Малик олдуғумуз һәр шеји ианә етмәлијикми?

“МӘНИ диләнчи адландыра биләрсиниз, лакин бу мәни нараһат етмир. Ахы мән буну Иса үчүн едирәм”. Протестант кешишинин бу ајдын сөзләриндән динләрин малијјәләшдирилмәси мәсәләсинин һансы фикир ајрылыгларына сәбәб олдуғуну баша дүшмәк олар. Елә тәәссүрат јараныр ки, рәсми сурәтдә тә’сис едилмиш дини тәшкилатлар јалныз чохлу пул һесабына мөвҹуд ола биләр. Мәваҹиб өдәмәк, мә’бәдләр тикмәк вә онлары тә’мин етмәк, миссионер фәалијјәтини малијјәләшдирмәк лазымдыр. Бүтүн бунлары тә’мин етмәк үчүн пулу һарадан алмалы?

Бир чох килсәләр мәсәләнин һәллини ондалығын јығылмасында ҝөрүрләрa. Јеванҝелист Норман Робертсон иддиа едир ки, “ондалығын јығылмасы Аллаһын јер үзәриндәки Өз падшаһлығыны малијјәләшдирилмә үсулудур. Бу Онун, Мүждәнин тәблиғ едилмәсини мүмкүн едән тәҹһизат системидир”. Јеванҝелист Норман Робертсон чәкинмәдән диндарларын ианә етмәјә борҹлу олдугларыны вурғулајараг дејир: “Сиз ондалығы имканлы олдуғунуз үчүн вермирсиниз. Бу, итаәт мәсәләсидир. Ондалығы өдәмәкдән бојун гачырмаг, Аллаһын әмрләрини ачыгдан-ачыға позмагдыр. Бу, башгасынын әмлакыны мәнимсәмәк демәкдир” (“Tithing—God’s Financial Plan”).

Јәгин сиз разылашаҹагсыныз ки, мадди ҹәһәтдән ианә етмәк мәсиһчинин борҹудур. Лакин килсәләрин исрарла ианә етмәк чағырышы сиздә нараһатчылыг, јахуд гәзәб һисси ојатмырмы? Бразилија илаһијјатчысы Инасју Стридер килсәләри, ондалығы “өзләринин дахили проблемләринин һәлли” үчүн јығмагда ҝүнаһландырыр вә белә “ганунсуз вә тәһгиредиҹи” һәрәкәти “илаһијјатдан узаглашма” адландырыр. Нәтиҹәдә, онун гејд етдији кими, “ишсизләр, дуллар, харабалыгларда јашајанлар вә үмумијјәтлә садәлөвһ инсанлар белә нәтиҹәјә ҝәлирләр ки, Аллаһ онлары тәрк етмиш вә онларын аиләләри јарыаҹ-јарытох јашајараг кешишә бөјүк мәбләғдә пул өдәмәјә борҹлудурлар”.

Сиз соруша биләрсиниз: Ондалығы өдәмәјә мәҹбур едән килсәләр Мүгәддәс Јазылара дүзҝүнмү риајәт едирләр? Бә’зи динләр инсанлары бүсбүтүн сојмаг үчүн онлары Аллаһын ҹәзасы илә горхутмурму? Аллаһ биздән ҝөзләјирми ки, малик олдуғумуз һәр шеји ианә едәк?

[Һашијә]