Јеговаја тәгдим едилән гурбанлары, Исраилин әтрафындакы халгларын јалан танрылара тәгдим етдикләри гурбанлардан хүсусилә фәргләндирирди. Мусанын ганунунда ҝөстәрилән гурбанларын бу фәргләндириҹи хүсусијјәтләри барәдә бир арајыш китабчасында дејилир: “Биз, ҹадуҝәрлик вә ја фалчылыгла һеч бир әлагәнин олмадығыны ҝөрүрүк; һеч бир дини азғынлыг, өзүнү гәсдән шикәст етмәк вә ја фаһишәлик мәрасимләри јохдур. Торпағын мәһсулдар олмасы үчүн кечирилән шәһвани вә сон дәрәҹә әхлагсыз мәрасимләр исә гәти шәкилдә гадаған олунур; инсанлары гурбанлыг кими тәгдим етмәк вә ја өләнләрин руһуна гурбан кәтирмәк јохдур”. Бүтүн бунлар диггәти нөвбәти факта јөнәлдир: Јегова мүгәддәсдир вә һәр һансы бир ҝүнаһа, јахуд әхлаг позғунлуғуна ҝөз јуммур (Һабаккук 1:13). Јеговаја едилән ибадәт вә ҝәтирилән гурбанлар, физики, мә’нәви вә руһани ҹәһәтдән тәмиз вә ләкәсиз олмалыдыр (Левилиләр 19:2; 1 Петер 1:14—16).
10. Павелин Ромалылара 12:1, 2 ајәләрдәки нәсиһәтинә әсасән, һансы саһәдә өзүмүзә диггәтлә нәзәр јетирмәлијик?
10 Буну нәзәрә алараг, хидмәтимизин Јегова тәрәфиндән гәбул олунмасы үчүн, һәјатын бүтүн саһәләриндә өзүмүзә фикир вермәлијик. Биз мәсиһчи јығынҹагларында вә тәблиғдә мүәјјән дәрәҹәдә иштирак едириксә, һеч вахт дүшүнмәмәлијик ки, шәхси һәјатымызда һәр шејә јол верә биләрик. Бундан башга, ҝүман етмәли дејилик ки, мәсиһчи фәалијјәтиндә иштирак етмәјимиз, һәјатын диҝәр саһәләринә аид Аллаһын вердији ганунлара риајәт етмәмәјә бизә ихтијар верир (Ромалылара 2:21, 22). Әҝәр биз, Аллаһын ҝөзүндә натәмиз вә ја ләкәли олан бир шејин дүшүнҹә вә давранышымызы натәмиз етмәсинә јол верирксә, Аллаһын хејир-дуасы вә илтифатына үмид едә билмәрик. Павелин сөзләрини хатырлајын: “Еј гардашлар, Аллаһын мәрһәмәти наминә сизә јалварырам ки, бәдәнләринизи дири, мүгәддәс, Аллаһа мәгбул гурбан кими тәгдим един; мә’нәви ибадәтиниз будур. Вә бу зәманәјә ујғунлашмајын, анҹаг Аллаһын јахшы, мәгбул вә камил ирадәсинин нә олдуғуну дәрк етмәк үчүн ағлынызын јениләнмәси илә көкүндән дәјишин” (Ромалылара 12:1, 2).
Сәмими гәлбдән һәмд гурбанлары ҝәтирин
11. Ибраниләрә 10:23 ајәсиндәки “үмумхалг гаршысында е’лан етмәк” анлајышы өзүнә нәји дахил едир?
11 Ибраниләрә ҝөндәрдији мәктубда Павел диггәти ибадәтимизин даһа ваҹиб бир саһәсинә јөнәлдир: “Ҝәлин, үмумхалг гаршысында е’лан етдијимиз үмидимизи тәрәддүд етмәдән мөһкәм тутаг, чүнки вә’ди верән садигдир” (Ибраниләрә 10:23, ЈД). “Үмумхалг гаршысында е’лан етмәк” ифадәси һәрфи мә’нада “е’тираф етмәк” демәкдир вә бундан әлавә Павел “һәмд гурбаны” һаггында сөјләјир (Ибраниләрә 13:15). Бу, Һабил, Нуһ вә Ибраһим кими адамларын тәгдим етдикләри гурбанлары хатырладыр.
12, 13. Бүтөв шәкилдә јандырылан һејван гурбаныны тәгдим едән исраилли нәји е’тираф едирди вә белә руһу биз неҹә әкс етдирә биләрик?
12 Исраилли бүтөв шәкилдә јандырылан гурбан ҝәтирәндә, буну “Јегованын гаршысында көнүллү сурәтдә” едирди (Левилиләр 1:3, ЈД). Һәмин адам белә гурбаны ҝәтирмәклә, көнүллү сурәтдә үмумхалг гаршысында е’лан вә ја е’тираф едирди ки, Јегова өз халгына бол-бол хејир-дуа верир вә она һәдсиз мәһәббәт бәсләјир. Јандырылан гурбанын фәргләндириҹи хүсусијјәтини јада салаг: гурбан ҝәтирилән һејван гурбанҝаһ үзәриндә бүтөвлүклә јандырылырды. Бу, һәдсиз сәдагәт вә там һәср олунма символудур. Биз буна мүвафиг тәрздә, һәвәслә вә сәмими гәлбдән Јеговаја “һәмд гурбаныны, јә’ни... додагларын бәһрәсини” тәгдим едәрәк, фидијә гурбанлығына иманымызы вә бу ән’ама ҝөрә миннәтдарлығымызы ҝөстәрмиш олуруг.
13 Мәсиһчиләр һејванлардан вә ја биткиләрдән һәгиги мә’нада гурбанлар тәгдим етмәсәләр дә, онларын үзәринә, Падшаһлыг һаггындакы хош хәбәри тәблиғ етмәк вә Иса Мәсиһин шаҝирдләрини һазырламаг мәс’улијјәти дүшүр (Матта 24:14; 28:19, 20). Сиз, Аллаһын итаәткар инсанлара һазырладығы ҝөзәл не’мәтләр барәдә даһа чохларынын билмәси үчүн, Аллаһын Падшаһлығы һаггындакы хош хәбәрин үмумхалг гаршысында е’лан олунмасында һәр бир јаранан имкандан истифадә едирсинизми? Марагланан инсанлара тә’лим вермәјә вә онларын Иса Мәсиһин шаҝирдләри олмасына көмәк етмәк үчүн вахт вә гүввәнизи көнүллүмү сурәтдә сәрф едирсиниз? Хидмәтдә сә’јлә иштирак етмәјимиз, јандырылан гурбанын хош әтри кими, Аллаһа чох хошдур (1 Коринфлиләрә 15:58).
Аллаһла вә инсанларла үнсијјәтдә олмагдан севинин
14. Павел, Ибраниләрә 10:24, 25 ајәләриндә әмин-аманлыг гурбанлығы илә неҹә мүгајисә апарыр?
14 Ахырда Павел диггәти она јөнәлдир ки, Аллаһа ибадәт едән бизләрин һәмиманлыларымызла һансы мүнасибәтимиз олмалыдыр. “Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бә’зиләринин адәт етдикләри кими өз јығынҹагларымызы тәрк етмәјәк. Амма хүсусән, о Ҝүнүн јахынлашдығыны ҝөрдүјүмүз нисбәтдә бир-биримизи даһа чох үрәкләндирәк” (Ибраниләрә 10:24, 25). “Мәһәббәтә вә хејирли ишләрә тәшвиг етмәк”, “јығынҹаг” вә “бир-бирини үрәкләндирмәк” ифадәләри, Исраилдә әмин-аманлыг гурбанынын тәгдим едилмәсинин Аллаһын халгына нә вердијини хатырладыр.
15. Әмин-аманлыг гурбаны илә мәсиһчи јығынҹаглары арасында һансы мүгајисә изләнир?
15 “Әмин-аманлыг гурбаны” ифадәсиндә, “сүлһ” мә’насы верән ибрани сөзү ҹәм һалындадыр. Бәлкә дә бу ону ҝөстәрир ки, бу нөв гурбанлыгда иштирак етмәк, һәм Аллаһла, һәм дә һәмиманлыларла сүлһдә олмаға сәбәб олурду. Бир алим, әмин-аманлыг гурбанынын ҝәтирилмәси барәдә гејд едир: “Бу, доғрудан да Әһд Аллаһы илә хошбәхт үнсијјәт заманы олурду, чүнки Аллаһ Исраилә илтифат ҝөстәрирди вә гурбан сүфрәсиндә онларын Гонағы олурду; бунунла јанашы, һәмишә исраиллиләрин Саһиби олараг галырды”. Бу, Исанын вә’дини хатырладыр: “Һарадаса ики вә ја үч киши Мәним адымла бир јерә топлашмыш олурса, Мән орада, онларын арасындајам” (Матта 18:20). Биз һәр дәфә мәсиһчи јығынҹағында иштирак едәндә, руһландырыҹы вә нәсиһәт верән үнсијјәтдән фајда әлдә едирик, һәмчинин Рәббимиз Иса Мәсиһин арамызда олмасы фикриндән раһатлыг тапырыг. Бүтүн бунларын сајәсиндә, мәсиһчи јығынҹағы доғрудан да бөјүк севинҹ верир вә иманы мөһкәмләндирир.
16. Әмин-аманлыг гурбаны илә мүгајисә едиләрсә, мәсиһчи јығынҹагларына хүсуси севинҹ верән нәдир?
16 Јеговаја әмин-аманлыг гурбаны тәгдим едилән заман, ич јағы, бөјрәкләр, бөјрәкләрдә вә бел әзәләсиндә олан пијләр, еләҹә дә гојун гујруғу гурбанҝаһда јандырылыб, түстүләндирилирди (Левилиләр 3:3—16). Пиј, һејванын ән гидалы вә јахшы һиссәси сајылырды. Ону гурбанҝаһда тәгдим етмәк, Јеговаја ән јахшы шеји вермәк әламәти иди. Јалныз нәсиһәт алмағымыз јох, еләҹә дә Јеговаја һәмд етмәјимиз мәсиһчи јығынҹагларына хүсуси севинҹ ҝәтирир. Бу, кичик дә олса, виҹданла үрәкдән нәғмә охумаг ҹәһдимиздә, диггәтлә гулаг асмағымызда вә имкан оланда суаллара ҹаваб вермәјимиздә әкс олунур. “РӘББӘ һәмд един. РӘББӘ јени бир тәранә вә мүттәкиләрин ҹамаатында [“сәдагәтли оланларын јығынҹағында”, ЈД] онун һәмдини охујун” - дејә мәзмурчу нида едирди (Мәзмур 149:1).
Бизи Јеговадан бол хејир-дуалар ҝөзлыјир
17, 18. а) Јерусәлим мә’бәдинин тәнтәнәли ачылышы заманы Сүлејман һансы бөјүк гурбаны тәгдим етди? б) Мә’бәдин тәнтәнәли ачылышы халга һансы хејир-дуалары ҝәтирди?
17 Ерамыздан әввәл 1026-ҹы илин једдинҹи ајында, Јерусәлим мә’бәдинин тәнтәнәли ачылышы заманы, Сүлејман падшаһ “бүтөв јандырылан гурбаны, чөрәк совгатыны вә әмин-аманлыг гурбанынын пијини” тәгдим едәрәк, “РӘББИН өнүндә [“бөјүк”, ЈД] гурбанлар кәсди”. Чөрәк совгатындан әлавә, үмумијјәтлә 22 мин ири бујнузлу мал вә 120 мин гојун гурбан ҝәтирилмишдир (1 Краллар 8:62—65).
18 Бу мәрасимин һансы хәрҹләрлә бағлы олдуғуну вә нә гәдәр зәһмәт тәләб етдијини тәсәввүр едирсинизми? Буна бахмајараг, Исраилин алдығы хејир-дуалар, ајдын сурәтдә хәрҹләри өтүб кечирди. Бу шадлығын сонунда Сүлејман “халгы ҝөндәрди; вә падшаһа хејир-дуа вердиләр, РӘББИН гулу Давуда вә халгы Исраилә ҝөстәрдији бүтүн јахшылыгдан долајы севинҹлә вә јахшы үрәклә чадырларына гајытдылар” (1 Краллар 8:66). Сүлејман доғру деди ки, “РӘББИН бәрәкәти, зәнҝин едән одур вә онунла бәрабәр кәдәр гатмаз” (Сүлејманын мәсәлләри 10:22).
19. Јеговадан инди вә әбәдијјән бөјүк хејир-дуалар алмаг үчүн биз нә едә биләрик?
19 Биз, “ҝәләҹәк не’мәтләрин... көлҝәсинин”, “не’мәтләрин әсл сурәтилә” дәјишдији бир зәманәдә јашајырыг (Ибраниләрә 10:1). Иса Мәсиһ, сурәтләрлә тәсвир олунан бөјүк Баш Каһин вәзифәсинә кечәрәк, артыг ҝөјләрә дахил олуб вә өз ганынын дәјәрини тәгдим едиб ки, онун гурбанлығына иман едәнләрин һамысынын ҝүнаһыны јусун (Ибраниләрә 9:10, 11, 24—26). Бу бөјүк гурбанлыға әсасән, һәмчинин Аллаһа тәмиз вә ләкәсиз һәмд гурбанларыны тәгдим етмәк шәртилә, биз дә “севинҹлә вә јахшы үрәклә” вә Јеговадан бол-бол хејир-дуалар ҝөзләјәрәк, ирәли ҝедә биләрик (Малаки 3:10).
Сиз неҹә ҹаваб верәрдиниз?
• Ганунда гурбанлар вә совгатлар һаггындакы мә’лумат бизә неҹә тә’лим вә тәсәлли верә биләр?
• Гәбул олмасы үчүн гурбанлыг илк нөвбәдә һансы тәләбә ујғун олмалы иди вә бизим үчүн бу һансы мә’наны дашыјыр?
• Бүтөв шәкилдә јандырылмаға көнүллү тәгдим едилән гурбанла мүгајисәдә биз нә тәгдим едә биләрик?
• Мәсиһчи јығынҹаглары һансы тәрздә әмин-аманлыг гурбанларынын тәгдим едилмәсинә бәнзәјирләр?
[12-ҹи сәһифәдәки шәкил]
Исанын фидијә гурбанлығы, Јегова тәрәфиндән бәшәријјәтин хиласы үчүн тәгдим олунмушдур
[14-ҹү сәһифәдәки шәкил]
Хидмәтимизин Јегова тәрәфиндән гәбул олунмасы үчүн, һәр бир натәмизликдән узаг олмалыјыг
[15-ҹи сәһифәдәки шәкил]
Биз хидмәтдә иштирак етмәклә, үмумхалг гаршысында Јегованын хејирхаһ олдуғуну е’тираф едирик