Охумаг вә өјрәнмәк үчүн вахты “сатын алын”
“Өзүнүз үчүн мүвафиг вахты сатын алын, чүнки јашадығымыз ҝүнләр шәрдир” (ЕФЕСЛИЛӘРӘ 5:16, ЈД).
1. Вахты планлашдырмаг нәјә ҝөрә мүдрикликдир вә вахтымыздан неҹә истифадә етмәјимиз нәји ҝөстәрир?
“ВАХТЫ планлашдыр — она гәнаәт ет” дејилир. Вахтынын мүәјјән һиссәсини ваҹиб олан ишләрә ајыран шәхс, ондан даһа сәмәрәли истифадә едә билир. Мүдрик падшаһ Сүлејман јазырды: “Һәр шејин заманы вә ҝөјләр алтында һәр ишин вахты вар” (Ваиз 3:1). Һәр биримиз ејни мигдарда вахта саһибик вә бу вахтдан неҹә истифадә едәҹәјимизи өзүмүз гәрарлашдырмалыјыг. Нәјә үстүнлүк вермәјимиз вә вахтымызы неҹә бөлүшдүрмәјимиз, бизим үчүн нәјин даһа гијмәтли олдуғуну ҝөстәрир (Матта 6:21).
2. а) Дағүстү тәблиғиндә Иса руһани тәләбатларымыз һаггында нә деди? б) Өзүмүзү неҹә јохлаја биләрик?
2 Јемәјә вә јухуја вахт ајырмаға мәҹбуруг, чүнки бунлар бизим физики тәләбатларымыздыр. Бәс руһани тәләбатларымыз барәдә нә демәк олар? Биз билирик ки, онлары да тә’мин етмәк лазымдыр. Иса, Дағүстү тәблиғиндә демишдир: “Өзләринин руһани тәләбатларыны дәрк едәнләр хошбәхтдирләр” (Матта 5:3, ЈД). Елә бу сәбәбдән, “садиг вә ағыллы гул” Мүгәддәс Китабы охумаг вә өјрәнмәк үчүн вахт ајырмағын нә гәдәр ваҹиб олдуғуну мүнтәзәм олараг бизә хатырладыр (Матта 24:45). Ола биләр, бунун нә гәдәр ваҹиб олдуғуну дәрк едир, анҹаг вахтынызын олмадығыны дүшүнүрсүнүз. Әҝәр бу беләдирсә, ҝәлин Аллаһын Кәламыны охумаг, шәхси өјрәндикләримизин вә охудугларымызын үзәриндә дүшүнмәк үчүн лазым олан вахты тапмағын үсулларына бахаг.
Мүгәддәс Китабы охумаг вә өјрәнмәк үчүн вахт тапмаг
3, 4. а) Вахтдан истифадә етмәклә әлагәдар Павел һансы мәсләһәти верди вә бу өзүнә нәји дахил едир? б) “Мүвафиг вахты сатын” алмаға тәшвиг едәркән, һәвари Павел нәји нәзәрдә тутурду?
3 Јашадығымыз вахты нәзәрә алараг, һәр биримиз һәвари Павелин сөзләринә риајәт етмәлијик: “Беләликлә, нә ҹүр һәрәкәт етдијинизә чох диггәт верин, һикмәтсиз кими јох, һикмәтли кими јашајын. Һәр фүрсәтдән истифадә един [“Өзүнүз үчүн мүвафиг вахты сатын алын”, ЈД], чүнки јашадығымыз ҝүнләр шәрдир. Буна ҝөрә ағылсыз олмајын, лакин Рәббин ирадәси нәдирсә, ону гаврајын” (Ефеслиләпә 5:15—17). Шүбһәсиз ки, бу нәсиһәт мәсиһчи һәјатымызын бүтүн саһәләринә аиддир вә о ҹүмләдән өзүнә, дуа етмәји, өјрәнмәји, ҝөрүшләрә ҝәлмәји вә “Падшаһлыг һаггында олан... Мүждәнин” тәблиғиндә даһа фәал иштирак етмәк үчүн вахт тапмағы дахил едир (Матта 24:14; И—93; 28:19, 20).
4 Ҝөрүндүјү кими, бу ҝүн Јегованын хидмәтчиләриндән чоху Мүгәддәс Китабы охумаг вә дәриндән өјрәнмәк үчүн вахт тапмагда чәтинлик чәкирләр. Ајдын мәсәләдир ки, ијирми дөрд саатдан ибарәт олан ҝүнүмүзә артыг саат әлавә етмәк мүмкүн дејил, демәли, Павел башга бир шеји нәзәрдә тутурду. Јунан дилиндә “мүвафиг вахты сатын алын” ифадәси, бир шеји башга бир шејин һесабына сатын алмағы нәзәрдә тутур. У. Е. Вајн өзүнүн лүғәтиндә бу ифадәни “һәр имкандан мүмкүн гәдәр фајдаланмаг, әлдән бурахылан имканын бир даһа ҝери гајытмајаҹағындан ону ән јахшы тәрздә истифадә етмәк” кими изаһ едир (U. E. Vayn, “Expository Dictionary”). Мүгәддәс Китабы охумаг вә өјрәнмәк үчүн, мүвафиг вахты биз һарадан вә нәјин һесабына сатын ала биләрик?
Үстүнлүјү мүәјјән етмәлијик
5. “Ән ваҹиб шејләри” нәјә ҝөрә вә неҹә ајырд етмәлијик?
5 Дүнјәви ишләримиздән әлавә, руһани планда да чохлу мәс’улијјәтләримиз мөвҹуддур. Бизә, Јегованын садиг хидмәтчиләри кими, “Рәббин ишиндә тәрәгги етмәк” лазымдыр (1 Коринфлиләрә 15:58). Буна ҝөрә дә, Павел филипили мәсиһчиләри “ән ваҹиб олан шејләри” ајырд етмәјә чағырырды (Филипилиләрә 1:10, ЈД). Бу о демәкдир ки, үстүнлүкләри мүәјјән етмәк лазымдыр. Руһани дәјәрләр мадди мәсәләләрдән һәмишә үстүн олмалыдыр (Матта 6:31—33). Һәмчинин руһани мәс’улијјәтләримизи јеринә јетирмәк үчүн дә, таразлығы сахламаг ваҹибдир. Биз вахтымызы мәсиһчи һәјатынын мүхтәлиф саһәләринә неҹә бөлүшдүрүрүк? Сәјјаһ нәзарәтчиләр хәбәр верирләр ки, мәсиһчиләр үчүн “ән ваҹиб олан шејләр” арасында шәхси өјрәнмәјә вә Мүгәддәс Китабын охунмасына даһа чох е’тинасызлыг ҝөстәрилир.
6. Мүвафиг вахты “сатын алмаг” үчүн, дүнјәви вә ја ев ишләримизлә әлагәдар һансы тәдбирләр лазым ҝәлә биләр?
6 Ҝөрдүјүмүз кими, мүвафиг вахты “сатын алмаг” өзүнә,- “һәр имкандан мүмкүн гәдәр фајдаланмағы вә һәр имканы ән јахшы тәрздә истифадә етмәји” дахил едир. Буна ҝөрә дә, әҝәр Мүгәддәс Китабы охумаг вә өјрәнмәк вәрдишимиз гајдасында дејилсә, јахшы оларды ки, өзүмүзү јохлајыб, вахтымызын нәјә сәрф олундуғуну ајдынлашдыраг. Әҝәр дүнјәви ишимиз вахтымызын вә гүввәмизин даһа чох һиссәсини алырса, дуамызда бу һагда Јеговаја данышмалыјыг (Мәзмур 55:22). Јәгин ки, Мүгәддәс Китабын охунмасы вә өјрәнилмәси дә дахил олмагла, Јеговаја ибадәтлә бағлы ваҹиб ишләрә вахт ајырмаг үчүн даһа чох дәјишикликләр едә биләрик. Һаглы олараг дејилир ки, гадынын иши һеч вахт гуртармаз. Буна ҝөрә мәсиһчи баҹылар да үстүнлүјү мүәјјән етмәли вә Мүгәддәс Китабы охујуб ҹидди олараг өјрәнмәјә вахт ајырмалыдырлар.
7, 8. а) Охумаг вә өјрәнмәк үчүн вахты һансы ишләрин һесабына “сатын” алмаг олар? б) Истираһәт етмәкдә әсас мәгсәд нәдән ибарәтдир вә буну хатырлајараг үстүнлүкләри неҹә мүәјјән едә биләрик?
7 Үмумијјәтлә бизләрдән чохумуз өјрәнмәк үчүн вахты аз әһәмијјәтли ишләрин һесабына “сатын” ала биләрик. Өзүмүздән соруша биләрик: дүнјәви журналлары вә гәзетләри охумаға, телевизија верилишләринә бахмаға, мусигијә гулаг асмаға вә ја видео ојунлар ојнамаға нә гәдәр вахт сәрф едирәм? Компүтер гаршысында кечирдијим вахт, Мүгәддәс Китабын охунмасына сәрф етдијим вахтдан артыгдырмы? Павел дејир: “Буна ҝөрә ағылсыз олмајын, лакин Рәббин ирадәси нәдирсә, ону гаврајын” (Ефеслиләрә 5:17). Бир чох Шаһидләрин шәхси өјрәнмәјә вә Мүгәддәс Китабын охунмасына лазыми гәдәр вахт ајырмамаларынын әсас сәбәбләриндән бири, телевизора һәддиндән артыг бахмаларыдыр (Мәзмур 101:3; 119:37, 47, 48).
8 Бә’зи кәсләр, даим өјрәнмәјин онлар үчүн чәтин олдуғуну, динҹәлмәјә дә еһтијаҹ дујдугларыны сөјләјә биләрләр. Бу доғрудур, анҹаг јенә дә истираһәтә вә Мүгәддәс Китабын охунуб өјрәнмәсинә ајырдығымыз вахты мүгајисә етмәјимиз јахшы оларды. Нәтиҹә ҝөзләнилмәз ола биләр. Әјләнмәк вә истираһәт ваҹиб олса да, онларын да јери олмалыдыр. Бунлар, руһани фәалијјәтимиз үчүн јени гүввә әлдә етмәк мәгсәдилә едилмәлидир. Бир чох телевизија верилишләри вә видео ојунлар инсаны әлдән салдығы һалда, Аллаһын Кәламыны охумаг вә өјрәнмәк ону мөһкәмләндириб ҝүҹләндирир (Мәзмур 19:7, 8).
Бә’зиләри өјрәнмәк үчүн вахты неҹә тапырлар?
9. Јегованын Шаһидләринин 1999-ҹу ил үчүн “Мүгәддәс Јазылары ҝүндәлик арашдырмаг” брошүрасында олан мәсләһәтләрә риајәт етмәк нә үчүн фајдалыдыр?
9 Јегованын Шаһидләринин 1999-ҹу ил үчүн “Мүгәддәс Јазылары ҝүндәлик арашдырмаг” брошүрасынын мүгәддимәсиндә дејилир: “Бу брошүрада олан ҝүндәлик ајәләри вә онлара верилән шәрһләри һәр ҝүн сәһәр тәһлил етмәк чох фајдалы олаҹаг. Өзүнүзү елә һисс едәҹәксиниз ки, санки Даһи Мүәллим Јегова сизи өз нәсиһәтләри илә ојадыр. Иса Мәсиһин һаггында пејғәмбәрҹәсинә, һәр сәһәр Јегованын нәсиһәтләриндән фајдаланан шәхс кими данышылыр: “[Јегова] һәр сабаһ ојандырыр, шаҝирдләр кими ешитсин дејә гулағымы ојандырыр”. Белә нәсиһәтләрин сајәсиндә, “јорғун адама сөзлә тәсәлли верә” билсин дејә Исаја “шаҝирдләрин дили” верилди (Јеш. 30:20; 50:4; Мат. 11:28—30). Һәр сәһәр Аллаһын Кәламындан ҝәлән мәсләһәтләрлә ојандырылмаг, тәкҹә өз проблемләринизин өһдәсиндән ҝәлмәкдә јох, һәмчинин башгаларына көмәк едә билмәниз үчүн, сизә “шаҝирдләрин дилини” верәҹәк”a.
10. Бә’зиләри Мүгәддәс Китабы охумаг вә өјрәнмәк үчүн вахты неҹә тапырлар вә бу онлара һансы фајданы ҝәтирир?
10 Бир чох мәсиһчиләр, һәр сәһәр сүбһдән ҝүндәлик ајәләри вә онлара верилән шәрһләри, еләҹә дә Мүгәддәс Китабы охујуб вә ја өјрәнмәклә бу мәсләһәтләрә риајәт едирләр. Франсада јашајан садиг пионер бир баҹы, һәр сәһәр сүбһдән ојаныр вә Мүгәддәс Китабын охунмасына 30 дәгигә вахт ајырыр. Илләр әрзиндә буну етмәјә она нә көмәк едир? Баҹы дејир: “Охумаг үчүн дәрин һәвәс дујурам вә нә олурса-олсун оху графикимә ҹидди риајәт едирәм!” Охумаг үчүн ҝүнүн һансы саатыны сечсәк дә, ваҹиб олан одур ки, оху графикимизә бағлы галаг. Авропада вә Шимали Африкада 40 илдән артыг пионер хидмәтиндә чалышан Рене Мика дејир: “Мән, 1950-ҹи илдә, һәр ил Мүгәддәс Китабы бүтүнлүклә охумағы гаршыма мәгсәд гојдум вә бу ҝүнә гәдәр буну 49 дәфә етмишәм. Мән, Јараданымла сых мүнасибәти горујуб сахламағым үчүн, бунун һәјати ваҹиб олдуғуну дүшүнүрәм. Аллаһын Кәламы үзәриндә дүшүнмәк, Јегованын әдаләтини вә диҝәр хүсусијјәтләрини даһа да јахшы баша дүшмәкдә мәнә көмәк едир вә мәни һәмишә мөһкәмләндирир”b.
“Вахтлы-вахтында... јемәк пајлары”
11, 12. а) “Садиг нөкәрбашы” һансы руһани “јемәк пајлары” верир? б) Нәјә ҝөрә демәк олар ки, “јемәк пајлары” вахтлы-вахтында верилир?
11 Мүнтәзәм гидаланмаг јахшы физики сағламлыға сәбәб олдуғу кими, Мүгәддәс Китабын мүнтәзәм охунмасы вә өјрәнилмәси дә јахшы руһани сағламлыға сәбәб олур. Луканын Мүждәсиндә Исанын бу сөзләрини охујуруг: “Белә исә вахтлы-вахтында онлара јемәк пајларыны вермәк үчүн ағасынын нөкәрләри үзәринә гојдуғу садиг вә ағыллы нөкәрбашы кимдир?” (Лука 12:42). Артыг 120 илдән чохдур ки, “Ҝөзәтчи Гүлләси”нин вә Мүгәддәс Китаба әсасланан башга нәшрләрин васитәсилә инсанлара “вахтлы-вахтында... јемәк пајлары” верилир.
12 “Вахтлы-вахтында” ифадәсинә диггәт јетирәк. “Даһи Мүәллим” (ЈД) Јегова, өз оғлу вә гул синфи васитәсилә, тә’лим вә давраныш мәсәләләриндә халгына лазыми вахтда јол ҝөстәрир. Санки һамымыз: “Саға јахуд сола сапынҹа”, архамызда “јол будур, бу јолда јеријин” дејән сәс ешидирик (Јешаја 30:20, 21). Бундан әлавә, Мүгәддәс Китабы вә она әсасланан нәшрләри ајрыҹа олараг диггәтлә охујанда, инсанлар һисс едирләр ки, орада ифадә олунан фикирләр конкрет олараг онлара үнванланыб. Бәли, Аллаһ тәрәфиндән верилән мәсләһәт вә рәһбәрлик вахтлы-вахтында ҝәлир вә сынаглар гаршысында таб ҝәтирмәкдә, јахуд мүдрик гәрар гәбул етмәкдә бизә көмәк едир.
Јахшы гидаланмаға вәрдиш един
13. Руһән пис гидаланма вәрдишләриндән бә’зиләри һансылардыр?
13 Вахтлы-вахтында верилән “јемәк пајлары”ндан бүтүнлүклә фајда әлдә едә биләк дејә, јахшы гидаланмаға вәрдиш етмәлијик. Мүгәддәс Китабы охумаг, шәхси өјрәнмә үчүн график тәртиб етмәк вә бу графикә әмәл етмәк чох ваҹибдир. Бәс сизин руһән јахшы гидаланмаг вәрдишиниз вармы, дәриндән шәхси өјрәнмә үчүн мүнтәзәм вахт ајырырсынызмы? Јохса бизим үчүн диггәтлә һазырланан материаллара “санки ајагүстү дадына бахыр кими” садәҹә ҝөз ҝәздирир, бә’зән исә бу вә ја диҝәр “јемәкләри” ҝөздән гачырырсыныз? Руһән јахшы гидаланма вәрдишләри олмадығындан бә’зиләри иманда зәифләмиш, һәтта һәгигәтдән узаглашмышлар (1 Тимотејә 1:19; 4:15, 16).
14. Бизә таныш ҝөрүнән мөвзулары диггәтлә өјрәнмәк нәјә ҝөрә фајдалыдыр?
14 Ола биләр, бә’зи кәсләр артыг әсас тә’лимләри билдикләрини вә һәр мөвзуда тамамилә јени бир шејдән данышылмадығыны дүшүнүрләр. Буна ҝөрә дә, ардыҹыл сурәтдә өјрәнмәји вә јығынҹаглара ҝетмәји лазымсыз сајырлар. Лакин Мүгәддәс Китаб ҝөстәрир ки, билдикләримизин хатырладылмасына еһтијаҹымыз вар (Мәзмур 119:95, 99; 2 Петер 3:1; Јәһуда 5) Јахшы ашпаз бир нечә әсас мәһсуллардан чохлу ләзиз јемәкләр һазырладығы кими, гул синфи дә бизи мүхтәлиф руһани гидаларла гидаландырыр. Һәтта дәфәләрлә мүзакирә етдијимиз мөвзуларын белә, диггәтимизә лајиг инҹәликләри вар. Охудуғумуз материалдан нә гәдәр фајдаланаҹағымыз әсас е’тибары илә ону өјрәнмәк үчүн сәрф етдијимиз вахтдан вә гүввәдән асылыдыр.
Охумагдан вә өјрәнмәкдән әлдә едилән руһани фајдалар
15. Мүгәддәс Китабы охумаг вә өјрәнмәк, Аллаһын Кәламынын даһа баҹарыглы хидмәтчиләри олмагда бизә неҹә көмәк едир?
15 Мүгәддәс Китабы охумагдан вә өјрәнмәкдән әлдә етдијимиз фајдалар сајсыз-һесабсыздыр. Бизә, әсас мәсиһчи вәзифәләримиздән бирини, јә’ни “утанмаға әсасы олмајан вә һәгигәт сөзүнү доғрулугла өјрәдән бир ишчи” олмаға көмәк едир (2 Тимотејә 2:15). Мүгәддәс Китабы нә гәдәр чох охусаг вә өјрәнсәк, ағлымыз да бир о гәдәр Аллаһын дүшүнҹәләри илә долар. О заман биз дә, Павел кими, “Јазылары... [инсанларла] мүзакирә” едиб, Јегованын ҝөзәл нијјәтләри һаггындакы һәгигәти онлара “изаһ вә сүбут” едәрик (Һәвариләрин ишләри 17:2, 3, И—93). Өјрәтмәк габилијјәтимиз артар, сөһбәтләримиз, нитгләримиз вә нәсиһәтләримиз исә руһани ҹәһәтдән даһа мөһкәмләндириҹи олар (Сүлејманын мәсәлләри 1:5).
16. Аллаһын Кәламыны охумаг вә өјрәнмәк һәр биримизә һансы фајданы верир?
16 Бундан әлавә, Аллаһын Кәламынын дәриндән арашдырылмасына һәср етдијимиз вахт, һәјатымызы, бүтүнлүклә Јегованын јоллары илә ујғунлашдырмаға көмәк едәҹәк (Мәзмур 25:4; 119:9, 10; Сүлејманын мәсәлләри 6:20—23). Һәлимлик, сәдагәт кими руһани хүсусијјәтләримиз јахшылашаҹаг вә хошбәхтлијимиз артаҹаг (Тәснијә 17:19, 20; Вәһј 1:3). Мүгәддәс Китабы охујаркән вә өјрәнәркән әлдә етдијимиз биликләри практикада тәтбиг етсәк, һәјатымызда Аллаһын руһунун тә’сирини һисс едәҹәјик вә ҝөрдүјүмүз һәр бир ишдә руһун сәмәрәләри даһа ҝүҹлү тәрздә әкс олунаҹаг (Галатијалылара 5:22, 23).
17. Мүгәддәс Китабы нә гәдәр вә неҹә охумағымыз вә өјрәнмәјимиз Јегова илә мүнасибәтимизә неҹә тә’сир едир?
17 Ән башлыҹасы исә одур ки, башга мәшғулијјәтләрин һесабына “сатын” алынан вә Мүгәддәс Китабын охунуб өјрәнилмәсинә һәср едилән вахт Аллаһла мүнасибәтимизи мөһкәмләндирмәјә көмәк едәҹәк. Павел дуа едирди ки, онун һәмиманлылары “там һикмәт вә руһани идракла Аллаһын ирадәсини бүтүнлүклә” гаврасынлар ки, “Рәббә лајиг шәкилдә һәрәкәт едиб, Ону һәр ҹәһәтдән разы салсынлар” (Колослулара 1:9, 10). “Рәббә лајиг шәкилдә һәрәкәт етмәк” үчүн һәмчинин биз дә “там һикмәт вә руһани идракла Аллаһын ирадәсини бүтүнлүклә гаврамалыјыг”. Мә’лум мәсәләдир ки, Јегованын хејир-дуасыны вә тә’рифини газанмағымыз, әсас е’тибары илә Мүгәддәс Китабы нә гәдәр вә неҹә охумағымыздан вә өјрәнмәјимиздән асылыдыр.
18. Исанын Јәһја 17:3 ајәсиндәки сөзләринә риајәт етсәк, һансы хејир-дуалары аларыг?
18 “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар” (Јәһја 17:3). Бу, Мүгәддәс Китабы өјрәнмәјин ваҹиблијини башгалары да дәрк етсинләр дејә, Јегованын Шаһидләринин тез-тез мүраҹиәт етдикләри ајәләрдән биридир. Әлбәттә, Мүгәддәс Китабы өјрәнмәк бизим өзүмүз үчүн дә ваҹибдир. Ахы әбәди һәјата олан үмидимиз, Јегова вә Оғлу Иса Мәсиһ һаггында олан билијимизи артырмағымыздан асылыдыр. Бунун нә демәк олдуғуну бирҹә тәсәввүр един. Јегова һаггында әбәдијјән билик әлдә едәҹәјик вә һеч заман бунун сону олмајаҹаг! (Ваиз 3:11; Ромалылара 11:33).
Тәкрар үчүн суаллар
• Вахтдан истифадә етмә тәрзимиз нәји ҝөстәрир?
• Мүгәддәс Китабы охумаг вә өјрәнмәк үчүн, вахты һансы мәшғулијјәтләрин һесабына “сатын” ала биләрик?
• Нәјә ҝөрә руһән гидаланма вәрдишимизә диггәт јетирмәлијик?
• Мүгәддәс Јазылары охумаг вә өјрәнмәк һансы фајдалары верир?
[Һашијәләр]
a Ҝөзәтчи Гүлләси Ҹәмијјәти тәрәфиндән нәшр олунуб.
b “Ҝөзәтчи Гүлләси”нин 1995-ҹи ил 1 мај нөмрәсиндә 20, 21-ҹи сәһифәләрдә “Онлар Мүгәддәс Китабы нә вахт охујурлар вә бу онлара һансы фајданы ҝәтирир” адлы мәгаләјә бахын.
[26-ҹы сәһифәдәки шәкилләр]
Мүгәддәс Китабы мүнтәзәм олараг охумаг вә өјрәнмәк, “һәгигәт сөзүнү доғрулугла” өјрәтмәјимизә имкан јарадар
[28 вә 29-ҹу сәһифәләрдәки шәкилләр]
Һәјатымызын мәшғулијјәтләрлә долу олмасына бахмајараг, руһани ишләри јаддан чыхармасаг дәјәрли фајдалар ҝөрәрик