Јеһованын хидмәтчиләри һәгиги үмидә маликдирләр
“Јагубун галығы чох халгларын ортасында, Рәбб тәрәфиндән шеһ кими, инсан үчүн ҝеҹикмәјән... от үзәринә дүшән јағмур кими олаҹаг” (МИКА 5:7).
1. Руһани Исраил һансы тәрздә тәравәт ҝәтирир?
ЈАҒЫШ вә шеһ бөјүк Јарадан олан Јеһованын әлинин ишидир. Шеһин вә ја јағышын инсанлар тәрәфиндән вериләҹәјинә үмид етмәк әбәсдир. Мика пејғәмбәр јазырды: “Јагубун галығы чох халгларын ортасында, Рәбб тәрәфиндән шеһ кими, инсан үчүн ҝеҹикмәјән вә адәм оғуллары үчүн ҝөзләмәјән от үзәринә дүшән јағмур кими олаҹаг” (Мика 5:7). Бу ҝүн “Јагубун галығы” кимләрдир? Онлар руһани исраиллиләр, “Аллаһын Исраили”нин галығыдыр (Галатијалылара 6:16). Онлар јерин “чох халглары” үчүн “Рәбб тәрәфиндән шеһ” вә “от үзәринә дүшән јағмур” кимидирләр. Бәли, мәсһ едилмиш мәсиһчиләр бу ҝүн инсанлар үчүн Аллаһын хејир-дуасыдырлар. Јеһова онлары Падшаһлығын тәблиғчиләри кими истифадә едәрәк инсанлара һәгиги үмид хәбәрини чатдырыр.
2. Нараһат дүнјада јашасаг да, нәјә ҝөрә һәгиги үмидә маликик?
2 Буҝүнкү дүнјада јашајан инсанларын һәгиги үмидләринин олмамасы бизи тәәҹҹүбләндирмәли дејил. Сијаси дәјишкәнлик, әхлаг нормаларынын ашағы дүшмәси, ҹинајәткарлыг, игтисади бөһран, терроризм, мүһарибәләр — буна бәнзәр шејләри Шејтан Иблисин һөкм сүрдүјү дүнјада ҝөзләмәк олар (1 Јәһја 5:19). Чохлары ҝәләҹәјә горху илә бахырлар. Лакин Јеһованын хидмәтчиләри олан бизләр горхмуруг, чүнки ҝәләҹәјә әсаслы үмидимиз вар. Бу үмид Аллаһын Кәламына әсасландығы үчүн һәгигидир. Јеһованын дедикләри һәр заман доғру чыхдығы үчүн биз Она вә Онун Кәламына иман ҝәтиририк.
3. а) Јеһова нәјә ҝөрә Исраилә вә Јәһудаја гаршы чыхмаг нијјәтиндә иди? б) Миканын сөзләрини нәјә ҝөрә бизим ҝүнләрә аид етмәк олар?
3 Миканын Аллаһдан илһам алмыш пејғәмбәрлији Јеһованын исми илә јеримәк әзмимизи мөһкәмләндирир вә бизә һәгиги үмид үчүн әсас верир. Ерамыздан әввәл VIII әсрдә, Миканын пејғәмбәрлик етдији дөврдә, Аллаһла әһди олан халг ики дөвләтә — Исраил вә Јәһуда дөвләтләринә ајрылмышдыр вә онлардан һеч бири Аллаһла бағладыглары әһд барәдә хатырламырды. Бунун нәтиҹәсиндә исә, әхлаг нормаларынын ашағы дүшмәси, дини дөнүклүк вә һәдсиз вар-дөвләт топламаг јанғысы мүшаһидә олунурду. Буна ҝөрә дә Јеһова хәбәрдар етди ки, онларын әлејһинә чыхаҹагдыр. Аллаһын хәбәрдарлығы Миканын мүасирләринә үнванланса да, һазыркы вәзијјәт Миканын ҝүнләрини о гәдәр хатырладыр ки, онун сөзләрини бизим ҝүнләрә дә аид етмәк олар. “Мика” китабынын једди фәслиндән бә’зи фикирләрә диггәт јетирдикдә бу ајдын олаҹагдыр.
Мика китабынын гыса хүласәси
4. “Мика” китабынын биринҹи үч фәслиндә һансы мә’лумат верилир?
4 Ҝәлин “Мика” китабынын гыса хүласәсини нәзәрдән кечирәк. 1-ҹи фәсилдә Јеһова Исраилин вә Јәһуданын ҝүнаһыны ифша едир. Исраил ҝүнаһларына ҝөрә мәһв едиләҹәк, Јәһуданын чәкдији ҹәза исә Јерусәлимин дарвазаларына кими чатаҹаг. 2-ҹи фәсилдә зәнҝинләрин вә ҝүҹлүләрин, зәифләрә вә көмәксизләрә зүлм етмәләриндән бәһс едилир. Лакин һәмин фәсилдә Аллаһын халгынын бир араја топланаҹағына даир Аллаһын вә’ди дә јазылыб. 3-ҹү фәсилдә Јеһованын, халгын рәһбәрләринә вә гануну позан пејғәмбәрләринә гаршы сөјләдији сөзләр јазылыб. Рәһбәрләр әдаләти тәһриф едир, пејғәмбәрләр исә јалан сөјләјирләр. Буна бахмајараг, Јеһованын ҝәләҹәк һөкмү барәдә бәјан етмәк үчүн мүгәддәс руһ Микаја ҝүҹ верир.
5. “Мика” китабынын 4-ҹү вә 5-ҹи фәсилләринин маһијјәти нәдән ибарәтдир?
5 Нөвбәти 4-ҹү фәсилдә габагҹадан хәбәр верилир ки, Јеһованын тәрәфиндән өјрәдилмәк үчүн ахыр ҝүнләрдә бүтүн халглар Онун евинин јүксәк дағына ахышаҹаглар. Она кими исә, Јәһуда халгы Бабил әсарәтиндә олаҹаг, лакин Јеһова ону азад едәҹәк. 5-ҹи фәсилдә Мәсиһин Јәһуда шәһәри Бејтлеһемдә доғулаҹағындан бәһс едилир. О, өз халгыны отараҹаг вә ону залым халглардан азад едәҹәк.
6, 7. Миканын пејғәмбәрлијинин 6-ҹы вә 7-ҹи фәсилләриндә һансы фикирләр нәзәрдән кечирилир?
6 “Мика” китабынын 6-ҹы фәслиндә, Јеһованын Өз халгыны санки мәһкәмәдәки кими иттиһам етмәси барәдә јазылыб. Јеһова нә едиб ки, халгы Ону динләмир? Һеч бир шеј. Әслиндә Јеһованын тәләбләри олдугҹа дүзҝүндүр. О истәјир ки, хидмәтчиләри һагг оланы етсинләр вә Онунла јеријәрәк хејирхаһ вә тәвазөкар олсунлар. Бунун әвәзинә исә Исраил вә Јәһуда Она гаршы гијам галдырырлар. Онлар буна ҝөрә ҹаваб вермәли олаҹаглар.
7 Пејғәмбәрлијинин сон фәслиндә Мика өз мүасирләринин ҝүнаһларыны ифша едир. Пејғәмбәр Аллаһыны ҝөзләмәјә гәти гәрарлы олдуғу үчүн руһдан дүшмүр (Мика 7:7). Китабын сонунда Јеһованын Өз халгына мәрһәмәт ҝөстәрәҹәјинә әминлик ифадә едилир. Тарих шаһидлик едир ки, бу үмид әбәс олмады. Јеһованын Өз халгы үчүн мүәјјән етдији ҹәза тәдбири б.е.ә. 537-ҹи илдә баша чатды вә О, мәрһәмәт ҝөстәриб галығы өз вәтәнинә гајтарды.
8. “Мика” китабынын мәзмунуну гыса олараг неҹә шәрһ едәрдиниз?
8 Миканын васитәсилә Јеһова неҹә дә гијмәтли мә’луматлар тәгдим едир! Илһамланмыш бу китабда, өзүнү Јеһованын хидмәтчиләри адландыран, лакин Она садиг галмајан инсанларла Јеһованын неҹә даврандығыны ҝөстәрән сагындырыҹы нүмунәләр вар. Бу китаб бизим ҝүнләрдә баш верәҹәк һадисәләри габагҹадан сөјләјир. Һәм дә бу китаб өзүнә, үмидимизин мөһкәм олмасы үчүн бу чәтин анларда неҹә давранмалы олдуғумуза даир Аллаһдан ҝәлән нәсиһәтләри дахил едир.
Рәбб Јеһова данышыр
9. Мика 1:2 ајәсинә әсасән, Јеһова нә етмәк нијјәтиндә иди?
9 Инди исә, ҝәлин “Мика” китабыны даһа әтрафлы нәзәрдән кечирәк. Мика 1:2 ајәсиндә охујуруг: “Еј халглар, һамыныз ешидин; еј дүнја вә бүтүн ичиндәкиләр, јахшы динләјин; вә Рәбб Јеһова, Рәбб өз мүгәддәс мә’бәдиндән, сизә гаршы шаһид олсун”. Әҝәр сән Миканын ҝүнләриндә јашасајдын, шүбһәсиз ки, һәмин сөзләр сәнин дә диггәтини ҹәлб едәрди. Вә онлар сәнин диггәтини һәгигәтән дә ҹәлб едир, чүнки Јеһова Өз мүгәддәс мә’бәдиндән јалныз Исраилә вә Јәһудаја дејил, бүтүн инсанлара мүраҹиәт едир. Миканын ҝүнләриндә халг Рәббләри Јеһованы унутмушду. Һәмин вәзијјәт тез бир заманда дәјишмәли иди. Јеһова гәти аддымлар атмаға һазыр иди.
10. Мика 1:2 ајәсиндәки сөзләр нәјә ҝөрә бизим үчүн бөјүк әһәмијјәт кәсб едир?
10 Бизим ҝүнләрдә дә вәзијјәт ејнидир. Вәһј 14:18-20 ајәләринин ҝөстәрдији кими, Јеһова јенидән Өз мүгәддәс мә’бәдиндән данышыр. О тезликлә гәтијјәтлә һәрәкәт етмәјә башлајаҹаг, бәшәријјәти исә олдугҹа мүһүм һадисәләр јенидән сарсыдаҹаг. Бу дәфә ҝүнаһлы олан “јер үзүндәки үзүм салхымлары” Аллаһын гәзәбинин бөјүк үзүмсыханына атылаҹаг, Шејтанын пис системи исә тамамилә мәһв едиләҹәк.
11. Мика 1:3, 4 ајәләриндә јазылан сөзләр һансы мә’наны дашыјыр?
11 Јеһованын нә етмәк истәдијинә гулаг асаг. Мика 1:3, 4 ајәләриндә дејилир: “Будур, Рәбб јериндән чыхыр вә енәҹәк вә дүнјанын јүксәк јерләри үзәриндә јеријәҹәк. Вә онун алтында дағлар вә дәрәләр атәш гаршысында мум кими, енишдә ашағы төкүлмүш су кими әријәҹәкләр вә јарылаҹаглар”. Јеһова сәмави мәскәнини атараг, Вә’д едилән дијарын дүзәнликләри вә дағлар үзәриндә һәгиги мә’надамы јеримәјә башлајаҹаг? Јох. Буна еһтијаҹ јохдур. Јеһованын јер үзүнә садәҹә олараг нәзәр салмасы кифајәтдир ки, Онун ирадәси јеринә јетсин. Бундан әлавә, физики ландшафт дејил, јер үзүндә сакин олан инсанлар мәһв едиләҹәкләр. Јеһова һәрәкәт етмәјә башлајанда, нәтиҹә садиг олмајан инсанлар үчүн фәлакәтли олаҹаг. Елә тәәссүрат јаранаҹаг ки, санки, дағлар мум тәки әријир, дүзәнликләр исә зәлзәләдән имиш кими јарылыр.
12, 13. 2 Петер 3:10-12 ајәләринә әсасән үмидимизин мөһкәмлији нәдән асылыдыр?
12 Мика 1:3, 4 ајәләриндәки пејғәмбәрлик сөзләри, еһтимал ки, сәнә, јер үзүндә баш верәҹәк фәлакәти габагҹадан хәбәр верән башга пејғәмбәрлији хатырладыр. 2 Петер 3:10 ајәсиндә һәвари Петер јазырды: “Рәббин Ҝүнү исә, ҝеҹә ҝәлән оғру кими ҝәләҹәкдир. О Ҝүндә ҝөјләр бөјүк ҝурулту илә кечәҹәкләр, үнсүрләр јанараг әријәҹәкләр, јер вә орада олан бүтүн ишләр тамамилә јандырылаҹагдыр”. Миканын пејғәмбәрлијинә бәнзәр тәрздә, Петерин дә сөзләри һәгиги ҝөјләрә вә јерә аид дејил. Сөһбәт бу аллаһсыз системин башына ҝәләҹәк бөјүк фәлакәтдән ҝедир.
13 Лакин гаршыда ҝөзләнилән фәлакәтә бахмајараг мәсиһчиләр, Мика кими, ҝәләҹәјә әминликлә баха биләрләр. Онлар бунун үчүн нә етмәлидирләр? Петерин мәктубунун нөвбәти ајәләриндәки чағырыша риајәт етмәлидирләр: “Сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүр’әтләндирәрәк мүгәддәс вә Аллаһа ихласкар бир һәјат јашамалысыныз” (2 Петер 3:11). Ҝәләҹәјә олан үмидимиз, үрәјимизи итаәткарлыға өјрәдиб-өјрәтмәмәјимиздән вә давранышымызын мүгәддәс, һәјатымызын исә Аллаһа ихласкар әмәлләрлә долу олдуғуна диггәт јетириб-јетирмәмәјимиздән асылыдыр. Үмидимиз мөһкәм олсун дејә, Јеһованын ҝүнүнүн һөкмән ҝәләҹәјини биз дә јадда сахламалыјыг.
14. Исраил вә Јәһуда нәјә ҝөрә ҹәзаја лајигдир?
14 Јеһова, Онун гәдим халгынын нәјә ҝөрә ҹәзаја лајиг олдуғуну изаһ едир. Мика 1:5 ајәсиндә билдирилир: “Бүтүн бу шеј Јагубун ҝүнаһындан өтрүдүр вә Исраил евинин сучларындан өтрүдүр. Јагубун ҝүнаһы нә? Самиријә [Самарија] дејилми? вә Јәһуданын јүксәк јерләри нә? Јерусәлим дејилми?” Мөвҹудијјәтләри илә Исраил вә Јәһуда Јеһоваја борҹлудур. Лакин онлар Она гаршы гијам галдырараг ҝүнаһ ишләдир вә онларын ҝүнаһы пајтахтлары олан Самарија вә Јерусәлимә гәдәр чатыр.
Ҝүнаһ артды
15, 16. Миканын мүасирләри һансы ҝүнаһларда тәгсирләнирләр?
15 Миканын мүасирләринин ҝүнаһы, мисал үчүн, Мика 2:1, 2 ајәләриндә ајдын тәсвир олунур: “Јатаглары үзәриндә фәсад дүзәнләрин вә пислик планлашдыранларын вај башына! Сабаһ ағарынҹа ону едәрләр, чүнки онларын әлиндән ҝәлир. Вә тарлалара ҝөз дикирләр вә онлары зорла алырлар; евләрә дә ҝөз дикирләр, онлары да алырлар; вә бир кимсә илә евинә, бир адама вә мирасына зәрәр јетирирләр”.
16 Тамаһкар инсанлар, јахынларынын тарлаларыны вә евләрини әлә кечирмәји планлашдырараг ҝеҹәни јатмырлар. Сәһәр исә, планларыны һәјата кечирмәјә тәләсирләр. Онлар Јеһова илә бағладыглары әһди хатырласајдылар, бүтүн бу ҝүнаһ ишләри ҝөрмәздиләр. Мусанын ганунунда касыблары мүдафиә едән гурулуш вар. Ганун, һәр һансы бир аиләнин малик олдуғу мирасдан әбәдијјән мәһрум едилмәсинә јол вермирди. Лакин бу мәсәлә тамаһкар инсанлары нараһат етмир. Онлар, Левилиләр 19:18 ајәсиндә јазылан, “Гоншуну өзүн кими севәҹәксән” — сөзләринә диггәт јетирмирләр.
17. Өзләрини Аллаһын хидмәтчиләри адландыран инсанлар илк нөвбәдә вар-дөвләт далынҹа гачанда нә баш верә биләр?
17 Бу, өзләрини Аллаһын хидмәтчиләри адландыран инсанларын руһани мәгсәдләри нәзәрдән гачыранда вә илк нөвбәдә вар-дөвләт далынҹа гачанда нә баш вердијини ҝөстәрир. Павел өз дөврүнүн мәсиһчиләрини хәбәрдар едирди: “Варланмаг истәјәнләр исә јолдан чыхыр вә тора дүшүрләр вә инсанлары фәлакәтә вә һәлака апаран бир чох мә’насыз вә зијанвериҹи еһтираслара гапылырлар” (1 Тимотејә 6:9). Инсан вар-дөвләт топламағы һәјатында әсас јерә гојанда, јаланчы аллаһа — Маммона, јә’ни Сәрвәтә ибадәт етмәјә башлајыр. Бу јаланчы аллаһ ҝәләҹәк үчүн һеч бир үмид вермир (Матта 6:24).
18. Миканын ҝүнләриндәки вар-дөвләт ҝүдән инсанлары һансы тәһлүкә ҝөзләјирди?
18 Миканын мүасирләринин чоху, вар-дөвләтә ҝүвәнмәјин әбәс олдуғуна өзләринин аҹы тәҹрүбәләриндә әмин олурлар. Мика 2:4 ајәсинә әсасән, Јеһова дејир: “О ҝүндә сизә гаршы мәсәл сөјләјәҹәкләр вә һәзин мәрсијә охујаҹаглар вә дејәҹәкләр: Тамамилә хараб олдуг; халгымын пајыны башга әлә верир; ону неҹә әлимдән алыр! тарлаларымызы хаинләрә пај олараг дағыдыр”. Бәли, башгаларынын евләрини вә тарлаларыны әлләриндән аланларын өзләри онлара мәхсус олан аилә мирасындан мәһрум олаҹаглар. Онлары башга өлкәјә сүрҝүн едәҹәкләр, мүлкләри исә башга халгдан олан “хаинләрә” чатаҹаг. Хош ҝәләҹәјә һеч бир үмид галмајаҹаг.
19, 20. Јеһоваја бел бағлајан јәһудиләрлә нә баш верди?
19 Лакин Јеһоваја бел бағлајанларын үмиди әбәс дејил. Јеһова Ибраһим вә Давудла бағладығы әһдинә садигдир, һәм дә Ону севән вә Аллаһдан узаглашан һәмјерлиләринә аҹыјан Мика кими инсанлара мәрһәмәт ҝөстәрир. Салеһ инсанларын хатиринә Аллаһын мүәјјән етдији вахтда бәрпа ишләри башланаҹаг.
20 Бу бәрпа ишләри б.е.ә. 537-ҹи илдә, Бабилин сүгутундан сонра јәһудиләрин галығы вәтәнә гајыданда башланыр. О заман Мика 2:12 ајәсиндәки сөзләр илк дәфә јеринә јетир. Јеһова дејир: “Еј Јагуб, һамынызы әлбәттә бир араја ҝәтирәҹәјәм; Исраилин галығыны әлбәттә топлајаҹағам; онлары Ботсра гојунлары кими, өзләринин отлағы ортасында олан бир сүрү кими бир араја гојаҹағам; инсан чохлуғундан бөјүк ҝурулту едәҹәкләр”. Јеһова нә гәдәр бөјүк мәһәббәтә маликдир! Халгыны ҹәзаландырдыгдан сонра, галыға әсарәтдән гајытмаға вә онларын әҹдадларына вердији торпагда Она гуллуг етмәјә имкан верир.
Бизим ҝүнләримизлә һејрәтдоғуран охшарлыг
21. Буҝүнкү вәзијјәт Миканын дөврү илә нәдә охшардыр?
21 “Мика” китабынын илк ики фәслини мүзакирә едәркән о дөврлә бизим ҝүнләрин һејрәтдоғуран охшарлығына диггәт јетирдинми? Миканын ҝүнләриндә олдуғу кими, бу ҝүн дә чохлары өзүнү Аллаһын хидмәтчиси адландырыр. Лакин онлар, Јәһуда вә Исраилә бәнзәр тәрздә бөлүнмүш вә һәтта араларында дөјүшүрләр. Христиан дүнјасына мәхсус олан варлылар чох вахт касыблары сыхышдырырлар. Дин рәһбәрләри, Мүгәддәс Китабда бирбаша иттиһам едилән ишләрә ҝетдикҹә даһа чох ҝөз јумурлар. Христиан дүнјасынын вә үмумијјәтлә јалан динин дүнја империјасы сајылан “Бөјүк Бабилин” һәлакынын тезликлә јахынлашмасы тәәҹҹүблү дејил! (Вәһј 18:1-5). Буна бахмајараг, Миканын ҝүнләриндә олдуғу кими, Јеһованын јер үзүндә садиг хидмәтчиләри олаҹагдыр.
22. Һансы ики груп Аллаһын Падшаһлығына үмид бәсләјир?
22 Мәсһ едилмиш садиг мәсиһчиләр 1919-ҹу илдә Христиан дүнјасынын килсәләри илә бүтүн әлагәләрини кәсдиләр вә Падшаһлыг һаггындакы хош хәбәри бүтүн халглара бәјан етмәјә башладылар (Матта 24:14). Онлар илк нөвбәдә руһани Исраилин галан үзвләрини ахтарырдылар. Сонра “башга гојунлары” топламаға башладылар вә бу групун һәр икиси “тәк Чобан”ы олан “тәк сүрү” олду (Јәһја 10:16). Онлар Аллаһа 234 өлкәдә хидмәт етсәләр дә, Аллаһын бу садиг хидмәтчиләринин һамысы ‘бир араја’ вә ја бирлијә ҝәтирилибләр. Вә инди гојун ағылы “инсан чохлуғундан”, кишиләрин, гадынларын вә ушагларын чохлуғундан ‘бөјүк ҝурулту едир’. Онлар бу системә дејил, тезликлә јер үзүндә Ҹәннәти бәрпа едәҹәк Аллаһын Падшаһлығына үмид едирләр.
23. Үмидинизин һәгиги олдуғуна нәјә ҝөрә әминсиниз?
23 “Мика” китабынын 2-ҹи фәслинин сонунҹу ајәсиндә Јеһованын садиг хидмәтчиләри һаггында дејилир: “Онларын падшаһы өнләриндә вә Рәбб онларын башында ҝедир”. Јеһованын башчылығы алтында олан бу тәнтәнәли зәфәр јүрүшүндә өзүнү ҝөрүрсәнми? Падшаһын олан Иса Мәсиһин ардынҹа ҝедирсәнми? Әҝәр беләдирсә, онда гәләбәјә вә үмидинин һәгиги олдуғуна әмин ола биләрсән. Бу, Миканын пејғәмбәрлијиндә олан нөвбәти парлаг фикирләри нәзәрдән кечирәндә даһа ајдын олаҹаг.
Сиз неҹә ҹаваб верәрдиниз?
• Миканын ҝүнләриндә Јеһова нәјә ҝөрә Јәһудаја вә Исраилә гаршы галхмаг гәрарына ҝәлди?
• Өзүнү Аллаһын хидмәтчиси адландыран кәсләр илк нөвбәдә вар-дөвләт далынҹа гачанда нә баш верә биләр?
• “Мика” китабынын илк ики фәслини нәзәрдән кечирәндән сонра үмидинизин һәгиги олдуғуна нәјә ҝөрә әминсиниз?
[7-ҹи сәһифәдәки шәкил]
Миканын пејғәмбәрлији бизи руһән ҝүҹләндирә биләр.