Јеһова биздән нә ҝөзләјир?
“Һагг оланы етмәк вә мәрһәмәти севмәк вә Аллаһынла тәвазөкарлыгла јеримәкдән башга Рәбб сәндән нә истәр?” (МИКА 6:8).
1, 2. Јеһованын бә’зи хидмәтчиләри нәјә ҝөрә руһдан дүшә биләр, амма онлара нә көмәк етмәлидир?
ВЕРАНЫН — 75 јашлы садиг мәсиһчинин сәһһәти писдир. О дејир: “Бә’зән пәнҹәрәјә бахыр вә мәсиһчи баҹы-гардашларымын евдән-евә тәблиғ етдикләрини ҝөрүрәм. Ҝөзләрим долур, чүнки мән дә онларла бир јердә олмаг истәјирәм, хәстәлијим исә Јеһоваја вар гүввәмлә хидмәт етмәјә имкан вермир”.
2 Буна бәнзәр һиссләр сәндә дә баш галдырыбмы? Тәбиидир ки, Јеһованы севәнләрин һамысы Онун исми илә јеримәк вә Онун тәләбләринә мүвафиг олмаг истәјирләр. Бәс сәһһәтимиз писләширсә, јашымыз чохдурса, ја да аиләдә үзәримизә дүшән мәс’улијјәтләр чохдурса, онда нә етмәли? Бу бизи гисмән руһдан сала биләр, чүнки бу кими вәзијјәтләр уҹбатындан Јеһоваја хидмәтимиздә, јәгин ки, үрәјимиз истәдији гәдәр едә билмәјәҹәјик. Әҝәр бу беләдирсә, онда, чох ҝүман ки, “Мика” китабынын 6-ҹы вә 7-ҹи фәсилләри бизи чох руһландыраҹаг. Бу фәсилләр ҝөстәрир ки, Јеһованын тәләбләри ағлабатан вә һәјата кечиләндир.
Јеһованын Өз халгы илә давранма үсулу
3. Јеһова Она гаршы гијам галдыран исраиллиләрлә неҹә давраныр?
3 Әввәлҹә Мика 6:3-5 ајәләринә диггәт јетирәк вә Јеһованын халгы илә неҹә даврандығына диггәт јетирәк. Миканын ҝүнләриндә Исраиллиләрин Аллаһа гаршы гијам галдырдыгларыны јада салаг. Буна бахмајараг, Јеһова онлара “еј халгым”, дејә шәфгәтлә мүраҹиәт едир. О јалварыр: “Еј халгым, риҹа едирәм, хатырла” (ЈД). Исраиллиләри сәрт тәрздә мәзәммәт етмәк әвәзинә, Јеһова “сәнә нә етдим?” дејә сорушараг, онларын үрәјини әлә алмаға чалышыр. О, һәтта онлары ‘Она гаршы ҹаваб вермәјә’ чағырыр.
4. Аллаһын шәфгәт ҝөстәрмәјә даир вердији нүмунә бизә неҹә тә’сир етмәлидир?
4 Јеһова бизә неҹә дә ҝөзәл нүмунә верир! Һәтта Исраилин вә Јәһуданын Миканын ҝүнләриндә јашајан гијамчы сакинләрини шәфгәтлә “халгым” адландырыр вә онлара мүраҹиәт едәркән “риҹа едирәм” дејирди. Буна ҝөрә дә биз, јығынҹаға мәхсус олан кәсләрлә давранышымызда, сөзсүз ки, шәфгәт вә хејирхаһлыг тәзаһүр етдирмәлијик. Доғрудур, бә’зән киминләсә јола ҝетмәк чәтин олур; ким исә руһән зәифдир. Анҹаг јенә дә, әҝәр онлар Јеһованы севирләрсә, биз онлара көмәк етмәли вә шәфгәт ҝөстәрмәлијик.
5. Мика 6:6, 7 ајәләриндәки әсас фикир һансыдыр?
5 Ҝәлин сонра Мика 6:6, 7 ајәләринә диггәт јетирәк. Пејғәмбәр бир сыра суаллар верир: “Нә илә Рәббин гаршысына чыхым вә уҹа Аллаһын өнүндә әјилим? онун гаршысына јахылан тәгдимәләрләми, бир иллик бузовларламы чыхым? Минләрлә гочлардан, он минләрлә јағ селләриндән Рәбб хошланырмы? ҝүнаһым үчүн илк оғлуму, ҹанымын сучу үчүн бәдәнимин сәмәрәсиними верим?” Һәгигәтән дә Јеһованы ‘минләрлә гочларла, он минләрлә јағ селләри илә’ гане етмәк мүмкүн дејил. Буна бахмајараг Ону разы салмаг мүмкүндүр. Неҹә?
Биз һагг оланы етмәлијик
6. Мика 6:8 ајәсиндә Аллаһын һансы үч тәләби әкс олунур?
6 Мика 6:8 ајәсиндән Јеһованын биздән нә ҝөзләдијини өјрәнирик. Мика сорушур: “Һагг оланы етмәк вә мәрһәмәти севмәк вә Аллаһынла тәвазөкарлыгла јеримәкдән башга Рәбб сәндән нә истәр?” Бу үч тәләб бизим һәм һиссләримизә, һәм дүшүнҹә тәрзимизә, һәм дә давранышымыза аиддир. Биз бу кејфијјәтләри тәзаһүр етдирмәјә тәшвиг һисси дујмалы, буну неҹә едәҹәјимизин үзәриндә дүшүнмәли вә мүвафиг тәрздә давранмалыјыг. Ҝәлин бу үч тәләби нөвбә илә нәзәрдән кечирәк.
7, 8. а) “Һагг оланы етмәк” нә демәкдир? б) Миканын ҝүнләриндә һансы нөв һагсызлыг ади һал алмышды?
7 “Һагг оланы етмәк” әдаләтлә давранмаг демәкдир. Аллаһын давраныш тәрзи, әдаләт ме’јарыдыр. Миканын мүасирләри исә, әксинә олараг, һагсыз давранырлар. Һансы саһәләрдә? Мика 6:10 ајәсинә диггәт јетирәк. Бу ајәнин сонунда таҹирләр һаггында дејилир ки, онлар “әксик өлчү”дән, даһа доғрусу, лазым ҝәлдијиндән ашағы өлчүдән истифадә едирләр. 11-ҹи ајәдә дејилир ки, онлар “һијләли чәки дашлары” ишләдирләр. 12-ҹи ајәјә әсасән исә, онларын “дилләри алдадыҹыдыр”. Ҝөрдүјүмүз кими, Миканын јашадығы дөврдә тиҹарәт саһәсиндә әксик өлчү, дүзҝүн олмајан чәки дашлары вә јалан ади һала чеврилмишди.
8 Лакин һагсызлыг јалныз тиҹарәтдә мүшаһидә олунмур. Бу вәзијјәт мәһкәмәдә дә ади һала чеврилиб. Мика 7:3 ајәсиндә дејилир ки, “рәис һәдијјә истәјир вә һаким мүкафат алыр”. Һакимләрә рүшвәт верирләр ки, онлар ҝүнаһсыз инсанлара әдаләтсиз һөкм кәссинләр. “Бөјүк адам”, јә’ни нүфузлу шәхс ҹинајәтә гол гојур. Бундан әлавә, Миканын сөзләринә ҝөрә рәисләр, һакимләр вә бөјүк адамлар өзләринин шәрәфсиз әмәлләрини “һөрүрләр”, даһа доғрусу, бирликдә һәјата кечирирләр.
9. Шәрәфсизләрин төрәтдији һагсызлыг Јәһуда вә Исраилә неҹә тә’сир ҝөстәрир?
9 Шәрәфсиз рәһбәрләрин төрәтдији һагсызлыг бүтүн Јәһуда вә Исраил падшаһлығына тә’сир ҝөстәрир. Мика 7:5 ајәсиндә гејд олунур ки, әдаләтин чатышмазлығы јолдашлар, јахын достлар вә һәтта әр-арвад арасында да е’тибарсызлыға сәбәб олур. 6-ҹы ајәдә дејилир ки, бунун уҹбатындан оғул илә ата, гыз илә ана кими јахын гоһумлар бир-бирини “тәһгир едир”, даһа доғрусу, бир-биринә “нифрәт едир” (ЈД).
10. Буҝүнкү һагсызлыг мүһитиндә мәсиһчиләр өзләрини неҹә апарырлар?
10 Бәс бу ҝүн? Буна бәнзәр вәзијјәти бу ҝүн мүшаһидә етмирикми? Миканын ҝүнләриндә олдуғу кими, бу ҝүн бизи дә һәр јердә һагсызлыг, е’тибарсызлыг, ҹәмијјәтдә вә аилә һәјатында гарма-гарышыглыг әһатә едир. Буна бахмајараг, Аллаһын хидмәтчиләри олан бизләр әдаләтсиз дүнјада јашасаг да, бу дүнјаја хас олан һагсызлығын мәсиһчи јығынҹағына дахил олмасына јол вермирик. Әксинә олараг, биз дүзлүк вә нөгсансызлыг принсипләринә риајәт едәрәк бу кејфијјәтләри ҝүндәлик һәјатымызда әкс етдиририк. Һәгигәтән дә биз “һәр ҹәһәтҹә өзүмүзү јахшы апармаға ҹан атырыг” (Ибраниләрә 13:18). Мәҝәр әдаләтлә давранараг бол хејир-дуалар әлдә етмәјимизә разы дејиликми? Ахы биз там е’тибар һөкм сүрән гардашлыға маликик.
Инсанлар “Рәббин сәсини” неҹә ешидирләр?
11. Мика 7:12 ајәси неҹә јеринә јетир?
11 Мика пејғәмбәрлик едир ки, әтрафда һөкм сүрән һагсызлыға бахмајараг, ҝәләҹәкдә бүтүн инсанлар үчүн әдаләт галиб ҝәләҹәк. Пејғәмбәр габагҹадан сөјләјир ки, инсанлар Јеһованын хидмәтчиләри олмаг үчүн “дәниздән дәнизә вә дағдан даға гәдәр” топлашыб ҝәләҹәкләр (Мика 7:12). Бу ҝүн, бу пејғәмбәрлијин сонунҹу иҹрасы заманы һансыса мүәјјән бир халг јох, бүтүн халглардан олан инсанлар Аллаһын гәрәзсиз әдаләтиндән фајда әлдә едирләр (Ишаја 42:1). Бу неҹә баш верир?
12. “Рәббин сәси” бу ҝүн һансы јолла ешидилир?
12 Ҹавабы Миканын бир гәдәр әввәл дедији сөзләрдә тапмаг олар. Мика 6:9 ајәсиндә дејилир: “Рәббин сәси шәһәрә нида едир вә һикмәтли адам сәнин исминдән горхар”. Бүтүн халглардан олан инсанлар Јеһованын сәсини неҹә ешидир вә бунун бизим әдаләтли давранышымызла һансы әлагәси вар? Еһтимал ки, бу ҝүн инсанлар Аллаһын сәсини һәгиги мә’нада ешитмир. Лакин бизим үмумдүнја тәблиғ фәалијјәтимиз сајәсиндә Јеһованын сәсини бүтүн милләтләрдән вә тәбәгәләрдән олан инсанлар ешидир. Нәтиҹәдә, бу сәсә гулаг асанлар Аллаһын исминә еһтирамла јанашараг ондан ‘горхурлар’. Бизим Падшаһлығын тәблиғчиләри кими сә’јлә јеринә јетирдијимиз хидмәт, шүбһәсиз ки, әдаләт вә мәһәббәтин тәзаһүрүдүр. Үзҝөрәнлик етмәдән һәр бир кәсә Аллаһын исмини билмәјә имкан јарадараг, биз ‘һагг оланы едирик’.
Биз мәрһәмәти севмәлијик
13. Мәрһәмәтлә мәһәббәт арасында һансы фәрг мөвҹуддур?
13 Инди исә ҝәлин Мика 6:8 ајәсиндән икинҹи тәләби мүзакирә едәк. Јеһова ҝөзләјир ки, биз ‘мәрһәмәти севәҹәјик’. “Мәрһәмәт” кими тәрҹүмә олунан гәдим ибрани сөзү һәм дә “севҝи долу инајәт”, “дәјишмәз мәһәббәт” демәкдир. Мәрһәмәт фәал кејфијјәтдир вә өзүнә, башгаларына рәһмлә гајғы ҝөстәрмәји дахил едир. Мәрһәмәтлә мәһәббәт арасында фәрг вар. Һансы? Мәһәббәт даһа ҝениш мә’на дашыјыр: ону һансыса әшјалара вә мүҹәррәд анлајышлара мүнасибәтдә дујмаг олар. Мүгәддәс Китабда “шәраб вә јағ севән”, һәмчинин ‘һикмәти севән’ кәсләр һаггында бәһс едилир (Сүлејманын мәсәлләри 21:17; 29:3). Диҝәр тәрәфдән исә, мәрһәмәт вә ја инајәт јалныз инсанлара, әләлхүсус да Аллаһын хидмәтчиләринә мүнасибәтдә әкс олунур. Буна ҝөрә дә, Мика 7:20 ајәсиндә Аллаһа хидмәт едән инсана — “Ибраһимә мәрһәмәт” барәдә данышылыр.
14, 15. Мәрһәмәт неҹә тәзаһүр етдирилир вә буну һансы нүмунә ҝөстәрир?
14 Мика 7:18 ајәсиндә пејғәмбәр баша салыр ки, Јеһова “мәрһәмәтдән хошланыр”. Мика 6:8 ајәсиндә бизә садәҹә олараг мәрһәмәт ҝөстәрмәк јох, бу кејфијјәти севмәк тапшырылыр. Бу ајәләрдән нә өјрәнә биләрик? Мәрһәмәт вә инајәти һәвәслә, һазырлыгла әкс етдирирләр, белә ки, буну етмәји арзулајырлар. Јеһова кими, биз дә көмәјә еһтијаҹы оланларын хејри үчүн мәрһәмәт ҝөстәрмәји севирик.
15 Бу ҝүн Аллаһын халгы мәрһәмәт вә хејирхаһлығы илә фәргләнир. Јалныз бир нүмунәни нәзәрдән кечирәк. 2001-ҹи илин ијун ајында баш верән гасырға Техас штатында (АБШ) ҝүҹлү дашгына сәбәб олду. Минләрлә евә, о ҹүмләдән Јеһованын Шаһидләринә мәхсус јүзләрлә евә зәрәр дәјди. 10 минә јахын Јеһованын Шаһиди, фәлакәтә дүчар олан мәсиһчи баҹы-гардашларына көмәк етмәк үчүн, һазырлыгла вә тәмәннасыз олараг өз вахтларыны вә гүввәләрини әсирҝәмәди. Көнүллүләр јарым илдән артыг мүддәтдә ҝеҹә-ҝүндүз вә истираһәт ҝүнләриндә јорулмадан чалышдылар ки, 8 Падшаһлыг Залыны вә һәмиманлыларына мәхсус 700-дән артыг еви бәрпа етсинләр. Бу ишдә көмәклик едә билмәјән кәсләр әрзаг, илк јардым ләвазиматлары вә пул ианә едирдиләр. Нәјә ҝөрә минләрлә бу Шаһидләр, гардашларынын көмәјинә ҝәлдиләр? Чүнки онлар ‘мәрһәмәти севирләр’. Вә гардашларымызын буна бәнзәр ишләри бүтүн дүнјада јеринә јетирдикләрини билмәк неҹә дә үрәкачандыр! Бәли, “мәрһәмәти севмәк” тәләбини јеринә јетирмәк јүк јох, севинҹдир!
Аллаһла тәвазөкарлыгла јеримәк
16. ‘Аллаһла тәвазөкарлыгла јеримәјин’ ваҹиблији һансы нүмунәнин әсасында јахшы ҝөрүнүр?
16 ‘Аллаһла тәвазөкарлыгла јеримәк’ Мика 6:8 ајәсиндә јазылан үчүнҹү тәләбдир. Бу, имканларымызын мәһдуд олдуғуну вә Аллаһдан асылы олдуғумузу дәрк етмәк мә’насыны дашыјыр. Буну нүмунә әсасында изаһ едәк. Човғун вахты балаҹа гызҹығаз вар гүввәси илә атасынын әлиндән јапышыр. Гызҹығаз ҝүҹүнүн чох олмадығыны билир, лакин атасына е’тибар едир. Биз дә имканларымызын мәһдуд олдуғуну дәрк етмәли вә сәмави Атамыза әмин олмалыјыг. Бу ҹүр әминлији өзүмүздә неҹә сахлаја биләрик? Бунун үчүн, башга шејләрлә јанашы, Јеһова илә сых әлагәни горумағын нәјә ҝөрә мүдриклик олдуғуну јадда сахламаг лазымдыр. Мика бизә үч сәбәби хатырладыр: Јеһова бизи азад едир, бизә јол ҝөстәрир вә бизи мүдафиә едир.
17. Јеһова Өз халгыны неҹә азад едир, јол ҝөстәрир вә мүдафиә едирди?
17 Мика 6:4, 5 ајәсинә әсасән, Аллаһ дејир: “Мисир дијарындан сәни мән чыхардым”. Бәли, Јеһова Исраил халгынын Хиласкары олмушдур. Јеһова сонра дејир: “Сәнин өнүнҹә Мусаны, Һаруну вә Мирјамы мән ҝөндәрдим”. Мусанын вә Һарунун васитәсилә Јеһова халга рәһбәрлик едирди, Мирјам исә гәләбә рәгсиндә гадынлара јол ҝөстәрирди (Чыхыш 7:1, 2; 15:1, 19-21; Тәснијә 34:10). Јеһова рәһбәрлијини хидмәтчиләринин васитәсилә һәјата кечирирди. 5-ҹи ајәдә исә Јеһова исраиллиләрә, онлары Балакдан вә Баламдан мүдафиә етдијини вә Моабдакы Шиттимдән Вә’д едилән дијардакы Гилгала гәдәр олан сәјаһәтләринин сон мәрһәләсиндә онлары горудуғуну хатырладыр.
18. Аллаһ бу ҝүн бизи неҹә азад едир, бизә јол ҝөстәрир вә бизи мүдафиә едир?
18 Бу ҝүн Аллаһ бизи, Онунла јеријәнләри, Шејтанын дүнјасындан азад едир, Кәламы, һәмчинин тәшкилаты васитәсилә бизә јол ҝөстәрир вә дүшмәнләр үзәримизә һүҹум едәндә бизи бир груп кими мүдафиә едир. Буна ҝөрә дә, гәдим вахтын Вә’д едилән дијарындан даһа јахшы олан Аллаһын әдаләтли јени дүнјасына доғру сәјаһәтимизин сонунҹу ҹошғун мәрһәләсини сәмави Атамызла бирликдә дәф едәрәк, Онун әлиндән мөһкәм јапышмағымыз үчүн бүтүн әсасларымыз вар.
19. Тәвазөкарлыг имканларымызын һүдудлары илә неҹә әлагәлидир?
19 Аллаһла тәвазөкарлыгла јеримәјимиз бизә өз шәраитләримизә реал нөгтеји-нәзәрлә бахмаға көмәк едир. Мәсәлә ондадыр ки, тәвазөкарлыг, имканларымызын һүдудларыны анламаг мә’насыны дашыјыр. Ола биләр ки, аһыл јаш вә ја писләшән сәһһәтимиз, һансыса дәрәҹәдә Јеһоваја хидмәт етмәк имканларымызы мәһдудлашдырыр. Кәдәрләнмәк әвәзинә, Аллаһын бизим сә’ј вә гурбанларымызы “инсанда олмајан мала ҝөрә дејил, олан мала ҝөрә” гәбул етдијини јадда сахламаг ҝәрәкдир (2 Коринфлиләрә 8:12). Јеһова бизим Она бүтүн гәлбимизлә вә имканларымызын јол вердији гәдәр хидмәт едәҹәјимизи ҝөзләјир (Колослулара 3:23). Аллаһа хидмәтдә ҝүҹүмүзүн чатдығы һәр шеји сәмими гәлбдән вә сә’јлә јеринә јетирәндә, Аллаһ бизә бол хејир-дуалар верир (Сүлејманын мәсәлләри 10:22).
Сәбирлә ҝөзләмәк хејир-дуа ҝәтирир
20. Нәји дәрк етмәјимиз Јеһованы Мика кими ҝөзләмәкдә бизә көмәк едә биләр?
20 Биз Јеһовадан хејир-дуа алырыг, бу исә бизи Миканын әһвал руһијјәсини әкс етдирмәјә тәшвиг едир. О дејирди: “Гуртулушумун Аллаһыны ҝөзләјәҹәјәм” (Мика 7:7). Бу сөзләр, Аллаһла јеријәркән әкс етдирдијимиз тәвазөкарлыгла неҹә әлагәлидир? Әҝәр биз Јеһованы сәбирлә ҝөзләјириксә, бу, Онун ҝүнүнүн һәлә ҝәлмәдијинә ҝөрә кәдәрләнмәмәјимизә көмәк едир (Сүлејманын мәсәлләри 13:12). Доғрудур, бизим һамымыз бу пис системин сонуну сәбирсизликлә ҝөзләјирик. Анҹаг һәр һәфтә минләрлә инсан Јеһова илә јеримәјә јени башлајыр. Бу бизим Јеһованы ҝөзләмәјимизә әсаслы дәлилдир. Узун мүддәтдир ки, һәгигәт јолу илә јеријән бир Шаһид дејир: “Тәблиғ хидмәтиндә кечирдијим 55 или нәзәрдән кечирәндә, бир даһа әмин олурам ки, Јеһованы ҝөзләмәклә һеч нә итирмәмишәм. Әксинә, өзүмү бир чох әзаб-әзијјәтләрдән горумушам”. Буна бәнзәр һиссләри сән дә јашамысанмы?
21, 22. Мика 7:14 ајәси бизим ҝүнләрдә неҹә јеринә јетир?
21 Јеһова илә јеримәјимиз, сөзсүз ки, бизә фајда ҝәтирир. Мика 7:14 ајәсиндә охудуғумуз кими, пејғәмбәр Аллаһын халгыны, өзүнү чобанын јанында тәһлүкәсиз һисс едән гојунларла мүгајисә едир. Бу ҝүн пејғәмбәрлијин бөјүк мигјасда јеринә јетдији бир вахтда да, руһани Исраилин галығы, һәмчинин “башга гојунлар” өзләрини Чобанлары олан Јеһованын јанында тәһлүкәсиз һисс едирләр. Онлар ҝетдикҹә даһа ҝәрҝин вәзијјәт алан вә тәһлүкәли олан дүнјадан руһән ајрылараг “Кармел ортасындакы орманда тәк башына” јашајырлар (Јәһја 10:16; Тәснијә 33:28; Јеремја 49:31; Галатијалылара 6:16).
22 Аллаһын халгы чичәкләнир, бу исә Мика 7:14 ајәсиндә габагҹадан дејилиб. Аллаһын гојунлары, јә’ни Онун халгы барәдә Миканын дедикләринә диггәт јетирәк: “Башанда вә Ҝилеадда отласынлар”. Башанда вә Ҝилеадда јашыл отлагларда отлајан гојунлара бәнзәр тәрздә, бу ҝүн Аллаһын халгы руһән инкишаф едир; бунун өзү дә Аллаһла тәвазөкарлыгла јеријәнләр үчүн хејир-дуадыр (Сајлар 32:1; Тәснијә 32:14).
23. Мика 7:18, 19 ајәләриндән нә өјрәнә биләрик?
23 Мика 7:18, 19 ајәләриндә пејғәмбәр гејд едир ки, Јеһова төвбә едәнләри бағышламаг истәјир. 18-ҹи ајәдә дејилир ки, Јеһова “фәсад бағышлајан” вә ‘ҝүнаһдан ваз кечәндир’. 19-ҹу ајәјә әсасән исә, О, ‘бүтүн сучлары дәнизин әнҝинликләринә атыр’. Биз бурадан һансы ибрәт дәрсини ҝөтүрә биләрик? Өзүмүздән соруша биләрик: бу саһәдә биз Јеһованы тәглид едирикми? Башгалары бизә гаршы сәһв ишләтдикләри һалда онлары бағышлајырыгмы? Онлар төвбә едәндә вә һәр шеји гајдаја салмаға чалышанда, шүбһәсиз ки, биз Јеһованы тәглид едәрәк онлары бүтүнлүклә вә һәмишәлик бағышламалыјыг.
24. Миканын пејғәмбәрлијиндән һансы фајданы әлдә етдиниз?
24 Миканын пејғәмбәрлијини нәзәрдән кечирәрәк һансы фајданы әлдә етдик? Бу пејғәмбәрлик бизә хатырлатды ки, Јеһова, Она јахынлашанлара һәгиги үмид верир (Мика 2:1-13). Пејғәмбәрлик бизи әбәдијјән Аллаһымызын исмилә јеримәјә көмәк едән һәгиги ибадәти дәстәкләмәк үчүн гүввәмиз дахилиндә олан һәр шеји етмәјә һәвәсләндирди (Мика 4:1-4). Вә бизә әминлик верди ки, шәраитләримиздән асылы олмајараг, Јеһованын тәләбләринә ҹаваб верә биләрик. Бәли, Миканын пејғәмбәрлији Јеһованын исми илә јеримәкдә бизә чох көмәк едир.
Неҹә ҹаваб верәрдиниз?
• Мика 6:8 ајәсинә әсасән, Јеһова биздән нә тәләб едир?
• “Һагг оланы етмәк” үчүн нә ваҹибдир?
• ‘Мәрһәмәти севдијимизи’ неҹә ҝөстәрмәк олар?
• ‘Аллаһла тәвазөкарлыгла јеримәк’ үчүн нә етмәк лазымдыр?
[17-ҹи сәһифәдәки шәкил]
Бүтүн тәбәгәдән олан инсанлара шаһидлик едәрәк һагг оланы ет.
[17-ҹи сәһифәдәки шәкилләр]
Башгаларынын еһтијаҹларына һај вермәклә, мәрһәмәти севдијини ҝөстәр.
[17-ҹи сәһифәдәки шәкил]
Имканларынын һүдудларыны тәвазөкарлыгла дәрк едәрәк, имканын дахилиндә олан һәр шеји ет.
[19-ҹу сәһифәдәки шәкилләр]
Миканын ҝүнләриндә һөкм сүрән пис вәзијјәтә бахмајараг, о, Јеһованын тәләбләринә мүвафиг тәрздә јашајырды. Буну сән дә едә биләрсән.