Јеһоваја сабит үрәклә хидмәт един
“Үрәјим сабитдир, еј Аллаһ, үрәјим сабитдир” (МӘЗМУР 57:7).
1. Биз, Давудун малик олдуғу әминлији нәјә ҝөрә әлдә едә биләрик?
ЈЕҺОВА, Онун садиг хидмәтчиләри кими мәсиһчи јолуну һеч заман тәрк етмәмәк үчүн бизә сабитлик верә биләр (Ромалылара 14:4). Буна ҝөрә дә биз, мәзмурчу Давудун малик олдуғу әминлији әлдә едә биләрик. О охујурду: “Үрәјим сабитдир, еј Аллаһ” (Мәзмур 108:1). Әҝәр бизим дә үрәјимиз “сабитдирсә”, о бизи, Аллаһа һәср олунмамыза мүвафиг тәрздә јашамаға тәшвиг едәҹәкдир. Јеһованын гүввәсинә вә рәһбәрлијинә ҝүвәндикдә исә, нөгсансызлығын сарсылмаз, гәтијјәтли вә иманлы мүһафизәчиләри кими, “һәр заман Рәббин ишиндә тәрәгги” едә биләрик (1 Коринфлиләрә 15:58).
2, 3. Павелин 1 Коринфлиләрә 16:13 ајәсиндә јаздығы нәсиһәтин мәғзи нәдир?
2 Һәвари Павелин, Исанын гәдим Коринфдә јашајан давамчыларына јаздығы мәктубунда, шүбһәсиз ки, мүасир мәсиһчиләрә дә тәтбиг едилән нәсиһәтләри охујуруг: “Ајыг олун, иманда сабит дурун, мәрданә вә мөһкәм олун” (1 Коринфлиләрә 16:13). Јунан мәтниндә бу ҝөстәришләрин һамысы индики заманда ишләнир вә фасиләсиз фәалијјәтә тәшвиг едир. Бәс бу нәсиһәтин мәғзи нәдир?
3 Биз Иблисә гаршы дуруб, Аллаһла јахын мүнасибәтләрдә галараг руһән “ајыг ола” биләрик (Јагуб 4:7, 8). Јеһоваја е’тибарымыз, вәһдәтдә галмағымыза вә мәсиһчи иманында сабит дурмағымыза көмәк едир. Бизим һамымыз - кишиләр, еләҹә дә гадынлар - Падшаһлығын тәблиғчиләри кими Аллаһа хидмәт етмәк үчүн “мәрданә” олуруг (Мәзмур 68:11). Һәр заман сәмави Атамыздан Онун ирадәсини јеринә јетирмәк үчүн гүввә истәјәндә “мөһкәм олуруг” (Филипилиләрә 4:13).
4. Мәсиһчи кими вәфтиз олунмамыза нә сәбәб олмушдур?
4 Өзүмүзү Јеһоваја бүтүнлүклә һәср етдијимиз вә бу аддымы суда вәфтиз олунмагла символлашдырдырдығымыз заман, һәгиги иманы гәбул етдијимизи ҝөстәрдик. Бәс вәфтиз олунмағымыза сәбәб нә олду? Әввәлҹә Аллаһын Кәламындан дәгиг билик әлдә етдик (Јәһја 17:3). Бу исә, иманымызы инкишаф етдирмәјә көмәк етди вә әввәлләр ишләтдијимиз ҝүнаһлара ҝөрә төвбәјә тәшвиг етди (Һәвариләрин ишләри 3:19; Ибраниләрә 11:6). Бундан сонра дөнмәк ҝәлир: биз, пис әмәлләрдән әл чәкиб, Аллаһын ирадәсинә ујғун јашамаға башладыг (Ромалылара 12:2; Ефеслиләрә 4:23, 24). Бунун ардынҹа дуада Јеһоваја үрәкдән һәср олундуг (Матта 16:24; 1 Петер 2:21). Аллаһдан тәмиз виҹдан хаһиш етдик вә өзүмүзү Она һәср етмәјимизә ишарә олараг вәфтиз олундуг (1 Петер 3:21). Бу аддымлар үзәриндә дүшүнмәјимиз, һәср олунмамыза мүвафиг јашамаг вә Јеһоваја сабит үрәклә хидмәт етмәк үчүн даима гүввә сәрф етмәјин ваҹиблијини һәр заман хатырламагда бизә көмәк едәҹәк.
Дәгиг биликләрә ҹан атмаға давам един
5. Нәјә ҝөрә Мүгәддәс Китаб биликләрини бундан сонра да әлдә етмәлијик?
5 Аллаһа һәср олунмамыза мүвафиг јашамаг үчүн, иманы мөһкәмләдән Мүгәддәс Китаб биликләрини әлдә етмәји давам етдирмәлијик. Аллаһын һәгигәти илә илк дәфә таныш оларкән, руһани гиданы неҹә дә мәмнунлугла гәбул едирдик! (Матта 24:45-47). Һәмин “јемәкләр” чох дадлы иди, руһән гидаланмағымызда онларын ваҹиб ролу олмушдур. Руһани ҹәһәтдән бәсләјиҹи гиданы бундан сонра да гәбул етмәк ваҹибдир: о заман биз, Јеһоваја һәср олунмуш хидмәтчиләрә лајиг сабит үрәји горујуб сахлаја биләрик.
6. Һәгигәтә ҝөрә сәмими миннәтдарлыг инкишаф етдирмәкдә сизә неҹә көмәк едибләр?
6 Мүгәддәс Китабдан әлдә етдијимиз биликләри дәриндән анламаг асан дејил. Буну, бөјүк гүввә тәләб едән хәзинә ахтарышлары илә мүгајисә етмәк олар. Лакин газандығымыз мүкафат чәкдијимиз әмәјә дәјәр - биз, “Аллаһ билијини” әлдә едирик! (Сүлејманын мәсәлләри 2:1-6). Падшаһлығын тәблиғчиси Мүгәддәс Китабы сизинлә илк дәфә өјрәнәндә, јәгин ки, “Әбәди һәјата апаран билик” китабындан истифадә едирди. Бу тәдрис курсуну баша вурмаг үчүн, олсун ки, мүәјјән вахт тәләб олунуб, бә’зи фәсилләри исә, еһтимал ки, бир-нечә дәфәјә арашдырмысыныз. Фәсилләрдә ҝәтирилән Мүгәддәс Китаб ајәләри охунур вә изаһ едилирди. Һансыса фикир чәтин ҝөрүндүкдә, ону сизә изаһ едирдиләр. Сизинлә Мүгәддәс Китаб өјрәнмәси кечирән адам јахшы һазырлашырды, мүгәддәс руһ һаггында дуа едир вә һәгигәтә ҝөрә сәмими миннәтдарлыг һисси инкишаф етдирмәкдә сизә көмәк едирди.
7. Инсан һәгигәти башгаларына өјрәтмәк үчүн неҹә һазырлыг кечир?
7 Павелин јаздығы, “Аллаһын Кәламы һаггында тә’лим алан, тә’лим верәнлә һәр ҹүр не’мәти бөлүшдүрсүн” сөзләриндән ҝөрүндүјү кими, бу ҹүр сә’јләр өзүнү доғрулдурду (Галатијалылара 6:6). Бурадакы јунан мәтни она ишарә едир ки, Аллаһын Кәламындакы тә’лимләр, “Рәбб јолунда тә’лим” алан кәсләрин ағлында вә үрәјиндә көк салыр. Бу ҹүр тә’лим алмагла, сиз башгалары үчүн дә мүәллим ола биләрсиниз (Һәвариләрин ишләри 18:25). Һәср олунманыза садиг галманыз үчүн, Аллаһын Кәламыны мүнтәзәм охујараг руһани сағламлығынызы вә сабитлијинизи горумалысыныз (1 Тимотејә 4:13; Титуса 1:13; 2:2).
Төвбә етдијинизи вә дөндүјүнүзү јадда сахлајын
8. Аллаһа мәгбул тәрздә давранмагда бизә нә көмәк едәр?
8 Һәгигәти өјрәндијиниз, төвбә едиб Мәсиһин фидијә гурбанлығына әсасән Аллаһын сизи бағышладығыны билдијиниз заман неҹә јүнҝүллүк һисс етдијинизи јадда сахлајырсынызмы? (Мәзмур 32:1-5; Ромалылара 5:8; 1 Петер 3:18). Сөзсүз ки, әввәлки ҝүнаһлы јола гајытмаг истәмирсиниз (2 Петер 2:20-22). Лакин Аллаһа мәгбул тәрздә давранмаг, һәср олунмамыза мүвафиг јашамаг вә Јеһоваја һәмишә сәдагәтлә хидмәт етмәк үчүн, илк нөвбәдә һәр вахт дуа етмәк ваҹибдир (2 Петер 3:11, 12).
9. Пис ишләрдән дөндүкдән сонра һансы јолла ҝетмәк лазымдыр?
9 Пис ишләрдән дөнәрәк, сабит үрәји горумагда Аллаһдан көмәк ахтармаға давам един. Сиз, демәк олар ки, јанлыш јол илә ҝедирдиниз, лакин сонра е’тибарлы хәритәнин көмәји илә дүзҝүн јолу тапдыныз. Бир даһа јолдан сапмајын. Аллаһын рәһбәрлијинә ҝүвәнмәјә давам един вә әбәди һәјата апаран јолда галмаға гәтијјәтлә һазыр олун (Ишаја 30:20, 21; Матта 7:13, 14).
Һәср вә вәфтиз олундуғунузу һеч заман унутмајын
10. Аллаһа һәср олунмамызла әлагәдар нәји јадда сахламалыјыг?
10 Јадда сахлајын ки, дуада Јеһоваја, Она әбәдијјәт боју сәдагәтлә хидмәт етмәјә сөз верәрәк өзүнүзү һәср етмисиниз (Јәһуда 20, 21). Һәср олунма, мүгәддәс мәгсәд үчүн ајрылмаг мә’насыны дашыјыр (Левилиләр 15:31; 22:2). Аллаһа һәср олунма, мүвәггәти бағланан мүгавилә дејил. Бу, һәмчинин инсанлар гаршысында мәс’улијјәт дашымаг мә’насыны да вермир. Сиз өзүнүзү Каинатын Һакиминә һәср етмисиниз, буна мүвафиг олараг јашамаг үчүн исә, Аллаһа өмрүнүз боју садиг галмалысыныз. Бәли, “јашајырыгса, Рәбб үчүн јашајырыг; өлүрүксә, Рәбб үчүн өлүрүк” (Ромалылара 14:7, 8). Хошбәхтлијимиз, Аллаһын ирадәсинә итаәт етмәјимиздән вә үрәјимиздә сабитлији горујараг Она хидмәт етмәјимиздән асылыдыр.
11. Вәфтизиниз вә онун мә’насы барәдә хатырламаныз нәјә ҝөрә ваҹибдир?
11 Аллаһа сәмими гәлбдән һәср олунманыза ишарә олараг вәфтиз олундуғунуз барәдә һеч заман унутмајын. Сиз зор ҝүҹүнә вәфтиз едилмәмисиниз, бу гәрары сиз шәхсән гәбул етмисиниз. Инди сиз өз ирадә азадлығынызы һәјатыныз боју Аллаһын ирадәси илә ујғунлашдырмаға һазырсынызмы? Сиз тәмиз виҹдан барәдә Аллаһа мүраҹиәт етмисиниз вә Она һәср олунманыза ишарә олараг вәфтиз олунмусунуз. Һәср олунманыза мүвафиг јашајараг, тәмиз виҹданынызы горујун, Јеһова да сизә бол-бол хејир-дуа верәҹәк (Сүлејманын мәсәлләри 10:22).
Ирадәниз әһәмијјәт кәсб едир
12, 13. Бизим ирадәмиз һәср вә вәфтиз олунмамызла неҹә бағлыдыр?
12 Бүтүн дүнјада милјонларла инсанлар һәср вә вәфтиз олунараг хејир-дуалар алырлар. Аллаһа һәср олунмамызы суда вәфтизлә символлашдыранда, әввәлки һәјат тәрзимиз үчүн өлүрүк, амма ирадә азадлығындан имтина етмирик. Лазыми тә’лими алдыгдан сонра, көнүллү сурәтдә өзүмүзү дуада Јеһоваја һәср едир вә вәфтиз олунуруг. Амма бунун үчүн, Аллаһын ирадәсинин нәдән ибарәт олдуғуну билмәли вә сонра бу ирадәни шүурлу тәрздә һәјата кечирмәлијик (Ефеслиләрә 5:17). Бунунла биз, көнүллү сурәтдә дүлҝәрлик сәнәтини атыб, вәфтиз олан вә өзүнү бүтүнлүклә сәмави Атасынын ирадәсини јеринә јетирмәјә һәср едән Исаны тәглид едирик (Мәзмур 40:7, 8; Јәһја 6:38-40).
13 Јеһова Аллаһын ирадәсинә әсасән, Онун Оғлу “әләмләрлә камала” јетишмәли иди. Буна ҝөрә дә Иса өз ирадәси илә бу изтираблара сәдагәтлә дөзмәли иди. О, “ҝүҹлү фәрјадла вә ҝөз јашлары илә дуалар вә хаһишләр етмиш вә Аллаһ горхусу сајәсиндә ешидилмишди” (Ибраниләрә 2:10, 18; 5:7, 8). Јеһованын гаршысында буна бәнзәр еһтирамлы горху һисси дујуругса, биз дә әмин ола биләрик ки, “ешидиләҹәјик” вә Јеһова сабит вә сәдагәтли Шаһидләр олараг галмағымыза көмәк едәҹәк (Ишаја 43:10).
Үрәјиниздә сабитлији горуја биләрсиниз
14. Мүгәддәс Китабы нәјә ҝөрә һәр ҝүн охумалыјыг?
14 Иманда сабит галмагда вә бунунла да Аллаһа һәср олунманыза мүвафиг јашамагда сизә нә көмәк едә биләр? Аллаһын Кәламыны даһа дәриндән анламаг мәгсәди илә Мүгәддәс Китабы һәр ҝүн охујун. “Садиг вә ағыллы гул” бизи һәмишә мәһз буна тәшвиг едир. Бу ҹүр мәсләһәт она ҝөрә верилир ки, Аллаһын һәгигәтиндә даима ирәлиләјәрәк һәср олунмамыза мүвафиг јашаја биләк. Әҝәр Јеһованын тәшкилаты биләрәкдән јалан тә’лимләри мүдафиә етсәјди, нә Јеһованын Шаһидләринә, нә дә онларын тәблиғ етдикләри кәсләрә Мүгәддәс Китабы охумаг һеч заман мәсләһәт ҝөрүлмәзди.
15. а) Гәрарлар гәбул едәркән нәји јадда сахламаг лазымдыр? б) Нәјә ҝөрә мәсиһчиләр үчүн иш икинҹи дәрәҹәли јери тутур?
15 Гәрарлар гәбул едәркән, Аллаһа һәср олундуғунуз барәдә һәмишә хатырлајын. Мәсәлән, гәрарлар сизин ишинизлә бағлы ола биләр. Ишинизин, Аллаһа иззәт ҝәтирмәкдә сизә көмәк етмәсинә чалышырсынызмы? Үмуми ҝөтүрсәк, иш саһибләри мәсиһчиләрин е’тибарлы вә баҹарыглы ишчиләр олдугларыны билсәләр дә, ону да ҝөрүрләр ки, Јеһованын Шаһидләри шөһрәтпәрәст дејилләр вә даһа јүксәкмәваҹибли вәзифә тутмаға чалышараг башгалары илә рәгиблик етмирләр. Иш ондадыр ки, Шаһидләр зәнҝинлијә, шөһрәтә, нүфуза вә ја һакимијјәтә наил олмаг мәгсәдиндә дејилләр. Аллаһа һәср олунмасына мүвафиг јашајан кәсләр үчүн ән ваҹиб иш Аллаһын ирадәсини јеринә јетирмәкдир. Бу ҹүр инсанлар ишә, чөрәк пулу газанмаг үсулу - икинҹи дәрәҹәли әһәмијјәт кәсб едән иш кими бахырлар. Һәвари Павел кими, онлар үчүн ән ваҹиби мәсиһчи хидмәтидир (Һәвариләрин ишләри 18:3, 4; 2 Салониклиләрә 3:7, 8; 1 Тимотејә 5:8). Падшаһлығын мараглары сизин һәјатынызда да ваҹиб јери тутурму? (Матта 6:25-33).
16. Һәддиндән артыг нараһатлыглар Аллаһа һәср олунмамыза мүвафиг јашамағымыза мане олурса, нә етмәк олар?
16 Һәгигәти тапана кими бә’зиләрини мүхтәлиф нараһатлыглар үстәләјирди. Лакин Падшаһлыг һаггындакы һәгигәти гәбул етдикдән сонра, онларын үрәкләри бөјүк севинҹ, Аллаһа миннәтдарлыг вә мәһәббәтлә долмушдур! Һәмин вахтдан е’тибарән әлдә етдикләри хејир-дуалар үзәриндә дүшүнмәк, сөзсүз ки, онлара Јеһоваја һәср олунмаларына мүвафиг јашамаға көмәк едәҹәк. Диҝәр тәрәфдән, бә’зән тиканлар биткинин бөјүмәсинә вә бәһрә ҝәтирмәсинә мане олдуғу кими, јашадығымыз индики системә хас проблемләр уҹбатындан јаранан һәдсиз нараһатлыглар да “кәламы боғур”са, онда нә етмәли? (Лука 8:7, 11, 14; Матта 13:22; Марк 4:18, 19). Әҝәр буна бәнзәр шејләрин сизинлә вә ја аилә үзвләринизлә баш вердијини һисс едирсинизсә, Јеһоваја ҝүвәнин вә мәһәббәтдә, һәмчинин миннәтдарлыг һиссиндә бөјүмәнизә көмәк ҝөстәрмәси үчүн дуа един. Әҝәр сиз гајғыларынызы Онун үзәринә гојсаныз, О, сизә дәстәк олаҹаг вә ҝүҹ верәҹәкдир ки, үрәјиниздә сабитлији горујараг бундан сонра да Она бәхтијарҹасына хидмәт едәсиниз (Мәзмур 55:22; Филипилиләрә 4:6, 7; Вәһј 2:4).
17. Ағыр сынаглара неҹә таб ҝәтирмәк олар?
17 Јеһова Аллаһа һәср олунан заман дуа етдијиниз кими, һәмишә дуа етмәјә давам един (Мәзмур 65:2). Сәһв һәрәкәт етмәк һәвәсиниз јаранан вә ја чәтин сынагларла гаршылашан заман Аллаһын рәһбәрлијини ахтарын вә бу рәһбәрлијә риајәт етмәк үчүн көмәк һаггында дуа един. Имана малик олмағын ваҹиблији һаггында хатырлајын, ахы шаҝирд Јагуб јазырды: “Әҝәр сизләрдән биринин [сынаглара таб ҝәтирмәк үчүн] һикмәти әксикдирсә, һәр кәсә ҹомәрдликлә вә ҝилејләнмәјәрәк верән Аллаһдан диләсин, она вериләҹәкдир. Амма гој иманла диләсин, һеч шүбһә етмәсин. Чүнки шүбһә едән, күләјин галдырдығы вә тәлатүмә ҝәтирдији дәниз далғасына бәнзәр. Гој белә бир адам дүшүнмәсин ки, Рәббдән бир шеј алаҹагдыр. Мүтәрәддид адам етдији һеч бир шејдә сабит дејил” (Јагуб 1:5-8). Әҝәр сынаглар дәфедилмәз ҝөрүнүрсә, онда әмин олун ки, “сиз һәр инсанын башына ҝәләндән башга бир имтаһана мә’руз галмадыныз. Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир ки, таб ҝәтирә биләсиниз” (1 Коринфлиләрә 10:13).
18. Әҝәр ҝизли едилән ҹидди ҝүнаһ Аллаһа һәср олунманыза мүвафиг јашамаг гәрарымызы зәифләдирсә, нә етмәк олар?
18 Бәс әҝәр ҝизли едилән ҹидди ҝүнаһ виҹданыныза әзаб верирсә вә Аллаһа һәср олунманыза мүвафиг јашамаг гәрарынызы зәифләдирсә, онда неҹә олмалы? Әҝәр төвбә едирсинизсә, тәсәлли тапа биләрсиниз ки, “Аллаһ, гырылмыш вә әзилмиш үрәји хор” ҝөрмүр (Мәзмур 51:17). Гајғыкеш ағсаггалларын Јеһованы тәглид едәрәк, сәмави Атанызла јахшы мүнасибәтләр јаратмаг истәјинизә е’тинасыз јанашмајаҹагларыны биләрәк, көмәк үчүн онлара мүраҹиәт един (Мәзмур 103:10-14; Јагуб 5:13-15). О заман үрәјиниздәки сабитлијин вә руһани гүввәнин артдығыны һисс едәрәк, ајагларыныз үчүн доғру јоллар сала биләр вә әввәлки кими, Аллаһа һәср олунманыза мүвафиг јашаја биләрсиниз (Ибраниләрә 12:12, 13).
Үрәјиниздә сабитлији горујун
19, 20. Ҝүнбәҝүн һәср олунмамыза мүвафиг јашамаг нә үчүн олдугҹа зәруридир?
19 Бу чәтин вахтларда, һәср олунмамыза мүвафиг јашамаг вә сабит үрәји горујараг Аллаһа хидмәт етмәк үчүн олдугҹа сә’ј ҝөстәрмәк лазымдыр. Иса деди: “Ахыра гәдәр сәбр едән хилас олаҹагдыр” (Матта 24:13). “Ахыр ҝүнләрдә” јашадығымыз үчүн, сон, бизим ҝөзләмәдијимиз вахтда ҝәлә биләр (2 Тимотејә 3:1). Бундан әлавә, сабаһкы ҝүнә сағ чыхаҹағымыза һеч биримиз әмин дејилик (Јагуб 4:13, 14). Буна ҝөрә дә, ҝүнбәҝүн һәср олунмамыза мүвафиг јашамағымыз олдугҹа зәруридир!
20 Һәвари Петер буна бәнзәр фикри икинҹи мәктубунда сөјләмишдир. О, әхлагсызларын Туфанда һәлак олмасы илә, символик јерин - әхлагсыз инсан ҹәмијјәтинин - “Рәббин Ҝүнүндә” мәһви арасында паралел ҝәтирир. Сонра Петер јазыр: “Сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүр’әтләндирәрәк мүгәддәс вә Аллаһа ихласкар бир һәјат јашамалысыныз!”. Петер һәмиманлылара һәмчинин өјүд верир: “Еј севимлиләр, бунлары габагҹадан биләрәк еһтијат един ки, [јаланчы мүәллимләрин вә] позғун адамларын хатасы илә јолдан аздырылмајасыныз вә сабит вәзијјәтиниздән ајрылмајасыныз” (2 Петер 3:5-17). Вәфтиз олунмуш мәсиһчинин һәгиги јолдан дөнүб, сабит үрәји горуја билмәдији үчүн һәлак олмасы неҹә дә кәдәрли оларды.
21, 22. Мәзмур 57:7 ајәсиндәки сөзләр Давудун үзәриндә неҹә јеринә јетди вә мәсиһчиләрә ҝәлдикдә неҹә доғру чыхыр?
21 Әҝәр вәфтиз олундуғунуз хошбәхт ҝүнү јадынызда сахлајарсынызса вә сөзләринизин, һәмчинин әмәлләринизин Аллаһын үрәјини севиндирмәси үчүн Ондан көмәк диләјәрсинизсә, онда Аллаһа һәср олунманыза мүвафиг јашамаг гәрарыныз сабит олаҹагдыр (Сүлејманын мәсәлләри 27:11). Јеһова өз халгыны һеч заман пис вәзијјәтдә гојмур, әлбәт ки, биз дә Она садиг олмалыјыг (Мәзмур 94:14). Аллаһ Давуда, онун дүшмәнләринин планларыны позмагла вә ону хилас етмәклә мәрһәмәт вә шәфгәт ҝөстәрирди. Буна ҝөрә миннәтдарлыг һисси дујараг, Давуд өз Хиласкарына садиглији вә сарсылмаз мәһәббәтини сөјләди. О, үрәкдән охујурду: “Үрәјим сабитдир, еј Аллаһ, үрәјим сабитдир; нәғмә охујуб тәрәннүм едәрәм” (Мәзмур 57:7).
22 Исанын һәгиги давамчылары, Давуд кими, Аллаһа һәмишә садиг галырлар. Үрәкләриндә сабитлији горујараг, хилас вә мүдафиә етдијинә ҝөрә Јеһоваја миннәтдарлыг едир вә Ону севинҹлә тәрәннүм едирләр. Үрәјиниз сабитдирсә Јеһоваја ҝүвәнәҹәк вә Онун көмәји илә һәср олунманыза мүвафиг јашајаҹагсыныз. Бәли, сиз, мәзмучунун һаггында охудуғу “салеһ” инсан кими олаҹагсыныз. Мәзмурчу охујурду: “Пис хәбәрдән горхмајаҹагдыр; Рәббә ҝүвәнәрәк үрәји сабитдир” (Мәзмур 112:6, 7). Аллаһа иман ҝәтирәрәк вә Она там е’тибар едәрәк һәср олунманыза мүвафиг јашајаҹаг вә үрәјиниздә сабитлији горујараг Јеһоваја һәмишә хидмәт едә биләҹәксиниз.
Хатырлајырсынызмы?
• Мүгәддәс Китабын дәгиг биликләрини бундан сонра да әлдә етмәк нә үчүн ваҹибдир?
• Төвбә етдијимизи вә дөндүјүмүзү нәјә ҝөрә јадда сахламалыјыг?
• Һәср вә вәфтиз олундуғумузу унутмамаг нәјә ҝөрә фајдалыдыр?
• Јеһоваја, үрәјимиздә сабитлији горујараг хидмәт етмәјә нә көмәк едәр?
[28-ҹи сәһифәдәки шәкилләр]
Мәсиһчи хидмәтини һәјатымызда ән ваҹиб иш һесаб етмәклә, Јеһоваја үрәјимиздә сабитлији горујараг хидмәт едә биләрик.
[28-ҹи сәһифәдәки шәкил]
Аллаһын Кәламыны һәр ҝүн охујараг руһани сағламлығынызы горујурсунузму?