Севҝи долу хејирхаһлыгла даныш!
«Ағзыны һикмәтлә ачар вә севҝи долу хејирхаһлыг гануну онун дилиндәдир» (СҮЛ. МӘС. 31:26, ЈД).
1, 2. а) Јеһованын хидмәтчиләри һансы хүсусијјәти инкишаф етдирмәјә тәшвиг олунурлар? б) Бу мәгаләдә һансы суаллары арашдыраҹағыг?
ГӘДИМДӘ јашамыш Лемуел падшаһын анасынын она дедији сөзләриндә јахшы арвадын әсас хүсусијјәти вурғуланыр (Сүл. мәс. 31:1, 10). Орада дејилир: «Ағзыны һикмәтлә ачар вә севҝи долу хејирхаһлыг гануну онун дилиндәдир» (Сүл. мәс. 31:26, ЈД). Һикмәтли арвадын, еләҹә дә Јеһованы разы салмаг истәјән бүтүн инсанларын дилиндән севҝи долу хејирхаһлыг ахмалыдыр. Бу хүсусијјәт Аллаһын бүтүн һәгиги хидмәтчиләринин данышығындан бәлли олмалыдырa.
2 Бурада «севҝи долу хејирхаһлыг» дејилдикдә нә баша дүшүлүр? Севҝи долу хејирхаһлыг кимләрә ҝөстәрилмәлидир? Нәјин сајәсиндә данышығымызда севҝи долу хејирхаһлыг тәзаһүр етдирә биләрик? Бу, аилә үзвләримизлә вә һәмиманлыларымызла үнсијјәтимизә неҹә тәсир едәҹәк?
Садиг мәһәббәтдән доған хејирхаһлыг
3, 4. а) «Севҝи долу хејирхаһлыг» нәдир? б) «Севҝи долу хејирхаһлыг» ади хејирхаһлыгдан нә илә фәргләнир?
3 Мүгәддәс Китабда ады чәкилән (азәрбајҹанҹа Мүгәддәс Китабда «сәдагәт», «мәһәббәт», «хејирхаһлыг» вә саирә кими тәрҹүмә олунан) севҝи долу хејирхаһлыг хүсусијјәтинә мәһәббәт вә хејирхаһлыг дахилдир. Хејирхаһлыг һәмчинин башгаларынын гајғысына галмаг демәкдир. Бу, өзүнү нәзакәтли сөзләрдә вә хејирхаһ әмәлләрдә бүрузә верир. Мәһәббәт дә бу хүсусијјәтин тәркиб һиссәси олдуғу үчүн севҝи долу хејирхаһлыг инсаны мәһәббәтдән ирәли ҝәләрәк башгаларынын рифаһы илә марагланмаға тәшвиг едир. Лакин орижинал мәтндә «севҝи долу хејирхаһлыг» ифадәси садиг мәһәббәтдән доған хејирхаһлыгдан даһа бөјүк мәна дашыјыр. Бу хүсусијјәти тәзаһүр етдирән инсан башгаларына үрәкдән вә ахыра гәдәр јахшылыг етмәјә чалышыр.
4 Севҝи долу хејирхаһлыг ади хејирхаһлыгдан јалныз бу ҹәһәтдән фәргләнмир. Үмумијјәтлә, инсанлар һәр кәсә, һәтта танымадыглары адамлара белә хејирхаһлыг ҝөстәрә биләрләр. Малта адасынын сакинләри ҝәми гәзасына дүшән, өзү дә һеч вахт ҝөрмәдикләри һәвари Павелә вә 275 адама бу ҹүр хејирхаһлыг ҝөстәрмишдиләр (Һәв. иш. 27:37—28:2). Диҝәр тәрәфдән исә, севҝи долу хејирхаһлыг дедикдә артыг мүәјјән мүнасибәтләри олан инсанларын бир-бириләринә сәдагәтләри дә нәзәрдә тутула биләрb. Генлиләр «Исраил өвладлары Мисирдән чыхан заман» онлара гаршы бу хүсусијјәти тәзаһүр етдирмишдиләр (1 Шам. 15:6).
Аллаһын ишләри үзәриндә дүшүнмәјин вә дуа етмәјин ваҹиблији
5. Дилимизи јүјәнләмәјә бизә нә көмәк едә биләр?
5 Данышығымызда севҝи долу хејирхаһлыг тәзаһүр етдирмәк һеч дә асан дејил. Бу һагда Исанын шаҝирди Јагуб јазыр: «Дили исә һеч бир инсан әһлиләшдирә билмир. Дил, гаршысы алынмаз бәладыр вә өлдүрүҹү зәһәрлә долудур» (Јаг. 3:8). Белә чәтин идарә олунан бәдән үзвүнү јүјәнләмәјә бизә нә көмәк едә биләр? Бу суалын ҹавабыны јер үзүндә јашајаркән Исанын дин рәһбәрләринә дедији сөзләрдән тапмаг олар. О демишди: «Ағыз үрәкдән ҝәләни сөјләјир» (Мат. 12:34). Севҝи долу хејирхаһлыг бизи шәр дилдән горусун дејә бу хүсусијјәт үрәјимиздә көк салмалыдыр. Ҝәлин ҝөрәк дүшүнмәк вә дуа етмәк бу ишдә бизә неҹә көмәк едә биләр.
6. Нәјә ҝөрә биз Јеһованын севҝи долу хејирхаһ ишләри үзәриндә дәриндән дүшүнмәлијик?
6 Мүгәддәс Китабда дејилир ки, Јеһова «мәһәббәтли», јәни севҝи долу хејирхаһ Аллаһдыр (Чых. 34:6). «Ја Рәбб, јер үзү мәһәббәтинә бүрүнүб», — дејә мәзмурчу Аллаһа һәмд едирди (Мәз. 119:64). Мүгәддәс Китабда Јеһованын хидмәтчиләринә севҝи долу хејирхаһлыг ҝөстәрмәсинә даир бир чох нүмунәләр вар. Јеһованын ишләри үзәриндә дәриндән дүшүнмәјә вахт ајырмаг бу хүсусијјәти инкишаф етдирмәјә биздә истәк ојада биләр. (Мәзмур 77:12 ајәсини оху.)
7, 8. а) Јеһова Лута вә онун аиләсинә севҝи долу хејирхаһлығыны неҹә ҝөстәрди? б) Давуд Јеһованын она ҝөстәрдији севҝи долу хејирхаһлығы барәдә нә дүшүнүрдү?
7 Мәсәлән, Јеһованын Ибраһимин гардашы оғлу Луту вә онун аиләсини јашадыглары Содом шәһәринин мәһви заманы неҹә хилас етдијини јадыныза салын. Шәһәрин мәһви јахынлашдыгҹа Лутун јанына ҝәлән мәләкләр ону вә аиләсини тез-тәләсик шәһәри тәрк етмәјә чағырырдылар. «Лут јаваш тәрпәнди. Рәбб она мәрһәмәт етдијинә ҝөрә һәмин шәхсләр [мәләкләр] онун, арвадынын вә ики гызынын әлиндән тутуб шәһәрдән кәнара чыхартдылар», — дејә Мүгәддәс Китабда хәбәр верилир. Һәгигәтән дә, Јеһованын бу хилас тәдбири үрәјимизи риггәтә ҝәтирир! Мәҝәр бу, Јеһованын севҝи долу хејирхаһлығынын тәзаһүрү дејилди? (Јар. 19:16, 19).
8 Гәдим Исраилин падшаһы Давудун нүмунәсинә дә нәзәр салаг. О, Јеһова һаггында дејирди: «Одур бүтүн тәгсирләрини әфв едән, бүтүн хәстәликләринә шәфа верән». Бат-Шева илә ишләтдији ҝүнаһынын бағышландығына ҝөрә о, Јеһоваја чох миннәтдар иди вә буна ҝөрә дә Она һәмд едирди: «Ҝөјләр јердән нә гәдәр уҹадырса, Ондан горханлара олан мәһәббәти [«севҝи долу хејирхаһлығы», ЈД] о гәдәр бөјүкдүр» (Мәз. 103:3, 11). Мүгәддәс Китабда јазылан бу вә ја диҝәр һадисәләр үзәриндә дүшүнмәк бизи севҝи долу хејирхаһлығына ҝөрә Јеһоваја бүтүн гәлбимизлә миннәтдар олмаға вә она һәмд-сәна етмәјә тәшвиг едир. Јеһоваја нә гәдәр миннәтдар олсаг, бир о гәдәр дә Ону тәглид етмәјә чалышаҹағыг (Ефес. 5:1).
9. Јеһованын хидмәтчиләринин ҝүндәлик һәјатларында севҝи долу хејирхаһлығы тәзаһүр етдирмәјә һансы тутарлы сәбәби вар?
9 Мүгәддәс Китабдакы нүмунәләр ҝөстәрир ки, Јеһова севҝи долу хејирхаһлығыны, башга сөзлә, сәдагәтли мәһәббәтини Онунла јахын мүнасибәтләр гурмуш инсанлара ҝөстәрир. Бәс јахшы, Аллаһла бу ҹүр мүнасибәтләри олмајанлар һаггында нә демәк олар? Демәк олармы ки, Јеһова онлара гаршы кобуд вә гәддардыр? Әсла! Лука 6:35 ајәсиндә дејилир: «[Аллаһ] нанкорлара вә пис адамлара гаршы да хејирхаһдыр». «О, Өз ҝүнәшинә әмр едир ки, пис вә јахшы адамларын үзәринә доғсун; вә салеһ оланлар илә олмајанларын үзәринә јағышлар ҝөндәрир» (Мат. 5:45). Һәгигәти өјрәниб һәјат тәрзимизи дәјишмәздән өнҹә Аллаһ башгалары кими бизә дә хејирхаһлығыны ҝөстәрирди. Лакин Онун хидмәтчиси олдугдан сонра Јеһова бизә гаршы Өз сәдагәтли мәһәббәтини тәзаһүр етдирир. (Јешаја 54:10 ајәсини оху.) Буна ҝөрә Јеһоваја биз неҹә дә миннәтдарыг! Һәгигәтән дә, данышығымызда, еләҹә дә һәјатымызын диҝәр саһәләриндә севҝи долу хејирхаһлыг тәзаһүр етдирмәјә тутарлы сәбәбимиз вар!
10. Үрәјимиздә севҝи долу хејирхаһлыг хүсусијјәтини инкишаф етдирмәкдә дуанын ролу нәјә ҝөрә әвәзсиздир?
10 Севҝи долу хејирхаһлығы тәзаһүр етдирмәкдә дуанын ролу әвәзсиздир. Чүнки мәһәббәт вә хејирхаһлыг Јеһованын мүгәддәс руһунун сәмәрәсидир (Галат. 5:22). Мүгәддәс руһун бизи истигамәтләндирмәсинә јол вермәклә севҝи долу хејирхаһлығы үрәјимиздә инкишаф етдирә биләрик. Мүгәддәс руһу алмағын билаваситә јолу дуада ону диләмәкдир (Лука 11:13). Буна ҝөрә дә, јахшы оларды ки, мүнтәзәм дуа едәрәк Аллаһдан мүгәддәс руһ диләјәк вә онун рәһбәрлијинә табе олаг. Бәли, әҝәр данышығымызда севҝи долу хејирхаһлығын тәзаһүр олунмасыны истәјириксә, онда дүшүнмәјин вә дуа етмәјин ваҹиблијини нәзәрдән гачырмамалыјыг.
Әрлә арвадын севҝи долу хејирхаһлыг ҝөстәрмәси
11. а) Һарадан билирик ки, Јеһова әрләрдән һәјат јолдашларына гаршы севҝи долу хејирхаһлыг тәзаһүр етдирмәләрини ҝөзләјир? б) Севҝи долу хејирхаһлыг дилини сахламагда әрә неҹә көмәк едә биләр?
11 Һәвари Павел әрләри тәшвиг едир: «Арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди» (Ефес. 5:25). Павел һәмчинин онлара Јеһованын Адәмлә Һәвваја дедији сөзләри хатырладыр: «Инсан ата-анасыны бурахаҹаг вә арвадына бағланаҹагдыр. Икиси дә бир бәдән олаҹагдыр» (Ефес. 5:31). Ајдындыр ки, Јеһова әрләрдән арвадларына садиг галмаларыны вә онлара гаршы севҝи долу хејирхаһлыг тәзаһүр етдирмәләрини ҝөзләјир. Бу хүсусијјәтдән ирәли ҝәләрәк әр башгаларынын јанында арвадынын сәһвләрини үзүнә вурмајаҹаг вә ја сөзләри илә ону алчалтмајаҹаг. Әксинә, ону үрәкдән тәрифләјәҹәк (Сүл. мәс. 31:28). Әҝәр мүәјјән сәбәбләрә ҝөрә онларын арасында проблем јаранарса, онда севҝи долу хејирхаһлыг әри һәјат јолдашыны алчалтмамаг үчүн дилини сахламаға тәшвиг едәҹәк.
12. Арвад ағзындан чыхан сөзләрдә севҝи долу хејирхаһлығы неҹә әкс етдирә биләр?
12 Арвадын да ағзындан чыхан сөзләрдә севҝи долу хејирхаһлыг әкс олунмалыдыр. Бу дүнјанын руһу онун данышыг тәрзинә тәсир етмәмәлидир. «Әринә еһтирам» бәсләјән гадын башгаларынын јанында онун һаггында јахшы данышаҹаг вә ону инсанларын ҝөзүндә уҹалдаҹаг (Ефес. 5:33). Аталарыны ушагларынын ҝөзүндән салмамаг үчүн арвад онларын гаршысында әринә наразылығыны билдирмәјәҹәк вә онун фикрини шүбһә алтына алмајаҹаг. О, белә мәсәләләри тәкликдә мүзакирә етмәјә үстүнлүк верәҹәк. «Һикмәтли гадын евини гурар, сәфеһ гадын ону әли илә учурар», — дејә Аллаһын Кәламында гејд олунур (Сүл. мәс. 14:1). Онун еви аиләси үчүн хош вә раһат јердир.
13. Севҝи долу хејирхаһлыг хүсусән һарада вә неҹә тәзаһүр олунмалыдыр?
13 Әр-арвад тәкликдә галанда белә өз данышыглары илә бир-биринә һөрмәт етмәлидир. «Гәзәб, һиддәт, кин, ифтира, ағзыныздан чыхан әдәбсиз сөзләр кими шејләрин һамысыны бир јана гојун», — дејә һәвари Павел јазыр вә сонра да әлавә едир: «Аллаһын сечилмишләри, мүгәддәсләри вә севимлиләри кими үрәкдән шәфгәт, хејирхаһлыг, тәвазөкарлыг, һәлимлик вә сәбирлилик,.. камил бирлијин бағы олан мәһәббәти ҝејин» (Колос. 3:8, 12—14). Даима валидејнләринин данышыг тәрзиндә севҝи долу хејирхаһлығын әкс олундуғуну ҝөрән ушаглар нәинки сағлам мүһитдә бөјүјүрләр, һәмчинин бу саһәдә валидејнләриндән нүмунә ҝөтүрүрләр.
14. Аилә башчылары аиләләринә дајаг олмаг үчүн дилләриндән неҹә истифадә едә биләрләр?
14 Мәзмурчу јазырды: «Мән “бүдрәјир ајағым” дејән заман, ја Рәбб, мәнә мәһәббәтинлә дајагсан» (Мәз. 94:18). Јеһова Өз халгына нәсиһәт вермәклә вә рәһбәрлик тәгдим етмәклә дајаг олур (Мәз. 119:105). Бәс аилә башчылары сәмави Атамызын нүмунәсини изләјәрәк аиләләринә дајаг олмаг үчүн дилләриндән неҹә истифадә едә биләрләр? Аиләләрини идарә етмәклә вә руһландырмагла. Руһани хәзинәләри ашкар етмәк үчүн аиләви ибадәт ахшамы неҹә дә ҝөзәл фүрсәтдир! (Сүл. мәс. 24:4).
Һәмиманлыларына сәдагәтли мәһәббәт бәслә
15. Ағсаггаллар вә руһани ҹәһәтдән јеткин мәсиһчиләр һәмиманлыларыны «гору»маг үчүн дилләриндән неҹә истифадә едә биләрләр?
15 «Ја Рәбб, мәрһәмәтини мәндән әсирҝәмә, даим мәни мәһәббәтинлә, һәгигәтинлә гору», — дејә падшаһ Давуд Јеһоваја дуа едирди (Мәз. 40:11). Јығынҹағын ағсаггаллары вә руһани ҹәһәтдән јеткин олан диҝәр мәсиһчиләр бу саһәдә Јеһованы неҹә тәглид едә биләрләр? Сөзсүз ки, дилимиздән истифадә едәркән диггәти Мүгәддәс Китабдакы мәлумата јөнәлтмәк севҝи долу хејирхаһлығын әсил тәзаһүрү оларды (Сүл. мәс. 17:17).
16, 17. Севҝи долу хејирхаһлыгла данышдығымызы неҹә ҝөстәрә биләрик?
16 Әҝәр һәмиманлымызын Мүгәддәс Китаб принсипләринә зидд даврандығыны ҝөрүрүксә, онда неҹә? Мәҝәр севҝи долу хејирхаһлыг тәзаһүр етдирәрәк она дүзәлиш вермәјә чалышмајаҹағыг? (Мәз. 141:5). Әҝәр һәмиманлымызын ҹидди ҝүнаһа јол вердијиндән хәбәр тутсаг, сәдагәтли мәһәббәтдән ирәли ҝәләрәк ону «иманлылар ҹәмијјәтинин ағсаггалларыны» чағыртдырмаға тәшвиг едәҹәјик ки, онлар «Рәббин ады илә үзәринә јағ сүртәрәк, онун үчүн дуа етсинләр» (Јаг. 5:14). Ишдир, ҝүнаһкар ағсаггаллара јахынлашмырса, бу һагда сусмағымыз һеч дә хејирхаһлығын әламәти олмазды. Ола билсин, јығынҹагда бәзиләри өзүнү тәнһа вә лазымсыз һисс едир, јахуд да мәјуслугдан әзијјәт чәкир. Данышығымызда севҝи долу хејирхаһлығы тәзаһүр етдирмәјин ән јахшы јолу «гәмҝинләрә тәскинлик» вермәкдир (1 Салон. 5:14, ЈД).
17 Аллаһын дүшмәнләри һәмиманлыларымыз барәдә шајиәләр јајанда неҹә давранмалыјыг? Гардашларымызын нөгсансызлығыны шүбһә алтына алмаг әвәзинә, биз белә сөз-сөһбәтләрә мәһәл гојмамалыјыг, јахуд мүнасибдирсә, һәмин инсандан дедикләринин нәјә әсасландығыны сорушмалыјыг. Әҝәр Аллаһын халгынын дүшмәнләри мәсиһчи гардашларымыза хәтәр јетирмәк үчүн онларын һарада олдуғуну билмәк истәјирләрсә, сәдагәтли мәһәббәтдән ирәли ҝәләрәк бу һагда бир кәлмә дә олсун онлара демәјәҹәјик (Сүл. мәс. 18:24).
Севҝи долу хејирхаһ инсан һәјат тапаҹаг
18, 19. Нәјә ҝөрә севҝи долу хејирхаһлыг һәмиманлыларымызла мүнасибәтдә дилимиздән әскик олмамалыдыр?
18 Һәр бир ишдә һәмиманлыларымыза гаршы сәдагәтли мәһәббәт тәзаһүр етдирмәлијик. Һәтта чәтин вәзијјәтләрдә белә, севҝи долу хејирхаһлыг дилимиздән әскик олмамалыдыр. Исраил оғулларынын севҝи долу хејирхаһлығынын «еркән учуб ҝедән шеһ» кими јох олмасы Јеһованын наразылығына сәбәб олду (Һушә 6:4, 6). Диҝәр тәрәфдән исә, бу хүсусијјәти даима тәзаһүр етдирмәјимиз Јеһова Аллаһымыза хош ҝедир. Ҝөрүн О, белә даврананлары неҹә хејир-дуаландырыр.
19 «Салеһлик вә сәдагәтин [севҝи долу хејирхаһлығын] ардынҹа ҝедән һәјат, салеһлик вә шәрәф тапар», — дејә Сүлејманын мәсәлләри 21:21 ајәсиндә дејилир. Хејир-дуалардан бири дә мүвәггәти јох, әбәди һәјатдыр. Јеһова бу хүсусијјәти тәзаһүр етдирән инсана «әбәди һәјаты бәрк» тутмаға көмәк едир (1 Тим. 6:12, 19). Буна ҝөрә дә, ҝәлин баҹардығымыз гәдәр бир-биримизә севҝи долу хејирхаһлыг ҝөстәрәк (Зәк. 7:9).
[Һашијәләр]
a Мәнасы «севҝи долу хејирхаһлыг» олан ибрани сөзү хесед азәрбајҹанҹа Мүгәддәс Китабда «сәдагәт», «мәһәббәт», «хејирхаһлыг», «мәрһәмәт», «етибар» вә саирә кими тәрҹүмә олунуб. Бу сөзләр ибрани сөзүнүн там мәнасыны вермир. Буна ҝөрә дә мәгалә боју ҝәтирилән бүтүн ајәләрдә олан бу сөзләр «севҝи долу хејирхаһлыг» мәнасыны дашыјыр.
b Севҝи долу хејирхаһлығын (инајәтин) сәдагәтдән, мәһәббәтдән вә хејирхаһлыгдан нә илә фәргләндији мүзакирә олунан «Ҝөзәтчи Гүлләси»нин 1 август 2002-ҹи ил сајынын 8 вә 14, 15-ҹи сәһифәләринә бахын.
Изаһ едә биләрсинизми?
• Севҝи долу хејирхаһлыг нәдир?
• Севҝи долу хејирхаһлығын данышығымызда әкс олунмасы үчүн бизә нә көмәк едә биләр?
• Әрлә арвад данышыгларында сәдагәтли мәһәббәти неҹә тәзаһүр етдирә биләрләр?
• Һәмиманлыларымызла мүнасибәтдә севҝи долу хејирхаһлыг ганунун дилимиздә олдуғуну неҹә ҝөстәрә биләрик?
[23-ҹү сәһифәдәки шәкил]
Севҝи долу хејирхаһлығына ҝөрә Давуд Јеһоваја һәмд едирди
[24-ҹү сәһифәдәки шәкил]
Аиләви ибадәт ахшамыны мүнтәзәм олараг кечирирсинизми?