Мүгәддәс руһун вердији ҝүҹлә ширникдириҹи тәсирләрә вә руһ дүшкүнлүјүнә синә ҝәририк
«Мүгәддәс руһ үзәринизә ҝәләндә сиз гүввәт алаҹагсыныз» (ҺӘВ. ИШ. 1:8).
1, 2. Иса өз давамчыларына һансы гүввәни верәҹәјини вәд етмишди вә нәјә ҝөрә онлар бу гүввәјә еһтијаҹ дујурдулар?
ИСА билирди ки, онун бүтүн ҝөстәришләринә риајәт етмәк үчүн давамчыларынын өз ҝүҹләри кифајәт етмәјәҹәк. Тәблиғ етмәк тапшырығынын нә гәдәр бөјүк, дүшмәнләрин нә гәдәр гүдрәтли вә инсан бәдәнинин нә гәдәр зәиф олдуғуну нәзәрә алсаг, тамамилә ајдын иди ки, онлара инсан гүввәсиндән үстүн олан гүввә лазым олаҹагды. Ҝөјә галхмаздан өнҹә Иса шаҝирдләрини әмин етди: «Мүгәддәс руһ үзәринизә ҝәләндә сиз гүввәт алаҹагсыныз вә Јерусәлимдә, бүтүн Јәһудеја вә Самаријада, һәтта јерин уҹгарларынадәк мәним шаһидим олаҹагсыныз» (Һәв. иш. 1:8).
2 Бу вәд ерамызын 33-ҹү илинин Әллинҹи ҝүн бајрамында — мүгәддәс руһ Иса Мәсиһин давамчыларына бүтүн Јерусәлимдә тәблиғ етмәк гүввәтини верәндә јеринә јетмәјә башлады. Бу ишин гаршысыны һеч ким вә һеч нә ала билмәди! (Һәв. иш. 4:20). Биз дә дахил олмагла, Исанын садиг давамчыларынын һәмишә, дүз «дөврүн јекунуна кими» Аллаһын вердији бу гүввәјә сон дәрәҹәдә еһтијаҹы олаҹагды (Мат. 28:20).
3. а) Мүгәддәс руһла гүввәт арасында һансы фәрг вар? Изаһ един. б) Јеһованын вердији гүввәт бизә неҹә көмәк едир?
3 Иса шаҝирдләринә вәд етмишди ки, ‘мүгәддәс руһ үзәрләринә ҝәләндә онлар гүввәт алаҹаглар’. «Руһ» вә «гүввәт» фәргли анлајышлардыр. Аллаһын руһу, јәни фәал гүввәси Онун ирадәсинин һәјата кечирилмәси үчүн инсанлара вә әшјалара јөнәлдилән вә онлара тәсир ҝөстәрән енержидир. Гүввәт исә «бир иши ҝөрә билмәк габилијјәти вә ја нәтиҹә әлдә етмәк баҹарығы»дыр. Гүввәт мүәјјән нәтиҹәнин әлдә олунмасына еһтијаҹ јаранана гәдәр кимдәсә вә ја нәдәсә фәалијјәтсиз гала биләр. Буна ҝөрә дә мүгәддәс руһу аккумулјатору јүкләјән електрик ҹәрәјанла, гүввәти исә јүкләнмиш аккумулјаторда һәрәкәтсиз шәкилдә олан енержи илә мүгајисә етмәк олар. Мүгәддәс руһ васитәсилә Јеһованын Өз хидмәтчиләринә вердији гүввәт һәр биримизә һәср олунмағымыза ујғун јашамаға, еләҹә дә үзләшдијимиз пис тәсирләрлә мүбаризә апармаға көмәк едир. (Микеја 3:8; Колослулара 1:29 ајәләрини оху.)
4. Бу мәгаләдә нә мүзакирә олунаҹаг вә нәјә ҝөрә?
4 Мүгәддәс руһ васитәсилә Јеһованын бизә вердији гүввәт өзүнү неҹә бүрузә верир? Бу гүввәт мүхтәлиф вәзијјәтләрдә давранышымызы вә һәрәкәтләримизи неҹә мүәјјән едир? Аллаһа сәдагәтлә хидмәт етмәк истәдијимиз үчүн биз бир чох манеәләрлә үзләширик: бу ја Шејтан вә онун пис системи, ја да ки гејри-камиллијимиз уҹбатындан јаранан чәтинликләр ола биләр. Бундан сонра да мәсиһчи кими фәалијјәт ҝөстәрмәк, хидмәтдә мүнтәзәм олмаг вә Јеһова илә сых мүнасибәтләри горумаг үчүн бу ҹүр манеәләрин өһдәсиндән ҝәлмәк ваҹибдир. Ҝәлин мүгәддәс руһун ширникдириҹи тәклифләрә «јох» демәјә, јорғунлуг вә руһ дүшкүнлүјүнүн өһдәсиндән ҝәлмәјә бизә неҹә көмәк етдијини нәзәрдән кечирәк.
Ширникдириҹи тәклифләр
5. Дуа бизә неҹә ҝүҹ верә биләр?
5 Иса шаҝирдләрини: «Гојма сынаглар гаршысында јыхылаг, амма бизи Шәрирдән хилас ет», — дејә дуа етмәјә өјрәтмишди (Мат. 6:13). Јеһова садиг хидмәтчиләринин бу кими хаһишләрини һеч вахт јерә салмыр. Башга вахт исә Иса демишди: ‘Ҝөјдәки Ата ондан истәјәнләрә мүгәддәс руһундан верәҹәк’ (Лука 11:13). Неҹә дә руһландырыҹыдыр ки, Јеһова салеһлик јолунда галмағымыза көмәк етмәк үчүн өз мүгәддәс руһуну биздән әсирҝәмәјәҹәјини вәд едир! Лакин бу, о демәк дејил ки, Аллаһ бизи бүтүн сынаглардан һифз едәҹәк (1 Кор. 10:13). Әксинә, сынагларла үзләшәндә биз даһа тәкидлә дуа етмәлијик (Мат. 26:42).
6. Шејтанын ширникдириҹи тәклифләринә Исанын вердији ҹаваблар нәјә әсасланырды?
6 Иблисин ширникдириҹи тәклифләринә ҹаваб олараг Иса Мүгәддәс Јазылардан ајәләр ситат ҝәтирирди. О демишди: «Јазылыб... Һәмчинин јазылыб... Рәдд ол, Шејтан! Ахы јазылыб: “Аллаһын Јеһоваја сәҹдә гыл вә јалныз Она ибадәт ет”». Јеһоваја вә Онун Кәламына олан мәһәббәт Исаны Шејтанын бүтүн ширникдириҹи тәклифләрини рәдд етмәјә тәшвиг етди (Мат. 4:1—10). Иса бир нечә дәфә вә гәтијјәтлә Шејтанын бүтүн тәклифләринә «јох» дејәндә о, ону тәрк етди.
7. Мүгәддәс Китаб бизә Иблисин ширникдириҹи тәклифләрини рәдд етмәјә неҹә көмәк едир?
7 Әҝәр Иса Иблисин тәклифләрини рәдд етмәк үчүн һәр дәфә Мүгәддәс Јазылара истинад едирдисә, онда бизим белә етмәли олдуғумуз даһа ваҹиб дејилми? Бәли, Иблисин вә онун гурдуғу фәндләрин гурбаны олмамаг үчүн биз, илк нөвбәдә, Аллаһын нормалары һаггында өјрәнмәјә вә онлары һәјатымызда там тәтбиг етмәјә гәти гәрарлы олмалыјыг. Бир чох инсанлар Мүгәддәс Јазылары өјрәнмәјә, һәмчинин Аллаһын мүдриклијини вә салеһлијини дәрк едиб ону гијмәтләндирмәјә башлајандан сонра онларда бу нормалара ујғун јашамаг истәји јараныб. Һәгигәтән дә, «Аллаһын сөзү» инсана ‘үрәјинин дүшүнҹә вә нијјәтләрини’ ајырд етмәк баҹарығыны верир (Ибр. 4:12). Инсан нә гәдәр чох Мүгәддәс Јазылары охујуб үзәриндә дүшүнсә, бир о гәдәр Јеһованын «һәгигәтини» ‘дәрк едәҹәк’ (Дан. 9:13). Бу сәбәбдән зәиф ҹәһәтләримизлә бағлы олан ајәләрин үзәриндә дүшүнмәк хүсусилә ваҹибдир.
8. Мүгәддәс руһ алмаг үчүн нә етмәлијик?
8 Иса Иблисин ширникдириҹи тәклифләринин һамысыны рәдд етмәјә мүвәффәг олду, чүнки о нәинки Мүгәддәс Јазылары билирди, һәм дә ‘мүгәддәс руһла долу’ иди (Лука 4:1). Биздә дә белә гүввә вә баҹарыг олсун дејә Јеһованын бизи мүгәддәс руһла тәмин етмәк үчүн тәгдим етдији һәр шејдән там јарарланараг Она јахынлашмалыјыг (Јаг. 4:7, 8). Јәни Мүгәддәс Китабы арашдырмалы, дуа етмәли вә һәмиманлыларымызла үнсијјәтдә олмалыјыг. Бир чохлары мәсиһчи фәалијјәти илә там мәшғул олмағын ҝәтирдији фајданы өз тәҹрүбәләриндә ҝөрмүшләр. Бәли, бу, онлара бүтүн диггәтләрини руһән мөһкәмләндирән фикирләрә јөнәлтмәјә көмәк едир.
9, 10. а) Јашадығын әразиндә ән чох һансы сынагларла үзләшәҹәјин јәгиндир? б) Дүшүнмәк вә дуа јорғун олдуғун һалларда сынагларла мүбаризә апармаға неҹә ҝүҹ верир?
9 Шәхсән сән һансы пис арзуларла мүбаризә апармалы олмусан? Үрәјиндә нә вахтса һәјат јолдашын олмадығы бир кәслә ешгбазлыг етмәк истәји јараныбмы? Әҝәр субајсанса, иманына шәрик олмајан инсанла ҝөрүшмәк вә ја аилә гурмаг тәклифини гәбул етмәк арзусу сәндә баш галдырыбмы? Мәсиһчи телевизора бахаркән вә ја Интернетдән истифадә едәркән бирдән-бирә онда әдәбсиз бир шејә бахмаг истәји јарана биләр. Сән дә бу кими вәзијјәтләрлә үзләшмисәнми? Әҝәр үзләшмисәнсә, онда бу заман неҹә давранмысан? Јахшы оларды ки, бир сәһв аддымын башга сәһв аддыма, нәтиҹәдә исә ҹидди ҝүнаһа неҹә ҝәтирә биләҹәјинин үзәриндә дүшүнәсән (Јаг. 1:14, 15). Јеһоваја бирҹә дәфә сәдагәтсизлик ҝөстәрмәјин Она, јығынҹаға вә аилә үзвләринә нә гәдәр ағры-аҹы ҝәтирәҹәјини бир дүшүн. Анҹаг Аллаһын принсипләринә садиг галсан, виҹданын тәмиз олаҹаг. (Мәзмур 119:37; Сүлејманын мәсәлләри 22:3 ајәләрини оху.) Белә сынагларла үзләшәндә онлара мүгавимәт ҝөстәрмәк үчүн Јеһовадан ҝүҹ-гүввәт диләмәјә гәти гәрарлы ол.
10 Иблисин Исаја етдији ширникдириҹи тәклифләри илә әлагәдар бир шеји дә јадда сахламалыјыг. Иблис Исаја башга вахт јох, мәһз сәһрада 40 ҝүн аҹ галандан сонра јахынлашды. Шүбһә јохдур ки, Иблис Исанын нөгсансызлығыны сынаға чәкмәк үчүн буну әла «фүрсәт» һесаб едирди (Лука 4:13). Шејтан бизим дә нөгсансызлығымызы сынамаг үчүн әлверишли вахт ахтарыр. Буна ҝөрә дә руһани ҹәһәтдән һәмишә мөһкәм олмағымыз олдугҹа ваҹибдир. Шејтан, адәтән, һәдәфинин зәиф олдуғуну ҝөрдүјү вахт она һүҹум едир. Буна ҝөрә дә биз өзүмүзү јорғун, јахуд руһдан дүшмүш һисс едәндә Јеһовадан көмәк вә мүгәддәс руһ диләмәјә һәмишәкиндән даһа әзмли олмалыјыг (2 Кор. 12:8—10).
Јорғунлуг вә руһ дүшкүнлүјү
11, 12. а) Нәјә ҝөрә чохлары бу ҝүн руһ дүшкүнлүјүнә гапылырлар? б) Руһ дүшкүнлүјүнә гапылмамаға бизә нә көмәк едәҹәк?
11 Гејри-камил олдуғумуз үчүн вахташыры руһ дүшкүнлүјүнә гапылырыг. Ҝәрҝин зәманәдә јашамағымыз вәзијјәтимизи даһа да ағырлашдырыр. Һәгигәтән дә, бу дөвр бәшәријјәтин үзләшдији ән чәтин дөврдүр (2 Тим. 3:1—5). Һар-Маҝедон јахынлашдыгҹа игтисади, емосионал вә диҝәр тәзјигләр артыр. Буна ҝөрә дә тәәҹҹүблү дејил ки, бәзиләринә аилә үзвләринин гајғысына галмаг вә онлары доландырмаг ҝүнү-ҝүндән чәтинләшир. Онлар өзләрини јорғун, үзҝүн, бәзән дә тамамилә әлдән дүшмүш һисс едирләр. Әҝәр бүтүн бунлар сәнә дә танышдырса, ҝәрҝинликлә неҹә мүбаризә апара биләрсән?
12 Иса шаҝирдләринә көмәкчи, јәни Аллаһын мүгәддәс руһуну верәҹәјинә сөз вермишди. (Јәһја 14:16, 17 ајәләрини оху.) Мүгәддәс руһ Каинатда ән гүдрәтли гүввәдир. Онун васитәсилә Јеһова бизә ‘дүшүндүјүмүздән гат-гат артыг’ ҝүҹ верә биләр (Ефес. 3:20). Бу гүввәнин көмәјилә, Павелин тәбиринҹә десәк, биз һәтта ‘һәр тәрәфдән сыхышдырылсаг’ белә, ‘инсан ҝүҹүндән үстүн олан гүдрәт’ алырыг (2 Кор. 4:7, 8). Јеһова бизи стрессдән азад едәҹәјини демир, лакин әмин едир ки, руһу васитәсилә бизә онунла мүбаризә апармаға ҝүҹ верәҹәк (Филип. 4:13).
13. а) Бир ҝәнҹ баҹымыз чәтин сынагла мүбаризәдә ҝүҹ-гүввәни һарадан әлдә едир? б) Сән дә бу кими нүмунәләрлә растлашмысанмы?
13 Даими пионер кими хидмәт едән 19 јашлы Стефанинин нүмунәсинә нәзәр салаг. Бу баҹы 12 јашында инсулт кечирмишди вә һәкимләр онун бејниндә шиш ашкар етмишдиләр. О вахтдан бәри Стефани ики дәфә әмәлијјат олунуб вә шүа мүалиҹәси алыб. Бундан сонра кечирдији даһа ики инсулт нәтиҹәсиндә онун сол тәрәфи гисмән ифлиҹ олуб вә ҝөрмә габилијјәти зәифләјиб. Стефани ҝүҹүнү даһа ваҹиб һесаб етдији ишләр үчүн — мәсиһчи ҝөрүшләри вә тәблиғ хидмәти үчүн горумалы олур. Лакин о, Јеһованын мүгәддәс руһ васитәсилә она мүхтәлиф ҹүр көмәк етдијини һисс едир. Стефани өзүнү һалсыз һисс едәндә Мүгәддәс Китаба әсасланан нәшрләрдәки һәмиманлыларымызын нүмунәләри она ҝүҹ-гүввәт верир. Баҹы вә гардашлар ону тәк гојмурлар, һәмишә она дајаг олурлар: она мәктублар ҝөндәрир, ҝөрүшләрдән әввәл вә сонра ону руһландырырлар. Һәгигәтлә марагланан инсанлар исә Стефанинин евинә ҝәлиб өз дәрсләрини бурада кечирләр вә бунунла она миннәтдарлыгларыны ифадә едирләр. Бүтүн бунлара ҝөрә Стефани Јеһоваја үрәкдән миннәтдардыр. Мәзмур 41:3 ајәси онун севимли ајәсидир вә о инаныр ки, бу ајә онун үзәриндә дә јеринә јетир.
14. Биз руһдан дүшәндә нә етмәмәлијик вә нәјә ҝөрә?
14 Јорғун оланда вә ја дахилимиздә ҝәрҝинлик һисс едәндә һеч вахт дүшүнмәмәлијик ки, бунун өһдәсиндән ҝәлмәјин ән јахшы үсулу бәзи руһани мәшғулијјәтләримизә сон гојмагдыр. Бу, гәтијјән јахшы гәрар олмазды. Нәјә ҝөрә? Чүнки шәхси вә аиләви өјрәнмә, тәблиғ хидмәти вә јығынҹаг ҝөрүшләри кими ишләр васитәсилә бизә јени енержи верән мүгәддәс руһ алырыг. Мәсиһчи фәалијјәти һәмишә тәравәтләндириҹидир. (Матта 11:28, 29 ајәләрини оху.) Јәгин, өзүмүз дә фикир вермишик ки, баҹы вә гардашлар чох вахт ҝөрүшләрә тагәтсиз һалда ҝәлирләр, анҹаг евә ҝетмәк вахты ҝәләндә онлар өзләриндә јенидән ҝүҹ-гүввәт һисс едирләр, санки, онларын руһани аккумулјатору тәзәдән јүкләниб.
15. а) Јеһова мәсиһчи һәјатынын асан олаҹағыны вәд едибми? Ҹавабынызы Мүгәддәс Китаба әсасландырын. б) Аллаһ бизә нә вәд едиб вә бунунла әлагәдар һансы суал јараныр?
15 Бу, о демәк дејил ки, Мәсиһин шаҝирди олмаг чох асандыр. Әслиндә, садиг мәсиһчи олмаг үчүн чохлу сәј тәләб олунур (Мат. 16:24—26; Лука 13:24). Лакин Јеһова мүгәддәс руһ васитәсилә тагәтдән дүшмүш инсана ҝүҹ верә биләр. Јешаја пејғәмбәр јазыр: «Рәббә үмид бағлајанларса јени гүввәт алар, ганад ачыб гартал кими јүксәкләрә учар, гачанда тагәтдән дүшмәзләр, јол ҝедиб јорулмазлар» (Јешаја 40:29—31). Буна ҝөрә дә өзүмүзә нөвбәти суалы вермәлијик: «Мәни әслиндә һансы мәшғулијјәтләр јорур?»
16. Јорғунлуға вә руһ дүшкүнлүјүнә бәзән нә сәбәб ола биләр вә бунлары неҹә арадан галдырмаг олар?
16 Јеһованын Кәламы бизи ‘даһа ваҹиб шејләри ајырд етмәјә’ тәшвиг едир (Филип. 1:10). Мәсиһчи һәјат тәрзини узун мәсафәјә гачышла мүгајисә едәрәк Аллаһдан илһам алан Павел нәсиһәт едир: «Ҝәлин бизә ағырлыг едән һәр шеји... чыхараг вә дөзүмлә гачараг гаршымыздакы мәсафәни гәт едәк» (Ибр. 12:1). Башга сөзлә десәк, бизи әлдән салан лазымсыз мәшғулијјәтләрдән гачмалы вә артыг јүкдән азад олмалыјыг. Ола билсин, бизләрдән бәзиләри бош вахтларынын олмамасына бахмајараг, һәлә үстәлик чијинләринә әлавә јүк дә ҝөтүрмәјә чалышырлар. Беләликлә, әҝәр сән чох вахт өзүндә ҝәрҝинлик вә јорғунлуг һисс едирсәнсә, онда фикирләш, ишинә, сәјаһәтләрә, идмана вә диҝәр мәшғулијјәтләрә нә гәдәр вахт вә гүввә сәрф едирсән. Мүдриклик вә тәвазөкарлыг имканларымызын мәһдуд олдуғуну бојнумуза алмаға вә лазымсыз мәшғулијјәтләрин сајыны азалтмаға тәшвиг етмәлидир.
17. Бәзиләринин руһдан дүшмәсинә сәбәб нәдир, лакин Јеһова бизи нәјә әмин едир?
17 Ола билсин, бәзиләримизин руһдан дүшмәсинә сәбәб бу пис системин сонунун фикирләшдијимиз вахтда ҝәлмәмәсидир (Сүл. мәс. 13:12). Әҝәр биз дә белә дүшүнүрүксә, гој Һабаггуг 2:3 ајәсиндәки сөзләр бизи руһландырсын: «Бу ҝөрүнтү мүәјјән вахт үчүндүр, баша чатмаға тәләсир вә јалан дејил. Ҝеҹикмиш кими ҝөрүнсә дә, ҝөзләјин, һөкмән ҝәләҹәк, ҝеҹикмәјәҹәк». Јеһова бизи әмин едир ки, бу системин сону дүз Онун тәјин етдији вахтда ҝәләҹәк!
18. а) Һансы вәдләр сәни мөһкәмләндирир? б) Нөвбәти мәгаләдә нә мүзакирә олунаҹаг?
18 Јеһованын бүтүн садиг хидмәтчиләри јорғунлуғун вә руһ дүшкүнлүјүнүн олмајаҹағы вә һамымызын ҝәнҹ вә сағлам олаҹағы вахты бөјүк сәбирсизликлә ҝөзләјирләр (Әјј. 33:25). Лакин һәтта бу ҝүн биз тәравәтләндириҹи руһани ишләрлә мәшғул олдуғумуз заман мүгәддәс руһун көмәји сајәсиндә дахилимиздә гүввә һисс едә биләрик (2 Кор. 4:16; Ефес. 3:16). Јол вермә ки, јорғунлуг сәни әбәди хејир-дуалардан мәһрум етсин. Буҝүнкү сынагларымыз — бизи јолдан чыхармаға чалышан һәр шеј, јорғунлуг вә руһ дүшкүнлүјү кечиб ҝедәҹәк. Әҝәр инди кечмәсә дә, Аллаһын јени дүнјасында мүтләг кечәҹәк. Нөвбәти мәгаләдә биз мүгәддәс руһун тәгибләрин, әтрафымыздакы инсанларын зәрәрли тәсиринин вә бир чох башга чәтинликләрин өһдәсиндән ҝәлмәјимиз үчүн бизә неҹә ҝүҹ вердијини арашдыраҹағыг.
Неҹә ҹаваб верәрдиниз?
• Мүгәддәс Китабы охумағымызын сајәсиндә биз неҹә ҝүҹ әлдә едирик?
• Дуа вә дүшүнмәк бизә неҹә ҝүҹ верир?
• Руһ дүшкүнлүјүнүн сәбәбләрини неҹә арадан галдырмаг олар?
[24-ҹү сәһифәдәки шәкил]
Мәсиһчи ҝөрүшләри бизә руһани ҝүҹ верир