Е’тигад азадлығы

Еһтимал ки, сиз е’тигад азадлығыны чох гијмәтләндирирсиниз. Бу ҹүр азадлыг сајәсиндә, Јер күрәсинин 6 милјард сакини күлли мигдарда е’тигад вә инама маликдир. Аллаһын хәлг етдији сајсыз-һесабсыз варлыглар бир-бириндән рәнҝи, формасы, гурулушу, дады, әтри вә сәси илә фәргләндији кими, мүхтәлиф фикир вә е’тигадлар да һәјатымызы парлаг, долғун вә мараглы едә биләр. Чох вахт буна бәнзәр мүхтәлифлик инсанларын һәјатына хүсуси ҝөзәллик верир (Мәзмур 104:24).

АММА еһтијатлы олмаг лазымдыр. Бә’зи фикирләр фәргли олмагла бәрабәр, һәм дә тәһлүкәлидир. Мәсәлән, ХХ әсрин башланғыҹында бә’зи инсанлар һесаб едирдиләр ки, јәһудиләр вә масонлар “христиан мәдәнијјәтини мәһв етмәји, өзләринин дүнјәви гајда-ганунларыны јаратмағы вә онлара рәһбәрлик етмәји” планлашдырырлар. Бу ҹүр шајиәләрин мәнбәләриндән бири, “Сион мүдрикләринин Протоколлары” адлы сәнәд иди. Бу “Протоколларда” дејилирди ки, ҝуја јәһудиләр, “диҝәр милләтләрин вар-дөвләтини бир зәрбә илә мәһв етмәк” мәгсәдилә верҝиләрин артмасыны, силаһланманы вә нәһәнҝ инһисарлары дәстәкләмәји, һәмчинин тәһсил системиндә рәһбәрлији әлә кечирмәклә “гејри-јәһудиләри авам һејванлара чевирмәји” планлашдырырлар. Һәтта, үсјан баш верәрдисә јәһуди мүдрикләринин дүшмәнләрин күлүнү ҝөјә совура билмәләри үчүн, дөвләтләрин пајтахтларыны бирләшдирән јералты дәмирјолу тикмәк планы һаггында да дејилирди.

Әлбәттә ки, бүтүн бунлар јәһудиләрә гаршы әдавәт руһуну гызышдырмаға јөнәлдилән јаланлар иди. Британ музејинин ишчиси Марк Ҹоунз гејд едир: “Бу мә’насыз шајиәләр Русијадан јајылмышды вә бу барәдә мәгалә илк дәфә 1903-ҹү илдә орада чап олунмушду”. 1920-ҹи ил мајын 8-дә һәмин мә’лумат Лондонда нәшр олунан “Тајмс” гәзетинин сәһифәләриндә чап едилмишди. Бир илдән артыг вахт кечдикдән сонра, “Тајмс” гәзетиндә “Протоколларын” сахта олдуғуна даир сүбутлар ҝәтирилирди. Лакин пис нијјәтлә едилән шајиәләр өз ишини ҝөрдү. Ҹоунзун сөзләринә ҝөрә, “белә ујдурмаларын јајылмасынын гаршысыны алмаг чәтиндир”. Инсанлар белә шајиәләрә инанмаға башлајан кими, онларда әдавәт вә нифрәтлә долу тәһлүкәли е’тигадлар јараныр. ХХ әсрин тарихи ҝөстәрир ки, бу әһвал-руһијјә чох вахт фәлакәтә сәбәб олур (Сүлејманын мәсәлләри 6:16—19).

Е’тигад вә һәгигәт

Әҝәр бир адамын е’тигады дүз дејилсә, бу о демәк дејил ки, һәмин адам гәсдән јалана инаныр. Һәрдән биз садәҹә олараг һәр шеји ахыра гәдәр баша дүшмүрүк. Нечә-нечә инсанлары, дүзҝүн сандыглары һәрәкәтләр уҹбатындан вахтсыз өлүм јахалајыб? Бунунла јанашы, биз чох вахт садәҹә олараг истәдијимиз шејә инанырыг. Бир профессор дејирди ки, һәтта алимләр дә “јаратдыглары әсәрләрин вурғуну олурлар”. Бунун сајәсиндә исә сағлам дүшүнҹәни итирирләр. Сонра бу инсанлар һәјатларыны, сәһв нөгтеји-нәзәрләринә мә’насыз сүбутлар ахтармаға һәср едирләр (Јеремја 17:9).

Бу кими һаллар, күлли мигдарда зиддијјәтләр тәшкил едән дин саһәсиндә дә баш верир (1 Тимотејә 4:1; 2 Тимотејә 4:3, 4). Кимин исә Аллаһа мөһкәм инамы вар. Башгасынын фикринә ҝөрә исә, һәмин адамын инамы әсассыздыр. Бә’зиләри, инсанларда өлүмдән сонра јашајан өлмәз ҹанын олдуғуна әминдирләр. Диҝәрләри санырлар ки, өлүмлә инсанын мөвҹудлуғуна бүсбүтүн сон гојулур. Ајдын мәсәләдир ки, бу кими тамамилә зидд е’тигадлар ејни вахтда һәгигәт ола билмәз. Буна ҝөрә, е’тигадынызын һәгигәтә әсасландығына әмин олмаг вә истәдијиниз шеји доғру кими гәләмә вермәмәк мүдриклик олмазмы? (Сүлејманын мәсәлләри 1:5). Буну неҹә етмәк олар? Бу суал нөвбәти мәгаләдә мүзакирә едиләҹәкдир.

[3-ҹү сәһифәдәки шәкил]

“Сион мүдрикләринин Протоколлары”ны ифша едән мәгалә. 1921-ҹи ил.