Јеһова јахшылығын ән бөјүк нүмунәсидир
“Ордуларын Рәббинә шүкр един, чүнки Рәбб јахшыдыр” (ЈЕРЕМЈА 33:11).
1. Етдији јахшылыға ҝөрә нә үчүн Аллаһы иззәтләндирмәјә тәшвиг һисси дујуруг?
ЈЕҺОВА һәдсиз дәрәҹәдә јахшы Аллаһдыр. “Онун јахшылығы нә бөјүк!” - дејә Зәкарја пејғәмбәр нида етмишдир (Зәкарја 9:17). Бәли, јер үзүндә һәјатын бизә севинҹ ҝәтирмәси үчүн Аллаһын етдији һәр шејдә јахшылыг әкс олунур (Тәквин 1:31). Каинаты јарадаркән Аллаһын тә’јин етдији мүрәккәб ганунларын һамысыны һеч заман дәрк едә билмәрик (Ваиз 3:11; 8:17). Лакин Каинат һаггында әлдә етдијимиз ҹүз’и билик бизи, етдији јахшылыглара ҝөрә Аллаһы иззәтләндирмәјә тәшвиг едир.
2. Јахшылығын нә олдуғуну неҹә изаһ едәрдиниз?
2 Јахшылыг нәдир? Мүгәддәс Китабда бу ифадә хејирхаһлыға ҹәһд етмәк мә’насында истифадә олунур. Јахшылыг, јалныз бүтүн нөгсанлары истисна етмир. Руһун сәмәрәсинин бир һиссәси олан јахшылыг мүсбәт кејфијјәтдир (Галатијалылара 5:22, 23). Биз хејирхаһлыг едәндә, башгалары үчүн фајдалы ишләр ҝөрәндә јахшылыг етмиш олуруг. Јашадығымыз бу дүнјада бә’зиләринин јахшылыг сандыглары шејә башгалары бир пислик кими бахырлар. Әҝәр сүлһ вә хошбәхтлик ичиндә јашамаг истәјириксә, јахшылыг мәсәләсиндә бир норма олмалыдыр. Бәс бу норманы тә’јин етмәк сәлаһијјәтинә ким маликдир?
3. Јарадылыш 2:16, 17 ајәләриндә јахшылыг нормаларына даир нә дејилир?
3 Јахшылыг нормасыны Аллаһ тә’јин едир. Бәшәр тарихинин башланғыҹында мәһз Јеһова илк инсана бујурмушдур: “Бағдакы бүтүн ағаҹларын бәһрәсиндән истәјәндә јејә биләрсән. Анҹаг хејирлә шәри билмә ағаҹынын мејвәсиндән јемә, чүнки ондан јејән ҝүн сән һөкмән өләҹәксән” (Јарадылыш 2:16, 17, МКШ). Бәли, хејир вә шәр һаггындакы биликләр үчүн инсанлар Јарадана мүраҹиәт етмәлидирләр.
Јахшылығын һәдсиз тәзаһүрү
4. Адәм ҝүнаһ ишләтдикдән сонра, Аллаһ бәшәријјәт үчүн нә етди?
4 Адәм ҝүнаһ ишләдәрәк Аллаһын хејир вә шәр нормаларыны мүәјјән етмәк һүгугуну инкар едәндә, санки бүтүн бәшәријјәт үчүн әбәди хошбәхтлик вә камиллик үмиди итирилди (Тәквин 3:1-6). Лакин Адәмин ҝүнаһы вә өлүмү мирас алан өвладлары дүнјаја ҝәлмәмишдән әввәл, Аллаһ ҝәләҹәк камил Зүрријјәт һаггында габагҹадан хәбәр верди. “Гәдим илан” олан Шејтан Иблисә мүраҹиәт едәрәк, Јеһова сөјләди: “Сәнинлә гадын арасына вә сәнин зүрријјәтинлә онун зүрријјәти арасына дүшмәнчилик гојаҹағам; о сәнин башыны әзәҹәк вә сән онун топуғуну чалаҹагсан” (Вәһј 12:9; Тәквин 3:15). Јеһова ҝүнаһлы бәшәријјәтин ҝүнаһларыны јумаг нијјәтиндә иди. Јеһова, әзиз Оғлунун фидијә гурбанлығына иман ҝәтирәнләрә хилас олмаг имканы вермәклә, һәдсиз јахшылығыны тәзаһүр етдирди (Матта 20:28; Ромалылара 5:8, 12).
5. Пислијә мејл едән үрәји мирас алмыш олсаг да, нәјин сајәсиндә мүәјјән дәрәҹәдә јахшылыг едә биләрик?
5 Адәмин ҝүнаһы уҹбатындан, әлбәттә ки, пислијә мејл едән үрәји мирас алмышыг (Тәквин 8:21). Лакин хошбәхтликдән, јахшылығы мүәјјән дәрәҹәдә тәзаһүр етдирмәкдә Јеһова бизә көмәк едир. Онун гијмәтли Мүгәддәс Јазыларындан өјрәндикләримизә әмәл етмәји давам етдирмәклә, биз јалныз “хилас ҝәтирән һикмәтә” наил олуб, “һәр ҹүр хејирли иш үчүн тәҹһиз” едилмәмишик, һәмчинин Онун ҝөзүндә јахшы сајылан ишләри дә едә биләрик (2 Тимотејә 3:14-17). Бунунла белә, Мүгәддәс Китабын нәсиһәтләринин бизә фајда ҝәтирмәси вә јахшылыг едә билмәјимиз үчүн мәзмурчунун дүшүнҹә тәрзинә малик олмалыјыг. О охујурду: “Сән [Јеһова] јахшысан вә јахшылыг едирсән; ганунларыны мәнә өјрәт” (Мәзмур 119:68).
Јеһованын јахшылығы јүксәлдилир
6. Давудун сәрәнҹамына ҝөрә сандыг Јерусәлимә ҝәтирилдикдән сонра левилиләрин охудуғу маһныда һансы сөзләр варды?
6 Гәдим Исраилин падшаһы Давуд, Јеһованын јахшылығыны е’тираф едир вә Онун рәһбәрлијини ахтарырды. Давуд дејирди: “Рәбб јахшы вә доғрудур; бунун үчүн ҝүнаһкарлара јолу өјрәдир” (Мәзмур 25:8). Аллаһ тәрәфиндән исраиллиләрә верилән нәсиһәт өзүнә, ики даш лөвһә үзәринә јазылан вә мүгәддәс әһд сандығында сахланан Он әмри дахил едирди. Давудун сәрәнҹамына ҝөрә сандығы Исраилин пајтахты олан Јерусәлим шәһәринә ҝәтирдикдән сонра левилиләрин охудуғу маһныда “Рәббә шүкр един, чүнки о јахшыдыр; чүнки инајәти әбәдидир” сөзләри варды (1 Тарихләр 16:34, 37-41). Охујан левилиләрин ағзындан бу сөзләри ешитмәк неҹә дә валеһедиҹи иди!
7. Сандығы Мүгәддәсләрин мүгәддәси дејилән јерә гојдугдан вә мә’бәди Јеһоваја һәср етмәк үчүн Сүлејманын сөјләдији дуадан сонра нә баш верди?
7 Һәмин иззәт сөзләри, Давудун оғлу Сүлејманын тикдирдији, Јеһованын мә’бәдинин ачылышы заманы да сөјләнди. Әһд сандығы јениҹә тикилмиш мә’бәдин Мүгәддәсләрин мүгәддәси дејилән јеринә гојулдугдан сонра, левилиләр Јеһованы, “чүнки о јахшыдыр; чүнки инајәти әбәдидир” сөзләри илә иззәтләндирмәјә башладылар. О заман мә’бәд, Јеһованын иззәтини вә иштиракыны фөвгәлтәбии тәрздә тәмсил едән булудла долду (2 Тарихләр 5:13, 14). Мә’бәди Јеһоваја һәср етмәк үчүн Сүлејманын сөјләдији дуадан сонра, “атәш ҝөјдән енди вә јандырылан тәгдимәни вә гурбанлары јејиб битирди”. Буну ҝөрән “бүтүн Исраил оғуллары... үзләри үстә јерә, даш дөшәмәнин үзәринә гапаныб сәҹдә гылдылар вә: Чүнки о јахшыдыр; чүнки инајәти әбәдидир, дејәрәк Рәббә шүкр етдиләр” (2 Тарихләр 7:1-3). Исраиллиләр 14 ҝүнлүк бајрамдан сонра, “Рәббин Давуда вә Сүлејмана вә халгы Исраилә ҝөстәрдији јахшылыгдан долајы севинҹли вә јахшы үрәкли олараг” евләринә гајытдылар (2 Тарихләр 7:10).
8, 9. а) Исраиллиләр Јеһованы јахшылығына ҝөрә иззәтләндирсәләр дә, нәһајәтдә һансы јолла ҝетдиләр? б) Јеремја васитәсилә Јерусәлим һаггында габагҹадан нә сөјләнмишди вә бу пејғәмбәрлик неҹә јеринә јетди?
8 Әфсуслар олсун ки, исраиллиләр Аллаһа охудуглары иззәт маһныларына мүвафиг јашамаға давам етмәдиләр. Вахт өтдүкҹә, Јәһуданын сакинләри Јеһованы јалныз “додаглары илә” сајмаға башладылар (Ишаја 29:13). Аллаһ тәрәфиндән тә’јин едилмиш јахшылыг нормаларына риајәт етмәк әвәзинә, пислик ишләтмәјә башладылар. Бу писликләр нәдән ибарәт иди? Бу халг бүтпәрәстликдә, әхлагсызлыгда, фағырлары инҹитмәкдә вә башга ағыр ҝүнаһларда тагсыркар олдулар. Бу сәбәбдән, б. е. ә. 607-ҹи илдә Јерусәлим мәһв едилди, Јәһуданын халгы исә Бабилә әсир апарылды.
9 Аллаһ өз халгыны бу јолла ҹәзаландырды. Лакин О, Јеремја пејғәмбәрин васитәсилә габагҹадан билдирди ки, Јерусәлимдә “Ордуларын Рәббинә шүкр един, чүнки Рәбб јахшыдыр, чүнки инајәти әбәдидир” дејән инсанларын сәси ешидиләҹәји бир вахт ҝәләҹәк (Јеремја 33:10, 11). Елә дә олду. Әрази 70 ил бош галдыгдан сонра, б. е. ә. 537-ҹи илдә јәһудиләрин галығы Јерусәлимә гајытды (Јеремја 25:11; Даниел 9:1, 2). Онлар Морија дағында, әввәлләр мә’бәдин јерләшдији јердә гурбанҝаһы бәрпа етдиләр вә орада гурбанлар ҝәтирмәјә башладылар. Мә’бәдин тәмәли, гајытдыглары вахтын икинҹи илиндә гојулду. Неҹә дә севинҹли вахт иди! Езра јазырды: “Иншаатчылар Рәбб мә’бәдинин тәмәлини атдыглары заман, Рәббә һәмд етмәк үчүн, Исраил падшаһы Давудун тәртибинә ҝөрә, палтарларыны ҝејинмиш олараг каһинләри боруларла вә Асаф оғуллары Левилиләри синҹләрлә дурдурдулар. Вә: Чүнки јахшыдыр, чүнки Исраил үзәриндә инајәти әбәдидир, дејәрәк Рәббә һәмд вә шүкр едәрәк гаршылыглы тәрәннүм етдиләр” (Езра 3:1-11).
10. Мәзмурун 118-ҹи фәслинин илк вә сон ајәләриндә һансы ваҹиб сөзләр вар?
10 Јеһованын јахшылығыны шөһрәтләндирән буна бәнзәр сөзләрә бир чох мәзмурларда раст ҝәлинир. Һәмин мәзмурлар арасында, јәһуди аиләләринин Пасха бајрамынын сонунда охудуглары 118-ҹи Мәзмуру да ҝөстәрмәк олар. Бу Мәзмур “Рәббә шүкр един, чүнки јахшыдыр; чүнки инајәти әбәдидир” сөзләри илә башлајыр вә тамамланыр (Мәзмур 118:1, 29). Чох ҝүман ки, бу, ерамызын 33-ҹү илиндә, Иса Мәсиһин өлүмүндән габаг, ахшам садиг һәвариләри илә охудуғу сонунҹу һәмд сөзләри олмушдур (Матта 26:30).
“Иззәтини мәнә ҝөстәр”
11, 12. Өз иззәтинин парылтысыны ҝөстәрәркән, Аллаһ Мусаја һансы сөзләрлә мүраҹиәт етди?
11 Јеһованын јахшылығы илә мәрһәмәти арасындакы бағлылыг илк дәфә, Езрадан јүзилликләрлә габаг әкс олунмушдур. Исраиллиләр сәһрада бузова ибадәт етдикдән вә тагсыркарлар ҹәзаландырылгдан тез сонра, Муса Јеһовадан хаһиш етди: “Нијаз едирәм, өз иззәтини мәнә ҝөстәр”. Јеһова билирди ки, Муса Онун үзүнү ҝөрүб сағ гала билмәз, она ҝөрә дә деди: “Мән бүтүн јахшылығымы сәнин өнүндән кечирәҹәјәм” (Чыхыш 33:13-20).
12 Ертәси ҝүн Сина дағында, Јеһованын јахшылыглары Мусанын өнүндән кечирилди. О заман Муса Аллаһын иззәтинин парылтысыны ҝөрдү вә белә сөзләр ешитди: “Јеһова, Јеһова, чох аҹыјан вә лүтф едән, ҝеҹ гәзәбләнән вә инајәти вә һәгигәти чох олан, минләрә инајәтини сахлајан, һагсызлығы вә ҝүнаһы вә сучу бағышлајан вә сучлуну әсла сучсуз чыхармајан, аталарын ҝүнаһыны оғулларда вә оғулларын оғулларында, үчүнҹү вә дөрдүнҹү нәсилдә ахтаран Аллаһ”дыр (Чыхыш 34:6, 7). Бу сөзләр ҝөстәрир ки, Јеһованын јахшылығы, Онун мәрһәмәти вә шәхсијјәтинә хас олан башга ҹәһәтләрлә дә әлагәлидир. Бу хүсусијјәтләри диггәтлә нәзәрдән кечирәрәк, јахшылыг тәзаһүр етдирмәјә даир көмәк әлдә едәҹәјик. Әввәлҹә, Аллаһын јахшылығынын тәсвири заманы ики дәфә хатырланан ҝөзәл хүсусијјәтә диггәт јетирәк.
Инајәти чох олан Аллаһ
13. Аллаһын јахшылығыны тәсвир едәркән һансы кејфијјәт ики дәфә хатырланыр вә бу нә үчүн мүнасибдир?
13 “Јеһова... инајәти... чох олан, минләрә инајәтини сахлајан” Аллаһдыр. “Мәрһәмәт” кими тәрҹүмә олунан гәдим јәһуди сөзү, һәмчинин “дәјишмәз мәһәббәт” мә’насыны да дашыјыр. Бу, Аллаһын Мусаја мүраҹиәтиндә ики дәфә хатырланан јеҝанә кејфијјәтдир. Бу чох мүнасибдир, чүнки Јеһованын әсас хүсусијјәти мәһәббәтдир! (1 Јәһја 4:8). Јеһоваја аид олан - “чүнки о јахшыдыр; чүнки инајәти әбәдидир” - иззәт сөзләри бу кејфијјәти гејд едир.
14. Аллаһ јахшылығы вә инајәти хүсусән кимә ҝөстәрир?
14 Јеһованын јахшылығы, инајәтинин чох олмасында да тәзаһүр олунур. Бу, Она һәср олунмуш садиг хидмәтчиләринә ҝөстәрдији зәриф гајғысында хүсусилә ҝөрүнүр (1 Петер 5:6, 7). Јеһованын Шаһидләри тәсдиг едә биләрләр ки, Јеһова, Ону севәнләрә вә Она хидмәт едәнләрә “инајәтини сахлајан” Аллаһдыр (Чыхыш 20:6). Аллаһын Оғлуну инкар етмәклә, ҹисмани Исраил Јеһованын инајәтиндән, јә’ни дәјишмәз мәһәббәтиндән мәһрум олду. Лакин бүтүн халглардан олан мәсиһчиләрә Аллаһын ҝөстәрдији јахшылыг вә дәјишмәз мәһәббәт һеч заман түкәнмәјәҹәкдир (Јәһја 3:36).
Јеһова чох аҹыјан вә лүтф едәндир
15. а) Мусанын Сина дағында ешитдији тәсвир һансы сөзләрлә башланыр? б) Аҹымаг һисси өзүнә нәји дахил едир?
15 Јеһованын јахшы хүсусијјәтләри һаггында Мусанын Сина дағында ешитдији садаланма - “Јеһова, Јеһова, чох аҹыјан вә лүтф” едәндир сөзләри илә башланыр. “Чох аҹыјан” кими тәрҹүмә олунан гәдим јәһуди сөзү дахили органлара вә “бәтин” сөзүнә аид едилә биләр. Нәтиҹә е’тибары илә, аҹымаг һисси өзүнә, инсан гәлбинин дәринлијиндә әмәлә ҝәлән зәриф мәрһәмәти дахил едир. Буна бахмајараг, мәрһәмәт садәҹә олараг сәмими шәфгәт демәк дејил. Бу һисс, башгаларынын изтирабларыны јүнҝүлләшдирмәк үчүн бизи һәрәкәт етмәјә тәшвиг етмәлидир. Мисал үчүн, севән мәсиһчи ағсаггаллары анлајырлар ки, лазым ҝәләрсә һәмиманлылара “севинҹ илә” мәрһәмәт ҝөстәрмәк лазымдыр (Ромалылара 12:8, КМ; Јагуб 2:13; Јәһуда 22, 23).
16. Јеһованы нәјә ҝөрә лүтфкар адландырмаг олар?
16 Аллаһын јахшылығы Онун “лүтф едән” олмасында да тәзаһүр олунур. Бу кејфијјәт, башгаларынын һиссләринә һәссаслыгла јанашмағы вә хүсусән дә ашағы вәзифә тутанлара сәмими гәлбдән јахшылыг етмәји тәләб едир. Садиг хидмәтчиләринә давранышы илә, Јеһова лүтфкарлығын нүмунәсини ҝөстәрир. Мәсәлән, мәләкләрин көмәји илә Аллаһ, јаша долмуш пејғәмбәри Даниели лүтфкар тәрздә руһландырды вә бакирә Мәрјәмә, Исанын анасы олмаг шәрәфинә лајиг ҝөрүлдүјүнү сөјләди (Даниел 10:19; Лука 1:26-38). Јеһованын Мүгәддәс Китабын сәһифәләриндән бизә лүтфкарлыгла мүраҹиәт етмәсини, Онун хидмәтчиләри олан бизләр чох гијмәтләндиририк. Бу ҹүр јахшылығына ҝөрә Ону иззәтләндирир вә башгалары илә давранышымызда лүтфкар олмаға чалышырыг. Руһани ҹәһәтдән баҹарыглы гардашлар һәмиманлыларыны “һәлимлик руһу илә” ислаһ едәндә, буну јумшаглыгла, тәвазөкарлыгла етмәјә чалышырлар (Галатијалылара 6:1).
Ҝеҹ гәзәбләнән Аллаһдыр
17. Јеһованын “ҝеҹ гәзәбләнән” олмасы нәјә ҝөрә рифаһымыза хидмәт едир?
17 “Ҝеҹ гәзәбләнән” Аллаһдыр. Бу сөзләр диггәти, Јеһованын јахшылығынын даһа бир тәрәфинә јөнәлдир. Јеһова бизим сәһвләримизә сәбирлә јанашыр вә ҹидди чатышмазлыглары арадан галдырыб, руһән бөјүмәмиз үчүн чохлу вахт верир (Јагуб 5:14, 15; Ибраниләрә 5:12-6:3). Аллаһын сәбри, Она һәлә ибадәт етмәјәнләрин дә рифаһына хидмәт едир. Онларын Падшаһлыг һаггындакы хәбәрә һај вермәјә вә төвбә етмәјә һәлә дә вахтлары вар (Ромалылара 2:4). Лакин Јеһова сәбирли олса да, Синај дағында гызыл бузова ибадәт едән исраиллиләрин нүмунәсиндән ҝөрдүјүмүз кими, бә’зән јахшылыг Ону гәзәбини тәзаһүр етдирмәјә дә тәшвиг едир. Тезликлә Аллаһ, Шејтанын аллаһсыз системини мәһв едәркән, гәзәбини даһа артыг дәрәҹәдә билдирәҹәкдир (Һезекиел 38:19, 21-23).
18. Һәгигәт мәсәләсиндә Јеһова илә инсан рәһбәрләри арасында һансы фәрг мөвҹуддур?
18 “Јеһова... һәгигәти чох олан” Аллаһдыр. Јеһова, гызыл тахт-таҹлар вә’д едән вә сөзүнүн үстүндә дурмајан инсан рәһбәрләриндән неҹә дә фәргләнир! Лакин Јеһованын хидмәтчиләри, Онун илһамландырдығы Кәламында јазыланлара әмин ола биләрләр. Аллаһын “һәгигәти чох” олдуғундан, Онун вә’дләринә һәмишә е’тибар едә биләрик. Јахшы олдуғуна ҝөрә, сәмави Атамыз руһани һәгигәти бизә бол-бол ачараг, бу барәдәки хаһишләримизә һәмишә ҹаваб верир (Мәзмур 43:3; 65:2).
19. Јеһова, төвбә едән ҝүнаһкарлара гаршы јахшылығыны ҝөркәмли тәрздә неҹә тәзаһүр етдирир?
19 “Јеһова... һагсызлығы вә ҝүнаһы вә сучу бағышлајан” Аллаһдыр. Јахшы олдуғу үчүн, Јеһова, төвбә едән ҝүнаһкарлары бағышламаға һазырдыр. Биз, Исанын гурбанлығы васитәсилә ҝүнаһларын бағышланмасыны мүмкүн етдији үчүн, сөзсүз ки, сәмави Атамыза чох миннәтдарыг (1 Јәһја 2:1, 2). Бәхтијарыг ки, фидијәјә иман ҝәтирән һәр бир кәс, Јеһова илә јахшы мүнасибәт вә Онун вә’д етдији јени дүнјада сонсуз һәјат әлдә едә биләр. Бүтүн бунлардан сонра, бәшәријјәтә тәзаһүр етдирдији јахшылығына ҝөрә Јеһоваја неҹә иззәт вермәјәсән! (2 Петер 3:13).
20. Аллаһын пислијә ҝөз јуммамасы нәдән ҝөрүнүр?
20 Јеһова “сучлуну әсла сучсуз чыхармајан” Аллаһдыр. Әслиндә, Јеһованы јахшылығына ҝөрә иззәтләндирмәк үчүн бу да бир сәбәбдир. Нәјә ҝөрә? Она ҝөрә ки, јахшылығын дәјәрли ҹәһәтләриндән бири, бу хүсусијјәтин пислијә ҝөз јуммамасыдыр. Бундан әлавә, “Рәбб Исанын гүдрәтли мәләкләри илә аловлу атәш ичәрисиндә ҝөјдән зүһур етдији заман” Аллаһын гисасы, “Аллаһы танымајан вә Өзү барәсиндәки Мүждәјә итаәт етмәјәнләрә” горхулудур (2 Салониклиләрә 1:6-9). Бундан сонра Јеһованын сағ галан хидмәтчиләри һәјатдан там мә’нада севинәҹәкләр вә “јахшылығын дүшмәни” олан аллаһсыз адамлар онлара мане олмајаҹаглар (2 Тимотејә 3:1-3).
Јахшылыгда Јеһовадан нүмунә ҝөтүрүн
21. Биз нәјә ҝөрә јахшылыг етмәлијик?
21 Шүбһәсиз ки, јахшылыгларына ҝөрә Јеһованы иззәтләндирмәјә вә миннәтдарлығымызы билдирмәјә сәбәбләримиз чохдур. Онун хидмәтчиләри олараг, јахшылыг етмәк үчүн әлимиздән ҝәләни етмәли дејиликми? Ахы һәвари Павел һәмиманлылары, “севимли өвладлар кими, Аллаһы тәглид” етмәјә тәшвиг едирди (Ефеслиләрә 5:1). Сәмави Атамыз һәмишә јахшылыг едир, биз дә елә давранмалыјыг.
22. Нөвбәти мәгаләдә нәји нәзәрдән кечирәҹәјик?
22 Әҝәр биз өзүмүзү Јеһоваја бүтүнлүклә һәср етмишиксә, сөзсүз ки, јахшылыгда Ону тәглид етмәјә ҝүҹлү истәјимиз вар. Адәмин ҝүнаһлы нәсли олдуғумуз үчүн, бу кејфијјәти тәзаһүр етдирмәк бизә о гәдәр дә асан дејил. Лакин нөвбәти мәгаләдән бунун нә үчүн белә ваҹиб олдуғуну анлајаҹағыг. Һәмчинин јахшылығын јүксәк нүмунәси олан Јеһованы һансы мүхтәлиф саһәләрдә вә нә үчүн тәглид етмәјин ваҹиб олдуғуна да бахаҹағыг.
Сиз неҹә ҹаваб верәрдиниз?
• Јахшылыг нә демәкдир?
• Јеһованын јахшылығы, Мүгәддәс Китабда јазылмыш һансы сөзләрдә ҝөрүнүр?
• Јеһованын јахшылығынын бә’зи тәзаһүрү һансылардыр?
• Јеһованын ҝөстәрдији јахшылыг нүмунәсини нә үчүн тәглид етмәлијик?
[20-ҹи сәһифәдәки шәкил]
Иззәт сөзләринә мүвафиг јашамадыглары үчүн, гәдимдә Јеһова өз халгыны ҹәзаландырырды.
[20-ҹи сәһифәдәки шәкил]
Садиг галыг Јерусәлимә гајытды.
[21-ҹи сәһифәдәки шәкил]
Муса, Аллаһын јахшылығы барәдә ҝөзәл сөзләр ешитди.
[23-ҹү сәһифәдәки шәкил]
Јеһованын бизә олан јахшылығы, Онун Мүгәддәс Китабын сәһифәләриндән бизә неҹә мүраҹиәт етмәсиндән ҝөрүнүр.