Көмәјә еһтијаҹы оланлара инајәт ҝөстәрин
“Һәр кәс гардашына инајәт... етсин” (ЗӘКАРЈА 7:9).
1, 2. а) Биз нәјә ҝөрә инајәт ҝөстәрмәлијик? б) Һансы суаллары мүзакирә едәҹәјик?
ЈЕҺОВА АЛЛАҺ бизи өз Кәламында “мәрһәмәти [инајәти]” севмәјә тәшвиг едир (Мика 6:8). О, буну нәјә ҝөрә етмәли олдуғумузун сәбәбләрини дә ҝөстәрир. Бу сәбәбләрдән бири одур ки, “мәрһәмәтли [инајәтли] адам өз ҹанына јахшылыг” едир (Сүлејманын мәсәлләри 11:17). Бу доғрудан да беләдир! Мәрһәмәт вә инајәт ҝөстәрәрәк, инсанларла сәмими вә јахын мүнасибәт әлдә етмәк олар. О заман бизим е’тибарлы достларымыз олаҹаг. Бу исә әсл сәадәтдир! (Сүлејманын мәсәлләри 18:24).
2 Мүгәддәс Јазыларда, һәмчинин дејилир: “Салеһлијин вә инајәтин ардынҹа ҝедән адам һәјат... тапар” (Сүлејманын мәсәлләри 21:21). Бәли, әҝәр “инајәтин ардынҹа” ҝедириксә, Аллаһын ҝөзүндә даһа гијмәтли олаҹаг вә ҝәләҹәкдә бол-бол хејир-дуалар, о ҹүмләдән әбәди һәјаты мирас алаҹағыг. Бәс биз инајәти неҹә вә кимләрә тәзаһүр етдирә биләрик? Вә бу хүсусијјәт ади инсанпәрвәрликдән вә үмуми мәрһәмәтдән фәргләнирми?
Инсанпәрвәрлик вә инајәт
3. Инајәт инсанпәрвәрликдән нә илә фәргләнир?
3 Ади инсанпәрвәрлик вә инајәт бир-бириндән чох фәргләнир. Мәсәлән, биз чох вахт башгаларына дәрин шәхси бағлылыг дујмадан инсанпәрвәрлик ҝөстәририк. Инајәти исә бизә әзиз олан адамлара тәзаһүр етдиририк. Мүгәддәс Китаба әсасән, араларында сәмими вә јахын мүнасибәтләр јаранан инсанлар бир-бирләринә инајәт ҝөстәрә биләрләр (Тәквин 20:13; 2 Самуел 3:8; 16:17). Јахуд инсанлар вахтилә онлара едилән јахшылыға ҝөрә инајәт ҝөстәрә биләрләр (Јешу 2:1, 12-14; 1 Самуел 15:6; 2 Самуел 10:1, 2). Бу фәрги әјани сурәтдә тәсәввүр етмәк үчүн, ҝәлин, Мүгәддәс Китабын инсанпәрвәрликлә инајәт арасындакы фәрги ҝөстәрән ики нүмунәсини мүгајисә едәк.
4, 5. Мүгәддәс Китабдан ҝәтирилән ики нүмунә, инсанпәрвәрликлә инајәт арасындакы фәрги неҹә ҝөстәрир?
4 Мәсәлән, Павел дә дахил олмагла, ҝәми гәзасына уғрајан адамлара инсанпәрвәрлик ҝөстәрилди. Бу адамлар Малта адасынын саһилинә чыхдылар (Һәвариләрин ишләри 27:37-28:1). Бу аданын сакинләри, гәзаја уғрајан дәнизчиләрә көмәк етмәјә борҹлу олмасалар да, һәтта онлары танымасалар белә, һәмин инсанлары севинҹлә гәбул едиб, онлара “гејри-ади бир инсанпәрвәрлик” ҝөстәрдиләр (Һәвариләрин ишләри 28:2, 7). Онларын гонагпәрвәрлији сәмими, анҹаг тәсадүфи иди вә онлар буну јад адамлар үчүн едирдиләр. Бу сәбәбдән һәмин хүсусијјәт инсанпәрвәрлик адланыр.
5 Ҝәтирилән нүмунәни, Давудун өз досту Јонатанын оғлу Мефибошетә ҝөстәрдији инајәтлә мүгајисә един. Давуд Мефибошетә нөвбәти сөзләрлә мүраҹиәт етди: “Сән даима мәним сүфрәмдә чөрәк јејәҹәксән”. Давуд өз гәрарыны изаһ едиб деди: “Атан Јонатанын хатиринә мүтләг сәнә јахшылыг [инајәт] едәҹәјәм” (2 Самуел 9:6, 7, 13). Давудун Мефибошетә ҝөстәрдији хејирхаһлығыны мүнасиб олараг садәҹә меһрибанлыг дејил, инајәт адландырмаг олар, чүнки бу, Давудун Јонатанла бағладығы әһдә садиг галдығына шәһадәт едирди (1 Самуел 18:3; 20:15, 42). Аллаһын хидмәтчиләри дә бу ҝүн бүтүн инсанлара инсанпәрвәрликлә јанашырлар. Лакин онлар инајәти, јә’ни дәјишмәз мәһәббәти һәмиманлыларына тәзаһүр етдирирләр (Матта 5:45; Галатијалылара 6:10).
6. Аллаһын Кәламында инајәтин һансы фәргләндириҹи хүсусијјәтләри гејд олунур?
6 Инајәтин даһа бир нечә фәргләндириҹи хүсусијјәтләрини ҝөрмәк үчүн, ҝәлин Мүгәддәс Китабдан үч епизоду гыса олараг нәзәрдән кечирәк. Бу епизодлардан өјрәнәҹәјик ки, инајәт 1) конкрет ишләрдә, 2) көнүллү сурәтдә вә 3) хүсусән көмәјә еһтијаҹы оланлара ҝөстәрилир. Бундан әлавә, инајәти бу ҝүн неҹә тәзаһүр етдирмәјимизин үсулуну да нәзәрдән кечирәҹәјик.
Ата инајәт ҝөстәрир
7. Ибраһимин гулу Бетуел илә Лабана һансы һадисәни нәгл етди вә һансы мәсәләни галдырды?
7 Әввәлки мәгаләдә хатырланан Ибраһимин гулу илә баш верән һадисәнин неҹә сона јетдијини “Тәквин” китабынын 24:28-67 ајәләриндән охујуруг. Ребека илә растлашдыгдан сонра, Ибраһимин гулуну гызын атасы Бетуелин евинә дә’вәт етдиләр (28-32-ҹи ајәләр). Орада гул Ибраһимин оғлу үчүн арвады неҹә ахтардығыны тәфсилаты илә нәгл етди (33-47-ҹи ајәләр). О, ишинин белә уғурлу олмасыны Јеһовадан бир әламәт кими гәбул етдијини хүсуси вурғулајыб деди: “Ағамын гардашы гызыны оғлуна алмаг үчүн мәни бирбаш бураја ҝәтирән” Аллаһдыр (48-ҹи ајә, МКШ). Гул, шүбһәсиз, үмид едирди ки, баш верән һадисә барәдә ачыг сөһбәт Бетуели вә Лабаны, бу ишин архасында Јеһованын дурдуғуна әмин едәҹәк. Сөһбәтин сонунда гул сорушду: “Мәнә дејин ҝөрүм, сиз ағама хејирхаһлыг [инајәт] вә сәдагәт ҝөстәрмәк истәјирсиниз, ја јох? Буну мәнә билдирин ки, мән дә нә едәҹәјими билим” (49-ҹу ајә, МКШ).
8. Ребекаја аид ишдә Бетуел неҹә давранды?
8 Јеһова артыг өз инајәтини Ибраһимә тәзаһүр етдирмишди (Тәквин 24:12, 14, 27). Ребекаја Ибраһимин гулу илә ҝетмәјә иҹазә верәрәк, Бетуел дә бу ҹүр давранмаг истәјәҹәкми? Аллаһын инајәти инсан инајәти илә тамамланаҹагмы? Јохса гулун узун сәјаһәти әбәс олаҹаг? Лабанла Бетуелдән: “Бу иш Аллаһдан олду” сөзләрини ешитмәк гул үчүн неҹә дә севиндириҹи иди! (50-ҹи ајә, МКШ). Онлар бу ишдә Јеһованын иштиракыны ҝөрдүләр вә Аллаһын гәрары илә дәрһал разылашдылар. Сонра Бетуел инајәт ҝөстәриб деди: “Будур, Ребека гаршындадыр, ал вә ҝет вә Рәббин сөјләдији кими сәнин ағанын оғлуна арвад олсун” (51-ҹи ајә). Ребека Ибраһимин гулу илә ҝетмәјә разылашды вә бир аздан Исһагын севимли арвады олду (49, 52-58, 67-ҹи ајәләр).
Оғулун ҝөстәрдији инајәт
9, 10. а) Јагуб оғлу Јусифдән нәји хаһиш етди? б) Јусиф атасына неҹә инајәт ҝөстәрди?
9 Ибраһимин нәвәси Јагуба да инајәт ҝөстәрилмишдир. “Тәквин” китабынын 47-ҹи фәслиндән өјрәнирик ки, Јагуб Мисирдә јашајан заман “өләҹәји ҝүнләр” јахынлашды (27-29-ҹу ајәләр). Анҹаг Аллаһын Ибраһимә вә’д етдији торпагдан кәнарда өлмәји ону нараһат едирди (Тәквин 15:18; 35:10, 12; 49:29-32). Јагуб Мисирдә басдырылмағы истәмирди, буна ҝөрә дә хаһиш етди ки, онун ҹәсәдини Кән’ан торпағында дәфн етсинләр. Атасынын арзусуну, јүксәк вәзифәјә саһиб олан оғлу Јусифдән башга ким даһа јахшы јеринә јетирә биләрди?
10 “Јарадылыш” китабында охујуруг: “[Јагуб] оғлу Јусифи чағырыб деди: “Әҝәр ҝөзләриндә лүтф тапмышамса... анд ич ки, хејирхаһлыг [инајәт] вә сәдагәт ҝөстәриб, мәни Мисирдә басдырмајаҹагсан, аталарымла бирҝә ујумаг үчүн өләндә мәни Мисирдән апарыб, онларын мәгбәрәсиндә басдыраҹагсан” (Јарадылыш 47:29, 30, МКШ). Јусиф сөз верди ки, бу хаһиши јеринә јетирәҹәк. Гыса вахтдан сонра Јагуб вәфат етди. Јусиф вә Јагубун башга оғуллары аталарынын ҹәсәдини “Кән’ан дијарына ҝөтүрдүләр вә ону Мамре гаршысында Макпела тарласынын мағарасында басдырдылар; о мағараны Ибраһим... сатын алмышды” (Тәквин 50:5-8, 12-14). Бунунла да Јусиф атасына инајәт ҝөстәрди.
Ҝәлинин ҝөстәрдији инајәт
11, 12. а) Рут Наомијә неҹә инајәт ҝөстәрди? б) Рутун “сон инајәти” нәјә ҝөрә “илк инајәтиндән” даһа јахшы иди?
11 “Рут” китабы, дул Наомијә моаблы ҝәлини тәрәфиндән неҹә инајәт ҝөстәрилдији һаггында мә’лумат верир. Онун ҝәлини Рут да дул галмышды. Наоми Јәһудејанын Бејтлеһем шәһәринә гајытмаг гәрарына ҝәлдикдә, Рут онунла галмаг нијјәтиндә олдуғуну сөјләди: “Һараја ҝетсән, ораја ҝедәҹәјәм, һарада галсан, орада галаҹағам; халгын халгым олаҹаг, Аллаһын Аллаһым” (Рут 1:16, МКШ). Сонрадан Рут, Наоминин јашлы гоһуму Боаза әрә ҝетмәјә разы олмагла да инајәт ҝөстәрмиш олдуa (Тәснијә 25:5, 6; Рут 3:6-9). Боаз она деди: “Сон инајәтин сәнин илк инајәтиндән даһа јахшыдыр, чүнки фағыр олсун, зәнҝин олсун ҝәнҹләрин ардынҹа ҝетмәдин” (Рут 3:10).
12 Бурада “илк инајәт” сөзү алтында, Рутун өз халгыны тәрк едиб, Наоми илә ҝетмәси нәзәрдә тутулур (Рут 1:14; 2:11). Рутун “сон инајәти” исә, јә’ни Баоза көнүллү әрә ҝетмәси, “илк инајәтиндән даһа јахшы” иди. Инди Рут, доғмаг үчүн һәддиндән артыг гоҹа олан Наомијә варис дүнјаја ҝәтирә биләрди. Никаһ бағланды вә Рутун өвлады олдугда бејтлеһемли гадынлар нида етдиләр: “Наомијә оғул доғулуб” (Рут 4:14, 17, МКШ). Һаглы олараг “нәҹабәтли гадын” сајылан Рут, Јеһовадан ҝөзәл мүкафат алды. О, Иса Мәсиһин улу валидејни олду (Рут 2:12; 3:11, МКШ; 4:18-22; Матта 1:1, 5, 6).
Инајәт әмәлләрдә тәзаһүр етдирилир
13. Бетуел, Јусиф вә Рут инајәти неҹә тәзаһүр етдирдиләр?
13 Бетуелин, Јусифин вә Рутун инајәти неҹә тәзаһүр етдирдикләринә диггәт јетирдинизми? Онлар буну јалныз дилдә дејил, конкрет әмәлләрдә ҝөстәрдиләр. Бетуел јалныз “Ребека гаршындадыр” демәди, һәм дә онун ҝетмәсинә изин верди (Тәквин 24:51, 59). Јусиф атасына: “Неҹә дејирсән, елә дә едәрәм” демәклә кифајәтләнмәди, гардашлары илә бирликдә “атасынын вәсијјәтини тамамилә” јеринә јетирди (Јарадылыш 47:30; 50:12, 13, МКШ). Рут јалныз: “Һараја ҝетсән, ораја ҝедәҹәјәм” демәди, анҹаг һәгигәтән дә халгыны тәрк едиб, Наоми илә бирликдә Бејт-Леһемә ҝәлди (Рут 1:16, 19). Јәһудејада Рут јенә дә “гајынанасынын бүтүн тапшырыгларына әмәл етди” (Рут 3:6, МКШ). Беләликлә ҝөрүрүк ки, Рутун, о ҹүмләдән Јусифин вә Бетуелин инајәти әмәлләриндә тәзаһүр олунду.
14. а) Аллаһын мүасир хидмәтчиләри инајәти әмәлдә неҹә ҝөстәрирләр? б) Сизин вилајәтиниздә мәсиһчиләрин бир-бирләринә етдикләри хејирхаһ ишләр барәдә данышын.
14 Аллаһын мүасир хидмәтчиләринин дә әмәлдә инајәт тәзаһүр етдирмәләрини ҝөрмәк инсана тә’сир бағышлајыр. Мәсәлән, зәиф, мә’јус вә ја кәдәрли олан һәмиманлыларына емосионал ҹәһәтдән көмәк едән кәсләр һаггында дүшүнүн (Сүлејманын мәсәлләри 12:25). Һәмчинин һәр һәфтә машынла јашлылары Падшаһлыг Залындакы ҝөрүшләрә апаран чохсајлы Шаһидләр һаггында да фикирләшин. Артрит хәстәлијиндән әзијјәт чәкән 82 јашлы Анна, чохларынын һиссләрини ифадә едәрәк деди: “Киминсә сәни машынла бүтүн јығынҹаг ҝөрүшләринә апармасы Јеһованын хејир-дуасыдыр. Бу ҹүр гајғыкеш баҹы-гардашлар вердијинә ҝөрә мән Јеһоваја үрәкдән миннәтдарам”. Јығынҹағыныздакы баҹы-гардашлара бу ҹүр көмәк ҝөстәрирсинизми? (1 Јәһја 3:17, 18). Әҝәр беләдирсә, ҝөстәрдијиниз инајәтин јүксәк гијмәтләндирилдијинә әмин ола биләрсиниз.
Инајәт көнүллү тәзаһүр етдирилир
15. Нәзәрдән кечирдијимиз Мүгәддәс Китабын үч нүмунәсиндә инајәтин даһа һансы фәргләндириҹи хүсусијјәтләри гејд олунур?
15 Нәзәрдән кечирдијимиз Мүгәддәс Китаб епизодларындан ҝөрүрүк ки, инајәт мәҹбури дејил, көнүллү вә һәвәслә тәзаһүр етдирилир. Мәсәлән, һәм Бетуел, һәм дә Ребека Ибраһимин гулу илә көнүллү олараг разылашдылар (Тәквин 24:51, 58). Јусиф кәнардан һеч бир тәзјиг олмадан инајәт ҝөстәрди (Тәквин 50:4, 5). Рут Наоми илә ҝетмәјә гәти гәрарлы иди (Рут 1:18). Наоми она Боазын јанына ҝетмәји тәклиф етдикдә, инајәт моаблы Руту бу сөзләри демәјә сөвг етди: “Дедикләринин һамысына әмәл едәрәм” (Рут 3:1-5, МКШ).
16, 17. Бетуелин, Јусифин вә Рутун ҝөстәрдији инајәт нәјә ҝөрә хүсусилә әһәмијјәтлидир вә бу хүсусијјәти ҝөстәрмәјә онлары нә тәшвиг етди?
16 Бетуелин, Јусифин вә Рутун ҝөстәрдикләри инајәт хүсусилә әһәмијјәтлидир, чүнки нә Ибраһим, нә Јагуб, нә дә Наоми бу инсанлары ирадәләринә зидд һәрәкәт етмәјә мәҹбур едә билмәздиләр. Мисал үчүн, Бетуел гызы илә ајрылмаға борҹлу дејилди. О, Ибраһимин гулуна изаһ едә биләрди ки, гызы она чох көмәк етдији үчүн ондан ајрылмаг нијјәтиндә дејил вә бунунла да, гулун тәклифиндән бојун гачырарды (Тәквин 24:18-20). Јусиф дә атасынын хаһишини јеринә јетириб јетирмәмәји өзү шәхсән гәрара ала биләрди, ахы Јагуб артыг өлмүшдү вә оғлуну сөзүнүн үстүндә дурмаға мәҹбур едә билмәзди. Наоми исә өзү деди ки, Рутун Моабда галмаға һаггы вар (Рут 1:8). Рут исә јашлы Боаза дејил, ҹаванлардан биринә әрә ҝедә биләрди.
17 Бетуел, Јусиф вә Рут көнүллү олараг инајәт ҝөстәрдиләр, буна онларын үрәји тәшвиг етди. Давуд падшаһ Мефибошетә инајәт ҝөстәрмәк үчүн сонрадан дахилиндә тәһрик һисси дујдуғу кими, онлар да бу кејфијјәти јахынларына тәзаһүр етдирмәји мә’нәви ҹәһәтдән өзләринә борҹ билдиләр.
18. а) Ағсаггаллар һансы әһвал-руһијјә илә “сүрүнү отарырлар”? б) Бир ағсаггал һәмиманлыларына етдији көмәк барәдә фикрини неҹә ифадә етди?
18 Инајәт вә хејирхаһ ишләр, әввәлки кими, инди дә Аллаһын халгынын, хүсусилә дә, Аллаһын “сүрүсүнү” идарә едән кишиләрин фәргләндириҹи әламәти олараг галыр (Мәзмур 110:3; 1 Салониклиләрә 5:12). Бу ағсаггаллар, тә’јинат алдыглары заман онлара һәвалә едилән е’тибары доғрултмағы өзләринә борҹ санырлар (Һәвариләрин ишләри 20:28). Лакин онлар ағсаггаллыг вәзифәсини вә јығынҹағын хејри үчүн олан башга хејирхаһ ишләри “мәҹбури дејил, көнүллү” јеринә јетирирләр (1 Петер 5:2). Ағсаггаллар мәсиһчиләри мәрһәмәтлә һимајә едирләр. Буну, садәҹә вәзифәләринә дахил олдуғу үчүн дејил, һәм дә сүрүјә көмәк етмәк истәдикләри үчүн едирләр (Јәһја 21:15-17). Бир ағсаггал дејирди: “Мән гардашлара баш чәкмәји, зәнҝ етмәји вә бунунла да онлар барәсиндә дүшүндүјүмү онлара билдирмәји севирәм. Гардашлара көмәк етмәклә бөјүк севинҹ вә мәмнунлуг дујурам!” Гајғыкеш ағсаггалларын һамысы бу сөзләрлә там разыдырлар.
Көмәјә еһтијаҹы оланлара инајәт ҝөстәрин
19. Бу мәгаләдә нәзәрдән кечирдијимиз Мүгәддәс Китабын епизодлары инајәтә даир нәји вурғулајыр?
19 Нәзәрдән кечирдијимиз Мүгәддәс Китаб епизодларында диггәтәлајиг олан одур ки, инајәт көмәјә еһтијаҹы оланлара ҝөстәрилир. Нәслини давам етдирмәк үчүн Ибраһим Бетуелин көмәјинә еһтијаҹ дујурду. Јагуб исә ҹәсәдинин Кән’ан дијарында дәфн едилмәси үчүн Јусифин көмәјинә мөһтаҹ иди. Наоми исә Рутун көмәји олмадан варисә саһиб ола билмәзди. Һәм Ибраһим, һәм Јагуб, һәм дә Наоми башгаларынын көмәји олмадан кечинә билмәздиләр. Елә бу ҝүн дә, инајәти хүсусилә көмәјә еһтијаҹы оланлара ҝөстәрмәк лазымдыр (Сүлејманын мәсәлләри 19:17). Биз, “јардыма чағыран дүшкүнә вә јардымчысы олмајан јетимә”, һәмчинин “өлүм тәһлүкәсиндә” олана диггәт јетирән гәбилә башчысы Ејубдан нүмунә ҝөтүрмәлијик. Бундан башга, Ејуб “дул гадынын үрәјини” севиндирир, “кора ҝөз” вә “топала ајаг” кими хидмәт едирди (Ејуб 29:12-15).
20, 21. Көмәјимизә кимләрин еһтијаҹы вар вә һәр биримиз нәјә гәрарлы олмалыјыг?
20 Шүбһәсиз ки, һәр бир мәсиһчи јығынҹағында “јардыма чағыран” кәсләр вар. Ола билсин, онлар тәнһалыгдан, мә’јуслугдан, өзләрини лазымсыз һисс етдикләриндән, башгаларынын е’тибарсызлығындан, ҹидди хәстәликдән, јахуд да әзизләринин өлүмүндән әзијјәт чәкирләр. Бунун сәбәби һәр нә олса да, бизим үчүн гијмәтли олан бу инсанларын һамысы, хејирхаһлыг вә инајәт әкс етдирәрәк һәвәслә вә сәбирлә едә биләҹәјимиз вә етмәјә борҹлу олдуғумуз көмәјә еһтијаҹ дујурлар (1 Салониклиләрә 5:14).
21 Ҝәлин бундан сонра да “инајәти... чох олан” Јеһова Аллаһымызы тәглид едәк (Чыхыш 34:6; Ефеслиләрә 5:1). Хүсусилә дә ҝәлин, көмәјә еһтијаҹы оланлара диггәт јетирәрәк, инајәти көнүллү вә конкрет ишләрдә тәзаһүр етдирәк. Бир-биримизә инајәт ҝөстәрмәклә Јеһоваја еһтирам бәсләјәҹәк вә бөјүк севинҹ дујаҹағыг (Зәкарја 7:9).
[Һашијә]
a Бурада хатырланан никаһ һаггында ҝениш мә’луматы, Јеһованын Шаһидләри тәрәфиндән нәшр олунмуш “Мүгәддәс Јазыларын дәрк едилмәси” әсәринә бахын, Ы ҹилд, сәһ. 370 (инҝ.).
Сиз неҹә ҹаваб верәрдиниз?
• Инајәт инсанпәрвәрликдән нә илә фәргләнир?
• Бетуел, Јусиф вә Рут инајәти неҹә ҝөстәрдиләр?
• Инајәти биз һансы әһвал-руһијјә илә ҝөстәрмәлијик?
• Көмәјимизә кимләрин еһтијаҹы вар?
[15-ҹи сәһифәдәки шәкил]
Бетуел инајәти неҹә ҝөстәрди?
[17-ҹи сәһифәдәки шәкил]
Рутун инајәти Наоми үчүн хејир-дуа иди.
[18-ҹи сәһифәдәки шәкилләр]
Инајәт көнүллү вә конкрет ишләрдә тәзаһүр етдирилир вә көмәјә еһтијаҹы оланлара фајда ҝәтирир.