Јеһоваја гурбанлары ҹанла-башла ҝәтир
«Һәр нә едирсинизсә, ҹанла-башла един, санки инсанлар үчүн дејил, Јеһова үчүн едирсиниз» (КОЛОС. 3:23).
1-3. а) Исанын ишҝәнҹә дирәјиндә өлмәси о демәкдирми ки, Јеһова артыг биздән һеч бир гурбан тәләб етмир? Изаһ ет. б) Бу ҝүн гурбанларла әлагәдар һансы суал ортаја чыхыр?
ЕРАМЫЗЫН биринҹи әсриндә Јеһова Өз халгына Исанын фидјә гурбанлығынын Мусанын Ганунуну ләғв етдијини ачыглады (Колос. 2:13, 14). Јәһудиләрин јүз илләр бојунҹа ҝәтирдикләри гурбан вә тәгдимләрә артыг еһтијаҹ јох иди, чүнки Ганун «Мәсиһә апаран тәрбијәчи» ролуну јеринә јетирмишди (Галат. 3:24).
2 Амма бу, о демәк дејил ки, гурбанлар биз мәсиһчиләри марагландырмамалыдыр. Һәвари Петер «Иса Мәсиһин васитәсилә Аллаһа мәгбул руһани гурбанлар» тәгдим етмәјин ваҹиблији барәдә јазмышды (1 Пет. 2:5). Һәвари Павел дә ајдын ҝөстәрмишди ки, өзүнү Аллаһа һәср етмиш мәсиһчинин һәјатынын һәр бир саһәсини әсаслы олараг «гурбан» һесаб етмәк олар (Ром. 12:1).
3 Беләликлә, мәсиһчиләр һәм мүәјјән шејләри Јеһоваја верәндә, һәм дә Она ҝөрә нәләрдәнсә имтина едәндә гурбан ҝәтирмиш олурлар. Исраиллиләрдән тәләб олунан гурбанларла әлагәдар билдикләримизә әсасән, Јеһоваја ҝәтирдијимиз бүтүн гурбанларын Она мәгбул олуб-олмадығыны неҹә мүәјјән едә биләрик?
ҜҮНДӘЛИК ҺӘЈАТЫМЫЗДА
4. Ҝүндәлик мәшғулијјәтләримиз барәдә нәји јадда сахламалыјыг?
4 Ола билсин, ҝүндәлик һәјатымызда ҝөрдүјүмүз ишләрин Јеһоваја гурбанлар ҝәтирмәклә һансы әлагәси олдуғуну баша дүшмәк чәтиндир. Илк бахышдан бизә елә ҝәлә биләр ки, ев ишләри, мәктәб дәрсләри, иш, алыш-вериш вә бу кими шејләрин руһани ишләрә һеч бир аидијјәти јохдур. Лакин әҝәр сән өзүнү Јеһоваја һәср етмисәнсә, јахуд буну јахын ҝәләҹәкдә етмәји планлашдырырсанса, јадда сахламалысан ки, бүтүн бунлар сәнин Јеһова илә мүнасибәтләринә бөјүк тәсир ҝөстәрә биләр. Биз ҝүнүн 24 сааты мәсиһчијик. Мүгәддәс Китаб принсипләрини һәјатымызын һәр бир саһәсиндә тәтбиг етмәлијик. Буна ҝөрә дә Павел бизә нөвбәти нәсиһәти верир: «Һәр нә едирсинизсә, ҹанла-башла един, санки инсанлар үчүн дејил, Јеһова үчүн едирсиниз». (Колослулара 3:18—24 ајәләрини оху.)
5, 6. Ҝүндәлик ҝејим вә давранышымыза нә тәсир етмәлидир?
5 Мәсиһчинин ҝүндәлик һәјаты мүгәддәс хидмәтин бир һиссәси дејил. Бунунла белә, Павелин: «Һәр нә едирсинизсә, ҹанла-башла един, санки инсанлар үчүн дејил, Јеһова үчүн едирсиниз», — сөзләри бизи һәјат тәрзимиз барәдә дүшүнмәјә тәшвиг едир. Буну өзүмүзә неҹә тәтбиг едә биләрик? Һәмишә мәсиһчијә јарашан тәрздә давраныр вә ҝејинирик? Јохса ҝүндәлик ишләрлә мәшғул оларкән давраныш вә ја ҝејим тәрзимизә ҝөрә Јеһованын Шаһиди олдуғумузу демәјә утанырыг? Гој бу, бизимлә һеч вахт баш вермәсин! Јеһованын халгы Онун адына ләкә ҝәтирәҹәк һеч бир шеј етмәк истәмир (Јешаја 43:10; 2 Кор. 6:3, 4, 9).
6 Ҝәлин ҝөрәк һәр шеји «ҹанла-башла», санки, «Јеһова үчүн» етмәк истәјимиз һәјатымызын мүхтәлиф саһәләринә неҹә тәсир едир. Буну арашдыраркән јадда сахламалыјыг ки, исраиллиләр малик олдугларынын ән јахшысыны Јеһоваја тәгдим етмәли идиләр (Чых. 23:19).
БУ, СӘНИН ҺӘЈАТЫНА НЕҸӘ ТӘСИР ЕДИР?
7. Мәсиһчинин һәср олунмасына нә дахилдир?
7 Сән өзүнү Јеһоваја һәср едәндә буну гејд-шәртсиз етмисән, елә дејилми? Бу, о демәкдир ки, сән һәјатынын һәр бир саһәсиндә Јеһованы биринҹи јерә гојаҹағына сөз вермишдин. (Ибраниләрә 10:7 ајәсини оху.) Бу, јахшы гәрар иди. Шүбһәсиз, сән һәр бир мәсәләјә даир Јеһованын нөгтеји-нәзәрини өјрәниб Онун ирадәсинә ујғун давранмаға чалышанда нәтиҹәләрин әла олдуғуну ҝөрмүсән (Јешаја 48:17, 18). Аллаһын халгы мүгәддәс вә хошбәхтдир, чүнки бу халг она тәлим верәнин хүсусијјәтләрини әкс етдирир (Лев. 11:44; 1 Тим. 1:11).
8. Гәдимдә ҝәтирилән гурбанлары Јеһованын мүгәддәс һесаб етмәсинин бизим үчүн һансы әһәмијјәти вар?
8 Исраиллиләрин Јеһоваја ҝәтирдикләри гурбанлар мүгәддәс һесаб олунурду (Лев. 6:25; 7:1). «Мүгәддәс» кими тәрҹүмә олунан ибрани сөзүнүн мәнасы «ајры гојулмуш», «хүсуси» вә ја «Аллаһа һәср олунмуш» мәнасыны верир. Гурбанларымызын Јеһова тәрәфиндән гәбул олунмасыны истәјириксә, дүнјадакы мурдар шејләрин онлара тәсир етмәсинә јол вермәмәлијик. Биз Јеһованын нифрәт етдији шејләрин һеч бирини севмәмәлијик. (1 Јәһја 2:15—17 ајәләрини оху.) Ајдындыр ки, бу, Аллаһын ҝөзүндә бизи мурдар едәҹәк һәр бир шејдән вә ја һәр бир кәсдән узаг дурмалы олдуғумузу нәзәрдә тутур (Јешаја 2:4; Вәһј 18:4). Бу һәмчинин о демәкдир ки, биз ҝөзүмүзү натәмиз вә әхлагсыз олан һеч бир шејә бахмаға гојмајаҹаг вә ја бу кими шејләр барәдә хәјала далмајаҹағыг (Колос. 3:5, 6).
9. Мәсиһчиләрин башгалары илә неҹә давранмасы нә дәрәҹәдә ваҹибдир вә нәјә ҝөрә?
9 Павел һәмиманлыларыны тәшвиг едирди: «Јахшылыг етмәји вә башгалары илә бөлүшмәји јаддан чыхартмајын, чүнки бу ҹүр гурбанлар Аллаһа хошдур» (Ибр. 13:16). Беләликлә, јахшы инсан олсаг вә башгаларына јахшылыг етсәк, онда Јеһова давранышымызы Она мәгбул гурбан кими гәбул едәҹәк. Башгаларына мәһәббәтлә јанашмаг һәгиги мәсиһчиләрин сәҹијјәви ҹәһәтидир (Јәһ. 13:34, 35; Колос. 1:10).
ИБАДӘТДӘ ГУРБАНЛАР
10, 11. Јеһова хидмәт вә ибадәтимизә неҹә бахыр вә бу, бизә неҹә тәсир етмәлидир?
10 Башгаларына етдијимиз нәзәрә чарпан јахшылыглардан бири «үмидимизи аләмдә бәјан [етмәкдир]». Шаһидлик етмәк үчүн һәр бир фүрсәтдән истифадә едирсәнми? Павел мәсиһчи фәалијјәтимизин ваҹиб һиссәси олан бу иши Аллаһымызын «адыны уҹалдан мәдһ гурбаны, јәни дилимизин [бәһрәси]» адландырды (Ибр. 10:23; 13:15; Һушә 14:2). Падшаһлыг һаггында хош хәбәри тәблиғ етмәк үчүн сәрф етдијимиз вахтын кејфијјәти вә кәмијјәти һаггында дүшүнмәк пис олмазды. Хидмәти ҝөрүшүн бир чох бәндләринин мәгсәди дә бизә бу саһәдә јахшылашмағымыза көмәк етмәкдир. Гысаҹа десәк, саһә хидмәтимиз вә гејри-формал шаһидлик етмәјимиз «мәдһ гурбаны»нын, јәни ибадәтимизин бир һиссәсидир. Буна ҝөрә дә бу гурбан верә биләҹәјимиз ән јахшы гурбан олмалыдыр. Шәраитләримиз мүхтәлифдир, лакин хош хәбәрин тәблиғинә нә гәдәр вахт ајырмағымыз чох вахт руһани шејләрә нә гәдәр дәјәр вердијимиздән хәбәр верир.
11 Биз һәм тәк, һәм дә башгалары илә бирҝә Јеһоваја мүнтәзәм шәкилдә ибадәт едирик. Буну биздән Јеһова тәләб едир. Дүздүр, биздән Шәнбә ҝүнүнә риајәт етмәк вә бајрамларда иштирак етмәк үчүн мүнтәзәм олараг Јерусәлимә ҝетмәк тәләб олунмур. Лакин биз мәсиһчиләр бу гәдим ганунлардан өзүмүз үчүн дәрс ҝөтүрә биләрик. Аллаһ бу ҝүн дә биздән ҝөзләјир ки, өлү әмәлләримиздән, јәни бош вә сәмәрәсиз ишләрдән ваз кечәк вә Онун Кәламыны өјрәнәк, дуа едәк, һәм дә јығынҹаг ҝөрүшләриндә иштирак едәк. Аилә башчылары да аиләви ибадәт кечирмәји өз өһдәләринә ҝөтүрмәлидирләр (1 Салон. 5:17; Ибр. 10:24, 25). Јахшы оларды ки, руһани фәалијјәтимизлә әлагәдар өзүмүздән сорушаг: «Ибадәтимин кејфијјәтини јахшылашдыра биләрәмми?»
12. а) Гәдимдә ибадәт заманы бухурун јандырылмасыны бизим ҝүнләрдә нә илә мүгајисә етмәк олар? б) Бу мүгајисә дуаларымызын мәзмунуна неҹә тәсир етмәлидир?
12 Давуд падшаһ Јеһоваја охујурду: «Гој һүзурунда дуаларым бухур кими... гәбул олунсун!» (Мәз. 141:2). Бир анлыға дуаларынын нә дәрәҹәдә мүнтәзәм вә кејфијјәтли олдуғу барәдә дүшүн. «Вәһј» китабында мүгәддәсләрин дуалары бухура бәнзәдилир, чүнки Јеһованын мәгбул һесаб етдији дуалар ширин вә хош әтир кими Онун һүзуруна уҹалыр (Вәһј 5:8). Гәдим Исраилдә мүнтәзәм олараг Јеһованын гурбанҝаһында јандырылан бухур Онун вердији хүсуси гајдаја ҝөрә дәгигликлә һазырланмалы иди. Бухур јалныз Онун тәсис етдији гајдалара ујғун шәкилдә ҝәтирилдији һалда гәбул олунурду (Чых. 30:34—37; Лев. 10:1, 2). Әҝәр сәмими-гәлбдән ҝәлән дуаларымыз ејни шәкилдә «тәртиб олунубса», онда әмин ола биләрик ки, дуаларымыз Она мәгбулдур.
ВЕРМӘК ВӘ АЛМАГ
13, 14. а) Филипи јығынҹағы вә Епафродит Павел үчүн нә етмишдиләр вә онун буна мүнасибәти неҹә иди? б) Биз Епафродитин вә Филипидәки диҝәр мәсиһчиләрин нүмунәсини неҹә изләјә биләрик?
13 Мәбләғиндән асылы олмајараг, үмумдүнја ишини дәстәкләмәк үчүн вердијимиз ианәләри дә гурбан һесаб етмәк олар (Марк 12:41—44). Ерамызын биринҹи әсриндә Филипидәки јығынҹаг Павелә мадди ҹәһәтдән көмәк етмәк үчүн Епафродити Ромаја ҝөндәрмишди. О, Филипи јығынҹағынын ҝөндәрдији пулу Павелә чатдырды. Бу, илк дәфә дејилди ки, Филипидәки мәсиһчиләр Павелә гаршы белә сәхавәт ҝөстәрирдиләр. Онларын Павелә гаршы хејирхаһ олмагда мәгсәдләри о иди ки, о, хидмәтә даһа чох вахт сәрф етсин вә мадди шејләр барәдә нараһатчылыгдан азад олсун. Павел бу һәдијјәјә неҹә мүнасибәт ҝөстәрди? О, буну «хош әтир, Аллаһа хош ҝедән, Она мәгбул олан [гурбан]» адландырды. (Филипилиләрә 4:15—19 ајәләрини оху.) Павел филипилиләрин хејирхаһлығына ҝөрә үрәкдән миннәтдар иди. Шүбһә јохдур ки, бу, Јеһоваја да хош иди.
14 Бизим ҝүнләрдә дә Јеһова үмумдүнја иши үчүн етдијимиз ианәләри јүксәк гијмәтләндирир. Үстәлик, Јеһова сөз верир ки, әҝәр биз Падшаһлыг ишини һәмишә биринҹи јерә гојсаг, О, бизим һәм руһани, һәм дә физики тәләбатларымызын гајғысына галаҹаг (Мат. 6:33; Лука 6:38).
МИННӘТДАР ОЛДУҒУНУ ҜӨСТӘР
15. Јеһоваја миннәтдар олмағын үчүн һансы сәбәбләрин вар?
15 Јеһоваја миннәтдар олмағымыз үчүн сајсыз-һесабсыз сәбәбләримиз вар. Мәсәлән, мәҝәр һәр ҝүн һәјат әнамына ҝөрә Она тәшәккүр етмәли дејилик? Јашамаг үчүн лазым олан һәр шеји — гида, палтар, сығынаҹаг вә алдығымыз нәфәси бизә О верир. Үстәлик, дәгиг билијә әсасланмыш иман бизә үмид бәхш едир. Јеһованын ким олдуғуну вә бизим үчүн етдикләрини нәзәрә алсаг, Она ибадәт етмәјимиз вә мәдһ гурбанлары ҝәтирмәјимиз дүзҝүндүр. (Вәһј 4:11 ајәсини оху.)
16. Мәсиһин фидјә гурбанлығына ҝөрә миннәтдар олдуғумузу неҹә ҝөстәририк?
16 Әввәлки мәгаләдән өјрәндијимиз кими, Иса Мәсиһин фидјә гурбанлығы Аллаһын бәшәријјәтә вердији ән гијмәтли һәдијјәдир. Бу, Аллаһын бизә бәсләдији мәһәббәтинин ән бөјүк тәзаһүрүдүр (1 Јәһ. 4:10). Буну дәјәрләндирдијимизи неҹә ҝөстәрә биләрик? Павел дејирди: «Бизә тәкан верән гүввә Мәсиһин мәһәббәтидир. Биз белә бир гәнаәтә ҝәлдик: ...бир нәфәр һамы үчүн өлдү. О, һамыдан өтрү өлдү ки, јашајанлар артыг өзләри үчүн дејил, онларын уғрунда өлүб дирилмиш шәхс үчүн јашасынлар» (2 Кор. 5:14, 15). Павел демәк истәјирди ки, әҝәр биз лајиг олмадығымыз һалда Аллаһын бизә ҝөстәрдији лүтфү гијмәтләндиририксә, һәјатымыз боју Ону вә Оғлуну иззәтләндирәҹәјик. Бизим Аллаһа вә Мәсиһә олан севҝимиз вә миннәтдарлығымыз итаәткарлыг ҝөстәрмәјимиздә, еләҹә дә тәблиғ етмәк вә шаҝирд һазырламаг истәјимиздә өзүнү бүрузә верир (1 Тим. 2:3, 4; 1 Јәһ. 5:3).
17, 18. Бәзиләри Јеһоваја даһа чох һәмд гурбанлары ҝәтирмәк үчүн нә етмишдиләр? Нүмунә чәк.
17 Јеһоваја ҝәтирдијин һәмд гурбанларыны јахшылашдыра биләрсәнми? Бир чохлары Јеһованын онлар үчүн етдикләри јахшылыгларын үзәриндә дүшүндүкдән сонра Падшаһлығын тәблиғ ишиндә вә диҝәр теократик фәалијјәтләрдә даһа чох иштирак етмәк үчүн һәјатларында бәзи дәјишикликләр етмишләр. Бунун сајәсиндә бәзиләри ил әрзиндә бир вә ја бир нечә ај көмәкчи пионер кими хидмәт етмиш, башгалары исә даими пионерләрин сырасына гошулмушлар. Диҝәрләри исә Јеһоваја ибадәтдә истифадә олунан биналарын тикинтисиндә иштирак едирләр. Мәҝәр бүтүн бунлар миннәтдарлығымызы билдирмәк үчүн әла фүрсәт дејил? Әҝәр биз Јеһоваја дүзҝүн нијјәтдән ирәли ҝәләрәк, јәни Она миннәтдарлығымызы ҝөстәрмәк үчүн хидмәт едәриксә, онда мүгәддәс хидмәтлә бағлы олан бүтүн бу ишләри Јеһова гәбул едәҹәк.
18 Бир чох мәсиһчиләр Јеһоваја өз миннәтдарлыгларыны ҝөстәрмәјә тәшвиг олунублар. Онлардан бири дә Моренадыр. Бу гадын руһани суалларына ҹавабы доғма дини олан католисизимдә, еләҹә дә Асија фәлсәфәсиндә ахтарырды. Амма онларын һеч бириндә ганеедиҹи ҹаваб тапмады. Јалныз Јеһованын Шаһидләри она Мүгәддәс Китабы өјрәтмәјә башлајандан сонра Моренанын руһани сусузлуғу јатды. Мүгәддәс Китабдан бүтүн суалларына ҹаваб алдығына вә бу ҹавабларын она гәлб раһатлығы ҝәтирдијинә ҝөрә бүтүн гүввәсини Јеһоваја хидмәтә сәрф етмәклә Она дәрин миннәтдарлығыны билдирмәк истәди. О, вәфтиздән дәрһал сонра мүнтәзәм олараг көмәкчи пионер кими хидмәт етмәјә башлады вә фүрсәт дүшән кими даими пионер олду. Бундан 30 ил кечсә дә, Морена һәлә дә таммүддәтли хидмәтдәдир.
19. Јеһоваја даһа чох гурбанлар ҝәтирмәк үчүн нә едә биләрсән?
19 Әлбәттә ки, Аллаһын бир чох садиг хидмәтчиләри шәраитләри уҹбатындан пионер кими хидмәт едә билмирләр. Јеһоваја хидмәтдә нә етмәјимиздән асылы олмајараг, һәр биримиз Она мәгбул руһани гурбанлар ҝәтирә биләрик. Давранышымызла: һәр заман Јеһованы тәмсил етдијимизи јадда сахлајараг Онун салеһ принсипләринә дәгигликлә риајәт етмәлијик. Иманымызла: биз Аллаһын нијјәтинин һәјата кечәҹәјинә зәррә гәдәр дә шүбһә етмирик. Јахшы ишләримизлә: биз хош хәбәрин јајылмасына көмәк едирик. Бунунла биз етдији һәр шејә ҝөрә Јеһоваја үрәкдән миннәтдар олдуғумузу ҝөстәририк. Ҝәлин Јеһоваја гурбанлары ҹанла-башла ҝәтирмәјә давам едәк!
[25–ҹи сәһифәдәки јазы]
Јеһованын хејирхаһлығы сәни һәмд гурбаныны јахшылашдырмаға тәшвиг едирми?
[23–ҹү сәһифәдәки шәкил]
Шаһидлик етмәк үчүн һәр бир фүрсәтдән истифадә едирсән?