Өјрәндикләринизә әмәл един

“Мәндән нә өјрәндинизсә, нә гәбул етдинизсә, нә ешитдинизсә вә мәндә нә ҝөрдүнүзсә, онлара әмәл един вә сүлһ верән Аллаһ сизинлә олаҹагдыр” (ФИЛИПИЛИЛӘРӘ 4:9).

1, 2. Үмумиликдә өзләрини диндар һесаб едән кәсләрин һәјатына Мүгәддәс Китаб тә’сир ҝөстәрирми? Изаһ един.

“ДИНДАРЛЫГ артыр, әхлаг нормалары исә дәјәрини итирир”. Мә’лумат бүллетенләринин бириндә верилән бу башлыг, Америка Бирләшмиш Штатларынын бүтүн әразиләриндә апарылан сорғуја белә јекун вурду (“Emerging Trends”). Ҝөрүндүјү кими, бу өлкәдә килсәјә ҝедәнләрин вә һәјатларында динин ваҹиб јер тутдуғуну сөјләјән инсанларын сајы артыб. Бунунла белә, бүллетендә гејд олундуғу кими, “дәрин тәәссүрат доғуран бу јекуна бахмајараг, америкалыларын чоху динин ајры-ајры инсанлара вә ҹәмијјәтә үмуми олараг тә’сирини суал алтына гојурлар”.

² Бу, јалныз бир өлкәнин вәзијјәти дејил. Дүнјанын һәр јериндә чох инсанлар өзләрини иманлы һесаб едир вә Мүгәддәс Китабда јазыланларла разы олдугларыны билдирирләр, лакин ејни заманда Мүгәддәс Јазыларын һәјатларына тә’сир етмәсинә јол вермирләр (2 Тимотејә 3:5). Бир тәдгигатчы групунун рәһбәри гејд етмишдир: “Мүгәддәс Китаба әввәлки кими бөјүк һөрмәт бәсләнилир, о ки галды ону охумаг үчүн вахт ајырмаға, өјрәнмәјә вә она әмәл етмәјә — бунлар доғрудан да кечмишдә галды”.

3. а) Мәсиһчи оланлара Мүгәддәс Китаб неҹә тә’сир ҝөстәрир? б) Исанын давамчылары Павелин Филипилиләрә 4:9 ајәсиндә јаздығы мәсләһәтинә неҹә риајәт едирләр?

³ Мәсиһчиләрә ҝәлдикдә исә вәзијјәт башга ҹүрдүр. Аллаһын Кәламынын вердији мәсләһәтләрә әмәл етмәјин сајәсиндә онларын дүшүнҹә тәрзләри вә давранышлары дәјишилиб. Мәсиһчиләрин ҝејиндији јени мәнлик әтрафдакыларын нәзәринә тез чарпыр (Колослулара 3:5-10). Мүгәддәс Китаб Исанын давамчылары үчүн рәфдә тоз басан вә истифадә олунмајан бир китаб дејил. Һәвари Павел Филип шәһәриндә јашајан мәсиһчиләрә демишдир: “Мәндән нә өјрәндинизсә, нә гәбул етдинизсә, нә ешитдинизсә вә мәндә нә ҝөрдүнүзсә, онлара әмәл един вә сүлһ верән Аллаһ сизинлә олаҹагдыр” (Филипилиләрә 4:9). Мәсиһчиләр Аллаһ Кәламынын һәгигәтләрини садәҹә гәбул етмәклә кифајәтләнмирләр. Онлар аиләдә, ишдә, јығынҹагда вә һәјатын диҝәр саһәләриндә Мүгәддәс Китабын мәсләһәтләринә әмәл едәрәк өјрәтдикләринә мүвафиг давранырлар.

4. Нәјә ҝөрә һәјатда Аллаһын ганунларына әмәл етмәк асан дејил?

⁴ Аллаһын ганунларына вә принсипләринә һәјатда әмәл етмәк асан дејил. Биз, Мүгәддәс Китабын “бу әсрин танрысы” адландырдығы Шејтан Иблисин һакимијјәти алтында јерләшән дүнјада јашајырыг (2 Коринфлиләрә 4:4; 1 Јәһја 5:19). Буна ҝөрә дә, Јеһова Аллаһын ҝөзүндә нөгсансыз галмағымыза мане олаҹаг һәр бир шејдән гачынмаг олдугҹа ваҹибдир. Бәс нөгсансызлығымызы неҹә горуја биләрик?

“Сағлам сөзләри... нүмунә олараг” һифз един

5. Исанын “ардымҹа ҝәлмәјә давам етсин” сөзләри һансы мә’наны верир?

⁵ Өјрәндикләримизә әмәл етмәјин үсулларындан бири, иманымыза шәрик олмајан инсанларын ҝөстәрдикләри мүгавимәтләрә бахмајараг, һәгиги ибадәти сәдагәтлә мүдафиә етмәкдир. Бунун үчүн тәһәммүл ҝәрәкдир, бу исә сә’ј тәләб едир. Иса демишдир: “Ким ардымҹа ҝәлмәк истәјирсә, гој өзүнү инкар етсин, ишҝәнҹә дирәјини ҝөтүрүб ардымҹа ҝәлмәјә давам етсин” (Матта 16:24, ЈД). Иса демәди ки, биз онун ардынҹа ҹәми бир һәфтә, бир ај, јахуд бир ил ҝетмәлијик. Әксинә, о деди: “Ардымҹа ҝәлмәјә давам етсин”. Исанын сөзләриндән ҝөрүрүк ки, онун шаҝирди олмаг мүвәггәти просес, диндарлығын епизодик тәзаһүрү дејил. Һәгиги ибадәти сәдагәтлә мүдафиә етмәк, нәјин баһасына олурса-олсун сечдијимиз јолу садигликлә давам етдирмәк демәкдир. Буну неҹә едә биләрик?

6. иринҹи әсрин мәсиһчиләринин Павелдән өјрәндикләри ‘сағлам сөзләрин нүмунәси’ нәдир?

⁶ Һәвари Павел: “Мәндән ешитдијин сағлам сөзләри Мәсиһ Исада олан иман вә мәһәббәтлә нүмунә олараг һифз ет” дејә, һәмкары Тимотеји тәшвиг едирди (2 Тимотејә 1:13, И–93). Павел нә демәк истәјирди? Бурада “нүмунә” кими тәрҹүмә едилән јунан сөзү һәрфи мә’нада рәссамын ескизи демәкдир. Бу ҹүр тәсвир тәфәррүаты илә олмаса да, диггәтли адам артыг ајдын шәкилдә ҹызылмыш контурларын көмәји илә үмуми шәкли ҝөрә биләр. Бунун кими дә, Павелин Тимотејә вә башгаларына өјрәтдији һәгигәтин нүмунәси ағла ҝәлә билән һәр суала конкрет ҹаваб вермәк үчүн дејилди. Ескиз кими, бу тә’лимләрин мәҹмусу да үмуми рәһбәрлик верир, анҹаг бу кифајәтдир ки, сәмими инсанлар Јеһованын онлардан нә тәләб етдијини баша дүшсүнләр. Лакин Аллаһы мәмнун етмәк үчүн, әлбәттә, онлар өјрәндикләринә әмәл едәрәк һәгигәтин нүмунәсини изләмәли идиләр.

7. Мәсиһчиләр сағлам сөзләрин нүмунәсинә неҹә риајәт едирләр?

⁷ Биринҹи әсрдә јашамыш Имене, Исҝәндәр вә Филит кими адамлар ‘сағлам сөзләрин нүмунәсинә’ зидд ҝедән идејалары тәблиғ едирдиләр (1 Тимотејә 1:18-20; 2 Тимотејә 2:16, 17). Илк мәсиһчиләр өзләрини дөнүк чыхан адамлардан неҹә горуја биләрдиләр? Онлар Аллаһдан илһам алмыш јазылары диггәтлә өјрәнмәли вә һәјата кечирмәли идиләр. Павелин вә башга садиг мәсиһчиләрин нүмунәсини тәглид едәнләр өјрәндикләри һәгигәтин нүмунәсинә зидд ҝедән һәр бир шеји ҝөрүб, рәдд едә билирдиләр (Филипилиләрә 3:17; Ибраниләрә 5:14). “Мүнагишә вә сөз давасы хәстәлијинә” тутулмаг әвәзинә, онлар Аллаһа садиглијин доғру јолу илә јеримәјә давам едирдиләр (1 Тимотејә 6:3-6). Өјрәндијимиз һәгигәтләрә ҝүндән-ҝүнә әмәл етмәклә биз дә ејни шеји етмиш олуруг. Бүтүн јер үзүндә Јеһоваја хидмәт едән милјонларла инсанларын Мүгәддәс Китабдан өјрәндикләри һәгигәтин нүмунәсинә риајәт етдикләрини ҝөрмәк иманымызы неҹә дә мөһкәмләндирир! (1 Салониклиләрә 1:2-5).

“Әфсанәләри” рәдд един

8. а) Шејтан бизим иманымызы сындырмаға неҹә чалышыр? б) Павел 2 Тимотејә 4:3, 4 ајәләриндә нә барәдә хәбәрдарлыг етмишди?

⁸ Шејтан өјрәндикләримизин доғру олдуғуна даир шүбһәләр ојадараг бизи һәгигәт јолундан дөндәрмәјә чалышыр. Биринҹи әсрдә олдуғу кими, бу ҝүн дә дөнүкләр вә бә’зи башга инсанлар садәлөвһ адамларын иманыны сындырмаға чалышырлар (Галатијалылара 2:4; 5:7, 8). Бә’зән онлар күтләви информасија васитәләриндә Јеһованын хидмәтчиләринин фәалијјәти вә мәгсәдләри һаггында тәһриф едилмиш мә’луматлар, һәтта ағ јаланлар јајырлар. Һәгигәтдән киминсә үз дөндәрәҹәји барәдә һәвари Павел дә хәбәрдарлыг етмишди: “Вахт олаҹагдыр ки, сағлам тә’лимә тәһәммүл етмәјәҹәкләр; лакин сәсләри гулагларына хош ҝәлән вә арзуларына ујғун олан мүәллимләри әтрафларына топлајаҹаглар. Вә өз гулагларыны һәгигәтдән узаглашдырыб, әфсанәләрә мејл ҝөстәрәҹәкләр” (2 Тимотејә 4:3, 4, И–93).

9. “Әфсанәләр” дедикдә, Павел нәји нәзәрдә тута биләрди?

⁹ Бә’зиләри сағлам сөзләрин нүмунәсинә риајәт етмәк әвәзинә, ‘әфсанәләрлә’ марагланмаға башламышдылар. Бу әфсанәләр нә иди? Ола билсин, Павел буну дедикдә Тобитин апокрофик китабында јазылан ујдурма әфсанәләр кими һекајәләри нәзәрдә тутурдуa. Әфсанәләрә һај-күјә сәбәб олан вә һәгигәтә ујғун олмајан шајиәләр дә аид ола биләрди. Башга инсанлар исә “арзуларына ујғун” олараг, Аллаһын нормаларына вә ја јығынҹагда рәһбәрлији үзәрләринә ҝөтүрәнләри тәнгид едәнләр тәрәфиндән алдадыла биләрдиләр (3 Јәһја 9, 10; Јәһуда 4). Бүдрәмәјә һәр нә сәбәб олса да, ҝөрдүјүмүз кими, бә’зи инсанлар јаланлары Аллаһын Кәламындакы һәгигәтләрдән үстүн тутурдулар. Бир аз кечдикдән сонра онлар өјрәндикләринә әмәл етмәјә сон гојуб, руһани ҹәһәтдән өзләринә зәрәр вурдулар (2 Петер 3:15, 16).

10. Бу ҝүн һансы әфсанәләр мөвҹуддур вә еһтијатлы олмағын ваҹиблијини Јәһја неҹә вурғулады?

¹⁰ Әҝәр динләдијимиз, јахуд охудуғумуз шејләрә диггәт јетирәр вә еһтијатлы оларыгса, мүасир әфсанәләрдән гачына биләрик. Мәсәлән, чох вахт күтләви информасија васитәләриндә әхлагсызлыг нүмајиш етдирилир. Бир чох инсанлар агностисизми, јахуд ачыгҹа атеизми мүдафиә едирләр. Мүгәддәс Китаб тәнгидчиләри, Мүгәддәс Китабын Аллаһдан илһам алдығынын тәсдигинә истеһза едирләр. Мүасир дөнүкләр исә мәсиһчиләрин иманыны гырмаг үчүн даим онларда шүбһәләр ојатмаға чалышырлар. Биринҹи әсрдә јаланчы пејғәмбәрләрдән изһар олунан буна бәнзәр тәһлүкәләр һаггында һәвари Јәһја јазмышдыр: “Севимлиләрим, һәр руһа инанмајын, амма руһлары сынагдан кечирин ки, онларын Аллаһдан олуб-олмадығыны биләсиниз. Чүнки дүнјада чохлу јаланчы пејғәмбәр јајылмышдыр” (1 Јәһја 4:1). Ҝөрдүјүмүз кими, бизә еһтијатлы олмаг лазымдыр.

11. Иманда олуб-олмадығымызы јохламағын үсулларындан бири һансыдыр?

¹¹ Бунунла бағлы Павел јазмышдыр: “Өзүнүзү јохлајын, ҝөрүн иман јолундасынызмы?” (2 Коринфлиләрә 13:5). Бу сөзләрлә һәвари, мәсиһчи тә’лиминин мәҹмусуна риајәт едиб-етмәдијимизи мүәјјән етмәк үчүн өзүмүзү јохламаға тәшвиг едир. Мәсәлән, әҝәр биз һәмишә нәдәнсә наразы олан адамы динләмәјә мејллијиксә, дуа едәрәк өзүмүзү јохламағымыз ҝәрәкдир (Мәзмур 139:23, 24). Јеһованын халгында нөгсанлар ахтармаға мејллијикми? Әҝәр еләдирсә, бунун сәбәби нәдир? Киминсә сөзләри, јахуд һәрәкәти хәтримизә дәјирми? Әҝәр еләдирсә, вәзијјәти дүзҝүнмү гијмәтләндиририк? Бу дүнјада гаршылашдығымыз һәр бир сыхынты мүвәггәтидир (2 Коринфлиләрә 4:17). Һәтта әҝәр бә’зи сынагларла јығынҹагда гаршылашырыгса, бундан өтрү Аллаһа хидмәти дајандырмалыјыгмы? Әҝәр бизи нә исә нараһат едирсә, проблемин һәлли үчүн әлимиздән ҝәләни едиб, сонра мәсәләни Јеһованын өһдәсинә бурахмаг даһа јахшы олмазмы? (Мәзмур 4:4; Сүлејманын мәсәлләри 3:5, 6; Ефеслиләрә 4:26).

12. Веријалылар һансы саһәдә бизим үчүн јахшы нүмунәдир?

¹² Тәнгиди әһвал-руһијјә тәзаһүр етдирмәкдәнсә, ҝәлин шәхси өјрәнмә заманы вә јығынҹаг ҝөрүшләриндә әлдә етдијимиз биликләрә гаршы руһән сағлам мүнасибәти горујуб сахлајаг (1 Коринфлиләрә 2:14, 15). Аллаһын Кәламыны шүбһә алтына гојмағын әвәзинә исә, биринҹи әсрдә јашамыш вә Мүгәддәс Јазылары диггәтлә арашдыран веријалылары тәглид етмәк нә гәдәр мүдрик оларды! (Һәвариләрин ишләри 17:10, 11). Буна ҝөрә дә, ҝәлин әфсанәләрдән гачынараг вә һәгигәтин тәрәфиндә дурараг өјрәндикләримизи һәјата кечирәк.

13. Билмәдән әфсанәләри неҹә јаја биләрик?

¹³ Гачынмағымыз ҝәрәк олан әфсанәләрин даһа бир нөвү мөвҹуддур. Бу, тез-тез електрон почту илә јајылан сенсасијалы мә’луматлардыр. Бу ҹүр һекајәләрә, хүсусилә дә әҝәр онларын илк мәнбәји бизә мә’лум дејилсә, еһтијатла јанашмаг мүдриклик оларды. Һәтта әҝәр бу мә’луматы ҝөндәрән һөрмәтли бир мәсиһчидирсә, о, еһтимал ки, јазылан һадисәләрин шаһиди олмамышдыр. Буна ҝөрә дә, јохланылмамыш мә’луматлары истифадә етмәкдән, јахуд јајмагдан гачынмаг ваҹибдир. Әлбәттә ки, биз мүгәддәслијә ләкә ҝәтирән “мурдар әфсанәләри” тәкрар етмәк истәмирик, чүнки бу әфсанәләр Аллаһын һәгигәтинә ујғун дејил (1 Тимотејә 4:7). Бир-биримизә һәгигәти сөјләмәк борҹумуз олдуғу үчүн билмәдән дә олса, јалан јајмағымыза сәбәб олаҹаг һәр бир һәрәкәтдән чәкинсәк мүдрик давранмыш оларыг (Ефеслиләрә 4:25).

Һәгигәтә әмәл етмәјин ҝәтирдији фајдалар

14. Аллаһын Кәламындан өјрәндикләримизә әмәл етмәк һансы фајданы ҝәтирир?

¹⁴ Мүгәддәс Китабы шәхси өјрәнмәјин вә јығынҹаг ҝөрүшләринин сајәсиндә әлдә етдијимиз биликләрә әмәл етмәк бөјүк фајда ҝәтирәҹәкдир. Мәсәлән, биз һәмиманлыларымызла мүнасибәтләримизин даһа да јахшылашдығыны ҝөрә биләрик (Галатијалылара 6:10). Мүгәддәс Китаб принсипләринә әмәл етмәјин сајәсиндә биз даһа чох севинҹ дујаҹағыг (Мәзмур 19:8). Бундан әлавә, өјрәндикләримизә әмәл едәрәк ‘Аллаһын тә’лимини бәзәјирик’ вә бунунла да һәгиги ибадәтә башгаларыны да ҹәлб етмәк еһтималы артыр (Титуса 2:6-10, И–93).

15. а) Бир гыз мәктәбдә шаһидлик етмәк үчүн ҹәсарәтини неҹә топлады? б) Бу нүмунәдән нә өјрәндиниз?

¹⁵ Јеһованын Шаһидләри арасында, Мүгәддәс Китабы вә она әсасланан нәшрләри шәхсән өјрәнмәјин, һәмчинин јығынҹаг ҝөрүшләриндә мүнтәзәм иштирак етмәјин сајәсиндә өјрәндикләринә әмәл едән чохлу ҝәнҹләр вар. Бу ҝәнҹ мәсиһчиләр нүмунәви давранышлары илә мүәллимләрә вә мәктәб јолдашларына ҝөзәл шаһидлик едирләр (1 Петер 2:12). Ҝөрүн Америка Бирләшмиш Штатларында јашајан 13 јашлы Лесли илә нә баш вериб. Бу ҝәнҹ гызын е’тираф етдији кими, әввәлләр она өз дини һаггында данышмаг чәтин иди, лакин бир һадисә һәр шеји дәјишди. О дејир: “Биз синифдә сатыҹыларын өз малларыны неҹә сатдыгларыны мүзакирә едирдик. Бир гыз әлини галдырыб нүмунә олараг Јеһованын Шаһидләрини мисал чәкди”. Јеһованын Шаһиди олан Лесли буна неҹә мүнасибәт ҝөстәрди? Лесли дејир: “Мән диними мүдафиә етдим, бу да, јәгин, чохларыны тәәҹҹүбләндирди, чүнки адәтән мән мәктәбдә чох сакитәм”. Леслинин бу ҹүр ҹәсарәтли олмасы һансы фајданы ҝәтирди? Лесли дејир: “Мән һәмин гыза брошүра вә трактат сахладым, чүнки онун суаллары варды”. Алдыглары биликләрә әмәл едән вә мәктәбдә шаһидлик етмәк үчүн ҹәсарәтини топлајан бу ҹүр ҝәнҹләр Јеһованын үрәјини, ҝәрәк ки, нә гәдәр севиндирирләр! (Сүлејманын мәсәлләри 27:11; Ибраниләрә 6:10).

16. Бир ҝәнҹ мәсиһчијә Теократик Хидмәт Мәктәби һансы фајданы ҝәтирди?

¹⁶ Елизабетин нүмунәсини дә нәзәрдән кечирәк. Једди јашындан башлајараг орта мәктәбдә охудуғу мүддәт бојунҹа, бу ҝәнҹ гыз Теократик Хидмәт Мәктәбиндән һәр дәфә тапшырығы оланда өз мүәллимини Падшаһлыг Залына дә’вәт едирди. Әҝәр мүәллим ҝәлә билмирдисә, Елизабет дәрсдән сонра мәктәбдә галыр вә онун гаршысында өз тапшырығы илә чыхыш едирди. Елизабет сонунҹу синифдә охујанда, Теократик Хидмәт Мәктәбинин фајдасы һаггында он сәһифәлик мә’рузә јазмыш вә ону дөрд мүәллимдән ибарәт јохлама гаршысында тәгдим етмишди. Ондан һәмчинин Теократик Хидмәт Мәктәбиндә чыхышларын неҹә кечдијини нүмајиш етдирмәји хаһиш етдиләр вә о, “Аллаһ изтираблара нә үчүн јол верир?” мөвзусуну сечди. Ҝөрдүјүмүз кими, Јеһованын Шаһидләри тәрәфиндән Теократик Хидмәт Мәктәбиндә кечирилән маарифләндирмә програмы Елизабетә фајда ҝәтирди. Бу, Аллаһын Кәламындан өјрәндикләринә әмәл едәрәк Јеһоваја иззәт ҝәтирән ҝәнҹ мәсиһчиләрин нүмунәләриндән јалныз биридир.

17, 18. а) Мүгәддәс Китаб дүрүстлүк һаггында нә дејир? б) Јеһованын Шаһидинин дүрүст давранышы бир нәфәрә һансы тәәссүраты бағышлады?

¹⁷ Мүгәддәс Китаб мәсиһчиләри өзләрини һәр шејдә дүрүст апармаға чағырыр (Ибраниләрә 13:18). Дүрүст олмамаг башгалары илә, ән ваҹиби исә Јеһова илә мүнасибәтимизи поза биләр (Сүлејманын мәсәлләри 12:22). Диҝәр тәрәфдән, јахшы давранышымыз өјрәндикләримизә әмәл етдијимизә шәһадәт едир вә бунун сајәсиндә инсанларын чоху Јеһованын Шаһидләринә даһа чох һөрмәт бәсләјирләр.

¹⁸ Филип адлы һәрбичинин башына ҝәлән һадисәни нәзәрдән кечирәк. О, долдурулмамыш, лакин имзаланмыш чекини итирир вә чеки почт илә она ҝөндәринҹәјә гәдәр бу ишдән хәбәри олмур. Чекин үзәринә балаҹа бир кағыз јапышдырылмышды, орада дејилирди ки, чеки тапан Јеһованын Шаһидидир вә ону бу гијмәтли кағызы гајтармаға дини е’тигады тәшвиг едиб. Филип дәһшәтә ҝәлди. “9 мин долларымы оғурлаја биләрдиләр” дејә, о өз-өзүнә дүшүндү. Бир дәфә килсәдә онун шлјапасыны оғурламышдылар вә бу ону мә’јус етмишди. Һәр-һалда бу иши тутан танышларындан бири иди, амма инди танымадығы бир адам нечә мин доллар дәјәриндә чеки онун өзүнә гајтарыр! Сөзсүз ки, дүрүст мәсиһчиләр өз давранышлары илә Јеһова Аллаһа еһтирам ҝөстәрирләр!

Өјрәндикләринизә әмәл етмәјә давам един

19, 20. Мүгәддәс Китабдан өјрәндијимиз һәгигәтләрә мүвафиг јашајырыгса, һансы фајданы әлдә едирик?

¹⁹ Аллаһын Кәламындан өјрәндикләринә әмәл едәнләр, чохлу фајда әлдә едирләр. Шаҝирд Јагуб јазырды: “Ким камил гануна, азадлыг ганунуна диггәтлә бахыб она бағлы галарса вә унутган динләјиҹи дејил, иҹраедиҹидирсә, өз әмәлиндә хошбәхт олаҹагдыр” (Јагуб 1:25). Шүбһә јохдур ки, өјрәндијимиз Мүгәддәс Китаб һәгигәтләринә мүвафиг давранырыгса, биз һәгиги хошбәхтлик әлдә едәҹәк вә һәјатын чәтинликләринә даһа асан таб ҝәтирәҹәјик. Ән башлыҹасы исә, биз Јеһованын хејир-дуаларына вә әбәди һәјат үмидинә саһиб олаҹағыг! (Сүлејманын мәсәлләри 10:22; 1 Тимотејә 6:6).

²⁰ Бу сәбәбдән, Аллаһын Кәламыны сә’јлә өјрәнмәјә давам един. Јеһоваја ибадәт едәнләрлә мүнтәзәм олараг бир јерә топлашын вә мәсиһчи ҝөрүшләриндә диггәтли олун. Өјрәндикләринизә һәмишә әмәл един вә “сүлһ верән Аллаһ” сизинлә олаҹагдыр (Филипилиләрә 4:9).

[Һашијә]

Хатырлајырсынызмы?

• ‘Сағлам сөзләрин нүмунәси’ нәдир вә биз она неҹә риајәт едә биләрик?

• Һансы “әфсанәләрдән” гачынмалыјыг?

• Аллаһын Кәламындан өјрәндикләримизә әмәл етдикдә һансы фајданы әлдә едирик?

[15-ҹи сәһифәдәки шәкил]

Илк мәсиһчиләр өзләрини дөнүк чыхан адамлардан неҹә горуја биләрдиләр?

[16-ҹы сәһифәдәки шәкилләр]

Шүбһәләр күтләви информасија васитәләри, Интернет вә мүасир дөнүкләр васитәсилә сәпилә биләр.

[17-ҹи сәһифәдәки шәкил]

Јохланылмамыш мә’луматлары јајмаг дүзҝүн дејил.

[18-ҹи сәһифәдәки шәкилләр]

Јеһованын Шаһидләри Аллаһын Кәламындан охудугларына мәктәбдә, ишдә вә башга јерләрдә әмәл едирләр.