“Миннәтдар олун”

“Мәсиһин сүлһү, үрәкләриниздә һаким олсун... Миннәтдар олун” (КОЛОСЛУЛАРА 3:15, И–93).

1. Мәсиһчи јығынҹағы Шејтанын нәзарәти алтында олан дүнјадан нә гәдәр фәргләнир?

ЈЕҺОВАНЫН ШАҺИДЛӘРИНИН бүтүн дүнја үзрә 94 600 јығынҹағында миннәтдарлыг руһу ҝөрүнүр. Һәр ҝөрүш, өзүнә Јеһоваја миннәтдарлыг сөзләри дахил едән дуа илә башланыр вә гуртарыр. Ҝәнҹләрдән вә јашлылардан, чохдан вә ја тәзәликҹә Шаһид оланлардан — Аллаһа ибадәт вә севинҹли үнсијјәт үчүн топлашанларын һамысындан тез-тез “сағ олун” вә “бујурун” кими хош сөзләр ешитмәк олар (Мәзмур 133:1). Бу, “Аллаһы танымајан вә... Мүждәјә итаәт етмәјәнләр” арасында јајылмыш егоистликдән неҹә дә фәргләнир! (2 Салониклиләрә 1:8). Биз нашүкүр дүнјада јашајырыг. Вә әҝәр бу дүнјанын танрысынын ким олдуғуну хатырласаг, бу, тәәҹҹүблү дејил. Мәғрурлуғу вә үсјанкар руһу бүтүн бәшәр ҹәмијјәтинә һопмуш Шејтан Иблис егоистлијин тәҹәссүмүдүр! (Јәһја 8:44; 1 Јәһја 5:19; 2 Коринфлиләрә 4:4).

2. Һансы хәбәрдарлыға диггәт јетирмәлијик вә һансы суаллары нәзәрдән кечирәҹәјик?

² Бизи Шејтанын дүнјасы әһатә етдији үчүн еһтијатлы олмаг лазымдыр ки, онун руһуна јолухмајаг. Биринҹи әсрдә һәвари Павел Ефес мәсиһчиләринә хатырладырды: “Бир заманлар бу ҝүнаһлара ҝөрә һәрәкәт етдиниз, бу дүнјанын ҝедишинә, һавадакы һакимијјәтин, јә’ни инди итаәтсиз инсанларда фәал олан руһун һөкмранына ујдунуз. Бир заманлар бизим һамымыз да ҹисмани тәбиәтимизин еһтирасларына ујараг, бәдәнин вә әглин истәкләрини јеринә јетирәрәк бу ҹүр инсанларын арасында јашадыг вә диҝәрләри кими тәбиәтән Аллаһын гәзәбинә мә’руз идик” (Ефеслиләрә 2:2, 3). Бу сөзләр бу ҝүн дә чох инсанлара аиддир. Биз миннәтдарлыг руһуну неҹә горујуб сахлаја биләрик? Јеһова һансы көмәклији тәклиф едир? Һәгигәтән дә миннәтдар олдуғумузу әмәлдә неҹә ҝөстәрә биләрик?

Миннәтдар олмаг үчүн сәбәбләр

3. Јеһоваја нәләрә ҝөрә миннәтдарыг?

³ Илк нөвбәдә Јеһова Аллаһа — Јараданымыза вә Һәјатверәнимизә, хүсусилә дә бизә сәхавәтлә вердији һәдијјәләрә ҝөрә миннәтдар олмаға борҹлујуг (Јагуб 1:17). Сағ олдуғумуза ҝөрә һәр ҝүн Јеһоваја миннәтдарлыг едирик (Мәзмур 36:9). Бизи, Јеһованын ҝүнәш, ај, улдузлар кими ҝөзә чарпан чохсајлы әл ишләри әһатә едир. Торпаг гатындакы минералларын зәнҝин јатаглары, атмосфердәки һәјати ваҹиб газларын таразлашдырылмыш тәркиби, тәбиәтдәки маддәләрин мүрәккәб дөвријјәси — бүтүн бунлар севән сәмави Атамыза борҹлу олдуғумузу ҝөстәрир. Давуд падшаһ охујурду: “Ја Рәбб Аллаһым, јаратдығын харигәләр вә бизим үчүн дүшүнҹәләрин чохдур; Сәнә бәнзәјән јохдур. Онлары е’лан едиб сөјләмәк истәсәм, саја ҝәлмәз” (Мәзмур 40:5).

4. Јығынҹагларымыздакы севинҹли мүһитә ҝөрә Јеһоваја нә үчүн миннәтдарлыг етмәлијик?

⁴ Бу ҝүн һәгиги Ҹәннәт олмаса да, Јеһованын хидмәтчиләри руһани Ҹәннәтдәки һәјата севинирләр. Падшаһлыг Залларымызда вә конгресләрдә Аллаһын руһунун һәмиманлыларымыза неҹә тә’сир ҝөстәрдијини вә ҝәтирдији сәмәрәни ҝөрүрүк. Буну нәзәрә алараг, бә’зи Шаһидләр һеч бир динин фәал тәрәфдарлары олмајан инсанлара тәблиғ едәркән, Павелин галатијалылара јаздығы мәктубундакы сөзләрә истинад едирләр. Әввәлҹә онлар диггәти “ҹисмани тәбиәтин әмәлләри”нә јөнәлдир вә мүсаһибләриндән буна бәнзәр әмәлләри мүасир ҹәмијјәтдә ҝөрүб-ҝөрмәдикләрини сорушурлар (Галатијалылара 5:19-23). Әксәријјәти дәрһал разылашыр ки, бу ҝүн белә әмәлләр инсанларын сәҹијјәви хүсусијјәтләридир. Инсанлара Аллаһын руһунун ҝәтирдији сәмәрәнин тәсвирини ҝөстәрәндә вә онлары бу сәмәрәни өз ҝөзләри илә ҝөрмәләри үчүн јерли Падшаһлыг Залына дә’вәт едәндә, чохлары һәвәслә е’тираф едирләр: “Аллаһ һәгигәтән араныздадыр!” (1 Коринфлиләрә 14:25). Вә бу вәзијјәт јалныз јерли Падшаһлыг Залында мүшаһидә едилмир. Һара ҝетсәк дә, Јеһованын алты милјондан артыг Шаһидиндән киминлә ҝөрүшсәк дә, һәмин хошбәхт, севинҹли руһу ҝөрәҹәјик. Бу ҹүр ҝөзәл инсан ҹәмијјәтинин мөвҹудлуғу — бүтүн бунлары Өз руһу илә мүмкүн едән Јеһоваја миннәтдарлыг етмәк үчүн сәбәбдир (Тсефанја 3:9; Ефеслиләрә 3:20, 21).

5, 6. Аллаһын бөјүк һәдијјәси олан фидијә үчүн миннәтдарлығымызы неҹә билдирә биләрик?

⁵ Јеһованын бизә вердији ән бөјүк вә ән камил һәдијјә, Оғлу Иса Мәсиһин фидијә гурбанлығыдыр. Һәвари Јәһја јазырды: “Севимлиләрим, әҝәр Аллаһ бизи белә севдисә, биз дә бир-биримизи севмәлијик” (1 Јәһја 4:11). Фидијәјә ҝөрә миннәтдар олдуғумузу Јеһоваја јалныз мәһәббәт вә миннәтдарлығымызы билдирмәклә дејил, һәмчинин башгаларына мәһәббәт тәзаһүр етдирәрәк һәјат тәрзимизлә ҝөстәририк (Матта 22:37-39).

⁶ Јеһованын гәдим Исраил халгы илә неҹә даврандығыны нәзәрдән кечирмәклә, миннәтдарлыг билдирмәк барәдә даһа чох шеј өјрәнә биләрик. Мусанын васитәсилә бу халга вердији Ганунун көмәји илә Аллаһ чохлу ибрәт дәрси вермишди. Ганундакы “елмин вә һәгигәтин әсасына” варараг, Павелин “миннәтдар олун” мәсләһәтинә риајәт етмәјә көмәк едән чох шеј өјрәнә биләрик (Ромалылара 2:19; Колослулара 3:15, И–93).

Мусанын ганунундан үч ибрәт дәрси

7. Ондалыг һаггындакы ганун исраиллиләрә Јеһоваја олан миннәтдарлыгларыны билдирмәјә неҹә имкан верирди?

⁷ Јеһованын јахшылығына ҝөрә сәмими миннәтдарлыгларыны билдирә билсинләр дејә, Мусанын ганунунда Јеһова үч үсула диггәт јөнәлтмишди. Биринҹиси, ондалыг һаггындакы ганун иди. Торпағын мәһсулу “мал-гаранын вә гојунун ондалығы” илә бирликдә “Рәббә мүгәддәс” олмалы иди (Левилиләр 27:30-32). Исраиллиләр итаәткарлыг ҝөстәрәндә Јеһова онлара чохлу хејир-дуа верирди. “Ондалығын һамысыны анбар евинә ҝәтирин дә, евимдә јемәк олсун вә мәни инди бунунла сынајын, ордуларын Рәбби дејир, ҝөјләрин пәнҹәрәләрини сизә ачмајаҹағаммы вә јетәҹәк гәдәрдән артыг үзәринизә бәрәкәт төкмәјәҹәјәмми?” (Малаки 3:10).

8. Көнүллү гурбанлар ондалыгдан нә илә фәргләнирди?

⁸ Икинҹиси, ондалыг һаггындакы ганундан әлавә, Јеһова исраиллиләр үчүн көнүллү гурбанлар ҝәтирмәк имканы да јаратмышды. О, Мусаја тапшырды ки, исраиллиләрә белә десин: “Сизи апармагда олдуғум дијара ҝирдијиниз заман, елә олаҹаг ки, о дијарын чөрәјиндән јејинҹә Рәббә бир галдырма тәгдимәси әрз едәҹәксиниз”. Онлар ‘хәмирин илкиндән галдырма тәгдимәси олараг’ нәсилләри боју ‘көкә әрз етмәли идиләр’. Диггәт јетирәк ки, ҝәтирилән илк бәһрәләрә аид конкрет мигдар ҝөстәрилмирди (Сајлар 15:18-21). Лакин исраиллиләр тәгдимәни миннәтдарлыг һиссиндән ҝәтирдикдә, онлар Јеһованын хејир-дуа верәҹәјинә әмин олурдулар. Буна бәнзәр һалы Һезекиелин мә’бәдлә бағлы рө’јасында ҝөрүрүк. Орада дејилир: “Һәр шејин бүтүн нүбарларынын илки вә бүтүн галдырма тәгдимәләриниздән һәр шејин һәр галдырма тәгдимәси каһинләрин олаҹаг, евинизә бәрәкәт гонсун дејә, хәмирләринизин илкини каһинә верәҹәксиниз” (Һезекиел 44:30).

9. Мәһсулун галығы барәсиндәки ганунун васитәсилә Јеһова нә өјрәдирди?

⁹ Үчүнҹүсү, Јеһова мәһсулун галығы барәдә ганун вермишди. Аллаһ бујурмушду: “Дијарынызын әкинини бичдијиниз заман, тарланын күнҹләрини бүсбүтүн бичмәјәҹәксән вә әкиндән дүшән сүнбүлләри јығмајаҹагсан. Вә бағын үзүмләрини бүсбүтүн јығмајаҹагсан вә бағынын јерә дүшән мејвәсини јығмајаҹагсан; онлары фағыр вә гәриб үчүн сахлајаҹагсан; мән Аллаһыныз Рәббәм” (Левилиләр 19:9, 10). Јенә дә конкрет мигдар ҝөстәрилмирди. Һәр бир исраилли, еһтијаҹы оланлар үчүн нә гәдәр сахлајаҹағыны өзү гәрара алырды. Бурада мүдрик падшаһ Сүлејманын сөзләри тәтбиг едиләндир: “Касыба сәхавәт ҝөстәрән санки Рәббә борҹ верәр, чүнки онун әвәзи Рәбдән ҝәләр” (Сүлејманын мәсәлләри 19:17, МКШ). Беләликлә Јеһова касыблара шәфгәт вә диггәт ҝөстәрмәји өјрәдирди.

10. Миннәтдарлыг һиссини итирдикдә, Исраил халгынын башына нәләр ҝәлди?

¹⁰ Исраиллиләр итаәткарлыгла ондалыг ҝәтирәндә, көнүллү гурбанлар тәгдим едәндә вә касыблар үчүн нә исә сахлајанда, Јеһова онлара хејир-дуа верирди. Лакин миннәтдарлыг һиссини итирмәклә, Исраил халгы Јеһованын лүтфүндән мәһрум олду. Бу, бәдбәхтлијә вә нәтиҹәдә сүрҝүнә ҝәтириб чыхартды (2 Тарихләр 36:17-21). Бунда бизим үчүн һансы ибрәт дәрсләри вар?

Биз миннәтдарлығымызы неҹә билдирә биләрик?

11. Јеһоваја миннәтдарлығымызы һансы әсас үсулла билдирә биләрик?

¹¹ Јеһованы мәдһ едиб, Она миннәтдарлыг билдирә биләҹәјимиз әсас үсул да “гурбанларла” бағлыдыр. Еһтимал ки, биз, мәсиһчиләр кими, Мусанын гануну алтында дејилик вә һејванлары вә ја мәһсулун бир һиссәсини гурбан ҝәтирмәк мәс’улијјәти дашымырыг (Колослулара 2:14). Буна бахмајараг, һәвари Павел јәһуди мәсиһчиләрини тәшвиг едирди: “Бу сәбәбдән, һәмишә... Аллаһа һәмд гурбаныны, јә’ни Онун адыны играр едән додагларын бәһрәсини тәгдим едәк” (Ибраниләрә 13:15). Тәблиғ хидмәтиндә вә ја һәмиманлыларымызын ‘јығынҹагларында’ Јеһоваја һәмд гурбаны тәгдим етмәк үчүн габилијјәт вә имканларымыздан истифадә етмәклә, севән сәмави Атамыз Јеһова Аллаһа сәмими миннәтдарлығымызы ифадә едә биләрик (Мәзмур 26:12). Исраиллиләрин Јеһоваја миннәтдарлыгларыны билдирмәк имканларындан биз нә өјрәнирик?

12. Мәсиһчи мәс’улијјәтимизә даир ондалыг һаггындакы ганундан нә өјрәнирик?

¹² Һәр шејдән әввәл, ҝөрдүјүмүз кими, ондалығы ҝәтирмәк һәр бир исраиллинин борҹу иди. Биз мәсиһчиләр дә, хидмәтдә иштирак етмәк вә мәсиһчи ҝөрүшләринә ҝәлмәк мәс’улијјәти дашыјырыг. Бунунла мәшғул олуб-олмамаг гәрары бизим ихтијарымыза верилмәјиб. Сонун вахты һаггындакы бөјүк пејғәмбәрлијиндә Иса ајдын сурәтдә билдирди: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир” (Матта 24:14, И–93; 28:19, 20). Мәсиһчи ҝөрүшләринә даир һәвари Павел Аллаһдан илһам алараг бунлары јазмышдыр: “Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бә’зиләринин адәт етдикләри кими өз јығынҹагларымызы тәрк етмәјәк. Амма хүсусән, о Ҝүнүн јахынлашдығыны ҝөрдүјүмүз нисбәтдә бир-биримизи даһа чох үрәкләндирәк” (Ибраниләрә 10:24, 25). Тәблиғ етмәк, өјрәтмәк вә гардашларымызла јығынҹаг ҝөрүшләринә мүнтәзәм олараг топлашмаг мәс’улијјәтимизи севинҹлә гәбул етмәклә, буну үстүн вә шәрәфли сајмагла Јеһоваја миннәтдарлығымызы билдирмиш олуруг.

13. Көнүллү гурбанлар вә мәһсулун галығы барәдәки ганундан нә өјрәнирик?

¹³ Исраиллиләрин өз миннәтдарлыгларыны билдирә биләҹәкләри диҝәр ики үсул — көнүллү гурбанлар вә мәһсулун галығы илә әлагәли олан үсуллар үзәриндә дүшүнмәк дә фајдалыдыр. Ганун ондалыға аид конкрет тәләбләр вердији һалда, нә гәдәр көнүллү ианә етмәјә вә мәһсулу јығандан сонра тарлада нә гәдәр мәһсул сахламаға даир дәгиг ҝөстәришләр вермирди. Даһа доғрусу, Јеһованын хидмәтчисинин үрәји, онун миннәтдарлығынын нә гәдәр дәрин олдуғуну ҝөстәрмәли иди. Буна бәнзәр тәрздә, хидмәтдә вә мәсиһчи јығынҹагларында иштирак етмәк Јеһованын һәр бир хидмәтчисинин биринҹи дәрәҹәли мәс’улијјәти олдуғуну баша дүшсәк дә, өзүмүздән соруша биләрдик: бу вәзифәмизи үрәкдән вә һазырлыг руһу илә јеринә јетиририкми? Буну, Јеһованын бизә етдији һәр бир шеј үчүн үрәкдән миннәтдарлыг етмәк имканы сајырыгмы? Бу ишләрдә имканларымызын јол вердији гәдәр үрәкдән иштирак едирикми? Јохса биз бу ишләрлә јалныз борҹ һиссиндән ирәли ҝәләрәк мәшғул олуруг? Еһтимал ки, бу суаллара биз өзүмүз ҹаваб вермәлијик. Һәвари Павел изаһ едирди: “Гој һәр кәс өз ишини сынасын вә о заман башгасы илә дејил, өзү илә ифтихара сәбәб олсун” (Галатијалылара 6:4).

14. Јеһова, Она хидмәтимизлә әлагәдар биздән нә ҝөзләјир?

¹⁴ Јеһова Аллаһ бизим вәзијјәтләримизи јахшы билир. Имканларымызын һүдудлары Она бәллидир. О, хидмәтчиләринин һәвәслә ҝәтирдији, бөјүк вә ја кичик гурбанлары гијмәтләндирир. О ҝөзләмир ки, биз һамымыз ејни өлчүдә гурбанлар ҝәтирәҹәјик, биз буну едә билмәрик дә. Мадди ианәләр һаггындакы мәсәләни мүзакирә едәрәк, һәвари Павел Коринф мәсиһчиләринә ја­зырды: “Әҝәр шөвг варса, инсанда олмајан мала ҝөрә дејил, олан мала ҝөрә мәгбулдур” (2 Коринфлиләрә 8:12). Бу принсип бизим Аллаһа хидмәтимизә дә ејни тәрздә тәтбиг едиләндир. Хидмәтимизин Јеһованын ҝөзүндә мәгбул олмасы етдијимизин һәҹми илә дејил, ону севинҹлә вә үрәкдән јеринә јетирмәјимизлә мүәјјән олунур (Мәзмур 100:1-5; Колослулара 3:23).

Пионер руһу инкишаф етдирин вә ону горујуб сахлајын

15, 16. а) Пионер хидмәти илә миннәтдарлыг арасында һансы әлагә вар? б) Пионер кими хидмәт едә билмәјәнләр пионер руһуну неҹә әкс етдирә биләрләр?

¹⁵ Јеһоваја миннәтдарлыг етмәјин ҝөзәл үсулу таммүддәтли хидмәтә башламагдыр. Јеһоваја мәһәббәтдән вә Онун мәрһәмәтинә миннәтдарлыг һиссиндән ирәли ҝәләрәк бир чох һәср олунмуш хидмәтчиләр һәјатларында бөјүк дәјишикликләр етмишләр ки, Јеһоваја хидмәтә даһа чох вахт ајыра билсинләр. Бә’зиләри хош хәбәри тәблиғ едәрәк вә инсанлара һәгигәти өјрәдәрәк пионер кими ај әрзиндә орта һесабла 70 саат хидмәт едә билирләр. Имканлары мүхтәлиф шәраитләрлә мәһдудлашан диҝәрләри исә вахташыры олараг көмәкчи пионер кими хидмәт едәрәк ај әрзиндә 50 саат тәблиғ едирләр.

¹⁶ Бәс Јеһованын нә пионер, нә дә көмәкчи пионер кими хидмәт едә билмәјән чохсајлы хидмәтчиләри неҹә? Онлар өз миннәтдарлыгларыны, пионер руһу инкишаф етдирмәклә вә горујуб сахламагла билдирә биләрләр. Неҹә? Пионерләри руһландырмагла, ушагларында таммүддәтли хидмәтчиләр олмаг һәвәсини ојандырмагла вә имканлары јол вердији гәдәр тәблиғдә сә’ј ҝөстәрмәклә. Хидмәтдә етдикләримиз, әсас е’тибары илә Јеһованын бизим үчүн кечмишдә вә инди етдикләринә вә ҝәләҹәкдә едәҹәкләринә үрәјимиздәки миннәтдарлығын нә гәдәр дәрин олмасындан асылыдыр.

Малымызла миннәтдарлыг едирик

17, 18. а) Биз малымызла неҹә миннәтдарлыг едә биләрик? б) Иса дул гадынын ианәсини неҹә гијмәтләндирди вә нәјә ҝөрә?

¹⁷ Сүлејманын мәсәлләри 3:9 ајәсиндә дејилир: “Малынла вә бүтүн мәһсулунун нүбары илә, Рәббә еһтирам ет”. Јеһованын хидмәтчиләри артыг ондалыг ҝәтирмәли дејилләр. Павел Коринфдәки јығынҹаға јазырды: “Һәр кәс үрәјиндә нијјәт етдији кими версин, кәдәрлә, јахуд мәҹбури јох; чүнки Аллаһ ҝүләр үзлә верәни севир” (2 Коринфлиләрә 9:7). Падшаһлыг һаггындакы үмумдүнја тәблиғ ишини дәстәкләмәк үчүн көнүллү ианәләр етмәклә биз дә өз миннәтдарлығымызы билдиририк. Сәмими миннәтдарлыг бизи буну мүнтәзәм олараг етмәјә тәшвиг едир, еһтимал ки, биз һәтта еркән мәсиһчиләрин етдикләри кими, һәр һәфтә мүәјјән мәбләғи кәнара гојаҹағыг (1 Коринфлиләрә 16:1, 2).

¹⁸ Јеһоваја миннәтдарлығымыз нә гәдәр ианә етмәјимизлә јох, буну һансы әһвал-руһијјә илә етмәјимизлә тәзаһүр олунур. Буна, өз һәдијјәләрини мә’бәдин ианә гутусуна атан инсанлары мүшаһидә едән Иса диггәт јөнәлтмишдир. Иса, еһтијаҹы олан, лакин гутуја “ики лептон” атан дул гадыны ҝөрүб деди: “Һәгигәти сизә дејирәм ки, бу јохсул дул гадын һамыдан чох пул атды. Чүнки онларын һамысы өз варларынын артыглығындан Аллаһа һәдијјә вердиләр, бу гадын исә касыблығына бахмајараг, доланмаг үчүн әлиндә олан бүтүн пулуну верди” (Лука 21:1-4).

19. Өз миннәтдарлығымызы неҹә билдирмәјимиз үзәриндә бир даһа дүшүнмәк нәјә ҝөрә фајдалыдыр?

¹⁹ Гој бу мүзакирә бизи, өз миннәтдарлығымызы неҹә билдирдијимиз үзәриндә бир даһа дүшүнмәјә тәшвиг етсин. Мәсәлән, Јеһоваја һәмд гурбанларымызы вә үмумдүнја ишинә мадди јардымымызы артыра биләрикми? Әҝәр белә давранарыгса, әмин ола биләрик ки, сәхавәтли севән Атамыз Јеһова, бизим миннәтдарлығымызы бу тәрздә билдирмәјимиздән разы галаҹаг.

Хатырлајырсынызмы?

• Биз һансы сәбәбләрдән Јеһоваја миннәтдар олмалыјыг?

• Ондалыг, көнүллү ианәләр вә мәһсулун галығы барәсиндәки ганунлардан биз һансы ибрәт дәрсләрини ҝөтүрүрүк?

• Пионер руһуну неҹә инкишаф етдиририк?

• Биз өз малымызла Јеһоваја миннәтдарлығымызы неҹә билдирә биләрик?

[29-ҹу сәһифәдәки шәкилләр]

“Һәр бир јахшы бәхшиш вә һәр камил һәдијјә јухарыдан... ҝәлир”.

[30-ҹу сәһифәдәки шәкилләр]

Бурада Ганундан һансы үч ибрәт дәрсини ҝөрүрүк?

[31-ҹи сәһифәдәки шәкилләр]

Биз һансы гурбанлары ҝәтирә биләрик?